Ephesians 3

Pol nandaꞋ maol nawalipa epes hiesi sololama Godi owaꞋ Judaisi

Krais nakolasa epes hiesi wambotagw biam esis Juda saloma esis ina Juda sataga etifis. Amama atom deiꞋ aeꞋ Pol, Krais Jisas nandaꞋe andaꞋ kalabusa agiambama ipeꞋ epes fowaꞋ pelolama Godi. Endilisi, apeꞋ hiapai mape etapi God nagiambamapa naꞋa. Amama anan naseꞋe ma imafiam endaꞋ maol ewalapam ewalipipam. Maol anama Anan nasiꞋianai nape naꞋama. Basef Ananimi buꞋwami fowaꞋ ataꞋ mandambahoꞋ, deiꞋ God nawalapameam alihim andaꞋam bandam mail pas amama. Ama iꞋi pitalifa basef amama, pegawa okom aeꞋanai ma basef hiami Kraisi maliꞋ mape mandambahoꞋ. FowaꞋ laꞋelaꞋef God ina nawalapam alihima enis epes, owaꞋ. EaꞋ deiꞋ Ambal BuꞋunai Ananinai nawalapam alihima afaꞋ aposel waloma amam profet ananifai. Basef amama buꞋwami Godi mape naꞋama. Epes hiesi owaꞋ Judaisi hiꞋalas fowaꞋ sololama Godi saloma ipeꞋ pataga etifipa paloma apeꞋ Israel. EaꞋ ipeꞋ hipei paloma apeꞋ Juda mofaꞋ amamaga buꞋwami hiami God naꞋi endilisi naseꞋapami ma lagel Krais Jisasi.

God nandandepa aeꞋ andaꞋ maol awalapa basef amama buꞋwami. Anan okom nainaili nagiambame naꞋa nandaꞋe laꞋifiwi, amama atom deiꞋ ape andaꞋ maol anama. Endilisi aeꞋ ape falafuwei agiꞋ endilisi ma amam nematawa hiesi Godi. EaꞋ Anan okom nainaili nagiambame naꞋa ma andaꞋ maol awalipa esis sololama Godi basef buꞋwami ma Krais. Waf anama naloma basef amama boꞋom endilisi mikilaꞋ gawa epes hiesi, eaꞋ ina laꞋifisa sagawa ofagema amama, owaꞋ. EaꞋ God nagiambamas naꞋa nihiꞋambasa okom Ananinai maloma waf hianai Ananinai epes hiesi. Okom anama naloma waf anama ananinai hianai damba damba nape nandambahoꞋ nafiꞋi nataga deiꞋ. EaꞋ deiꞋ nandaꞋ amamaga hiami hiꞋalam mataga mape naseꞋe maol anama awalapa amama mape mandambahiꞋi alihim. 10 FowaꞋ ataꞋ mandambahoꞋ, deiꞋ naꞋi esis amam nematawa Godi sombaleꞋefanai sihiꞋambam amam dembemi agufumi maloma amamaga pepel hianai nape heveni mogawa gawa Godi. Gawa anama hianai ananinai naninani luꞋuna saꞋona hiꞋalana. 11 Anan nandaꞋam naꞋama etin siꞋi okom ananinai atona nape laꞋelaꞋef naꞋiama lagel dembinai apeꞋinai Krais Jisasi atona. 12 ApeꞋ mape laꞋifipa maloma anan mombaleꞋefana. Amama atom apeꞋ ina umbamahapa ma mefeꞋma God, owaꞋ. ApeꞋ ukup laꞋifim endilisi eaꞋ deiꞋ mafeꞋ felefeleꞋma Anan. 13 EaꞋ deiꞋ aꞋipipa aꞋi nimanimi amama deiꞋ efaꞋama igiambamepa, naꞋama piti amama ukup aom, paꞋi ipeꞋ ina laꞋifipa, owaꞋ. Pepe laꞋifipa siꞋi ipeꞋ dembipei. DeiꞋ main, nimanimi amama magiambamepa.

Pol nandaꞋ betena esis Efesus ataꞋ sogawa andeandeꞋ waf Krais okom nainailasanai

14 AeꞋ okom naꞋi Krais nakolas apeꞋ Juda maloma ipeꞋ ina Judaipei mataga etifipa, amama atom deiꞋ indiwa nembawa etawa andaꞋ beten anifela Ahalome. 15 ApeꞋ hiapai mape etap maloma sape ilif wapotiꞋ, apeꞋ amam nematawa wambotagw hiami mofaꞋ agof apeꞋimi ma Anan atona. 16 AeꞋ andaꞋ beten ahaliꞋana naꞋama. AꞋi God nigiambamepa ma pepel nafifilili ananinai luꞋunai endilisi. AꞋi pepel Ananinai atona nondaꞋepa pepe laꞋifipama opalef ipeꞋimi nomona Ambal BuꞋunai Ananinai atona. 17 AꞋi baleꞋef ipeꞋinai atona Krais nope opalef ipeꞋimi nomon laꞋelaꞋef. EaꞋ andaꞋ beten ahaliꞋ Goda waf ukup maimailasanai nope siꞋina ma ipeꞋ ma nondaꞋepa laꞋifipa pila waf anama siꞋi nombalef lawag nahapila etap nowala laꞋifina. 18 AꞋi ipeꞋ pefaꞋ pepel neloma amam nematawa Godi hiesi pegawa okom Kraisi nainailipa, anama luꞋuna endilisi nafeꞋ laogon endilisi nafeꞋ waꞋol waꞋol nalata gani ilif endilisi eaꞋ nowala nafeꞋ owin endilisi nafeꞋ etin. 19 EaꞋ andaꞋ beten ahaliꞋ Goda basef akutaimi naꞋama. AꞋi ipeꞋ pegawa okom anama Kraisi endilisi, anama nikilaꞋ gawa epes hiesi. AꞋi ipeꞋ pegawa okom anama Kraisi ma pepe siꞋipa endilisi ma waf buꞋunai God okom naꞋianai hianai. 20 God anan laꞋifinai. LaꞋifimi amama Ananimi deiꞋ mandaꞋ maol opalef apeꞋimi nomon, amama laꞋifim endilisi. LaꞋifimi amama atom anan laꞋifinai ma nondaꞋ amamaga hiami mikilaꞋ basef hiami mandaꞋ beten mahaliꞋanami hiꞋalam maloma ukup apeꞋ hiapai wapotiꞋ. 21 Amama atom deiꞋ apeꞋ epes Godi mombaleꞋefana minifela God mefela agel Ananinai luꞋuna ma Krais Jisas laꞋelaꞋef mofeꞋ mofeꞋ anona nemaf owagama gani. Endilisi.

Copyright information for `AOJFILIFITA