2 Timothy 1

AeꞋ Pol andaꞋ basef mafeꞋmago ineꞋ Timoti, aeꞋ okom nainailina. IneꞋ nembaleꞋefa God deiꞋ nataga nogalome aeꞋinai. Okom Godi atona deiꞋ ape aposel Jisas Kraisi. Basef Krais Jisasi endilisimi atom, naseꞋapa ambal namunai apeꞋ mape laꞋifipa maloma Anan. AeꞋ aꞋi amam biam migiambamena naꞋa eaꞋ muti uwahipina mondaꞋ okom ineꞋinai nope awanena.

ApeꞋ ina ambagof aoma basef Jisasi, owaꞋ

Esis ihase aeꞋasi saila waf Godi, deiꞋ aeꞋ wapotiꞋ ailana. EaꞋ malogel nape opaf aeꞋ nomoni ina nihiꞋambe anona waf aonai andaꞋanai, owaꞋ. Beten aeꞋanai owamb alip laꞋelaꞋef aeꞋ okom napomena anifela God. AeꞋ okom napoma embif maluwi naep ineꞋimi, okom nohafel endilisi aꞋi ataꞋ efoꞋo itilina endanifel endilisi. AeꞋ okom napoma baleꞋef ineꞋinai, anama endilisinai, ina basoꞋomunai, owaꞋ. BaleꞋef anama fowaꞋ naliꞋ napoma ihaꞋmena ineꞋikwi Lois kwaloma mamaꞋwena Yunis. EaꞋ egawa endilisi, baleꞋef anama deiꞋ napoma ineꞋ wapotiꞋ. FowaꞋ aeꞋ awamona lagofa balaga ineꞋinai ma God naseꞋena presen buꞋunai ananinai. EaꞋ deiꞋ aꞋi efela okom ineꞋinai ma okom nopoma presen anama napoma ineꞋ nimafiana notaga laꞋifina siꞋi sufapula nif fandom luꞋum. Ambal BuꞋunai God naseꞋapanai ina nondaꞋapa umbamohapa, owaꞋ. Anan naseꞋapa waf anama mitu laꞋifipamanai ma ukup mimila enis epes eaꞋ mumafi alop apeꞋinai andeandeꞋ. IneꞋ owaꞋ ambal aona niꞋipasa basef Dembinai apaꞋinai, owaꞋ. EaꞋ ina ambal aona ma aeꞋ wapotiꞋ, owaꞋ. AeꞋ andaꞋ maola Dembinai deiꞋ andaꞋ kalabus. IneꞋ nefaꞋ pepel Godi ma netaga laꞋifina nefaꞋ nimanimi nelome owalapa basef buꞋwami Ananimi. God nofaꞋapa mutanimani mope andeandeꞋ. Anan nofalapa amam nematawa ananipai atepa mope boꞋwepa andeandeꞋ. Anan ina okom napoma waf buꞋunai apeꞋ mandaꞋanai nofalapa, owaꞋ. Okom Ananinai atona nainailapa nofalapa nagiambamapa naꞋa. FowaꞋ dambadamba ina deiꞋ nandaꞋ etap, ataꞋ owaꞋ, Jisas Krais nandahomapa nagiambamapa naꞋa. 10 EaꞋ deiꞋ nogota anaeꞋ Krais Jisas nafiꞋi nofaꞋapa motanimani, anan nataga alihina. DeiꞋ maol ananinai God nagiambamapa naꞋa nandaꞋapa mataga laꞋifipa mataga alihim. Krais Jisas nikilaꞋ gaꞋ, eaꞋ basef buꞋwami Godi mihimaꞋmapa ambal namunai nape andeandeꞋ laꞋelaꞋef. 11 Anan naliꞋ nandandepe andaꞋ maol anama awalapa basef buꞋwami Godi ma epes hiesi. AeꞋ aposel God nasapaꞋe awalapa basef Ananimi, aeꞋ tisa dembiwei andaꞋ maol Jisasi. 12 Amama atom deiꞋ efaꞋ nimanimi amama. EaꞋ aeꞋ ina ambal aona ma amama, owaꞋ. AeꞋ egawa aman anama embaleꞋefanai. AeꞋ egawana endilisi anan laꞋifinai ma numafi amamaga hiami moloma epes hiesi ananisi aeꞋ aseꞋanas lagof ananimi. EaꞋ amama mope boꞋom andeandeꞋ mefeꞋ motagama nemaf anama luꞋunai notaga. 13 Basef amama buꞋwami ineꞋ nameꞋama malogel aeꞋanai, basef amama siꞋi anona ikwaf buꞋunai ma nihiꞋambena waf buꞋunai newalipasa epes. IneꞋ nembaleꞋefa Jisas Krais endilisi eaꞋ okom ninilana nendaꞋ waf naꞋama nembaleꞋef laꞋifina ma basef amama. 14 Nimafi basef amama buꞋwami endilisimi God naseꞋenam lagof ineꞋimi ma nimafiam. Ambal BuꞋunai Godi nape nomona apeꞋ, nigiambamena numafina ma maol anama. 15 IneꞋ negawa epes hiesi sape etap hiagoma Esiai, saloma amam biam Figelus naloma Hermogenes sakwahowe safeꞋ. 16 AeꞋ andaꞋ betena Dembinai ma ataꞋ niti Onesiforus naloma wambota ananinai uwahipis. DeiꞋ main, anan laꞋelaꞋef nandaꞋ okom aeꞋanai nape andeandeꞋ. Anan ina ambal aona ma aeꞋ andaꞋ kalabus, owaꞋ. 17 Anan nafiꞋi Rom nandaꞋ maol luꞋunai nagolope nogota laona eaꞋ natolowe. 18 AeꞋ andaꞋ betena Dembinai ma niti anan uwahipina nemaf anama buꞋunai. Anan nagiambame nimeguf hiami wambel anama Efesus, amama ineꞋ negawam andeandeꞋ.

Copyright information for `AOJFILIFITA