Acts 14

EaꞋ Pol naloma Barnabas mafeꞋ mataga Aikoniam mafeꞋ mawis ipat esis Juda saꞋi basef sapeinai mawalapa basef siꞋi maliꞋ mandaꞋam. Amam mawalapa basef buꞋwami eaꞋ esis Juda hiesi saloma enis epes owaꞋ Judaisi sombaleꞋefa God. EaꞋ enis epes Juda ina sombaleꞋefa God, owaꞋ. Esis safela ukupa enis amam nematawa owaꞋ Judaisi eaꞋ sandaꞋ epes isima opalef aoma esis Kristen. Amam biam mapani nogota launai Aikoniam eaꞋ mawalapa basef Dembinai laꞋifim alihim. Amam ina umbamaham, owaꞋ. MaꞋipasa basefa Dembinai nandahomas endilisi nagiambamas. EaꞋ Dembinai nandaꞋ amam biam mataga laꞋifim mandaꞋ ikwaf laꞋifinai naninani hianai. EaꞋ deiꞋ esis sogawa basef amama endilisimi atom. EaꞋ esis amam nematawa taun anama sandawaloga biefis. Enis opalef atifim saloma esis Juda, eaꞋ enis saloma amam aposel biam ukup etifim. Esis epes ina Judaisi saloma esis sandaꞋipama saꞋi basef sandameꞋmam saloma amam agufumi asasimi eaꞋ saꞋi sondaꞋ Pol naloma Barnabas aom. SaꞋi sokwaha otamba soham afum. EaꞋ amam biam mogawa amama mafaꞋ mafeꞋ etap hiagoma Likonia ma wambel biefina Listra naloma Derbe eaꞋ anona wambel felefeleꞋma anama. Amam mandaꞋ maol mawalapa basef buꞋwami Godi ma esis sape wambel anama.

Pol naloma Barnabas mandaꞋ maol Listra naloma Derbe

Anona aman nape wambel anama Listra, boꞋwagah ananimi magaꞋ mailana. FowaꞋ anan ataꞋ nape opaf mamaꞋwanai boꞋwagah ananimi magaꞋ mailana nape naꞋama. Aman anama ina naitu nafeꞋ kwaukwawieꞋ, owaꞋ. EaꞋ anan nameꞋ Pol naꞋi basef eaꞋ Pol natolona titi nogawana naꞋi aman anama nembaleꞋefa Goda notaga boꞋona wapotiꞋ. 10 EaꞋ natolona titi naꞋi basef laꞋifimi naꞋama naꞋi, “IneꞋ hafel nitu.”

EaꞋ nohafel mehip naitu eaꞋ nafeꞋ.

11 Amam nematawa hiesi sati amama Pol nandaꞋami eaꞋ saꞋi mehip diga Likoniai naꞋama saꞋi, “Amam god dambami apeꞋimi biam mataga siꞋi epes misilaꞋa apeꞋ!”

12 Barnabas sofalana saꞋi anona dembinai Sus. EaꞋ Pol anan aman nandaꞋ basef atomi. EaꞋ sofalana saꞋi anona dembinai Hermes. 13 Ipat esis sandaꞋ lotuma Susi notawa andeꞋ taun anama. EaꞋ pris nondolalima Susi nofaꞋ anom bulmakau suwafumi maloma enis afis sowaloꞋami eaꞋ nafiꞋi uta anama tauni. Anan nalumai esis amam nematawa saꞋi sondolali sondaꞋ ofa ma amam biam.

14 Amam aposel Barnabas naloma Pol mameꞋ esis saꞋi basef naꞋama, amam mawala luwaguf maim amam malami. EaꞋ masagih mafeꞋ mawala esis amam nematawa laꞋafena esis maꞋipas mehip maꞋi, 15 “IpeꞋ epes, deiꞋ maina pandaꞋam naꞋama? AfaꞋ wandaiwaꞋ. AfaꞋ biafa ina God dembifai, owaꞋ. AfaꞋ epes atofa etin siꞋi ipeꞋ wawalipipa basef buꞋwami. Wawalipipa ma ipeꞋ pekwaha god anama falafunai basoꞋmaimi ma pefeꞋ pembaleꞋefa God ambal namunai nape laꞋelaꞋefi. Anan nandaꞋ otaga ilif naloma etap maloma epes hiesi saloma naoh embel luꞋwami maloma amamaga hiami mape. 16 Endilisi fowaꞋ nimeguf hiami nape nati amam nematawa hiesi saila waf asasinai. 17 EaꞋ anan ina nape nandambahiꞋi, owaꞋ. Anan nihiꞋambapa waf ananinai ma nandaꞋ waf buꞋunai ma apeꞋ. Anan napani heven nandaꞋ asaf nalai ma ipeꞋ eaꞋ nandaꞋ amamaga gwaꞋaimi buꞋwami mataga dendeꞋ nimeguf amamumi. EaꞋ nowapotiꞋmipa gwaꞋaimi ipeꞋ, nandaꞋ opalef ipeꞋimi mandanifel.”

18 Amam maꞋipasa basef amama, mandaꞋ maol luꞋunai endilisi maꞋipas ina sandolalimam sandaꞋ ofamam, owaꞋ.

Esis sakwaha otamba saha Pol

19 Anom Juda mape Antiok naloma Aikoniam mafiꞋi Listra mafela ukup asasimi amam nematawa. EaꞋ deiꞋ esis sakwaha otamba saha Pol saꞋi endilisi anan afuna eaꞋ sahondeꞋana nawisi naꞋoh andeꞋ taun anama. 20 EaꞋ esis sombaleꞋefa Godi safiꞋi saitu salipana, nohafel wapotiꞋ eaꞋ nafeꞋ nawis taun anama. Wafilu nafeꞋ naloma Barnabas mafeꞋ Derbe.

21 Pol naloma Barnabas mawalapa basef buꞋwami Godi taun anama eaꞋ mafela ukup esis amam nematawa hiesi sataga alupusi Jisasi. Anom nimeguf mafeꞋma eaꞋ, motanima mafeꞋ wambel anama Listra naloma Aikoniam naloma Antiok. 22 EaꞋ mandaꞋ esis Kristen sataga laꞋifis. Amam maꞋipasa basef laꞋifimi naꞋama maꞋi, “IpeꞋ pepe laꞋifipa pembaleꞋefa dembinai God. ApeꞋ memeꞋ mofaꞋ nimanimi mamumami luꞋwami ma muwis nomon wambota Godi numafiapa.”

23 EaꞋ mandandepa agufumi mumafi esis Kristeni mandandaꞋ ma sios amama hiami. Amam makwaha gwaꞋaimi mandaꞋ betena mandaꞋ esis sope laꞋifisa lagel Dembinai anama sembaleꞋefana.

Pol naloma Barnabas motanima mafeꞋ wambel Antiok mape etap hiagoma Siria

24 EaꞋ amam mafeꞋ laꞋafena anona etap hiagoma Pisidia, mafeꞋ mataga anona etap hiagoma waꞋol Pamfilia. 25 Amam mawalapa basefa epes sape Pergai eaꞋ makiniꞋ Atalia. 26 Anama Atalia malata sip eaꞋ nefaꞋam mafeꞋ Antiok. Wambel anama fowaꞋ esis Kristen sandandepam mapoma lagel Godi ma nandahomam mandaꞋ maol anama deiꞋ mandaꞋanai hiꞋalana. EaꞋ deiꞋ motanima mafiꞋi wambel anama. 27 Amam mataga Antiok mofala esis mowaꞋanias sandakolas etifigin maꞋipasa basefa maol Dembinai nape nalomam nagiambamam mandaꞋanai. EaꞋ maꞋi, “God nandaꞋ eaf nagala esis amam nematawa hiesi enis owaꞋ Judaisi ma sombaleꞋefa Krais.”

28 EaꞋ mapani anom nimeguf hiami maloma esis sembaleꞋefa Krais sailana.

Copyright information for `AOJFILIFITA