2 Timothy 2

IneꞋ nepe siꞋi soldia buꞋunai nandaꞋ maol Kraisi

Nogalome aeꞋinai, laꞋelaꞋef ineꞋ nepe laꞋifina ma Krais Jisas nigiambamena naꞋama pepel anama nasoꞋ apeꞋ mape laꞋifipa ma Anan. Basef hiami ineꞋ nameꞋ fowaꞋ awalapama naep epes hiesi, amama newalapama anom amam buꞋwami mogawa basef andeandeꞋi ma miꞋipa enis epes andeandeꞋ. IneꞋ nepe laꞋifina endilisi siꞋi soldia naitu laꞋifina nila Krais Jisas. NefaꞋ nimanimi amama neloma afaꞋ anofa soldia ananifai ma maol anama Godi. Aman anama nape siꞋi soldia, ina nahapila maol naninani, owaꞋ. NandaꞋ maol anama soldiai buꞋunai atona niꞋi dembinai soldia ananinai okom ninila maol ananinai. NaꞋama etin, emi aman nondondombam noloma enis nosagih, nila waf anama esis sasagihanai. Ama nikilaꞋ nofaꞋ amamaga amama buꞋwami sasagih sikilaꞋ sefaꞋami. EaꞋ iꞋi anan owaꞋ nigiꞋma waf anama sasagihanai andeandeꞋ, atuwasi ina nofaꞋ amamaga amama, owaꞋ. Aman nandaꞋ maol luꞋunai aofi ma numafi aof andeandeꞋ nambimb niliꞋ nelaꞋ gwaꞋaimi aof anama nisilaꞋ enis epes. IneꞋ okokoma basef amama aꞋiami. Nambimb Dembinai nomboma okom ineꞋinai, eaꞋ negawa basef amama hiami ofagema. LaꞋelaꞋef ineꞋ okom nopoma Jisas Krais, anan nagaꞋ notanima nohafel wapotiꞋ. Anan wambota anama Deviti, siꞋi aꞋiama basef buꞋwami Godi. AeꞋ awalapa basef amama buꞋwami. Amama atom deiꞋ saꞋi aeꞋ aowei, saseꞋe nimanimi luꞋwami mamumami. SandaꞋe andaꞋ kalabus wapotiꞋ. EaꞋ basef Godi ina mandaꞋ kalabus mape, owaꞋetin. 10 EaꞋ andaꞋ okom aeꞋanai nataga laꞋifina ma aitu laꞋifiwi laꞋelaꞋef igiambama epes isima God nosaheꞋas eaꞋ Ananisi. AeꞋ aꞋi God nigiambama esisa nofaꞋas sotanimani ma Krais Jisas soloma howalagon pepel nape laꞋelaꞋefi. 11 Basef amama endilisimi apeꞋ mombaleꞋefam laꞋifipa. Basef amama.

IꞋi endilisi apeꞋ mogaꞋ molomana, anona nemaf mohafel mope namepa molomana wapotiꞋ.
12 IꞋi apeꞋ mope laꞋifipa mofaꞋ nimanimi luꞋwami, anona nemaf mope siꞋi king molomana. IꞋi mowaꞋ alafugahana, Anan wapotiꞋ anona nemaf nowaꞋ alafugahapa. 13 IꞋi apeꞋ miꞋi apeꞋ alupupai Ananipai milana, ma owaꞋ milana, eaꞋ apeꞋ hapaipai. EaꞋ Anan atona naila basef Ananimi endilisi andeandeꞋ. Ina anona nemaf nokwaham nombasoꞋmas, owaꞋ.

Amam mandaꞋ maola God endilisi, agof amamumi mataga mandawalapa naep Godi

14 LaꞋelaꞋef ineꞋ nefela ukup asasimi ma basef amama. NiꞋipasa ma naep Godi amama. IpeꞋ ina piꞋi basef pepaꞋam pelomasa basef mamumami, owaꞋ. Waf anama ina nigiambamas, owaꞋ. Waf anama nambimb mohambombaga isima someꞋami. 15 IneꞋ nendaꞋ maol Godi laꞋifina netaga aman nandaꞋ maol endilisi, ma ambal ineꞋinai ina aona ma maol anama, owaꞋ. NendaꞋana naꞋama ma God okom boꞋona ma ineꞋ ma niꞋi basef Ananimi boꞋom endilisi. 16 IneꞋ nihiꞋama basef awami. Amama ina basef Godi, owaꞋ. Basef amama nambimb mondaꞋ esis sofeꞋ eaf anama aonai ma sowaꞋ alafugaha God. 17 Basef asasimi awami atom nambimb motaga luꞋum siꞋi maselis awami, mondaꞋas motaga luꞋum endilisi. Tisa asasimi biam Himeneus naloma Filetus mandaꞋ waf anama, maꞋi basef mamumami wafimi. 18 Amam amama mololama basef endilisimi eaꞋ maꞋiam maꞋi, “ApeꞋ motanima mohafel hiꞋagilif eaꞋ, ina ataꞋ motanima mohafel wapotiꞋ, owaꞋ.”

Basef amama atom amam mahambombaga ukup laꞋifimi enis epes sombaleꞋefa Godi.
19 EaꞋ deiꞋ God nawa anona olaf laꞋifinai deiꞋ notawa. Olaf anama anom amef mailana maꞋi naꞋama maꞋi, “Dembinai nogawa andeandeꞋma epes isima Ananisi.” EaꞋ anom wapotiꞋ maꞋi, “Emi egafis saꞋi agel Dembinai, sokwaha waf aonai.”

20 Ipat luꞋunai nomon dis amama hiami esis sandaꞋ kapa buꞋunai gol o siliwa main howalagon sandaꞋami, anom sandaꞋ lawah sandaꞋam, anom salaꞋ etap sandaꞋami. Anom sandaꞋama maol buꞋunai, siꞋi sandaꞋ gwaꞋaimi saꞋam. EaꞋ anom sandaꞋama maol aonai falafunai, sala alufuta. 21 EaꞋ deiꞋ emi epen nekwaha waf aonai ma nepe boꞋwen andeandeꞋ, inima nambimb nepe siꞋi dis amama sandaꞋ maol buꞋunai atona. EaꞋ Dembinai nigiambaman nepe andeandeꞋ nendaꞋ maol ananinai. EaꞋ enin nendandombam nendaꞋ maol naninani buꞋunai hianai. 22 LaꞋelaꞋef ineꞋ nendafaꞋma ukup amama awasimi mataga ma amam amama awomimi. NendaꞋ maol buꞋunai laꞋifina nembaleꞋefa God nila waf buꞋunai neloma okom nainaila enis epesanai. EaꞋ nila waf opaf awaninai, neloma epes isima opalef mape boꞋom andeandeꞋ sofala Dembinai. 23 EaꞋ ineꞋ newaꞋ alafugama basef amama mamumami awami falafumi ma epes isima ukup maseꞋasi gawa aꞋasi. IneꞋ negawa basef amama atom mawalapa ukup mamumami wandafumi maꞋi mandahihianamam. 24 Aman anama nandaꞋ maola Dembinai ina niꞋi anom basef wafimi nifitapam neloma enis epes, owaꞋ. Anan niti amam nematawa hiesi uwahipis noseꞋas opaf. Anan nope dembinai tisa, nosopama okom wandafunai, nope niti esis sondaꞋmana waf aonai. 25 Anan nuwalipas saꞋombel nihiꞋamba andeandeꞋ epes isima sandaiwaꞋmanai sosambala basef ananimi. Anan nondaꞋ maol naꞋama nigiambamas, anona nemaf somboma opalefa sogawa basef endilisimi andeandeꞋ. 26 FowaꞋ Satan naoloꞋas isag ananinai ma saila basef ananimi. IꞋi esis sogawa basef amama endilisimi, nambimb ukup asasimi motaga alihim wapotiꞋ ma sokwaha isag anama Satani sifiꞋmai God.

Copyright information for `AOJFILIFITA