2 Thessalonians 3

Pol naꞋi, “IpeꞋ pendaꞋ betena God nigiambamafa.”

IpeꞋ Kristen alupipei, afaꞋ waꞋi ataꞋ wiꞋipipago anom basef wapotiꞋ. IpeꞋ pendaꞋ betena Goda nigiambamafa ma basef Dembinai mefeꞋ mehip anama hiagoma mofaꞋ agel luꞋunai siꞋi fowaꞋ mandaꞋam laꞋafena ipeꞋ IpeꞋ pendaꞋ betena afaꞋ ma God notagahofa ma lagofa epes isima sandaꞋ waf aonai. IpeꞋ pegawa epes hiesi ina deiꞋ sembaleꞋefa basef Godi, ataꞋ owaꞋ EaꞋ Dembinai naila basef ananimi andeandeꞋ nandaꞋ amamaga ananimi andeandeꞋ ma nondaꞋepa petaga laꞋifipa numafipa ma aman aonai owaꞋ laꞋifinama nomboma opalef ipeꞋimi Dembinai nafela ukup afaꞋimi deiꞋ ogawa ipeꞋ naꞋama. Waf hianai waꞋipipa ma pindaꞋanai, anama ipeꞋ pendaꞋana endilisi. EaꞋ anona nemaf wapotiꞋ ina pindaiwaꞋmana, owaꞋ. Pilana pendaꞋana laꞋelaꞋef AfaꞋ waꞋi Dembinai nondaꞋ opalef ipeꞋimi ma pegawa God okom nainailipa endilisi. AfaꞋ waꞋi nemaf anama nimanimi motagamepa, pitu laꞋifipa ma pepel Kraisi atona pendaꞋ waf buꞋunai atona.

Epes hiesi sondaꞋ opeh

IpeꞋ Kristen alupipei, afaꞋ waꞋipipa mehip naꞋama ma agel Dembinai Jisas Kraisi. IꞋi enis alupusi ipeꞋisi sope etina owaꞋ semeꞋ basef amama waꞋipasam sieilam, ipeꞋ pihiꞋamas pekwahis pefeꞋ IpeꞋ pegawa ma pila waf afaꞋinai. FowaꞋ wape walomepa, ina wape etin, owaꞋ Ina ofaꞋ gwaꞋaimi naꞋa ma ipeꞋ, owaꞋ. Watalom etin waꞋam. EaꞋ wandaꞋ opeh laꞋifimi hiami wandaꞋam owamb alipa ina wapoma ipeꞋ etipa pimafiafa, owaꞋ AfaꞋ wiꞋi ofaꞋ gwaꞋaimi ma ipeꞋ, God naꞋi andeandeꞋma okom ananinai. EaꞋ afaꞋ wandaiwaꞋma ofaꞋ gwaꞋaimi ipeꞋimi, owaꞋ. AfaꞋ wandaꞋam naꞋama ma ipeꞋ pati waf afaꞋ wandaꞋanai ma petolona pilana 10 IpeꞋ pegawa fowaꞋ wape walomepa afaꞋ waseꞋepa miꞋuli naꞋama. NaꞋi epen owaꞋ nendaꞋ maoli, ipeꞋ ina pemafian peseꞋan anom gwaꞋaimi, owaꞋ, hapaini 11 AfaꞋ ina waꞋipipa naꞋama etin, owaꞋ. WameꞋ basef enis sape laꞋafena ipeꞋi ina sandaꞋ opeh, owaꞋ. Sape etin. Esis sapoma basef atom usihimi ma amamaga enis epesi atom 12 Agel Jisas Kraisi Dembinai apeꞋinai afaꞋ waꞋipipa mehipa miꞋuli anama ma epes isima sape etini, waꞋi ofela ukup asasimi ma sondaꞋ waf naꞋama. Esis ataꞋ sope andeandeꞋma sondaꞋ maola sotagama gwaꞋaimi asasimi atom deiꞋ 13 IpeꞋ Kristen alupipei, ipeꞋ ina alaꞋuta nepa ma pendaꞋ waf buꞋunai, owaꞋ 14 IꞋi enin epen owaꞋ nila basef amama hiami afaꞋ wandaꞋami, ipeꞋ pegawa epen inima andeandeꞋ. EaꞋ pihiꞋaman pepe laogona enin. Ama enin ambal aona ma waf ananinai. DeiꞋ main, enin ina naila basef afaꞋimi, owaꞋ 15 IpeꞋ ina pefalan piꞋi nautamepa ipeꞋini, owaꞋ. Ukup mopoma enin siꞋi alupini ipeꞋini eaꞋ piꞋipana negawa waf anama aonai ma nekwahona.

Anom basef tuꞋwanim

16 AfaꞋ waꞋi Dembinai anan ofagonama opaf awanena laꞋelaꞋef noseꞋepa okom awanena ma mamagoma ipeꞋ pepe peafeꞋma. AfaꞋ waꞋi Dembinai nope nolomago ipeꞋ hipei.

17 Anan nandaꞋ basefi naseꞋe pen aeꞋ Pol andaꞋ basef amama ma lagel aeꞋanai, aꞋi nemaf buꞋunai ma ipeꞋ. Ikwaf anama aeꞋanai ma basef amama hiami aeꞋami, andaꞋam naꞋama etin.

18 AfaꞋ waꞋi Dembinai apeꞋinai Jisas Krais nigiambamepago ipeꞋ hipei naꞋa.

EaꞋ maꞋum.

Copyright information for `AOJFILIFITA