Ephesians 6

Basef esis mamasasi maloma batausas

IpeꞋ awasi, ipeꞋ pila basef mamasepa ipeꞋisi siꞋi paila basef Dembinai. Waf anama boꞋona andeandeꞋ. DeiꞋ main, anom basefa miꞋuli nape naliꞋi Godi basef endilisimi atom maꞋiam naꞋama maꞋi, “IpeꞋ pila ukup mamasepa ipeꞋisi eaꞋ pefela agof asasimi.” Basef amama maꞋi esis sila ukup mamasasi, “Ma ipeꞋ pepe andeandeꞋ nimeguf hiami etap anaeꞋ.”

EaꞋ ipeꞋ ahapas ina pendaꞋ ukup awasi ipeꞋisi aom, owaꞋ. IpeꞋ pimafias andeandeꞋ piwalipasa basef Dembinai piꞋipasa basef amama.

Basef esis agufisi saloma enis agof aꞋasi sandaꞋ maol naꞋai

IpeꞋ agof aꞋepa pandaꞋ maol naꞋa pape laꞋafena agufisi ipeꞋisi pemeꞋ basef asasimi pefeꞋ owina esis umbamehepamas. IpeꞋ pendaꞋ maol anama pila basef asasimi andeandeꞋma ukup etifim siꞋi paila basef Kraisi. IpeꞋ ina pendaꞋama naep asasimi atom pemboma ukup asasimi atom, owaꞋ. PendaꞋ maol anama siꞋi pandaꞋ maol pape owina Krais. PendaꞋam naꞋama etin siꞋi paila okom Godi ma opalef ipeꞋimi. IpeꞋ ukup mohafel endilisi pendaꞋ maol anama andeandeꞋ. Ina pandaꞋ maola epes etis, owaꞋ. IpeꞋ pandaꞋ maola Dembinai atona. DeiꞋ main, ipeꞋ pegawa, iꞋi emi egafis sandaꞋ maol andeandeꞋ, anona nemaf Dembinai notalis noseꞋas amamaga buꞋwami. EaꞋ nondaꞋas naꞋama etina isima agof aꞋasi sandaꞋ maol naꞋai saloma isima sandaꞋ maol sofaꞋ otambai.

IpeꞋ agufipei pimafi isima agof aꞋasi sape owina ipeꞋi sandaꞋmepa maol naꞋai, ipeꞋ pendaꞋam naꞋama etina esis siꞋi pandaꞋama Dembinai atona. IpeꞋ pekwaha waf anama paumbalisanai. DeiꞋ main, ipeꞋ pegawa Dembinai nape heveni anan Dembinai ipeꞋinai, asasinai wapotiꞋ. Anan ina nawaloga agof epesi ma naep ananimi, owaꞋetin. Anan nawaloga hiesi agufisi agof aꞋasi hiꞋalasa ikwaf buꞋunai atona.

Kristen amam nematawa siꞋi soldia

10 DeiꞋ aꞋi endaꞋ basef akutaimi amama. IpeꞋ pepe laꞋifipa peloma Jisas Dambinai, pepe laꞋifipama Anan atona ma pepel lagela pipitagel atona ananinai. 11 IpeꞋ pela luwaguf hiami peandaꞋ wandafami God nasiꞋipami, ma pitu laꞋifipama piliꞋamona waf aonai basoꞋmainai Satani. 12 DeiꞋ main? ApeꞋ ina mandaꞋ wandaf maloma epes, owaꞋ. ApeꞋ mandaꞋ wandaf mapaꞋ maloma ambagof gambefah awami mape maliꞋi maloma amam agufumi awami maloma amam ensel awami maloma pepel hianai aonai mumafi epes sandaꞋ waf aonai etap anaeꞋ. ApeꞋ mapaꞋ maloma ambagof awami hiami mape laꞋafena otaga naloma etap. 13 Amama atom deiꞋ pendawisa sosaf anama sandaꞋ wandafanai hianai God nasiꞋipanai hiꞋilana. Ama nemaf anama aonai notaga, ipeꞋ laꞋifipama pitu laꞋifipa ma pikilaꞋ amamaga meagwambaipei petofam. Ama pikilaꞋ waf aonai hiꞋilana pitu laꞋifipa laꞋelaꞋef.

14 IpeꞋ pitu pendawisa sosaf anama naꞋama. IpeꞋ pihapila basef endilisimi buꞋwami siꞋi anona let ipeꞋ pewaheꞋana. EaꞋ pendaꞋ waf buꞋunai nope alihina siꞋi sala siaot laꞋifinai sandaꞋ kapa sandaꞋanai niliꞋakwa mafatagw ipeꞋimi. 15 EaꞋ pendaꞋ anona waf buꞋunai naꞋama. Pendandombam pewalapa basef buꞋwami Godi naꞋi epes somboma opalef sope ukup etifim solomana. IpeꞋ pefaꞋ waf anama laꞋifina pitu laꞋifipa siꞋi esis sala su saitu laꞋifis. 16 IpeꞋ pendaꞋ waf anama siꞋi amamaga amama sandaꞋ wandafami eaꞋ piwatani anona waf wapotiꞋ. PembeleꞋefa Krais laꞋifipa siꞋi pefaꞋ walitap pandaꞋ wandaf. Walitap anama laꞋifinai ma nohagasa amama meagwambipei hiꞋalimi hiami hiꞋilam mafiꞋi aman anama aonai Satan. 17 God nofaꞋai ipeꞋ petanimani. Amama ipeꞋ ukup pendandaꞋmam pefaꞋam siꞋi pewaloꞋ hagw kapaimi laꞋifimi balagah ipeꞋimi. EaꞋ pihapila bainat hiꞋalinai Ambal BuꞋunai Godi nasiꞋipanai, anama basef Godi atom. 18 EaꞋ laꞋelaꞋef pefaꞋ pepel Ambal BuꞋunai Godi ma pendaꞋ beten naninani hianai pehaliꞋ God. IpeꞋ pindumafuma andeandeꞋ pendaꞋ beten. Ina pepoma nomaꞋw, owaꞋ PendaꞋ beten laꞋelaꞋef ma God nigiambama esis amam nematawa ananisi hiesi hiꞋilas.

19 EaꞋ pendaꞋ betena aeꞋ wapotiꞋ ma maina nemaf iꞋipasa basef Godi nigiambama malogel aeꞋanai ma basef ewalipasami. Ama ina umbamahe ewalipasa basef amama buꞋwami Godi fowaꞋ mape mandambahiꞋi. 20 AeꞋ awalapa basef amama, deiꞋ amama atom mowaꞋ lagof aeꞋami sen ape andaꞋ kalabus. Maol aeꞋanai anama. AeꞋ efaꞋ malogel Kraisi ma ewalapa basef amama Ananimi ma epes hiesi. EaꞋ pendaꞋ betena Goda nohogofa umbameahe etaga laꞋifiwi iwalipam siꞋi okom Kraisi naꞋiam.

Anom basef tuꞋwanim akutaimi

21 Aman anama Tikikus anan alupunai endilisi apeꞋinai, apeꞋ ukup maꞋiana. Anan nape laꞋifina ma Dembinai nandaꞋ maol Ananinai andeandeꞋ. Anan atuwasi nofoꞋo nowalapa basef niꞋipipa aeꞋ deiꞋ ape aꞋimama. 22 AeꞋ aꞋi esapaꞋana nefeꞋmago ipeꞋ ma atuwasi pegawa afaꞋ wape naꞋae wape waꞋimama ma nondaꞋepa petaga laꞋifipa.

23 AeꞋ aꞋi God Ahalomepa naloma Dembinai Jisas Krais mondaꞋago opalef ipeꞋ alupipei hipei pepe etifigin peloma God. EaꞋ aꞋi amam meseꞋepago waf anama ukup maimailasanai neloma baleꞋef buꞋunai wapotiꞋ. 24 EaꞋ aꞋi God nigiambamepago naꞋa nondaꞋ epes isima emi egafis ukup maimaila Jisas Krais Dembinai apeꞋinai laꞋelaꞋefi sotaga laꞋifis. Waf epes isima ukup maimailasanai anama nape laꞋelaꞋef owaꞋ hiꞋilanae.

EaꞋ maꞋum.

Copyright information for `AOJFILIFITA