2 Corinthians 3

Amam mandaꞋ maola basef dambaimi God naꞋi endilisimi atom

Basef amama doꞋokimi ipeꞋ paꞋi afaꞋ wafela agof afaꞋimi atom luꞋuna wapotiꞋ siꞋi anom amam mambasoꞋmepa mandaꞋam? O paꞋi afaꞋ owaꞋ laꞋififa wandaꞋam siꞋi amama oseꞋepa anom basef mail pasi enis epes sandaꞋami ma sefela agof afaꞋimi? O ipeꞋ wapotiꞋ nambimb pendaꞋ anom basef mil pasa pigiambamafa? OwaꞋetin. Basef mail pasi sefela agof afaꞋimi siꞋi ipeꞋ etipa. Basef amama mail laꞋifim nomon ukup afaꞋimi. Ama epes hiesi sotalifam sogawam. IpeꞋ pandawalap alihipa, pas amama eaꞋ ipeꞋ etipa. Krais atona nandaꞋ basef maila pas amama. Anan nandandepafa naseꞋafa pas amama wafoꞋo wasiꞋipami. Anan ina nandaꞋ ing nufandiam, owaꞋ. Anan nufandiama Ambal BuꞋunai God nape namunai. Anan ina nufandiam mail anona owap waꞋanai siꞋi buk, owaꞋ. Nufandiam mail ukup ipeꞋimi nomon.

Basef amama ofagema naꞋama. Krais nagiambamafa endilisi eaꞋ ombeleꞋef laꞋififa ma God wape naꞋama. Endilisi afaꞋ atofa ina laꞋififa ma ondaꞋ maol anama, owaꞋ. God atona nandaꞋafa laꞋififa ma wandaꞋ maol anama ananinai. EaꞋ anan atona nandaꞋafa laꞋififa ma wandaꞋ maola eaf basef dambaimi God naꞋi endilisimi atom. Basefa miꞋuli anama ina sandaꞋam mail pas atom, owaꞋ. Amama Ambal BuꞋunai Ananinai nawalapami. Basef sandaꞋam mail pas atom maha epes sagaꞋ, eaꞋ Ambal BuꞋunai Ananinai nandaꞋas sofaꞋ ambal namunai sope namis.

God nandaꞋ basef amama fowaꞋimi ma miꞋuli Ananinai mail otam waꞋanai siꞋi buk. Maol Godi amam mandaꞋami, amama matagama gaꞋ naloma nafifili ananinai buꞋunai wapotiꞋ. NaliꞋ damba damba nafifili anama nandaꞋ amaga Mosesi nafifil endilisi. EaꞋ nagiꞋ nataga soꞋusoꞋuna. Anama laꞋifinai endilisi ma esis Israel ina laꞋifisa siti amaga ananinai, owaꞋ. EaꞋ nafifiil ma maol Godi Ambal BuꞋunai Ananinai nandaꞋanai luꞋuna endilisi nikilaꞋ anama fowaꞋinai. Maol fowaꞋinai nawaloga epes hegilolas, anama nawalapai nafifili Godi. EaꞋ maol anama deiꞋinai nandaꞋ epes sataga boꞋwes eaꞋ God naꞋi esis boꞋwes andeandeꞋ. Maol anama deiꞋ nawalapai nafifili ananinai luꞋuna endilisi nikilaꞋ anama naliꞋi. 10 Endilisi, nafifili fowaꞋinai ina nafeꞋ naꞋama etin siꞋi deiꞋinai, owaꞋ. FowaꞋinai falafunai atona eaꞋ deiꞋinai luꞋunai nikilaꞋ endilisi. 11 Maol anama deiꞋ naꞋi hegililonai, anama fowaꞋ nataga naloma nafifili Godi. EaꞋ nafifili deiꞋinai ma maol anama nape laꞋelaꞋef luꞋuna endilisi nikilaꞋ anama naliꞋi.

12 AfaꞋ wandaꞋ maol Godi ogawa basef amama dambaimi God naꞋiam endilisimi atom eaꞋ wape ohafa nahafifili anama anona nemaf notagamafa. EaꞋ afaꞋ ina umbamahafa, owaꞋ. AfaꞋ laꞋififa endilisi. 13 AfaꞋ ina wape siꞋi Moses, owaꞋ. Anan nawala lowaf amaga ananinai nambahoꞋana ma esis Israel ina siti nafifili anama nefeꞋ soꞋusoꞋumbela hiꞋilana, owaꞋ. 14 EaꞋ ukup asasimi maseꞋas endilisi. DeiꞋ main, esis laꞋelaꞋef satalifa basef mail Baibeli fowaꞋ God naꞋi endilisimi atom. Nemaf mamana satalifa basef amama, lowaf anama waꞋanai nape amaga Mosesi ataꞋ nape laꞋelaꞋef nasopama ukup asasimi nafiꞋi nafiꞋi nataga deiꞋ. Ina nandatagah, owaꞋ. Ama Krais atona, God nahapeꞋ lowaf anama. 15 FowaꞋ satalifa basef Moses nandaꞋami safiꞋi sataga deiꞋ, lowaf anama ataꞋ naseꞋala opalef asasimi laꞋelaꞋef. 16 EaꞋ emi egafis somboma opalef sefeꞋma Dembinai, deiꞋ lowaf anama nendatagah. 17 Dembinai anama anan Ambal BuꞋunai Godi. IꞋi Ambal Dembinai nope enin epen, ina ataꞋ anom amamaga miliꞋakwa enin, owaꞋ. Enin nape wafifin. 18 EaꞋ apeꞋ hiapai deiꞋ mape amagah wafimi, nafifili buꞋunai Dembinai nafifima apeꞋ, apeꞋ mififima enis epes. ApeꞋ mape naꞋama deiꞋ Ambal BuꞋunai Godi nahoꞋofa waf apeꞋinai eaꞋ mandati siꞋi Dembinai ma nafifili anama nataga luꞋuna laꞋelaꞋef nafeꞋ etin nape. Amama mataga Dembinai atona, anan Ambal BuꞋunai Godi.

Copyright information for `AOJFILIFITA