Acts 8

Sol naha esis Kristen

EaꞋ Sol okom atotona naloma amam maha Stiven nagaꞋi.

Nogota anama esis amam nematawa sandaiwaꞋma esis Kristen sape Jerusalemi, sahas saseꞋasa nimanimi luꞋwami. EaꞋ amama atom deiꞋ esis sombaleꞋefanai safaꞋ safeꞋ anama etap hiagoma Judia naloma Samaria. EaꞋ amam aposel atom ataꞋ mapani laꞋelaꞋef Jerusalem.
Anom amam maila waf Godi andeandeꞋi mofaꞋ Stiven mawana malopana endilisi. EaꞋ Sol nafela maol nandaꞋana naha esis Kristen. Anan nafeꞋ nawis ifagw hiami atona etin nofaꞋai amam nematawa hiesi sembaleꞋefa Kraisi. EaꞋ nahondeꞋas nofaꞋas nafeꞋ nandaꞋas sandaꞋ kalabus.

Amam mawalapa basef buꞋwami etap hiagoma Samaria

Esis Kristen safaꞋ safeꞋ wambel hiagoma sawalapa basef buꞋwami Godi saꞋipasam. EaꞋ Filip nowala nafeꞋ anona wambel etap hiagoma Samaria nawalipasa basef buꞋwami naꞋi Jisas anan Krais, God nandandepana nasapaꞋana nafiꞋi. Amam nematawa hiesi sameꞋ basefa anan eaꞋ sati ikwaf laꞋifinai hianai naninani anan nandaꞋanai eaꞋ semeꞋam andeandeꞋma basef ananimi. Ikwaf anama naꞋama. Amam nematawa hiesi ambagof awami mapaisi, ambagof amama malef wigoꞋ kwapeteꞋam endilisi eaꞋ makwaha esis mawisi mafaꞋ mafeꞋ. EaꞋ epes isima lagof boꞋwagah awamisi, enis isima bihiguf mondalaꞋasi, esis hiesi sataga boꞋwes wapotiꞋ. EaꞋ deiꞋ esis wambel anama sofaꞋ danifel luꞋunai.

EaꞋ anona aman nape wambel anama agilinama Saimon. Aman anama fowaꞋ nandaꞋ ambagofi nape laꞋelaꞋef nafiꞋi nataga deiꞋ nemaf anama. EaꞋ nandaꞋ ukup esis amam nematawa Samariaisi ukup matamea mafeꞋ. Anan Saimon naꞋiam naꞋi, “AeꞋ aman dembiwei.” 10 EaꞋ esis amam nematawa hiesi agof aꞋasi saloma agufisi, esis hiesi semeꞋam andeandeꞋ basef Saimoni. SaꞋiam saꞋi, “Aman anama anan nofaꞋ pepel anama dembinai Godi sofalana saꞋi pepel luꞋunai.”

11 EaꞋ esis laꞋifisa saila basef ananimi. DeiꞋ main, nimeguf hiami anan nandaꞋ waf naninani hianai laꞋifinai nandaꞋ ambagof nahapila muꞋuhup. EaꞋ satolom ukup matamea mafeꞋ.

12 EaꞋ Filip nawalipasa basef buꞋwami esis hiesi. Nawalipasa agel Jisas Kraisi ma siowis wambota Godi numafias. EaꞋ sombaleꞋefa basef amama sofaꞋ baptais. Esis amam nematawa wapotiꞋ. 13 EaꞋ aman anama Saimon wapotiꞋ nembaleꞋefa Jisas eaꞋ nofaꞋ baptais nape naloma Filip. Anan nati Filip nandaꞋ ikwaf anama laꞋifinai naninani eaꞋ okom natanea nafeꞋ.

14 Amam aposel mape Jerusalemi mameꞋ basefa esis Samaria sefaꞋ basef Godi. NaꞋama masapaꞋ Pita naloma Jon mafeꞋma esis. 15 Amam biam mafiꞋi mataga mandaꞋ betena God nigiambamasa sofaꞋ Ambal BuꞋunai Ananinai. 16 DeiꞋ main, Ambal Godi ina deiꞋ nape nalomas, ataꞋ owaꞋ. Esis sofaꞋ baptais etina agel Dembinai Jisas. 17 EaꞋ amam biam mawamona lagofa esis eaꞋ sofaꞋ Ambal BuꞋunai Godi napais. 18 EaꞋ Saimon nati aposel amama biam mawamona lagof atoma esis sofaꞋ Ambal Godi. NaꞋama anan nofaꞋ moni ananinai nafiꞋmai amam naꞋipam naꞋi, 19 “IpeꞋ bipa peseꞋe pepel anama ma aeꞋ wapotiꞋ ma aeꞋ iꞋi ewamona lagofa enin epen, nefaꞋ Ambal BuꞋunai Godi.”

20 EaꞋ Pita nagwamana basef naꞋipana naꞋi, “AeꞋ aꞋi otamba ineꞋimi moloma ineꞋ pefeꞋ wambel aonai hel. Amamaga buꞋwami God naseꞋasam etin siꞋi presen, amama ineꞋ okom naꞋi wilama netalom otamba ineꞋimi? OwaꞋ. 21 IneꞋ owaꞋ boꞋwena neandaꞋ maol anama Godi afaꞋ wandaꞋanai. OwaꞋ! DeiꞋ main, okom ineꞋinai ina boꞋonama naep Godi, owaꞋ. 22 IneꞋ newaꞋ alafugama waf anama aonai ineꞋinai nemboma opaf nefeꞋma God. EaꞋ nendaꞋ betena Dembinai ma nokwaha waf aonai nape okom ineꞋinai. 23 DeiꞋ main, aeꞋ ati ineꞋ kowalena endilisi ma presen buꞋunai God naseꞋafa anai. EaꞋ aeꞋ egawena, waf anama aonai nembaleꞋena laꞋelaꞋef nape siꞋi kalabus.”

24 EaꞋ Saimon nagwa basef naꞋi, “IpeꞋ bipa pendaꞋ betena Dembinai ma anan nigiambame. NaꞋama amama ipeꞋ paꞋiami motagame.”

25 EaꞋ Pita naloma Jon maꞋipasa basef eaꞋ naꞋipasam maloma amamaga amama Dembinai nagiambamam eaꞋ. MaꞋipasam eaꞋ, motanima mafeꞋ Jerusalem. AtaꞋ nafeꞋ eaf, mawalapa basef buꞋwami Godi etap hiagoma esis Samaria.

Filip nawalapa basef buꞋwami ma aman Itiopiainai

26 EaꞋ anona ensel Dembinai naꞋipa Filip naꞋi, “IneꞋ nefeꞋ lambihilifinama kwaꞋwaha Jerusalem nikiniꞋi Gasa. Eaf anama fowaꞋ esis safeꞋanai. DeiꞋ owaꞋ. Eaf anama nape anama wafiguma fatauguma epes aꞋagoma.”

27 EaꞋ Filip nohafel nafeꞋ. EaꞋ natagama anona aman Itiopiainai eaf anama. Anan aman dembinai numafi otamba hiami ma kwin akwama dembeꞋwi gavman kumafi esis etap hiagoma Itiopia, sofalaꞋw saꞋi Kandasi. Aman anama anom amam matopaꞋmona alop ananinai. NimbewaꞋ nafiꞋi Jerusalema nandaꞋ lotu, 28 deiꞋ naꞋi notanima nefeꞋ. Anan natoma karis ananinai siꞋi wilkar eaꞋ natoma nati basef mape buk Baibeli fowaꞋ gani profet Aisaia nandaꞋam eaꞋ nafeꞋ. 29 EaꞋ Ambal BuꞋunai Godi naꞋipa Filip naꞋi, “IneꞋ foꞋo felefeleꞋma aman anama nefeꞋ neloma karis nanima.”

30 EaꞋ Filip nasagih nafeꞋ felefeleꞋma karis anama, eaꞋ nameꞋ aman anama natalifa basef amama Aisaia nandaꞋami.

EaꞋ Filip nahaliꞋana naꞋi, “IneꞋ negawa basef amama ofagema deiꞋ natalifam nafiꞋi?”

31 EaꞋ aman anama nagwamana basef naꞋi, “IꞋi enin epen owaꞋ nihiꞋambe, deiꞋ egawa basef amama iꞋimama?”

EaꞋ naꞋipa Filip naꞋi, “IneꞋ letowi netoma karis neloma aeꞋ.”

32 Basef amama tuꞋwanim Godi anan natalifimi maꞋiama Jisas maꞋi,

“Esis saoꞋwana nafeꞋ siꞋi sipsip ama saꞋi sohana nogaꞋ. Anan siꞋi sipsip noganai esis sahapilana satopaꞋmana awif ananimi, tol napan. EaꞋ naꞋama etina aman anama, ina naꞋi anom basef, owaꞋ.
33 Esis sasambalona endilisi eaꞋ ina sandaꞋmana basef andeandeꞋ ma kot ananinai, owaꞋ. Anan awasi bafasana aꞋana ma enis epes sitilis siꞋipa enis epesa esis, owaꞋ. DeiꞋ main, sahana nagaꞋ ma ina ataꞋ napan etap anaeꞋ wapotiꞋ, owaꞋ.”
34 EaꞋ aman anama Ithiopianai naꞋipa Filip naꞋi, “AeꞋ aꞋi ihaliꞋina. Profet anama naꞋi emi ma deiꞋ nandaꞋ basef amama? NaꞋiama anan atona o naꞋiama anona epen?”

35 EaꞋ Filip naꞋi basef nawalapama aman anama. Nahafel naꞋipama basef amama tuꞋwanim Godi aman anama naꞋiami mafeꞋ mafeꞋ eaꞋ nawalapai basef buꞋwami Jisasi.

36 Amam biam mafeꞋ, matagama anona dumb. EaꞋ aman anama naꞋipa Filip naꞋi, “Niti dumb notah anama. IneꞋ naꞋi aꞋe ma aeꞋ efaꞋ baptais?”

37 [EaꞋ Filip naꞋi, “IꞋi ineꞋ nembaleꞋefa Dembinai endilisi ma okom ineꞋinai, wila.”

EaꞋ nagwamana basef naꞋi, “AeꞋ embaleꞋefa Jisas Krais anan nogalomana Godi.”]

38 NaꞋiam eaꞋ, karis notawa eaꞋ Filip naloma aman anama dembinai misilaꞋ mafeꞋ mowala dumb anama. EaꞋ Filip napisiꞋana. 39 EaꞋ amam biam makwaha dumb mandegiai wataꞋita, mehip Ambal BuꞋunai Dembinai nofaꞋ Filip eaꞋ nafeꞋ. EaꞋ aman anama Ithiopiainai ina ataꞋ natolona wapotiꞋ, owaꞋ. EaꞋ anan nandanifel endilisi naila eaf ananinai nafeꞋ.

40 EaꞋ Filip nafeꞋ nataga Asdot. Anan nafeꞋ taun anama hiagoma ganigani nawalapa basef buꞋwami Godi. NafeꞋ nafeꞋ, notanima nafeꞋ nataga taun Sisaria.

Copyright information for `AOJFILIFITA