Acts 21

Pol nalata sip eaꞋ nafeꞋ Jerusalem

AfaꞋ wakwaha agufumi wafeꞋ walata sip nakwaha Miletus eaꞋ nafeꞋ. AfaꞋ usiꞋifa wafeꞋ naoh wataga Kos. Ama wafilu wafeꞋ wataga Rodes. EaꞋ wakwaha Rodes wafeꞋ wataga Patara wakwaha sip anama ukilaꞋi wape. EaꞋ wati anona sip naꞋi nefeꞋ Fonisia eaꞋ walata anama nakwaha anama eaꞋ nafeꞋ. EaꞋ wati ailan anama Saiprus wikilaꞋagon nape daꞋisinaima. AfaꞋ wafeꞋ wataga etap hiagoma Siria eaꞋ wafeꞋ wataga wail Tair. Esis saꞋi sowafa hiahaom ma sip anama wambel anama. EaꞋ afaꞋ wafeꞋ wagolopa enis Kristen watilis eaꞋ wape walomas wik siꞋina. EaꞋ Ambal Godi nafela ukup esis Kristeni ma saꞋipa Pola ina nefeꞋ Jerusalem, owaꞋ. Nogota afaꞋinai hiꞋalana wambel anama, waꞋi aꞋ ofeꞋ. Amam Kristen maloma awasi nematawa amamisi saitumafa wafeꞋ wawis andeꞋma taun anama. EaꞋ apeꞋ mindiwa nembawa mandaꞋ beten naoh akata. EaꞋ esis saꞋi basef sandanifel salomafa ma mondasoꞋama lagof etin eaꞋ sotanima safeꞋ ifagw asasimi, afaꞋ wafeꞋ sip.

Profet Agabus naꞋipana basef Pol anona wambel Sisaria

AfaꞋ wafeꞋ sip wakwaha Tair wafeꞋ wataga Tolemes. EaꞋ wape wandaꞋmasa nemaf buꞋunai esis Kristen wape walomas nemaf atotona. Ama wafilu wakwaha Tolemes wafeꞋ wataga Sisaria wakwaha sip eaꞋ wafeꞋ ipat anona aman Filip nawalipasa basef Godi wape walomana. Anan anona ma amam amama 7-peleimi fowaꞋ mandandepam Jerusalemi ma magiambama amam aposel. Anan nola nematawa biawai biawa, ina deiꞋ wasoꞋ amam, ataꞋ owaꞋ. God naseꞋawa gawa wawalapa basef ananimi siꞋi profet.

10 AfaꞋ wape Sisaria anom nimeguf wapotiꞋ eaꞋ anona profet agilinama Agabus nakwaha etap hiagoma Judia nakiniꞋi Sisaria. 11 Anan nafiꞋmai afaꞋ nofaꞋ let Poli nowaꞋ boꞋwagah maloma lagof ananimi atom. EaꞋ naꞋiam naꞋama naꞋi, “Spirit Ambal Godi naꞋi naꞋama naꞋi, ‘Amam Juda mape Jerusalemi nambimb mowaꞋ aman anama ofagenama let anama. EaꞋ moseꞋana nefeꞋma lagof anom amam mololama Godi.’ ”

12 AfaꞋ wameꞋ basef amama eaꞋ waloma esis wambel anamaisi wapotiꞋ waꞋipa Pol mehip waꞋi anan ina nefeꞋ Jerusalem, owaꞋ.

13 EaꞋ Pol nagwa basef naꞋi, “DeiꞋ maina ipeꞋ palef endilisi ma pandaꞋ okom aeꞋanai aona? AeꞋ ina andandombama endaꞋ kalabus etin, owaꞋ. AeꞋ andandombama eagaꞋ wapotiꞋ Jerusalema efela agel Dembinai Jisasi.”

14 EaꞋ afaꞋ ina laꞋififama osambala okom ananinai, owaꞋ. EaꞋ afaꞋ ukup maseꞋafa ma basef amama waꞋi, “Okom Dembinai notaga.”

Pol nawalapa basefa maol naꞋipa amam agufumi mumafi esis Kristen sape Jerusalemi

15 Anom nimeguf mafeꞋma eaꞋ, afaꞋ wandondomba amamaga afaꞋimi ma ofeꞋ Jerusalem. 16 EaꞋ enis alupusi saila Jisasi Sisariaisi safeꞋ salomafa. Esis saitumafa wafeꞋ ipat Nasoni, anan Saiprusinai nataga Kristen fowaꞋinai. Anan naꞋi afaꞋ atuwasi ope ipat ananinai. 17 EaꞋ wafeꞋ wataga Jerusalem, esis Kristen sandanifela sofaꞋafa.

18 Ama wafilu nemaf giꞋmaifi Pol nafeꞋ nalomafa ma niti Jems. EaꞋ amam agufumi hiami ma esis Kristeni mape malomana. 19 Pol nandaꞋmam nemaf buꞋunai eaꞋ naꞋipama amamaga hiami ma God nagiambamana nandaꞋam laꞋafena esis amam nematawa epes hiesi sololama Godi.

Pol nameꞋ basef amam agufumi eaꞋ nafeꞋ nawis ipat luꞋunai Godi

20 Amam mameꞋam eaꞋ, mafela agel Godi luꞋuna. EaꞋ maꞋipa Pol maꞋi, “Sahalomafa, ineꞋ negawa esis Juda tausen hiesi endilisi sombaleꞋefa Jisas sataga Kristen. EaꞋ Kristen isima hiesi laꞋifis endilisi ma saila miꞋuli anama God fowaꞋ nasoꞋ Mosesanai. 21 EaꞋ enis epes sambasoꞋmas saꞋipasa ineꞋ naꞋama saꞋi, ‘Pol naꞋipa esis Juda safeꞋ sape salomas anona wambel enis epes hiesi owaꞋ Judaisi. NaꞋipasa esis sokwaha miꞋuli anama fowaꞋ God nasoꞋ Mosesanai.’ Anan naꞋi, ‘IpeꞋ ina petopaꞋ alopa amam soꞋumi ipeꞋimi eaꞋ ipeꞋ ina ataꞋ pilana wapotiꞋ waf fowaꞋinai, hapainai.’ Enis epes someꞋ basef ineꞋ naꞋiami deiꞋ saꞋiam naꞋama. 22 ApeꞋ mogawa endilisi atuwasi esis Kristen Judaisi someꞋ basefa ineꞋ nafiꞋi nataga. NaꞋama deiꞋ afaꞋ ataꞋ ondaꞋam wiꞋimama? 23 EaꞋ afaꞋ waꞋi wiꞋipina anona wafa ineꞋ nendaꞋana naꞋama. AfaꞋ anom amam biamibiam maꞋi basef endilisimi maloma Goda mondaꞋ anom amamaga. 24 EaꞋ ineꞋ neꞋwa amam pila waf anama nendaꞋepa petaga boꞋwepa ma naep Godi. IneꞋ netal otamba amamumi wapotiꞋ amam migiꞋma waf esis Judai ma mando balagah amamumi. IneꞋ nendaꞋam naꞋama, epes hiesi sogawa basef amama esis sandaꞋmenam ineꞋi, amama basoꞋmaimi atom. EaꞋ sogawa ineꞋ naila miꞋuli anama. 25 EaꞋ esis Kristen owaꞋ Judaisi, apeꞋ mandaꞋ basef mafeꞋmasi maꞋipasa basef amama fowaꞋ mowaꞋami. Esis sindumafuma sope andeandeꞋ naꞋama. Esis ina seaꞋ mafis saham sasoꞋ god basoꞋamunai eaꞋ ina seaꞋ esimbel eaꞋ ina seaꞋ mafis amama sowaꞋ bagafowa ma afumi eaꞋ ina sondaꞋ waf aonai soꞋa waulanai, owaꞋ.”

26 EaꞋ Pol naoꞋwa amam amama ma wafilu naila waf hianai ma nondaꞋ anan nataga boꞋona ma naep Godi noloma amam. Anan nandaꞋam naꞋama nafeꞋ nawis ipat luꞋunai Godi naꞋipa amam pris. NaꞋipama nemaf anama atuwasi anan noꞋwa amam amama mifiꞋi ma amam pris mondaꞋ ofa mondolali ma amam atona etina motaga boꞋoma naep Godi.

Amam Juda mombaloꞋ Pol nomon ipat luꞋunai Godi sandaꞋ lotuwanai

27 Nimeguf amama 7-peleim felefeleꞋma hiꞋilam, anom Juda mape etap hiagoma Esiai mati Pol nape nomon ipat luꞋunai Godi eaꞋ mafela ukup esis amam nematawa hiesi ma mombaleꞋana. 28 EaꞋ soga saꞋi mehip naꞋama saꞋi, “IpeꞋ epes Israelipei, pigiambamapa aman anama naꞋipa epes hiesi wambel hiagoma nasambala epes hiesi Israela miꞋuli anama Godi fowaꞋ gani Moses nawalipasanai naloma ipat luꞋunai Godi wapotiꞋ. EaꞋ ina amama atom, owaꞋ. Anan naoꞋwai enis epes owaꞋ Judaisi safiꞋi sawisi nomon ipat anama sandaꞋana aona.”

29 DeiꞋ main, fowaꞋ amam mati anona aman Trofimus Efesusinai owaꞋ Judainai nape naloma Pol taun anama. EaꞋ amam ukup maꞋi Pol naoꞋwana mafeꞋ mawis nomon ipat anama. OwaꞋetin. MambasoꞋmas.

30 EaꞋ amama atom deiꞋ esis hiesi sape Jerusalemi sohafel gegelalasis kwapeteꞋas ma basef amama saꞋi sondaꞋ wandaf. EaꞋ sasagih safiꞋi sondowaꞋanima sawis ipat nomon sombaloꞋ Pol sahondeꞋana nawisi andeꞋ. EaꞋ mehip etin sowalowa utagw ipat anama.

Soldia Dembinai numafi soldia hiami Romumi nofaꞋ Pol

31 Esis saꞋi soha Pol nogaꞋ, eaꞋ basef mafeꞋ matagama soldia dembinai numafi amam soldiai. Basef maꞋiam naꞋama maꞋi, “Esis Jerusalem hiesi sohafel gegelalasis kwapeteꞋas saꞋi sondaꞋ wandaf.”

32 EaꞋ mehip anan naoꞋwa anom soldia masagih makiniꞋ ma esis hiesi. EaꞋ amam Juda mati anan ofisa dembinai naoꞋwa amam soldia, makwaha Pol ina ataꞋ mahana wapotiꞋ, owaꞋ.

33 Soldia anama dembinai nafiꞋi felefeleꞋ nombaloꞋ Pol naꞋipa amam soldia mowaꞋ lagof ananimi sen biefina. EaꞋ nahaliꞋ esis naꞋi, “Anan emi? Anan nandaꞋ main?”

34 Amam nematawa hiesi sohafel saꞋi basef. EaꞋ esis ina sagwam mafeꞋ etifigin, owaꞋ. Sagwam mafeꞋ deindei. EaꞋ sandaꞋ salamala Pol saꞋi sohana saꞋi mehip, eaꞋ ofisa dembinai ina nogawa basef ofagema asasimi, owaꞋ. EaꞋ naꞋipa amam soldia ma moꞋwa Pol nafeꞋ nuwis ipat amam soldiai. 35 EaꞋ Pol nafeꞋ nataga bulasan salata ipat anama, esis amam nematawa laꞋifis endilisi ma sohana. NaꞋama amam soldia mafelona mofaꞋana mafeꞋ.

36 EaꞋ esis amam nematawa hiesi saꞋi mehip saꞋi, “Hana ma afuna, hana ma afuna!” EaꞋ amam soldia mafelana mefaꞋana mafeꞋ maꞋi muwis ipat.

Pol naꞋipa esis Juda ma baleꞋef kofagona ananinai

37 Amam soldia maꞋi mofaꞋ Pol mofeꞋ muwis ipat amamunai nomon, eaꞋ Pol nahaliꞋ ofisa dembinai naꞋi, “AeꞋ aꞋi iꞋipina anom basef o owaꞋ?”

EaꞋ soldia anama dembinai naꞋipana naꞋi, “IneꞋ negawa diga Griki?
38 AeꞋ aꞋi ineꞋ aman Isipinai fowaꞋ nogota anama nafela wandaf napaꞋ naloma gavmani eaꞋ naoꞋwa amam 4,000-peleim mahapila bainahi naoꞋwam mafeꞋ anama wafiguma epes aꞋagoma.”

39 EaꞋ Pol naꞋi, “OwaꞋ. AeꞋ aman Judaiwei. Wambel aeꞋanai Tarsus etap hiagoma Silisia. EaꞋ aeꞋ aman anona wambel luꞋunai agel luꞋunai. IneꞋ niꞋi awi, aeꞋ iꞋipasa anom basef esis amam nematawa.”

40 EaꞋ soldia anama naꞋi ahoꞋmana naꞋi. Pol naitu bulasan anama, nafela lagel nandaꞋana deꞋindaꞋ ma esis amam nematawa sosopama malogof. EaꞋ Pol naꞋipasa basef diga Hibrui.

Copyright information for `AOJFILIFITA