Acts 2

Ambal BuꞋunai Godi nafiꞋi

Nemaf anama luꞋunai Pentikos nataga, esis hiesi sembaleꞋefana sandatama etifigin sape ipat atotona. EaꞋ deiꞋ atef sameꞋ anona maf luꞋunai nandaꞋam nafiꞋi heven. Maf anama nameꞋ siꞋi uf laꞋifinai naluwi eaꞋ ipat anama esis sapeinai siꞋinama maf anama. EaꞋ sati nif ilelowa siꞋi melisigah pepeꞋatam mafeꞋ matoma esis hiesi atona etin hiꞋalas. EaꞋ Ambal BuꞋunai Godi nape siꞋinama esis atona etin hiꞋalas, saꞋi basef Godi ma diga naninani wambel hiagoma. Ambal BuꞋunai Godi anama nandaꞋam mataga malogof asasimi.

EaꞋ enis Juda sandaꞋ lotuma Godi safiꞋi ganima etap hiagoma safiꞋi sape Jerusalem. Esis hiesi sameꞋ maf anama eaꞋ enis amam nematawa hiesi safiꞋi sondowaꞋanima sape. EaꞋ epes isima hiesi atona etin sameꞋ esis sembaleꞋefanai saꞋi basef Godi ma diga naninani hianai. EaꞋ sohafel gegelalasis kwapeteꞋas endilisi ma sameꞋ diga asasinai. Esis sohafel gegelalasis kwapeteꞋas eaꞋ ukup matamea hiahiam. EaꞋ saꞋiam saꞋi, “Amam amama Galilimi atom, eaꞋ deiꞋ maꞋi diga apeꞋinai atona etin. DeiꞋ maina apeꞋ hiapai atona etin mameꞋ amam maꞋi diga apeꞋinai dendeꞋ siꞋi apeꞋ mameꞋama mamasapa apeꞋisi? ApeꞋ mafiꞋi etap anama hiagoma anama, Partia, Midia Elam eaꞋ Judia, Kapadosia naloma Pontus Esia Frigia Pamfilia Isip eaꞋ apeꞋ anona etap hiagoma Mesopotamia eaꞋ esis ganima Libia felefeleꞋma wambel Sairini. EaꞋ anepa apeꞋ wambel Rom mafiꞋi mape naꞋae. 11 ApeꞋ Juda maloma enis epes maila waf esis Juda sandaꞋ lotuwanai eaꞋ apeꞋ etap hiagoma Krit Arebia, apeꞋ hiapai mameꞋ amam mawalapa basefa pepel maol Godi ma diga hianai naninani.”

12 EaꞋ esis hiesi sohafel gegelalasis kwapeteꞋas, esis ukup matamea mape hiahiam. Esis etis sandahaliꞋma saꞋi, “Amamaga amama mataga maꞋimama?”

13 EaꞋ enis sandaꞋ iafam saꞋi, “Amam maꞋ embel wain hianai eaꞋ mahaga magaol deiꞋ maꞋi basef mamumami.”

Pita nawalapa basef naꞋiam

14 EaꞋ Pita nohafel naitu naloma amam aposel 11-peleim eaꞋ noga naꞋi mehip nawalapa basefa esis amam nematawa hiesi naꞋi, “IpeꞋ Juda alupipei paloma ipeꞋ amam nematawa hipei ipeꞋ pape Jerusalem, ipeꞋ pembeꞋ aligaha basef aeꞋami, ma pegawa amamaga amama. 15 IpeꞋ paꞋi amam amama mandaꞋ spak, owaꞋ. DeiꞋ ataꞋ kuhimbita aon ataꞋ natefi nail etin siꞋi 9 klok. 16 EaꞋ amamaga amama mataga siꞋi anona profet Joel fowaꞋ gani naꞋi, 17 ‘God naꞋ i,

felefeleꞋ ma nimeguf akutaimi AeꞋ eseꞋas Ambal BuꞋunai AeꞋanai nope amam nematawa hiesi. EaꞋ efela esis batawisipa ipeꞋisi sowalapa basef siꞋi amam profet maꞋiam. EaꞋ ihiꞋamba amam soꞋumi ipeꞋimi mondandaꞋoh motolom naep moseꞋam mope motolom, eaꞋ eseꞋama moꞋoh mondandaꞋoh motolom amam hagami ipeꞋmi ma ihiꞋambam waf aeꞋanai.
18 Nimeguf amama aeꞋ eseꞋasa Ambal BuꞋunai aeꞋanai nope esis amam nematawa aeꞋasi sandaꞋ maol aeꞋanai nefelas sowalapa basef AeꞋami siꞋi fowaꞋ amam profet mandaꞋami.
19 EaꞋ endaꞋ anona ikwaf notaga gani otaga ilif, endaꞋ anona ikwaf notaga naꞋae etap. Anama naꞋama. EndaꞋ nogoh hiami otaga, endaꞋ esimbel, nif fandumi mataga etap anaeꞋ.
20 EaꞋ emboma aon alipunai notaga owamb owambunai notaga akwahina siꞋi esimbel. EaꞋ endaꞋam iꞋi nemaf Dembinai nigiꞋ notaga. Nemaf anama ananinai luꞋunai endilisi. Dembinai nihiꞋambapa pepel nafifili Ananinai.
21 Nemaf anama ataꞋ owaꞋ neataga emi egafis sofala agel Dembinai, nofaꞋas sotanimani.’ ”
22 EaꞋ Pita naꞋipas wapotiꞋ naꞋi, “IpeꞋ epes Israelipei, ipeꞋ pemeꞋ basef amama. DeiꞋ iꞋipipa aman anama Jisas Nasaretinai. IpeꞋ pegawa maol ahalomana laꞋifinai naloma pepel anama God nandaꞋanai laꞋafena ipeꞋ ma lagel aman anama. Amama mihiꞋambepa andeandeꞋ aman anama God nasapaꞋana nafiꞋi. 23 FowaꞋ gani God nogawa eaꞋ nail okom Ananinai atona nandaꞋ aman anama nefeꞋ nope lagof ipeꞋimi. EaꞋ amam amama mololama miꞋuli Godi sandaꞋ waf aonai, amam magiambama ipeꞋ pembaleꞋana paundana nail lawag usiꞋinai tuꞋwanainai eaꞋ pahana nagaꞋ. 24 EaꞋ God nafelona nohafel wapotiꞋ nakwaha ekep pahana ma nagaꞋi. DeiꞋ main, gaꞋ anama ina laꞋifina ma nombaleꞋana, owaꞋ.

25 FowaꞋ gani Devit naꞋi basefa Jisas naꞋi,

‘AeꞋ ati Dembinai aeꞋanai nape nalome waꞋol lagel aeꞋanai daꞋisinai laꞋelaꞋef. NaꞋama deiꞋ ina enis epes laꞋifisa sandaꞋme anom nimanimi, owaꞋ.
26 Amama atom deiꞋ okom aeꞋanai nandanifel. AeꞋ iꞋi basef buꞋwami iꞋi, aeꞋ egawa endilisi nambimb anona nigiambame epe andeandeꞋ. 27 DeiꞋ main, anona nemaf ina nekwaha ambal aeꞋanai nefeꞋ nepe anama epes sagaꞋi sapoma, owaꞋ. EaꞋ ina nambimb nekwaha aman anama buꞋunai nandaꞋ maol ineꞋinai alop ananinai foloꞋolana, owaꞋ. 28 IneꞋ nihiꞋambe eaf nafeꞋ natagama ambal namunai. Anona nemaf ineꞋ nepe nelome endanifel endilisi.’ ”
29 EaꞋ Pita naꞋipas wapotiꞋ naꞋi, “IpeꞋ sahope owape aeꞋipei, deiꞋ aeꞋ aꞋi ewalapa basef iꞋipipana aman anama akunamapa apeꞋinai Devit. Anan fowaꞋ gani nagaꞋ sawana, deiꞋ hiꞋagif ananinai ataꞋ nape laꞋafena apeꞋ. Basef amama Devit ina naꞋiama anan atona, owaꞋ. 30 Aman anama Devit anan profet eaꞋ nogawa God naꞋi basef laꞋifimi naꞋi endilisi gani ilif naꞋama ma anona nemaf nondaꞋ bafalomana Deviti notaga nope dembinai king siꞋi Devit fowaꞋ nape king. 31 FowaꞋ gani Devit ataꞋ nape, anan nogawa amama God naꞋi anona nemaf neandaꞋami. NaꞋama deiꞋ anan naꞋi dembinai Krais anona nemef nogaꞋ notanima nohafel wapotiꞋ. Anan naꞋiam naꞋi, ‘Anona nemaf God ina nokwahona nope anama sagaꞋi sapoma hiꞋagif alop ananinai foloꞋolana, owaꞋ.’ 32 Aman anama Jisas God nafelana notanima nohafel wapotiꞋ. EaꞋ afaꞋ hiafai wati amama deiꞋ waꞋiam. 33 DeiꞋ God nafelona nohafel nalata gani heven ilif eaꞋ nape lagel daꞋisinai Godi. Anan nofaꞋ Ambal BuꞋunai Godi ma Ahalomana, siꞋi fowaꞋ Ahalomana naꞋipana naꞋi endilisi neseꞋana. Amama atom deiꞋ Jisas naseꞋasam esis amamaga amama deiꞋ patolom pameꞋam eaꞋ. 34 DeiꞋ main, Devit ina nalata heven, owaꞋ. EaꞋ anan fowaꞋ gani naꞋi basef naꞋi,

‘Dembinai naꞋipa Dembinai aeꞋanai naꞋama naꞋi, “IneꞋ nepe lagel daꞋisinai aeꞋanai ma nepe Dembinai neloma aeꞋ.
35 Nepe naꞋama nefeꞋ nefeꞋ endaꞋ naumbih ineꞋisi sefeꞋ owina bowagah ineꞋimi ineꞋ nikilaꞋas.” ’ ”
36 EaꞋ deiꞋ Pita naꞋiam naꞋama naꞋi, “DeiꞋ apeꞋ Israel mogawa isima andeandeꞋ. Aman anama Jisas ipeꞋ paundana lawag usiꞋinai tuꞋwanainai pahana nagaꞋ, deiꞋ God nandaꞋana nataga nape dembinai anan Krais, God nandandepana nasapaꞋana nafiꞋi.”

Amam nematawa hiesi samboma opalef saila God eaꞋ sofaꞋ baptais

37 Esis sameꞋ basef amama, maha opalef asasimi endilisi. EaꞋ saꞋipa Pita naloma anom aposel saꞋi, “IpeꞋ sahopapa, deiꞋ apeꞋ mondaꞋ maina mope andeandeꞋ?”

38 EaꞋ Pita naꞋipas naꞋi, “IpeꞋ hipei pemboma opalef ipeꞋimi pila God eaꞋ ipeꞋ hipei atona etin pefaꞋ baptaisa agel Dembinai Jisas Krais ma God nokwaha waf aonai ipeꞋinai. IpeꞋ pendaꞋam naꞋama, nambimb God neseꞋepa Ambal BuꞋunai Ananinai nope nolomepa. 39 FowaꞋ gani God naꞋi basef laꞋifimi endilisimi atom naꞋi neseꞋepa Ambal BuꞋunai Ananinai nope noloma ipeꞋ peloma awasi ipeꞋisi soloma esis amam nematawa hiesi ataꞋ sape lauguni anona nemaf sigiꞋ seatagai. God Dembinai apeꞋinai naꞋiam ma noseꞋas Ambal BuꞋunai Ananinai nope noloma epes isima. Epes amama atom anona nemaf Anan nofalas sotanimani.”

40 Pita ina naꞋipasa basef amama atom, owaꞋ. NaꞋipasa anom basef hiami wapotiꞋ naꞋipas basef laꞋifimi ma nafela ukup asasimi naꞋi, “IpeꞋ pindumafuma andeandeꞋ. NaꞋama pefaꞋ nimanimi luꞋwami peloma amam nematawa deiꞋisi sandaꞋ waf aonai.”

41 EaꞋ epes emi egafis sofaꞋ basef Pitai sombaleꞋefam, esis sofaꞋ baptais. Nemaf anama God nowaꞋani epes hiesi wambota ananinai sataga hias 3,000-peleis sataga Kristen, eaꞋ sape saloma esis isima amam nematawa sombaleꞋefanai.

Esis Kristen sombaleꞋefanai sandaꞋ waf buꞋunai

42 Amam nematawa isima sataga Kristen dambaisi esis laꞋifis endilisi ma sameꞋ basef amam aposel mawalipasami sandagiambanama etin enis sahin owan sape etifigin etin saꞋ gwaꞋaimi sandaꞋ beten etifigin atogon. 43 Nimeguf hiami God nandaꞋ ikwaf luꞋunai ma pepel hianai nataga lagof amam aposeli. EaꞋ amam nematawa hiesi umbamahas endilisi sape. 44 EaꞋ esis hiesi sombaleꞋefa Kraisi sandatama etifigin atogon. Amamaga asasimi gwaꞋaimi maim hiami, ina asasimi atona etin, owaꞋ. Amamaga amama hiesi atom. 45 EaꞋ esis sombaleꞋefanai enis saseꞋasa etap asasinai naloma anom amamaga asasimi mafeꞋma enis epes satalamasam. EaꞋ sofaꞋ otamba ma amamaga sotambel sandaꞋam saseꞋ epes isima gwaꞋaimi aꞋasi kwahusi. 46 EaꞋ esis hiesi nimeguf laꞋelaꞋef safeꞋ ipat luꞋunai Godi sandaꞋ lotuwanai. EaꞋ safeꞋ saꞋ gwaꞋaimi ifagw asasimi atona etin. Esis sandanifel ukup boꞋom soseꞋas gwaꞋaimi ma sigiambama enis epes eaꞋ sandanifel saꞋ gwaꞋaimi etifigin. 47 LaꞋelaꞋef esis safela agel Godi luꞋuna, eaꞋ opalef esis amam nematawa hiesi sape andiꞋi boꞋoma esis Kristen nimeguf hiami. EaꞋ nimeguf laꞋelaꞋef Dembinai nofaꞋ enis amam nematawa sotanimani sape saloma epes hiesi isima sombaleꞋefanai.

Copyright information for `AOJFILIFITA