2 Corinthians 6

Amam aposel mofaꞋ nimanimi hiami ma maol Godi

AfaꞋ wandaꞋ maol Godi wandaoꞋoma walomana. DeiꞋ waꞋipipa basef laꞋifimi naꞋama waꞋi, “God nagiambamepa naꞋa. NaꞋama ipeꞋ ukup moseꞋepa waf anama nagiambamepa naꞋa, owaꞋ.” PemeꞋ. God naꞋi naꞋama naꞋi, “Nemaf aeꞋ ati uwahipipanai anama ameꞋ basef ipeꞋimi. Nemaf anaeꞋ aeꞋ agiambamepa aꞋi efaꞋepa petanimani.”

PemeꞋ! DeiꞋ God nati uwahipipa. DeiꞋ God naꞋi,

“AeꞋ ekwahomepa waf aonai efaꞋapa pitanimani.”
AfaꞋ wandaiwaꞋma epes siꞋipafa basef awami ma maol Godi afaꞋ wandaꞋanai. Amama atom deiꞋ wandaiwaꞋma ondaꞋ anom amamaga ma waf aonai mondaꞋ enis sondasisiꞋip sowa, owaꞋ. EaꞋ laꞋelaꞋef wihiꞋamba epes hiesi wandaꞋ maol Godi. DeiꞋ wihiꞋambas naꞋama. Waitu laꞋififa endilisi ma nimanimi mamumami ma amamaga maꞋi mohambombagafa. Esis sahafa sandaꞋafa wandaꞋ kalabus. Esis naumbih sandaꞋafa aofa saꞋipafa awagon. AfaꞋ wandaꞋ maol luꞋunai endilisi. Ina waꞋ gwaꞋaimi wape waꞋoh andeandeꞋ, owaꞋ. WandaꞋ waf buꞋunai eaꞋ wahapila gawa buꞋunai, opalef awanem waitu laꞋififa ma nimanimi. WandaꞋ waf buꞋunai ma enis epes. OfaꞋ pepel Ambal BuꞋunai Godi, wandaꞋ waf anama endilisi ma ukup maimaila enis epes wagiambamas. Ina waꞋi basef malogof atom, owaꞋ. Wawalapa basef endilisimi wandaꞋ maol waloma pepel Godi. AfaꞋ waila waf buꞋunai siꞋi wahapila amamaga wapaꞋami lagof biam daꞋisinai iganai. Enis epes safela agof afaꞋimi eaꞋ enis sandaha basefafa. Enis saꞋi basef awami saꞋi saseꞋafa alafugah eaꞋ enis saꞋipasa basef enis epesa waf buꞋunai afaꞋ wandaꞋanai. Esis ukup maꞋi saꞋi afaꞋ epes wambasoꞋami eaꞋ esis etis epes sambasoꞋami. AfaꞋ waꞋi endilisi. WandaꞋam naꞋama, ina enin epen negawa afaꞋ, eaꞋ hiesi sogwafa. AfaꞋ siꞋi epes wagaꞋi, eaꞋ owaꞋetin. AfaꞋ ataꞋ wape namofa. God ataꞋ nahafa bolam nanindinafa, wandanifel eaꞋ anan ina nahafa afufa, owaꞋ. 10 AfaꞋ opalef nimanim endilisi, eaꞋ laꞋelaꞋef wandanifel. Wape siꞋi isima amamaga aꞋasi kwahusi eaꞋ waseꞋasa amamaga afaꞋimi ma epes hiesi. AfaꞋ amamaga aꞋafa siꞋi isima kwahusi, eaꞋ waf buꞋunai Godi nihiꞋambafa wape siꞋi amamaga hiamifai.

11 IpeꞋ Korin alupipei, aeꞋ aꞋi basef hiami buꞋwami mape okom aeꞋanai awalapama ipeꞋ alihim hiꞋalam, aeꞋ okom nainailipa endilisi siꞋi alupisi aeꞋasi. 12 AeꞋ ina opaf aona ma ipeꞋ esambalipa, owaꞋ. AeꞋ okom nainailipa endilisi. EaꞋ ipeꞋ opalef aoma afa. EaꞋ ina mape opalef etifim endilisi, owaꞋ. 13 DeiꞋ aeꞋ ahalomepa, ipeꞋ siꞋi awasi aeꞋipei. IpeꞋ ukup mimili siꞋi aeꞋ okom nainailipa endilisi.

ApeꞋ siꞋi ipat Godi luꞋunai sandaꞋ lotuwanai

14 Epes isima owaꞋ sombaleꞋefa Godi, ipeꞋ ina pelomas pepe pefeꞋ etifigin atogon, owaꞋ, hapaisi. DeiꞋ main, waf anama buꞋunai ina nape etifigin naloma waf anama sosambala basef Godi, owaꞋ. DeiꞋ maina owambi alip mandakolas etifigin? OwaꞋetin. 15 PaꞋi Krais naloma Satan mape mefaꞋ ukup etifim? OwaꞋetin. DeiꞋ epes isima sembaleꞋefa Godi saloma epes isima owaꞋ sombaleꞋefa Godi sofaꞋ nomonas etifim, anona nemaf esis sondaꞋ maina waf? OwaꞋetin. Ina sandaꞋ anona waf buꞋunai, owaꞋ. 16 DeiꞋ aꞋipipa basef amama afela ukup ipeꞋimi. EaꞋ ina andeandeꞋma mokolasa ipat luꞋunai Godi noloma amamaga basoꞋmaimi sandaꞋam sandaꞋ lotumami, owaꞋ. IpeꞋ pegawa apeꞋ atepa siꞋi ipat anama God napainai nomon. SiꞋi fowaꞋ Anan naꞋiam naꞋi,

“Owagama aeꞋ epe elomas efeꞋ laꞋafena esis eaꞋ epe God asasiwei eaꞋ esis wapotiꞋ sepe epes aeꞋasi.”
17 EaꞋ Dembinai naꞋiam wapotiꞋ naꞋi,

“IpeꞋ pekwaha esis pefeꞋ pepe anagon. EaꞋ ipeꞋ ina pihapila amamaga alugumi awami, owaꞋ. Ama atuwasi eseꞋepa opaf aeꞋanai efaꞋepa petanimani.
18 Ama epe Ahalomepa ipeꞋiwei ipeꞋ pepe awasi amam nematawa aeꞋipei. Dembiwei ofagewema pepel hianai aꞋiam naꞋama.”
Copyright information for `AOJFILIFITA