Acts 9

Sol namboma opaf nataga Kristen

(Ap 22:4-16; 26:9-18)

FowaꞋ basef amama ataꞋ owaꞋ motagae, nogota anama Sol nandaꞋam naꞋama. Anan naꞋi basef laꞋifimi endilisi ma naha esis alupusi saila Dembinai nohas sogaꞋ. EaꞋ nafeꞋma pris dembinai nape naliꞋma pris hiami. NaꞋipana eaꞋ pris anama nandaꞋ basefa pas mafeꞋma agufumi hiami mumafi ifagw esis Juda saꞋi basef sapeimi wambel Damaskus. EaꞋ naseꞋana pasa basef amama Sol. MaꞋiam naꞋama maꞋi, “IꞋi Sol niti enis amam nematawa saila eaf anama dambainai sape Damaskusi, nondaꞋ kalabusimas nombaleꞋas nefaꞋas sefeꞋ Jerusalem.”

EaꞋ Sol nafeꞋ nataga felefeleꞋma Damaskus, mehip anona nafifili howalagon nafiꞋi nisilaꞋi heven eaꞋ mafifimana. EaꞋ nowa naꞋoh etap eaꞋ nameꞋ anona maf naꞋipana naꞋi, “Sol, Sol, deiꞋ maina ineꞋ nahambombaga aeꞋ?”

EaꞋ Sol nahaliꞋana naꞋi, “Dembinai, ineꞋ emi egafina?”

EaꞋ maf anama naꞋi, “AeꞋ Jisas ineꞋ nahambombaga aeꞋ.
DeiꞋ ineꞋ hafel nefeꞋ niwis taun luꞋunai. Nambimb anona aman nifiꞋmai ineꞋ niꞋipina amamaga ineꞋ nambimb neandaꞋami.”

EaꞋ amam mafeꞋ maloma Soli mameꞋ maf anama eaꞋ ina mati anona epen, owaꞋ. EaꞋ Sol nohafel naꞋi niti, owaꞋ. Nati owamb atona. EaꞋ amam mahapila lagof ananimi mofaꞋana mafeꞋ mawis Damaskus.

Anan nati owamb atona nape nimeguf wanom eaꞋ ina naꞋ gwaꞋaimi embel maim, owaꞋ.

10 EaꞋ anona alupunai Jisasi nape naꞋama Damaskus, agilinama Ananaias. EaꞋ naꞋoh nandondoꞋoh nati Dembinai nofalana naꞋipana naꞋi, “Ananaias!”

EaꞋ anan naꞋi, “Dembinai, aeꞋ ape naꞋae.”

11 EaꞋ Dembinai naꞋipana naꞋi, “IneꞋ hafel foꞋo eaf anama saꞋi usiꞋinai nefeꞋ ipat Judasi eaꞋ niti anona aman Tarsusinai, agilinama Sol. DeiꞋ anan nandaꞋ beten nape. 12 Sol naliꞋ naꞋoh nandondoꞋoh eaꞋ nati anona aman agilinama Ananaias atuwasi nifiꞋi nuwisi nowamona lagofa anona nondaꞋ naep miti andeandeꞋ wapotiꞋ.”

13 EaꞋ Ananaias nagwamana basef naꞋi, “Dembinai, aeꞋ ameꞋ basef hiami ma epen anama, waf aonai hianai anan nandaꞋana esis amam nematawa ineꞋisi gani Jerusalem. 14 Anan nofaꞋ agel luꞋunai eaꞋ ma amam pris dambami ma nombaloꞋ amam nematawa sandaꞋ betena agel ineꞋinai wambel anaeꞋ ma nandaꞋ kalabusimas.”

15 EaꞋ Dembinai naꞋipana nasapaꞋana naꞋi, “IneꞋ foꞋo. Aman anama nambimb nondaꞋ maol AeꞋanai. AeꞋ andandepana eaꞋ ma nefeꞋ niꞋipasa basefa agel aeꞋanai enis amam nematawa owaꞋ Judaisi soloma amam dambami king asasimi moloma esis Israel wapotiꞋ. 16 Nambimb aeꞋ ihiꞋambana nimanimi luꞋwami nefaꞋami ma nowalapa agel aeꞋanai. NaꞋama ineꞋ deiꞋ foꞋo netolona.”

17 EaꞋ Ananaias nafeꞋ nawis ipat anama nomon nasa lagofa Sol naꞋi, “Sahalome Sol, Dembinai Jisas natagamena eaf nogota anama ineꞋ nafiꞋi naꞋae. DeiꞋ nasapaꞋe afiꞋmai ineꞋ ma niti andeandeꞋ wapotiꞋ ma Ambal BuꞋunai Godi nope siꞋinama ineꞋ.”

18 EaꞋ amamaga mape masopama naep Soli siꞋi dunduf mafeꞋ mehip makwaha naep Soli mowa. EaꞋ naep ananimi mati wapotiꞋ, nohafel nofaꞋ baptais. 19 EaꞋ naꞋ gwaꞋaimi nataga laꞋifina wapotiꞋ.

Sol nawalapa basef buꞋwami Damaskus

Sol nape anom nimeguf naloma amam alupumi Jisasi Damaskus.
20 EaꞋ deiꞋ atef nafeꞋ ifagw hiami esis Juda saꞋi basef sapeimi nawalapa basef Jisasi naꞋi, “Jisas anan nogalomana Godi.”

21 Epes hiesi sameꞋ basef ananimi eaꞋ sohafel gegelalasis kwapeteꞋas saꞋi, “Aman anama nahambombaga amam nematawa sofala agel Jisasi wambel Jerusalem. EaꞋ deiꞋ nafiꞋi naꞋae ma nowaꞋ esis nondaꞋ kalabusimas nofaꞋas sefeꞋma amam pris dambami. EaꞋ maꞋuna aman anama atona.”

22 EaꞋ pepel Soli nataga laꞋifina nihiꞋamabas ma basef nawalipasami. EaꞋ esis Juda sape Damaskusi sameꞋ basefa anan. Esis ina laꞋifisa sogwa anom basef siꞋipanam, owaꞋ. Anan laꞋifina nihiꞋambas endilisi naꞋi, “Jisas anan Krais, God nandandepana nasapaꞋana nafiꞋi.”

Amam Juda mandaꞋmana waf aonai ma moha Sol afuna eaꞋ nafaꞋ nafeꞋ

23 Nimeguf hiami mafeꞋma eaꞋ, amam Juda maꞋi basef mandameꞋmama moha Sol nogaꞋ. 24 EaꞋ Sol nameꞋ basef amama amamumi. EaꞋ amam Juda hiami mape mumafi utagw hiami ma taun anama owamb alip wapotiꞋ ma maꞋi moha Sol nogaꞋ. 25 EaꞋ amam alupumi Soli mofaꞋana owamb mafeꞋ malata endalelemb nomon. EaꞋ malana nape anona holaf luꞋunai mapana mandelef malana nisilaꞋ endalelemb andeꞋ.

Sol nape Jerusalem

26 Sol nafeꞋ Jerusalem eaꞋ naꞋi nondakolas noloma esis alupusi Jisasi. EaꞋ esis hiesi umbamahasana. Esis ina sombaleꞋefana saꞋi anan alupunai Jisasi, ataꞋ owaꞋ. 27 EaꞋ Barnabas naoꞋwana mafeꞋma amam aposel eaꞋ naꞋipama Sol nati Dembinai eaf ma Dembinai naꞋipana basef anan. EaꞋ Barnabas naꞋipam naꞋi anan laꞋifina nawalapa basef naꞋipasama agel Jisasi Damaskus, deiꞋ anan ina ataꞋ umbamahana, owaꞋ.

28 EaꞋ deiꞋ sogawa anan wambota atona Jisasi nalomas nape laꞋafena esis. Anan laꞋifina nandaꞋ maol nafeꞋ Jerusalem anama hiagoma nawalapa basefa agel Dembinai. Anan ina umbamahana, owaꞋ. 29 NaꞋipasa basef Godi naloma amam Juda magawa diga Griki eaꞋ naꞋi basef nalomam mandahihianama. EaꞋ amam mandaiwaꞋma basef ananimi magolopa eafa mohana nogaꞋ. 30 Amam Kristen sahin owan mogawa amama, eaꞋ mofaꞋ Sol mafeꞋ makini Sisaria. EaꞋ masapaꞋana nafeꞋ nape wambel Tarsus.

31 DeiꞋ esis amam nematawa Kristen sape etap anama hiagoma Judia naloma Galili naloma Samaria sape opalef awanem sape andeandeꞋ eaꞋ esis Kristen sataga laꞋifis. Esis sape owina Dembinai eaꞋ Ambal BuꞋunai Godi nandaꞋas sataga laꞋifis opalef asasimi. EaꞋ esis Kristen sataga hias.

Pita nandaꞋ Inas boꞋona

32 Pita nafeꞋ wambel anama hiagoma eaꞋ nakiniꞋ nafeꞋ taun anama Lida wapotiꞋ nape naloma esis amam nematawa Godi sape wambel anama. 33 EaꞋ nati anona aman Inas. Alop bihiguf ananimi magaꞋana, tol naꞋoh nala lehis nape nogota laona afagof 8-peleim. 34 EaꞋ Pita naꞋipana naꞋi, “Inas, deiꞋ Jisas Krais nandaꞋena boꞋwena wapotiꞋ. IneꞋ hafel nendondomba lehis ineꞋimi andeandeꞋ.”

Pita naꞋipana eaꞋ deiꞋ etef nohafel.
35 EaꞋ epes hiesi wambel anama biefina Lida naloma Saron satolona samboma opalef safeꞋma Dembinai.

Tabita kwagaꞋ, Pita nafelaꞋw kohafel wapotiꞋ

36 Anona wambel Jopa anoꞋw nemataꞋw kwaila Jisasi kwape, agel akwaꞋunai Tabita. Diga esis Griki sofalaꞋw saꞋi Dorkas, agel anona mafin saꞋi dia. LaꞋelaꞋef akwaꞋw kwandaꞋ waf buꞋunai ma kwagiambama esis amam nematawa kwahusi ma gwaꞋaimi maim. 37 Nemaf anama awes nandaꞋakw kwagaꞋ. EaꞋ sasaꞋopa alop akwaꞋunai ma sowaꞋw. EaꞋ sofaꞋakw sambeꞋakw kwaꞋoh rum ilifanai. 38 Wambel Lida nape felefeleꞋ ma Jopa. EaꞋ esis alupusi Jisasi sameꞋ basefa Pita nape Lida, sasapaꞋ amam biam mafeꞋma anan mahaliꞋana naꞋama maꞋi, “IneꞋ nifiꞋmai afaꞋ. NiꞋi otaꞋ otaꞋ owaꞋ.”

39 EaꞋ Pita nohafel nafeꞋ nalomam, eaꞋ mafeꞋ mataga mofaꞋana mafeꞋ rum anama ilif akwaꞋw kwaꞋoma. Nematawa hiawai alifiwai wafiꞋi waitu felefeleꞋma Pita wape walopaꞋw. EaꞋ wihiꞋambana klos sagwegw maim akwaꞋw Dorkas kwagundisami nimbewaꞋ laꞋelaꞋef ataꞋ kwape kwalomawa. 40 EaꞋ Pita nagoloꞋma esis amam nematawa sawisi andeꞋ, nindiwa nembawa notawa nandaꞋ beten. EaꞋ namboma amaga ananinai nafeꞋma alop nemataꞋwi naꞋi, “Tabita, ineꞋ hafel.”

EaꞋ akwaꞋw naep mati kwati Pita kohafel kwape.
41 EaꞋ Pita nahapila lagel akwaꞋunai nafelaꞋw kwaitu. EaꞋ nofalai esis amam nematawa sombaleꞋefa Godi saloma nematawa awama alifiwai, nasoꞋ akwaꞋw kotanima kwafeꞋma esis. 42 Basef amama mafeꞋ anama hiagoma wambel Jopa eaꞋ esis amam nematawa hiesi sameꞋam sombaleꞋefa Dembinai. 43 Pita nape wambel anama Jopa nimeguf hiami. Anan nape naloma anona aman nandondomba agwafuh bulmakaumi agel ananinai Saimon.

Copyright information for `AOJFILIFITA