Ephesians 5

ApeꞋ mefeꞋ mila waf buꞋunai ma howalagon

IpeꞋ pila waf God nandaꞋanai. Anan okom nainailipa pape siꞋi awasi ananipei. IpeꞋ pila waf anama ukup maimailasanai siꞋi Krais okom nainaila apeꞋ hiapai nakwaha ambal Ananinai nagiambamapa. Anan naseꞋana alop Ananinai God nagaꞋ nondolalimana siꞋi ofa buꞋunai alogw buꞋwami maꞋami.

Waf anama hianai soꞋa waolanai, neloma waf aonai alop atonai neloma kowalasanai, ipeꞋ ina pendaꞋana, owaꞋ. Basefa waf anama ina mataga laꞋafena ipeꞋ, owaꞋ. DeiꞋ main, ineꞋ andeandeꞋma apeꞋ amam nematawa Godi mandaꞋ waf anama, owaꞋ. IpeꞋ ina pendaꞋ basef awami o basef mamumami awami, o basef salamalimi awami, owaꞋ. Waf anama ina andeandeꞋ, owaꞋ. AndeandeꞋma ipeꞋ pinifela God. IpeꞋ pegawa ma emi egafis sandaꞋ waf aonai soꞋa waolanai, o emi egafis ukup awami kowalasa amamaga enis epesi siꞋi saila god basoꞋomunai, epes isima ina anona nemaf suwis wambota Godi naloma Kraisi, owaꞋ. IpeꞋ pindumafuma andeandeꞋ. NaꞋama pemeꞋ basef enis epesi atom somboma ukup ipeꞋimi pendaꞋ waf anama aonai. DeiꞋ main, waf anama God okom wandafuna ma epes isima sandaꞋanai sosambala basef Ananimi. Amama atom deiꞋ ina pendaꞋ waf anama pendaoꞋoma pelomas, owaꞋ. Hapainai.

DeiꞋ main, fowaꞋ ipeꞋ ataꞋ panda waf aonai siꞋi pape owamb. EaꞋ deiꞋ pape laꞋifipama paloma Jisas Dembinai, amama atom deiꞋ nahaponepa papoma siꞋi pape howalagoma. IpeꞋ pefeꞋ siꞋi epes safeꞋ alip howalagoma. Epes safeꞋ alipi sawalapai waf buꞋunai, endilisinai hianai. 10 EaꞋ ipeꞋ pendandomba ma pegawa maina waf Dembinai okom naꞋianai. 11 IpeꞋ ina peloma epes isima sandaꞋ waf aonai siꞋi sape owambi pendaoꞋoma atogon etin, owaꞋ. Waf anama wafinai atona ina nola gwaꞋimi buꞋwami, owaꞋ. IpeꞋ pekwaha epes isima hiesi sandaꞋ waf anama aonai. 12 DeiꞋ main, aeꞋ ina ewalapa basefa waf anama aonai epes isima sandambahoꞋ sandaꞋanai, owaꞋ. AeꞋ ambal aona ieꞋiam iꞋi basef amama. 13 EaꞋ maina waf nagwahis mafifili mawalapanai, ofagena nataga nape nandawalap. 14 DeiꞋ main, maim amamaga mataga alihim mandawalap, amama mataga mape howalagoma. Amama atom deiꞋ anom basef mape maꞋi naꞋama maꞋi,

“IpeꞋ epes paꞋihi deiꞋ hafel mehip pekwaha koh! IpeꞋ pehafel hiꞋagif eaꞋ Krais neseꞋepa howalagon mififima ipeꞋ.”
15 IpeꞋ pape howalagoma eaꞋ. EaꞋ pimafia feꞋ pe ki ipeꞋinai. IpeꞋ ina pepe siꞋi epes isima gawa aꞋasi, owaꞋ. IpeꞋ pepe siꞋi epes isima gawaisi. 16 DeiꞋ ipeꞋ nemaf ataꞋ napomepa ma pendaꞋ waf Godi. EaꞋ pendaꞋana laꞋelaꞋef nemaf anaeꞋ. DeiꞋ main, nimeguf amama sandaꞋ waf aonai atona. 17 EaꞋ ipeꞋ deiꞋ ina pepe siꞋi epes gawa aꞋasi ukup meseꞋepa, owaꞋ. Pegawa andeandeꞋma okom Dembinai naꞋiami. 18 EaꞋ ipeꞋ ina peaꞋ embel laꞋifimi pehaga pegaol, owaꞋ. Waf anama nahambombaga ipeꞋ. IpeꞋ ahoꞋma Ambal BuꞋunai Godi nopaipa siꞋipa. 19 EaꞋ piꞋi basef buꞋwami atom peloma enis epes hiesi ma pendaꞋ awalef buꞋwami mape Buk Songi moloma awalef lotuwimi moloma awalef mandaꞋ epesi sataga laꞋifis. IpeꞋ pendaꞋ awalef pefela agel Dembinai laꞋifipa maloguf moloma ukup ipeꞋimi. 20 LaꞋelaꞋef pendanifela ahalomapa God ama amamaga hiami ma agel Dembinai apeꞋinai Jisas Kraisi atona.

Basef epes isima sandasoꞋamai

21 IpeꞋ pila okom Kraisi eaꞋ pefeꞋ owina esis alupusi ipeꞋisi.

22 IpeꞋ nematawa pila ukup moloma basef amam wauhiamipei siꞋi paila okom Dembinai. 23 DeiꞋ main, aman nape balaga naliꞋma akwaꞋw, siꞋi Krais nape balaga naliꞋma sios amam nematawa Godi. EaꞋ esis hiesi siꞋi alop siꞋina Ananinai. Epes isima Anan atona nofaꞋas sotanimani. 24 Epes isima sios safeꞋ owina Krais, eaꞋ naꞋama etin ipeꞋ nematawa wapotiꞋ, pepe owina amam wahupipa ipeꞋimi.

25 IpeꞋ amam wapotiꞋ, ukup mimila wauhiamepa ipeꞋiwai, siꞋi Krais okom nainaila sios amam nematawa Godi, nagaꞋ naloma ambal ananinai nahoꞋofas. 26 Anan nandaꞋam naꞋama ma sotaga epes Godi etis boꞋwes siꞋi nasaꞋopas embel sataga boꞋwesa basef ananimi. 27 Krais nandaꞋam naꞋama ma sataga boꞋwes andeandeꞋ sape Ananisi etis ma amamaga awami aꞋas. EaꞋ sape boꞋwes andeandeꞋ, amamaga awami aꞋas. 28 DeiꞋ naꞋama etina ipeꞋ amam ukup mimila awau wauhiamepa siꞋi ukup maila alop ipeꞋinai atona. Emi epen okom naila wauluꞋmana ananiꞋwi, anan okom naila anan wapotiꞋ. DeiꞋ main, esis sataga etifis. 29 ApeꞋ hiapai mogawa ina anona aman atotona nandaiwaꞋma alop siꞋina ananinai nahana, owaꞋ. Amam amama hiami mandaꞋ gwaꞋaimi mumafiana andeandeꞋ, siꞋi Krais numafi sios amam nematawa Godi. 30 DeiꞋ main, apeꞋ epes waꞋawaꞋana alop Kraisi. 31 Basef amama fowaꞋ mape mandambahiꞋi, luꞋwami nomonas hiami. DeiꞋ mataga alihim siꞋi Buk Baibel naꞋiam naꞋi, “Aman nekwaha mamasana ananisi nefeꞋ nope laꞋelaꞋef noloma wauluꞋmana ananiꞋwi, esis bias sataga alop atotona.”

AeꞋ okom naꞋi basef amama naꞋi Krais atona naloma sios amam nematawa Godi.
33 EaꞋ basef amama ofagema maꞋiam naꞋama wapotiꞋ ma ipeꞋ epes atona etin naꞋama maꞋi, “IpeꞋ amam hipei ukup mimila wauhiamepa ipeꞋiwai siꞋi ukup maimaila ipeꞋ etipa.”

EaꞋ ipeꞋ nematawa hipei wapotiꞋ pefela agofa wauhupipa ipeꞋimi pinifelom pila basef amamumi.

Copyright information for `AOJFILIFITA