b- Ap 6:2Ap 2:41; 16:5
c- Ap 6:31 Ti 3:7
d- Ap 6:5Ap 8:5
e- Ap 6:6Ap 13:3; 14:23
f- Ap 6:7Ap 2:41; 16:5
g- Ap 6:8Ap 2:43
h- Ap 6:92 Ti 1:15
i- Ap 6:10Lu 21:15
j- Ap 6:11Mt 26:59-61

Acts 6

Esis sandandepa amam 7-peleima migiambama amam aposel mandaꞋ maol Godi

Nogota anama esis alupusi saila Jisasi sataga hias endilisi. EaꞋ esis Juda hiesi enis saꞋi diga Griki safitap saloma enis Juda saꞋi diga Hibrui eaꞋ saꞋi, “Nimeguf hiami ipeꞋ pagiambama esis amam nematawa isima gwaꞋaimi maim aꞋasi, eaꞋ anowa nematawa alifiwai apeꞋiwai owaꞋ.”

EaꞋ amam aposel 12-peleim mati nimanimi amama eaꞋ mofalai esis alupusi isima hiesi safiꞋi maꞋipas maꞋi, “IꞋi afaꞋ okwaha maol anama owalipasa basef Godi ma otambeꞋam gwaꞋaimi, naꞋama ina andeandeꞋ, owaꞋ. IpeꞋ Kristen alupipei, ipeꞋ ataꞋ pendandepa anom amam 7-peleim laꞋafena ipeꞋ mape andeandeꞋma naep esis amam nematawai, Ambal BuꞋunai Godi nape napaim siꞋinama amam nomonas buꞋwami mapaimi. Ama afaꞋ ondaꞋam mopoma mumafi maol anama. EaꞋ afaꞋ opoma ondaꞋ beten etin eaꞋ wiꞋipasa basef Godi amam nematawa wigiambamas.”

Amam nematawa hiesi ukup maꞋi basef amama. EaꞋ sandandepa Stiven, anan nembaleꞋefa Jisasi ma Ambal BuꞋunai Godi napaina nape siꞋinamana. EaꞋ sandandepa Filip naloma Prokorus maloma Nikanor naloma Timon naloma Parmenas naloma Nikolas. Aman anama Nikolas Antiokinai, fowaꞋ nafiꞋi naila waf esis Judai. EaꞋ esis hiesi sandaꞋ amam amama maitu felefeleꞋma naep amam aposeli mawamona lagofa amam mandaꞋmam betena mondaꞋ maol anama.

EaꞋ basef Godi mafeꞋagon hiꞋalogon. Amam nematawa hiesi sape Jerusalemi sataga alupusi Jisasi sataga hias endilisi. EaꞋ pris amama hiami wapotiꞋ mombaleꞋefa Jisas mailana.

Amam Juda mandaꞋ kotima Stiven

God nandahowema Stiven nagiambamana. EaꞋ nandaꞋana laꞋifina, nandaꞋ ikwaf laꞋifinai hianai naninani laꞋafena esis amam nematawa. EaꞋ anom amam mohafel maꞋi basef mandahihianama maloma Stiven. Amam amama fowaꞋ mandaꞋ maol mape owina enis epes eaꞋ deiꞋ mape wafifim.
Amam amama maloma enis epes mandaꞋ lotu anona ipat esis Juda saꞋi basef sapeinai, ipat anama sofalana saꞋi FRIMAN.
,
b, c, d, e, f, g, h, i, j 

EaꞋ sofalana amam wambel Sairini naloma Aleksandria anona etap hiagoma Silisia naloma etap hiagoma Esia.
10 Ambal BuꞋunai Godi naseꞋana gawa buꞋunai Stiven. Amam amama hiami maꞋi basef mandahihianama maloma Stiven eaꞋ amam ina laꞋifima miꞋi basef mikilaꞋana, owaꞋ. 11 EaꞋ mandaꞋ anona waf basoꞋmaimi ma moha Stiven nogaꞋ. EaꞋ mofaꞋai anom amam maseꞋam anama otamba maꞋi basef maꞋi, “AfaꞋ wameꞋ anan naꞋi basef nandaꞋ Moses findiwana eaꞋ nandaꞋ God findiwana wapotiꞋ.”

12 EaꞋ amam mafela opalef esis amam nematawai saloma amam agufumi asasimi maloma amam mawalipasa miꞋuli Godi. EaꞋ esis safeꞋma Stiven sombaloꞋana sofaꞋana safeꞋma amam dambami Juda mumafi koti. 13 EaꞋ sandaꞋ anom amam maitu ma mambasoꞋmana ma anom basef basoꞋmaimi. Amam amama maꞋi, “LaꞋelaꞋef aman anama naꞋi basef awami ma ipat luꞋunai Godi naloma miꞋuli fowaꞋ gani God naꞋipa Mosesanai. 14 ApeꞋ mameꞋ anan naꞋi, ‘Aman anama Jisas Nasaretinai nambimb nohambombaga ipat anama luꞋunai Godi eaꞋ nondaꞋ anona waf dambainai nohoꞋofa waf hianai fowaꞋ gani Moses naꞋipapanai.’ ”

15 EaꞋ amam hiami mandaꞋ kolas etifigin ipat esis Juda sandaꞋ kotanai mati Stiven eaꞋ mati amaga ananinai nafifil nataga siꞋi amaga anona enseli.

Copyright information for `AOJFILIFITA