1 Thessalonians 2

Maol Pol nandaꞋanai wambel Tesalonaika

Alupipei, ipeꞋ pegawa fowaꞋ afaꞋ wafeꞋmago ipeꞋ, maol anama afaꞋ wandaꞋanai ina nalo, owaꞋ. FowaꞋ waliꞋ wafeꞋ wambel anama Filipai eaꞋ sandaꞋafa aofa alop afaꞋinai, wameꞋ nimanimi endilisi. IpeꞋ pegawa. EaꞋ God afaꞋinai nandaꞋ opalef afaꞋimi laꞋifim. EaꞋ afaꞋ ina umbamahafa wandafaꞋma esis naumbih, owaꞋ. AfaꞋ laꞋififa wafoꞋo wawalapa basef buꞋwami Godi ma ipeꞋ. Basef ofagema waꞋipipami ina waꞋi ondaꞋ waf aonai ma ipeꞋ, owaꞋ. AfaꞋ ina waila basef amama falafumi basoꞋmaimi waꞋipipam, owaꞋ. God atona nagwambafa natolofa wape andeandeꞋ eaꞋ naseꞋafa maol afaꞋ ma wawalapa basef buꞋwami Ananimi. EaꞋ amama atom deiꞋ wawalapam. AfaꞋ ina wandaꞋ maola epes sinifela maol afaꞋ wandaꞋanai, owaꞋ. WandaꞋ maola God atona nondanifela maol Ananinai, Anan atona nawaloga afaꞋ nogawafa. IpeꞋ pegawa basef waꞋipipami afaꞋ ina wakikipipa, owaꞋ. God natolofa nogawafa eaꞋ afaꞋ ina wandaꞋ maol wambahoꞋ basefa waf kowalasanai, owaꞋ. AfaꞋ ina wandaꞋ maola epes sefela agof afaꞋimi, o enis epes o ipeꞋ wapotiꞋ pinifelafa, owaꞋ. AfaꞋ wape aposel Kraisi endilisi. Anan nasapaꞋafa ma ondaꞋ maol Ananinai. EaꞋ deiꞋ wiꞋi aꞋe, wiꞋipipa mehipa peseꞋafa anom amamaga gwaꞋaimi maim. EaꞋ owaꞋ. Nogota nanima wape walomepa afaꞋ wandaꞋ waf soꞋumbilanai endilisi ma ipeꞋ, siꞋi anoꞋw nemataꞋw kumafi awasi akwaꞋusi andeandeꞋ. AfaꞋ ukup maimailipa endilisi. EaꞋ waseꞋepa basef buꞋwami Godi. Ina waꞋipipa basef atom, owaꞋ waseꞋepa opalef endilisi ma ipeꞋ. EaꞋ wandandombam ma ogaꞋ wigiamabamepa.

Endilisi ipeꞋ alupipei pegawa amama, afaꞋ wandaꞋ maol mehipa wawalapa basef buꞋwami Godi ma ipeꞋ. EaꞋ wandaꞋ maol wapotiꞋ umafi alop afaꞋinai ma gwaꞋaimi maim. WandaꞋ maol owamb alipa ina opoma ipeꞋ etipa ma ofaꞋ gwaꞋaimi maima ipeꞋ, owaꞋ. 10 IpeꞋ patolom pegawam eaꞋ God wapotiꞋ natolom nogawam eaꞋ waf wandaꞋana ipeꞋ pembaleꞋefa Krais. Waf anama afaꞋinai buꞋunai, ina aona, owaꞋ. 11 IpeꞋ pegawa waf anama siꞋi ahalomas numafi awasi ananisi, eaꞋ naꞋama etin siꞋi afaꞋ wandaꞋmepam ipeꞋ atona etin. AfaꞋ wafela ukup ipeꞋimi, wawalapa waf buꞋunai soꞋumbilinai. 12 WaꞋipipam naꞋama ma ipeꞋ pendaꞋ waf nefeꞋ andeandeꞋma God nitilipa ninifelipa. EaꞋ nofalepa pafiꞋi piwis pelomana wambel Ananinai howalogoma.

13 FowaꞋ ipeꞋ pefaꞋ basef Godi malogof afaꞋimi, pembaleꞋefam. Basef amama ina pefaꞋam siꞋi basef epesi atom, owaꞋ. PefaꞋ basef amama endilisimi Godi. EaꞋ basef amama magiambama opalef ipeꞋimi, deiꞋ paila waf buꞋunai. EaꞋ afaꞋ wanifela God laꞋelaꞋefa ipeꞋ pefaꞋ basef Ananimi pembaleꞋefana andeandeꞋ. 14 IpeꞋ Kristen alupipei, pefaꞋ nimanimi naꞋama etin siꞋi esis sombaleꞋefa basef Godi sape etap hiagoma Judiai. Esis sombaleꞋefa Jisas Krais, eaꞋ sataga amam nematawa Godi. Amama atom deiꞋ esis Juda saseꞋas nimanimi enisa alop asasinai naꞋama etin siꞋi ipeꞋ wambel atotona saseꞋepa nimanimi. 15 Esis Juda saha Dembinai Jisas naloma amam profet magaꞋ eaꞋ sandaꞋ wandaf saliꞋamonafa. Sosambala waf God okom naꞋianai sahambombaga epes hiesi. 16 EaꞋ sasopama eafa afaꞋ iꞋipasa basef Godi esis sololama Anani ma nofaꞋas sotanimani sope andeandeꞋ. Esis Juda sandaꞋas naꞋama deiꞋ sowatani waf aonai asasinai laꞋelaꞋef nataga luꞋuna endilisi. FowaꞋ God natilis naꞋa eaꞋ deiꞋ okom wandafunai Ananinai nafiꞋi natagamas nemaf akutainai nondaꞋas awes higilalas.

Pol okom nohafel endilisi ma naꞋi nitilis wapotiꞋ

17 IpeꞋ Kristen alupipei, esis Juda saliꞋamonafa nogota bandana ma wape siꞋi awasi mamasas aꞋasi. Endilisi afaꞋ ina wati amagahipama, eaꞋ ukup afaꞋimi mape malomepa. Amama atom deiꞋ wandaꞋ maol laꞋififa endilisi ma uti anona eafa ofoꞋo uti amagahipama. AfaꞋ ukup maimailipa endilisi ma utilipa. 18 EaꞋ deiꞋ waꞋi ofeꞋmago ipeꞋ. AeꞋ Pol andaꞋam nimeguf hiami aꞋi efoꞋo, eaꞋ Satan nahopamafa eaf.

19 Owagama Dembinai apeꞋinai nifiꞋi wapotiꞋ, apeꞋ mitu naep Ananimi. Nemaf anama afaꞋ ukup boꞋom mopoma main? EaꞋ ondanifela amamaga maim buꞋwami? OwaꞋetin. Nemaf anama afaꞋ ondanifelama ipeꞋ etipa. Nemaf anama apeꞋ hiapai mefeꞋ mope molomana.

Copyright information for `AOJFILIFITA