Acts 13

Esis Kristen sasapaꞋ Barnabas naloma Sol mafeꞋ mandaꞋ maol Godi

Esis amam nematawa Kristen sape Antioki anom amam mawalapa basef buꞋwami Godi mape. Anom profet maloma anom tisa mawalipasa basef Godi isima sembaleꞋefanai. Agof amamumi amama. Barnabas naloma Saimon agel waꞋana Niger, Lusius, anan wambel Sairininai maloma Sol maloma Manain anan alupunai Heroti gavman dembinai. Esis Kristen sakwaha gwaꞋaimi sandaꞋ lotuma God atona sape. EaꞋ Ambal BuꞋunai Godi naꞋipas naꞋi, “IpeꞋ pendandepa Barnabas naloma Sola maol anama aeꞋ efalam andandepam meandaꞋanai.”

EaꞋ esis sakwaka gwaꞋaimi sandaꞋ beten, sawamona lagofa amam biam sasapaꞋam mafeꞋ.

Barnabas naloma Sol mawalapa basef buꞋwami Godi anona ailan Saiprus

Ambal BuꞋunai Godi nasapaꞋ amam biam mafeꞋ makiniꞋ anona wambel Selusia. EaꞋ malata anona sip mefaꞋam mafeꞋ anona ailan Saiprus. EaꞋ mataga Salamis, mawis nomon ipat esis Juda saꞋi basef sapeinai maꞋipasa basef buꞋwami Godi, Jon Mak wapotiꞋ nape nalomam nagiambamam.

Amam mafeꞋ mataga wambel hiagoma nape ailan anama Saiprusi, eaꞋ mafeꞋ mataga wambel Pafos nape diꞋinai. EaꞋ mati anona aman anan Judainai. Anan nandaꞋ ambagof nandaꞋ amamaga mamumami basoꞋmaimi. Anan profet nambasoꞋma esis hiesi, agilinama Barjisas. Anan alupunai ma dembinai gavman agilinama Sergius Paulus. Sergius Paulus anan nomonas okom buꞋunai napainai. Anan nofalai Barnabas naloma Sol mafiꞋi ma anan nemeꞋ basef Godi ma amam. EaꞋ aman anama agel ananinai diga Griki saꞋi Elimas, nandaꞋ ambagofi nasambala basef amam biam maꞋiami. NaꞋi nomboma okom gavman anama dembinai ma ina nambimb nembaleꞋefa basef Godi. EaꞋ aman anama Sol, sofalana Poli, anan pepel laꞋifinai Ambal BuꞋunai Godi napainai. EaꞋ anan natiti Elimas naꞋipana naꞋi, 10 “IneꞋ awani nogaloma Satani! IneꞋ naumbih ma waf anama hianai buꞋunai! Waf anama basoꞋmainai hianai aonai siꞋina ma ineꞋ endilisi! IneꞋ nimeguf hiami nambomefa basef endilisimi buꞋwami Dembinai mataga basoꞋmaimi. DeiꞋ maina ineꞋ nandaiwaꞋma nekwaha waf aonai ineꞋ nandaꞋanai? 11 EaꞋ deiꞋ ineꞋ nemeꞋ. DeiꞋ Dembinai nehena lagel ananinai eaꞋ atuwasi naep ineꞋimi moseꞋena. EaꞋ ineꞋ atuwasi niti aon alipunai, owaꞋ. EaꞋ nepe naꞋama etin anom nimeguf.”

Pol naꞋiam naꞋama ma eaꞋ, mehip anom amamaga siꞋi elagw owamb nasopama naep Elimasi. EaꞋ naha ganigani nafeꞋ nogolopa enis epesa sohapila lagof ananimi ma sihiꞋambana eaf.
12 EaꞋ gavman anama dembinai nati amamaga amama gegelalasona endilisi ma basef Dembinai eaꞋ deiꞋ nembaleꞋefa Jisas.

Pol naloma Barnabas mafeꞋ mataga wambel Antiok nape etap hiagoma Pisidia

13 Pol naloma amam malomanai makwaha wambel Pafos eaꞋ mefaꞋ nefaꞋam mafeꞋ anona wambel Perga nape anona etap hiagoma Pamfilia. EaꞋ aman anama Jon nakwaha amam notanima nafeꞋ Jerusalem. 14 EaꞋ makwaha wambel anama Perga mafeꞋ mataga anona wambel Antiok nape etap hiagoma Pisidia. Anom nimeguf mafeꞋma eaꞋ, nemaf anama Sabat esis Juda sapoma nomaꞋwanai amam mafeꞋ mawis ipat Juda saꞋi basef sapeinai eaꞋ matoma balata. 15 EaꞋ anona aman natalifa basefa miꞋuli God nasoꞋ Mosesanai maloma basef amam profet maꞋiami eaꞋ amam agufumi Judai masapaꞋ basef mafeꞋma Pol naloma amam mandaꞋ maol etini maꞋiam maꞋi, “Alupipei, ipeꞋ iꞋi anom basefa mondaꞋ ukup esis amam nematawai motaga laꞋifim, ipeꞋ awi kiam.”

16 EaꞋ Pol nohafel nafela lagel naꞋi basef naꞋi,

“IpeꞋ Israel hipei paloma ipeꞋ enipa epes pandaꞋ lotuma Godi, ipeꞋ pemeꞋ basef aeꞋami.
17 God dembinai esis Israeli, anan nandandepa esis akusapa apeꞋisi ma nemaf anama esis safeꞋ sailas sapani etap hiagoma Isip eaꞋ anan nandaꞋas sataga epes hiesi wambota lounai. Anom nemeguf mafeꞋma eaꞋ, pepel Ananinai atona nofaꞋ esis sakwaha etap anama safiꞋi. 18 EaꞋ anama wafiguma fatauguma nofaꞋ nimanimi ma waf esis sandaꞋanai ma afagof amama 40-peleim. 19 Ma etap hiagoma Kenan anan nahambombaga lain 7-peleina amam nematawa hiesi eaꞋ naseꞋasa etap anama nafeꞋma esis Israel, 20 eaꞋ sahapila etap anama sape afagof amama 450-peleim.

EaꞋ anan nafela amam dambami esis Israeli eaꞋ amam mumafi esis sape satagama nemaf aman anama profet Samuel nataga.
21 Nemaf anama esis sawa salef saꞋi sofaꞋ anona king dembinai, eaꞋ God naseꞋasa anona aman Sol, Kis nogalomana. Aman anama nataga wambota Benjamini. EaꞋ anan nape king dembinai ma afagof hiami 40-peleim.

22 Anom nimeguf mafeꞋma eaꞋ, God naliꞋamona king Sol, nandaꞋ Devit nataga nape king asasinai. Anan naꞋipasa aman anama Devit naꞋi, ‘Devit nogalomana Jesi, okom aeꞋanai nainailana. Anan nambimb nila okom aeꞋanai atona naꞋiami.’

23 EaꞋ God nandaꞋam naꞋama siꞋi fowaꞋ naꞋiam naꞋi nondaꞋam. Ama wambota Deviti owagama God nefela Jisas, aman anama nofaꞋ apeꞋ Israeli. 24 FowaꞋ Jisas ataꞋ owaꞋ nifiꞋi, nogota anama aman anama Jon nawalapa basef naꞋipa esis Israel hiesi ma somboma opalef sokwaha waf aonai sefeꞋma Goda sefaꞋ baptais. 25 EaꞋ felefeleꞋma Jon naꞋi nondaꞋ maol ananinai hiꞋilana, anan naꞋi, ‘IpeꞋ ukup maꞋi aeꞋ maꞋimama? AeꞋ ina aman anama dembinai ipeꞋ pape pembaleꞋefanai, owaꞋ. IpeꞋ pemeꞋ! Aman anama owagama nila aeꞋ niefiꞋi, anan buꞋunai nikilaꞋ aeꞋ. AeꞋ ina buꞋuwei ma etagaha mandelefa su ananimi, owaꞋ.’

26 IpeꞋ sahin owan, ipeꞋ epes hiesi pataga wambota Abrahami, enipa owaꞋ Judaipei pandaꞋ lotuma Godi, pemeꞋ. DeiꞋ basef amama God nasapaꞋam mafiꞋmai apeꞋ hiapai. Basef amama ma anan nambimb nofaꞋapa mokwaha waf aonai motanimani. 27 EaꞋ esis sape Jerusalemi saloma amam agufumi asasimi, esis ina sogawa aman anama nofaꞋapa motanimani, owaꞋ. Esis ina sogawa andeandeꞋ basef amama amam profet fowaꞋ maꞋiami, owaꞋ. Anom agufumi matalifam Sabat nimeguf hiami sapoma nomaꞋwanai. EaꞋ ina sogawam, owaꞋ. Basef amama atom mataga endilisi nemaf anama esis sandaꞋ kotima Jisas saꞋi anan aman aonai ma sahana nogaꞋ. 28 Esis ina sati anom basef ofagema waf aonai ma sohana nogaꞋ, owaꞋ. EaꞋ sofalai gavman dembinai Pailat ma niꞋi aꞋe ma mohana nogaꞋ etin. 29 Esis sandaꞋam hiꞋalam amamaga amama siꞋi fowaꞋ amam profet maꞋi basef mandaꞋam mape buk Baibeli maꞋiama anan. Nimeguf wanom mafeꞋma eaꞋ, esis satagaha anan nisilaꞋi lawag usiꞋinai tuꞋwanainai eaꞋ sawana anona hiꞋagif. 30 EaꞋ God nafelona wapotiꞋ. 31 Esis isima hiesi sakwaha etap hiagoma Galili eaꞋ salomana sondowasaꞋ Jerusalemi, esis satolona nimeguf hiami. DeiꞋ epes isima safeꞋ sawalapa basefa apeꞋ Israela anan.

32 EaꞋ apeꞋ deiꞋ maꞋipipa basef buꞋwami ipeꞋ. Amamaga amama fowaꞋ God naꞋiama naꞋi noseꞋasas akusipa apeꞋisi, 33 eaꞋ maꞋum amama deiꞋ God nasoꞋ apeꞋ awasi ananipai ma nafela Jisas nape namunai. Nafela Jisas siꞋi basef mape buk Baibel Buk Song nafeꞋma bifi maꞋiam naꞋama. God naꞋi,

‘IneꞋ nogalome aeꞋinai. Nemaf deiꞋinai aeꞋ ataga ahalomena ineꞋiwei.’
34 DeiꞋ God nafelona wapotiꞋ hiꞋagif, eaꞋ anan ina ataꞋ notanima nofeꞋ hiꞋagif wapotiꞋ foloꞋolana, owaꞋ. EaꞋ naꞋama etin siꞋi God naꞋiam wapotiꞋ naꞋi,

ꞋNambimb aeꞋ igiambamepa iꞋipipa basef amama endilisimi AeꞋami. FowaꞋ basef amama aꞋiam eaꞋ ma aꞋi iꞋipanam Deviti, amama iꞋipipa ma AeꞋ pepe pe buꞋunai.’
35 EaꞋ siꞋi anom basef mape Buk Sami ma anan wapotiꞋ maꞋiam naꞋama maꞋi,

‘Ina nambimb niꞋi aꞋe ma aman anama nondaꞋ maol ineꞋinai andeandeꞋ foloꞋolana, owaꞋ.’
36 ApeꞋ mogawa Devit nahapila maol naila okom Godi laꞋafena esis amam nematawa sape saloma anani. Anom nimeguf mafeꞋma eaꞋ, anan nagaꞋ nafeꞋ naloma amam bafapana ananimi eaꞋ foloꞋwalana. 37 EaꞋ aman anama God notanima nafelona wapotiꞋ, anan ina foloꞋwalana, owaꞋ. 38 Amama atom deiꞋ aeꞋ aꞋi ipeꞋ sahin owan pegawa basef apeꞋimi amama. Aman anama nakwaha waf aonai ipeꞋ pandaꞋanai. 39 MiꞋuli anama God nasoꞋ Mosesanai anama ina laꞋifina ma nokwaha waf aonai ipeꞋ pandaꞋanai ma pepe wafifipa andeandeꞋ, owaꞋ. NaꞋama aman anama nakwaha waf hianai aonai ma ipeꞋ emi egafipa pembaleꞋefa anan, ma pepe wafifipa boꞋwepa ma naep Godi. 40 DeiꞋ ipeꞋ pegawa waf ipeꞋ pandaꞋanai andeandeꞋ boꞋona o aona? NaꞋama amamaga amama awami mifiꞋmai ipeꞋ siꞋi amam profet fowaꞋ maꞋiami maꞋi,

41 ‘IpeꞋ pandaꞋ basef findiwaimi, ipeꞋ petologon ukup matamea mefeꞋ eaꞋ awepa. AeꞋ andaꞋ anona maol laꞋifinai ma nimeguf ipeꞋ ataꞋ papeimi. IꞋi enin epen niꞋipipa maol anama, ipeꞋ ina atuwasi pembaleꞋefa maol anama, owaꞋ.’ ”
42 EaꞋ Pol naloma Barnabas maꞋi muwis mofeꞋ eaꞋ esis amam nematawa saꞋiam naꞋama saꞋi, “Nemaf anama Sabat nigiꞋi apeꞋ maꞋi ipeꞋ bipa pitanima pifiꞋi piꞋipapa basef amama wapotiꞋ.”

43 EaꞋ esis sakwaha ipat esis Juda saꞋi basef sapeinai sawisi andeꞋ eaꞋ esis Juda hiesi saloma enis epes hiesi sagiꞋmam. Esis isima saila waf esis Juda sandaꞋ lotuwanai. EaꞋ amam biam maseꞋasa basef esis hiesi ma sape laꞋifis sembaleꞋefa God nandaꞋ waf buꞋunai ma apeꞋ nagiambamapa etin.

44 Nimeguf wanom wanom atotona mafeꞋma eaꞋ Sabat nemaf nagiꞋi, amam nematawa sape wambel anamai safiꞋi sandakolasa sameꞋ basef Godi. Amam nematawa isima felefeleꞋma hiꞋilas wambel anama. 45 NaꞋama esis Juda sati amam nematawa hiesi sandakolasi, eaꞋ ukup kowalam endilisi. EaꞋ saꞋi basef awami ma Pol saꞋi anan nambasoꞋmas.

46 EaꞋ Pol naloma Barnabas ina umbamaham, owaꞋ. Amam laꞋifim maꞋipasam alihim maꞋi, “Endilisi, afaꞋ ataꞋ wiꞋipipa basef Godi ipeꞋ Juda piliꞋ. EaꞋ ipeꞋ pewaꞋ alafugaha basef amama. Amama ipeꞋ paꞋiam paꞋi, ‘ApeꞋ mandaiwaꞋma mofaꞋ ambal namunai ma mope andeandeꞋ laꞋelaꞋef.’

IpeꞋ paꞋi naꞋama deiꞋ ipeꞋ pemeꞋ. AfaꞋ deiꞋ okwaha ipeꞋ ofeꞋ ugiꞋma epes owaꞋ Judaisi wiꞋipasa basef amama.
47 DeiꞋ main, Dembinai naꞋipafa mehipa anom basef mail buk Baibeli maꞋi naꞋama maꞋi,

‘AeꞋ andaꞋ ipeꞋ siꞋi howalogon ma enis epes owaꞋ Judaisi. Ama ipeꞋ pigiambama esis amam nematawa sape wambel hiagomai ma etap anaeꞋ. Ama owagama efaꞋas sotanimani.’ ”
48 EaꞋ enis epes owaꞋ Judaisi sameꞋ basef amama sandanifel endilisi. Esis sandanifela basef Dembinai safela agel Ananinai. EaꞋ amam nematawa isima God nosaheꞋasi ma sope namisi laꞋelaꞋef, isima sombaleꞋefa Jisas.

49 EaꞋ basef Dembinai mafeꞋagon hiꞋalagon anama hiagoma. 50 NaꞋama esis Juda safela anowa nematawa agufuwai wandaꞋ lotuma Godi waloma anom agufumi mape taun anama luꞋwagoma saha Poli naloma Barnabas sandaꞋam kwapeteꞋam. EaꞋ sagaloꞋmam wambel asasinai. 51 EaꞋ amam mandilaꞋma sopof mail boꞋwagah amamumi ma mola ikwafa waf aonai napoma esis. EaꞋ mohafel mafeꞋ Aikoniam. 52 Esis alupusi sombaleꞋefa Jisasi sandanifel endilisi eaꞋ pepel Ambal BuꞋunai Godi nape siꞋina esis.

Copyright information for `AOJFILIFITA