2 Corinthians 10

Pol nahagofa basef awami sandaꞋmanami

AeꞋ Pol ahaliꞋipa nimanis aila waf Kraisi soꞋumbilinai siꞋi anan nandaꞋ okom ananinai nefeꞋ owina epes hiesi. DeiꞋ anifelipa ma anom amamaga etifim. Enis epes sambasoꞋme saꞋipi naꞋama saꞋi, “Anan ataꞋ nape naloma apeꞋ nandaꞋ anan nafeꞋ saꞋosaꞋona nafeꞋ owin, eaꞋ nogota anama nafeꞋ napani laogon nandaꞋ basef laꞋifimi ma apeꞋ.”

AeꞋ ihaliꞋipa naꞋama. Anona nemaf aeꞋ etagamepa, ipeꞋ pindumafuma andeandeꞋ. NaꞋama pehafa aeꞋ iꞋipipa basef laꞋifimi siꞋi aeꞋ okom naꞋi ewalapama enipa. AeꞋ ewalapama ipeꞋ paꞋi afaꞋ wafeꞋ waila waf aonai etapanai. Endilisi, afaꞋ wape wafeꞋ etap anaeꞋ, eaꞋ ina wape wandaꞋ wandaf siꞋi epes etapasi sapaꞋ, owaꞋ. Amamaga hiami sapaꞋami afaꞋ wahapilami amam ina etapami, owaꞋ. Amama pepel Godi, laꞋifinai ma notala endalelemb pepel naumbih Seteni. AfaꞋ wahagofa nomonas epes isima owaꞋ endilisisi. EaꞋ waf hianai nasopama eafa epes saꞋi sogawa Godi, anama afaꞋ wahagofana wasopamana wapotiꞋ. EaꞋ afaꞋ waliꞋamona nomonas hiami apeꞋ epesi ma ondaꞋam boꞋom mila okom Kraisi. AfaꞋ wandandombol wape ohafa ipeꞋ. Ama iꞋi ipeꞋ pila basef hiami afaꞋimi, afaꞋ nambimb ogwamasa nimanimi awami emi egafis sosambala basef Godi.

IpeꞋ pati amamaga mape naep ipeꞋimi atom andeꞋ atogon, nomon owaꞋ. DeiꞋ piti amamaga ofagema. IꞋi emi egafis sope laꞋifis siꞋi esis epes Kraisi, esis sogawa afaꞋ wapotiꞋ wape epes Kraisi. Dembinai naseꞋafa agof luꞋwami afaꞋ ma ondaꞋ maol anama ananinai, amama mondaꞋ baleꞋef ipeꞋinai notaga laꞋifina. Amama ina mohambombagepa, owaꞋ. Ama aeꞋ iꞋi efela agof afaꞋimi atoma maol anama Dembinai, nambimb aeꞋ ina ambal aona ma amama, owaꞋ. AeꞋ andaiwaꞋ endilisi ma ipeꞋ piꞋi aeꞋ aumbelipa etina anom pasa basef amama aeꞋami, owaꞋ. 10 DeiꞋ main, enis epes saꞋi, “Pasa basef ananimi nimanim endilisi eaꞋ laꞋifim endilisi. EaꞋ anan nafiꞋi natagamapa ma matolona naep apeꞋimi, ina laꞋifina eaꞋ basef ananimi falafumi atom.” 11 Epes saꞋi basef naꞋama, ataꞋ ukup miꞋi andeandeꞋ sogawa naꞋama. AfaꞋ wape laogon eaꞋ wandaꞋ basefa pas atoma ipeꞋ. IꞋi afaꞋ ope olomepa, ondaꞋ waf anama atona basef amama atom siꞋi wandaꞋam mail pas.

12 AfaꞋ ukup hiahiam deiꞋ wandaiwaꞋ ma wiꞋi afaꞋ wandati naꞋama etin siꞋi epes safela agof asasimi atom luꞋwami, owaꞋ. Epes isima sawaloga waf asasinai ma ikwaf ukup asasimi atom. EaꞋ sawalogam naꞋama. Esis isima owaꞋ sogawai, ukup mololasi. 13 EaꞋ afaꞋ wandaiwaꞋma usilaꞋ ikwaf afaꞋinai ma ofela agof afaꞋimi ilif endilisi, owaꞋ. AfaꞋ waꞋila ikwaf God nawalogafa naseꞋafa maol ananinai. AfaꞋ waila amama eaꞋ wafeꞋ wataga ma ipeꞋ wandaꞋ maol anama. EaꞋ wafela agof afaꞋimi ma maol anama atona. 14 AfaꞋ wameꞋ basefa God wailam wafoꞋo watagama ipeꞋ dendeꞋ ma alol anan nandandepamafagoma. EaꞋ afaꞋ ina umbisilaꞋ alola maol anama ma wawalipipa basef ananimi, owaꞋ. IꞋi afaꞋ owaꞋ omeꞋ basef Ananimi naꞋipipami ugiꞋmam, afaꞋ umbisilaꞋ alol. OwaꞋetin. AfaꞋ wafoꞋo ofaꞋago basef buꞋwami atom Kraisi watagamepa. 15 EaꞋ afaꞋ ina umbisilaꞋ alola ofela agof afaꞋimi atoma anona maol enis epes sandaꞋanai, owaꞋ. AfaꞋ ukup matamea laꞋifim naꞋama. Maol anama afaꞋ wandaꞋanai, ipeꞋ nambimb pembaleꞋefa Krais laꞋifipa pikilaꞋ fowaꞋ paliꞋ pambaleꞋefana. EaꞋ maol anama nataga luꞋuna laꞋafena ipeꞋ nikilaꞋ fowaꞋinai. AfaꞋ waꞋi ondaꞋana laꞋelaꞋef nendahama ikwaf God naseꞋafanai. 16 WaꞋiam naꞋama ma afaꞋ ataꞋ ofaꞋ basef buꞋwami Godi ofoꞋo laogon anona etap nape alafugaha ipeꞋ ganima waꞋol. Ama afaꞋ ina umbisilaꞋ ofeꞋma maol anama amani ofela agof afaꞋimi anona maol aman anama nandaꞋana eaꞋ, owaꞋ.

17 “Epen nindanifel, enin nendanifel ma Dembinai atona.”
Basef amama maꞋi epen nendanifela Godi mape Olpela Testamen Jeremaia 9:24.


18 DeiꞋ main, apeꞋ mogawa emi egafis sefela agof asasimi atom, esis agof aꞋasa naep Dembinai, owaꞋ. IꞋi Dembinai nefela agof anis epesi, deiꞋ epes isima etis sofaꞋ agof endilisi.

Copyright information for `AOJFILIFITA