Acts 26

Pol nawalapa basefa dembinai king Agripa

EaꞋ Agripa naꞋipa Pol naꞋi, “DeiꞋ ineꞋ negwa basef amama amam mambasoꞋmena.”

Pol nafela lagel naꞋi basef ananimi naꞋi,
“King dembinai Agripa, aeꞋ aꞋi egwa basef amama hiami amam Juda mambasoꞋma aeꞋami. AeꞋ okom naꞋi andeandeꞋma aꞋi ewalapa basef aeꞋami ma naep ineꞋimi. DeiꞋ main? IneꞋ negawa andeandeꞋma waf apeꞋ Judai naloma amamaga apeꞋ ukup mapomam mafeꞋ deindeiꞋmami. Amama atom deiꞋ aeꞋ aꞋi ineꞋ nemeꞋ basef aeꞋami, okom ineꞋinai ina iwanina mehip, owaꞋ.

FowaꞋ ape afiꞋi afiꞋi deiꞋ feꞋ anama aeꞋanai esis Juda hiesi sogawa. FowaꞋ ataꞋ saꞋowe ape etap aeꞋanai eaꞋ afeꞋ ape Jerusalem wapotiꞋ. FowaꞋ gani esis sogawa aeꞋ. IꞋi ukup asasimi miꞋi aꞋe, sowalapa basef amama ma waf aeꞋ andaꞋanai. Esis sogawa aeꞋ aila waf epes hiesi apeꞋ Farisi. Waf anama ahifina endilisi, nikilaꞋ waf hianai anona lotu apeꞋinai. EaꞋ basef ofagema ma kot naꞋama. AeꞋ embaleꞋef endilisi ma God nefela sagaꞋi sohafel wapotiꞋ, amama atom. AeꞋ embaleꞋef ape ehafa God nondaꞋ amamaga amama motaga siꞋi fowaꞋ naꞋipa akupapa apeꞋimi Judai. Amama atom deiꞋ esis sandaꞋ kotimi. Wambotagw apaꞋimi 12-peleim mandaꞋ lotuma God owamb alip eaꞋ mombeleꞋef endilisi mape mohafa amama atom. DeiꞋ aꞋipa ineꞋ dembinai king, aeꞋ wapotiꞋ embaleꞋef ape ehafa amama. EaꞋ naꞋama esis Juda sambasoꞋme.”

Pol naꞋipa king Agripa eaꞋ nandamboma naꞋipa amam Juda naꞋi, “DeiꞋ maina ipeꞋ paꞋi basef ina endilisimi ma God owagama nefela esis isima sagaꞋi wapoti? IpeꞋ pembaleꞋefa basef amama.

FowaꞋ aeꞋ wapotiꞋ okom naꞋi aeꞋ endaꞋ amamaga hiami ma ehagofa agel Jisas Nasaretinai. 10 AeꞋ andaꞋam naꞋama etina enis epes gani Jerusalem. Amam pris dambami maseꞋe pepel andaꞋ kalabusima amam nematawa hiesi Godi. Nemaf anama amam pris dambami maꞋi moha enis Kristen sogaꞋ, aeꞋ wapotiꞋ aꞋi aꞋe. 11 EaꞋ nimeguf hiami aeꞋ aseꞋas nimanimi Kristen isima ahas nomon ifagw esis Juda saꞋi basef sapeimi hiami. AeꞋ aꞋi endaꞋ esisa sondaꞋ Dembinai findiwana ma sokwaha basef Dembinai. AeꞋ okom wandafuna endilisi ma esis, ailas afeꞋ anona wambel laogoma luꞋwagoma.

Pol naꞋi basef nawalapama nataga Kristen namboma okom naila God

(Ap 9:3-19; 22:6-16)

12 EfaꞋ pepela amam pris dambami masapaꞋe afeꞋ Damaskus. 13 AeꞋ aꞋipa ineꞋ dembinai king, ma aon nahagasom aeꞋ aila eaf afeꞋ, ati howalogon nisilaꞋi heven nikilaꞋ aon alipunai. Howalagon nafiꞋi nolalowe aloma amam mafeꞋ malumai. 14 AfaꞋ hiafai waꞋoh etap eaꞋ aeꞋ ameꞋ anona malogel naꞋi diga Hibrui naꞋi, ‘Sol, Sol, deiꞋ maina ineꞋ nandaꞋ maol nahambombaga aeꞋ? IneꞋ nandaꞋ maol naha anama ina negawa. DeiꞋ nefaꞋ nimanimi bolam siꞋi anona naha bulmakau ananimi bolam nanindinama nafeꞋ andeandeꞋ.’

15 EaꞋ ahaliꞋana aꞋi, ‘Dembinai ineꞋ emi?’

EaꞋ Dembinai naꞋi, ‘AeꞋ Jisas, ineꞋ nahambombage.
16 EaꞋ ineꞋ hafel nitu. AeꞋ afiꞋmai ineꞋ ma amamaga amama. AeꞋ aꞋi esaheꞋena ma nihapila maol aeꞋanai, newalapa basefa amamaga ineꞋ natoloma aeꞋi. EaꞋ amamaga amama owagama aeꞋ ihiꞋambenam. 17 Nambimb aeꞋ etagahina lagof esis epes hiesi ineꞋisi Juda eaꞋ etagahina ma lagof isima enis epes sololama Godi wapotiꞋ. AeꞋ esapaꞋena nefeꞋma epes isima. 18 Ama newala naep asasimi ma esis sowaꞋ alafugaha akota waf aonai somboma opalef sifiꞋmai howalagon ma sokwaha pepel Satani sifiꞋmai God. Esis sombaleꞋefa aeꞋ ma ekwaha waf aonai esis sandaꞋanai. Ama sofaꞋ amamaga buꞋwami soloma enis amam nematawa God nandaꞋas boꞋwes ananisi etisi.’

Pol naꞋipa dembinai king Agripa ma maol anan nandaꞋana Dembinai

19 Dembinai king Agripa, aeꞋ ati amamaga amama mataga heveni eaꞋ ina esambala basef amama, owaꞋ. 20 AeꞋ aliꞋ awalapa basefa esis amam nematawa sape Damaskusi eaꞋ awalapama epes sape Jerusalemi eaꞋ awalapama esis sape etap hiagoma Judia eaꞋ afeꞋ awalapama isima sololama Godi wapotiꞋ. AeꞋ awalapa basefa pendaꞋ maol peloma waf buꞋunai nendahama epes somboma opalef sefeꞋma God. 21 AeꞋ andaꞋam naꞋama eaꞋ ofagema amama atom deiꞋ esis Juda sombaleꞋe ipat luꞋunai Godi saꞋi sehe egaꞋ. 22 NaꞋama God nagiambame afiꞋi afiꞋi ataga deiꞋ aitu naꞋae eaꞋ awalapa basef aꞋipa epes hiesi agof aꞋasi saloma ipeꞋ agufipei wapotiꞋ. AeꞋ ina ewalapa anom basef, owaꞋ. Awalapa basef amama Godi atom fowaꞋ amam profet maloma Moses maꞋiami ma amamaga owagama meatagai. 23 Amam maꞋiam naꞋama maꞋi, ‘Dembinai Krais ataꞋ nofaꞋ nimanimi, ma nambimb notanima nohafel hiꞋagif niliꞋma epes hiesi. Ama Anan nowalapa basefa epes hiesi sogawam siꞋi howalagon nikilaꞋi nififima esis ananisi soloma isima sololama Godi wapotiꞋ.’ ”

Pol naꞋipa dembinai king Agripa nombaleꞋefa Jisas

24 Pol naꞋipas naꞋama eaꞋ, Festus noga naꞋi basef laꞋifimi naꞋama naꞋi, “Pol, ineꞋ okom nololaina! IneꞋ nati buk hiami natalifam nogawam deiꞋ gawa anama luꞋunai nandaꞋena okom nololaina!”

25 EaꞋ Pol nagwamana naꞋi, “IneꞋ aman dembinai Festus, aeꞋ ina okom nololae, owaꞋ. AeꞋ okom napaewe deiꞋ aꞋi endilisi. 26 IneꞋ dembinai king negawa hiꞋalam amamaga amama hiami. EaꞋ aeꞋ deiꞋ awalapam aꞋiam aeꞋ ina umbamahe, owaꞋ. AeꞋ egawa amamaga amama hiami ina mandambahoꞋma naep maloma aligah ineꞋimi, owaꞋ. IneꞋ natolom negawam eaꞋ. DeiꞋ main, amamaga amama ina mataga mandambahoꞋ, owaꞋ. 27 Dembinai king Agripa, ineꞋ nembaleꞋa basef Godi amam profet fowaꞋ mawalipasami o owaꞋ? AeꞋ egawa ineꞋ nembaleꞋam!”

28 EaꞋ king Agripa naꞋipa Pol naꞋi, “Nogota anama bandana ineꞋ naꞋi nendaꞋe etaga Kristen?”

29 EaꞋ Pol naꞋi, “Nogota bandana o laona andeandeꞋ. AeꞋ anda betena God naꞋama. AꞋi nambimb ineꞋ neloma epes isima hiesi deiꞋ pameꞋ basef aeꞋami petaga Kristen naꞋama etin siꞋi aeꞋ. EaꞋ sen anama nowaꞋ aeꞋi, andaiwaꞋma nowaꞋepa.”

30 Pol naꞋiam naꞋama eaꞋ, dembinai king naliꞋ nohafel naitu naloma Bernaisi saloma gavman dembinai saloma epes isima sape salomasi.

31 EaꞋ sawis andeꞋ. Esis etis sandaꞋipama saꞋi, “Aman anama ina nandaꞋ anom amamaga awami ma nogaꞋ o nondaꞋ kalabus, owaꞋ.”

32 EaꞋ Agripa naꞋipa Festus naꞋi, “IꞋi aman anama ina nofala gavman dembinai Sisar ma nomeꞋanama kot, ineꞋ netagahana nofoꞋo wafifina.”

Copyright information for `AOJFILIFITA