b- Ga 5:91 Ko 5:6
c- Ga 5:16Ro 8:4Ga 5:25
d- Ga 5:17Ro 7:15,231 Pi 2:11

Galatians 5

ApeꞋ wafifipai mope wafifipa endilisi

Krais atona natagahepa mape wafifipa. Amama atom deiꞋ ipeꞋ pitu laꞋifipa. Ina ataꞋ piꞋi ahoꞋma enis epes siꞋipipa pitanima pepe pila miꞋuli anama esis Juda sailanai wapotiꞋ, owaꞋ.

PemeꞋ, aeꞋ Pol aꞋipipa amama. IꞋi ipeꞋ piꞋi ahoꞋma amam motopaꞋmepa alop, Krais ina nagiambamepa, owaꞋ. AꞋi iꞋipa ipeꞋ amam hipei wapotiꞋ. Emi aman niꞋi ahoꞋma motopaꞋmana alop ananinai, anan nila miꞋuli anama hianai hiꞋilana. IꞋi ipeꞋ paꞋi pila miꞋuli anama ma nambimb God niꞋi ipeꞋ epes buꞋupei, ipeꞋ pakwaha Krais pefalana bounai, eaꞋ pelolama waf God nagiambamapa naꞋa pakwahona. EaꞋ owaꞋ etin. ApeꞋ mombaleꞋefa Kraisa pepel Ambal BuꞋunai Godi. EaꞋ mogawa endilisi mape mohafa anona nemaf God niꞋi apeꞋ buꞋupai ma okom ananinai. Emi egafis sepe laꞋifisa Krais Jisas, waf anama matopaꞋ alopanai o owaꞋ motopaꞋ alopanai anama falafunai atona owaꞋ laꞋifina. EaꞋ waf sombaleꞋefa Krais atona nawalapai waf ukup maimailasanai. Amama buꞋwami endilisi mikilaꞋ. FowaꞋ ipeꞋ pape pandaꞋ waf buꞋunai pailana andeandeꞋ. EaꞋ deiꞋ ataꞋ emi nahopa eafa ipeꞋ ma owaꞋ pila basef endilisimi wapoti? Emi namboma ukup ipeꞋimi pakwaha basef amama? God ina nandaꞋepa naꞋama, owaꞋ. Anan nofalepa pafiꞋmai anan. Anom basef maꞋi naꞋama maꞋi, “Anom yis mandaꞋ bret natifi, amama mandaꞋ bret hianai nataga luꞋuna.”

10 AeꞋ alomepa ukup etifim mape laꞋifim maloma Dembinai. EaꞋ egawepa ipeꞋ nambimb ina pila anom basef, owaꞋ. Pila okom aeꞋanai atona. AeꞋ ina egawa aman anama namboma ukup ipeꞋimi, owaꞋ. EaꞋ hapainai, anan nandaꞋ waf aonai anona nemaf God noseꞋana nimanimi. 11 IpeꞋ sahin owan aeꞋipei, iꞋi endilisi aeꞋ awalipipa ma basef amama patopaꞋ alopanai, deiꞋ maina esis saꞋi soseꞋe nimanimi? IꞋi aeꞋ iꞋipipa basef amama, esis ina siꞋi sehe, owaꞋ. EaꞋ aeꞋ aꞋipipa basef buꞋwami ma Krais nagaꞋ lawag usiꞋinai tuꞋwanainai. EaꞋ esis ukup aom saꞋi soseꞋe nimanimi. 12 Amam amama mamboma opalef ipeꞋimi, andeandeꞋma motopaꞋmama alop anama tuꞋwanina amamunai atona hiꞋilana!
Basef amama ofagema biefim. Anom maꞋi siꞋi sagi popas bogofi nombagw. Amama Pol naꞋipa amam mambasoꞋami basef laꞋifimi. EaꞋ anom maꞋi amam amama makwaha sombaleꞋefa Krais ma mope laogon.
,
b, c, d 

13 Endilisi ipeꞋ sahin owan, God nofalipei ma pepe wafifipa andeandeꞋ. NaꞋama ipeꞋ ukup miꞋi, apeꞋ mape andeandeꞋ wafifipa, deiꞋ andeandeꞋma mondaꞋ waf alop atona. IpeꞋ ina ukup miꞋi naꞋama owaꞋ. IpeꞋ ukup mimila sahin owan ipeꞋisi pendaꞋ maol etifigin pindagigiambanama. 14 DeiꞋ main, miꞋuli God nasoꞋ Mosesanai hianai nape nomona basef amama atom maꞋi, “IpeꞋ ukup mimila epes isima hiesi siꞋi ukup maila ipeꞋ etipa.”

15 IꞋi ipeꞋ pendaꞋ lopaꞋ fitap nope laꞋafena ipeꞋ etipa, ipeꞋ pindumafuma andeandeꞋ. NaꞋama ipeꞋ hipei pendakolas pesa pewala etin!

Waf dambainai ma Ambal BuꞋunai Godi naloma waf saila opalef apimi

16 Basef aeꞋ aꞋiami amama. IpeꞋ pembaleꞋefa Ambal BuꞋunai Godi pefeꞋ. IꞋi ipeꞋ pilam pendaꞋam naꞋama, ina anona nemaf pila waf apinai, owaꞋ. 17 ApeꞋ mogawa opaf apinai naꞋi nohogofa Ambal BuꞋunai Godi, eaꞋ Ambal Godi naꞋi nohogofa opaf apinai. Amam biam mandahihianama mafitap mape. EaꞋ amamaga ipeꞋ paꞋi piendaꞋami ina laꞋifipama pandaꞋam, owaꞋ. 18 IꞋi ipeꞋ pila Ambal BuꞋunai Godi atona, ipeꞋ ina ataꞋ pila miꞋuli esis Juda sailanai, owaꞋ.

19 Waf opaf apinai epes hiesi sogawana eaꞋ nape alihina. Anama naꞋama. SoꞋa waol, waf aonai, ukup mohafema waf aonai, 20 sandagala sanifela god basoꞋomunai, sandaꞋ muꞋuhup, sandaꞋ ufial maꞋakw, waf nefala enis naumbih, ukup mapoma esis etis, lopaꞋ fitap, waf kowalasa anom amamaga enis epesi, ukup wandafum, basef wandafumi sondaha pepeꞋma biefis, sowala wambotagw, 21 ukup aoma kowalasa amamaga enis epesi, sandaꞋ spak sahaga sagaol, saꞋ gwaꞋaimi maloma embel laꞋifimi hiami ma sandaꞋ awalef awami, eaꞋ waf naninani aonai naꞋama. FowaꞋ aꞋipipa deiꞋ iꞋipipa wapotiꞋ. Emi egafis sandaꞋ waf anama aonai, anona nemaf ina sefeꞋ suwis wambel Godi, owaꞋ.

22 EaꞋ Ambal BuꞋunai Godi nawalapai waf buꞋunai naꞋama. Waf ukup maimaila enis epes, danifel, opalef awanemi, waf nape natilisa sondaꞋmena waf aonai, waf sati uwahipisanai, waf ukup boꞋoma enis epes nigiambamas, nandaꞋ amamaga andeandeꞋ ma naep epesi God wapotiꞋ, 23 waf soꞋumbilanai, naloma waf ukup boꞋomi mapaisa sumafi alop andeandeꞋ. OwaꞋ anom basefa miꞋuli atotona nape luꞋuna nikilaꞋ waf anama buꞋunai, owaꞋ. 24 Emi egafis Krais Jisasi saunda opalef apimi mail lawag usiꞋinai tuꞋwanainai maloma waf naninani ukup mohafemanai naloma naninani aonai. 25 Ambal BuꞋunai Godi atona naseꞋapa ambal namunai napaipa. EaꞋ deiꞋ apeꞋ mila waf ananinai mefeꞋ. 26 ApeꞋ ina mosambala basef mefela agof apeꞋimi atom, miꞋi basef moloma alupusi apeꞋisi mondahihianamama anona waf, owaꞋ. ApeꞋ ina kowalapa ma enis epes soloma amamaga asasimi, owaꞋ.

Copyright information for `AOJFILIFITA