Colossians 3

God nafela apeꞋ eaꞋ maloma Krais

God nafela ipeꞋ eaꞋ pape laꞋifipa paloma Jisas Krais. Amama atom ipeꞋ ukup mopoma amamaga mape otaga ilifi, anama Krais nape agilinai felefeleꞋma lagel daisinai Godi. IpeꞋ okokoma amamaga mape ilifi laꞋelaꞋef. Amamaga mape etapi owaꞋ, hapaimi. DeiꞋ main, ipeꞋ pagaꞋ eaꞋ. IpeꞋ pape laꞋifipa paloma God, deiꞋ ambal namunai ipeꞋinai nape nandabahoꞋ siꞋi Krais deiꞋ nape nandambahoꞋ. Krais ofagonama ambal namunai apeꞋinai anona nemaf notaga nondawalap alihiguma, eaꞋ ipeꞋ wapotiꞋ petaga pefaꞋ nafifili Ananinai pelomana.

ApeꞋ mataga epes dambaipai eaꞋ

IpeꞋ peha waf aonai hianai etapanai opaf apinai nogaꞋ, waf anama naꞋama. Waf soꞋa waolanai naloma waf aonai, waf anama aonai ukup mohafemanai, ukup maꞋi anom amamaga enis epesi. Waf anama siꞋi waf saila god basoꞋomainai. Epes sandaꞋ waf anama hianai, okom wandafunai Godi anona nemaf notaga nogwana. FowaꞋ ipeꞋ etipa paila waf aonai anama hianai pape owina waf anama ukup mohafemanai.

EaꞋ deiꞋ ipeꞋ pekwaha anona waf aonai hianai naꞋama. Waf migimigahinai, ukup wandafum, opalef aom ma peha enis epes, waf basef awami findiwaimi, basef awami. IpeꞋ ina pembasoꞋma esis sahin owan, owaꞋ. DeiꞋ main, ipeꞋ pakwaha waf hianai aonai ma opaf apinai eaꞋ pataga dambaipa. God nandaꞋepa pataga dambaipa ma opaf namunai. 10 EaꞋ anan nandaꞋepa pataga dambaipa laꞋelaꞋef ma petaga naꞋama etin siꞋi Anan nape, Anan nandaꞋ opaf anama namunai ma apeꞋ mogawana endilisi. 11 EaꞋ deiꞋ Krais atona Dembinai nape naliꞋma epes hiesi. Esis Grik saloma esis Juda saloma enis owaꞋ Judaisi, esis anona diga, isima sape aolopi sololama waf buꞋunai, agufisi, agof aꞋasi, waf saꞋiana epes isima falafunai atona. Krais atona Dembinai nape naliꞋma epes isima hiesi, nape nomona epes hiesi hiꞋalas.

ApeꞋ mofaꞋ waf miti enis uwahipis

12 God anan nandandepepa eaꞋ pape amam nematawa ananipei okom nainailipa endilisi. EaꞋ ipeꞋ pendaꞋ waf buꞋunai naꞋama. IpeꞋ piti epes hiesi uwahipis laꞋelaꞋef pigiambamas pendaꞋas andeandeꞋ. IpeꞋ petalogofa ipeꞋ pepe owina enis epes, pendaꞋ waf soꞋumbilinai ma esis eaꞋ pepe piti esis sondaꞋmepa waf naninani aonai ipeꞋ ma tol pepe opalef awanem. 13 IꞋi enin epen ipeꞋini nendaꞋ waf aonai ma enin epen, ina negwamana waf aonai anan nandaꞋmananai, owaꞋ. NendaꞋan saꞋombeman nekwahomana waf aonai anan nandaꞋmenanai. Dembinai nakwaha waf aonai ipeꞋ pandaꞋanai eaꞋ. EaꞋ ipeꞋ wapotiꞋ pendaꞋam naꞋama etin. 14 IpeꞋ pendaꞋ waf anama buꞋunai hianai aliꞋ aꞋipipanai pilana. EaꞋ pendaꞋ anona waf buꞋunai wapotiꞋ. IpeꞋ ukup miꞋi sahin owan ipeꞋisi ma waf anama nakolasepa nandaꞋepa pataga etifipa.

15 Krais naseꞋapa opaf awanena apeꞋ eaꞋ opaf anama atona numafi ipeꞋ endilisi. God nofalepa pataga alop etifina nape opalef awanem. IpeꞋ pinifelona laꞋelaꞋef. 16 Basef Kraisi buꞋwami endilisi mope opalef ipeꞋimi nomon. IpeꞋ pendaꞋam naꞋama piwalipa esis sahin owan ipeꞋisi piꞋipasa gawa hianai naninani. IpeꞋ pinifela Goda opalef ipeꞋimi pelomana. EaꞋ pendaꞋ awalef mail Buk Sami eaꞋ pendaꞋ awalef lotuwimi eaꞋ pendaꞋ awalef mondaꞋ ambagof ipeꞋimi motaga laꞋifim. 17 Maim amamaga ipeꞋ nambimb piꞋiama basef o pendaꞋ maol, anama ipeꞋ pendaꞋama agel Jisasi. Ama agel ananinai ipeꞋ pinifela God Ahalomapa.

Waf amam nematawa sandasoꞋama

18 IpeꞋ nematawa, ipeꞋ pefeꞋ owina wauhupipa ipeꞋimi. Waf anama dendeꞋma ipeꞋ Kristen piandaꞋanai. 19 IpeꞋ amam wapotiꞋ, ipeꞋ ukup mimila wauhiamepa ipeꞋiwai. IpeꞋ ina pendaꞋ opalef awaumi aom, owaꞋ.

20 IpeꞋ batawisas wapotiꞋ, pemeꞋ basef mamasipei andeandeꞋma waf naloma basef asasimi hiami. Waf anama nandaꞋ okom Dembinai boꞋona. 21 IpeꞋ ahapas, ina pendaꞋ opalef batawisipei aom, owaꞋ. NaꞋama ukup asasimi aom.

Basef esis agof aꞋasi sandaꞋ maol sape owina esis agufisi

22 IpeꞋ agof aꞋepa pape owina enis epes pandaꞋ maolanasi, pila basef amama hiami agufumi. IpeꞋ ina pendaꞋ maola naep asasimi atom, owaꞋ. IpeꞋ umbamehepa ma Dembinai, deiꞋ opalef ipeꞋimi mope boꞋoma maol anama pendaꞋana andeandeꞋ. 23 EaꞋ maim amamaga ipeꞋ pandaꞋami, amama pendaꞋam laꞋifipa siꞋi pandaꞋ maola Dembinai atona. IpeꞋ ina pandaꞋ maola epes etis, owaꞋ. 24 DeiꞋ main, ipeꞋ pegawa anona nemaf Dembinai nofaloꞋmepa neseꞋepa amamaga buꞋwami ipeꞋ. Amama anan nandandepam maꞋoh maꞋoma ipeꞋ epes ananipei. IpeꞋ pape pandaꞋ maola Krais Dembinai apeꞋinai. 25 Emi egafis sandaꞋ waf aonai, esis anona nemaf sofaꞋ nimanimi luꞋwami mondahama waf esis sandaꞋanai. DeiꞋ main, God nawaloga epes hiesi agufisi agof aꞋasi ma ikwaf buꞋunai atona.

Copyright information for `AOJFILIFITA