Hebrews 3

Agel luꞋunai Jisasi nikilaꞋ Moses

IpeꞋ alupipei epes Godi, Anan nape ilif nofalipei, ipeꞋ pemeꞋ. IpeꞋ okokoma Jisas, Anan aposel nape pris Dembinai ma waf naloma basef ofagema apeꞋ eaꞋ mombaleꞋef mawalipasami. Anan naila okom Godi nandaꞋ maol God nandandepana nandaꞋana andeandeꞋ, siꞋi fowaꞋ gani Moses nandaꞋ maol Godi andeandeꞋ nagiambama epes hiesi Godi. Aman anama Jisas, God naseꞋana agel luꞋunai nikilaꞋ agel luꞋunai Mosesi, siꞋi epes saseꞋana agel luꞋunai aman nandaꞋ ipat buꞋunai nalaꞋana etap anaeꞋ. EaꞋ esis ina safela agela ipat anama luꞋuna, owaꞋ. Endilisi, ifagw hiami epes etis salaꞋami. EaꞋ epen gawainai nandaꞋ amamaga hiami, anan God atona. Endilisi, Moses nandaꞋ maola nagiambama epes Godi andeandeꞋ nandaꞋana siꞋi nandaꞋ maol Godi, eaꞋ naꞋi basef nawalapama amamaga hiami anona nemaf owagama Krais nieꞋipasami. EaꞋ Krais nape nogalomana Godi naila basef endilisi nandaꞋ maol andeandeꞋ ma nape Dembinai numafi epes wambota Godi. IꞋi laꞋelaꞋef apeꞋ mombaleꞋefana laꞋifipa mogawa anona nemaf Krais niefiꞋi nofaꞋapa mefeꞋ heven mope andeandeꞋ, apeꞋ mape wambota Ananinai.

Epes sosambala basef Godi ina suwis sopoma nomaꞋw, owaꞋ

EaꞋ deiꞋ apeꞋ memeꞋ basef Ambal BuꞋunai Godi naꞋiami andeandeꞋ. Anan naꞋiam naꞋama naꞋi,

“Maina nemaf ipeꞋ pemeꞋ malogel Ananinai,
ipeꞋ ina pesopama opalef ipeꞋimi laꞋifim endilisi, siꞋi fowaꞋ gani bafasepa sandaꞋam sosambala basef Godi ma sandaꞋ okom Ananinai wandafuna, owaꞋ. Nogota anama esis sape anama wafiguma fatauguma esis sagwambana endilisi sasopama opalef. Esis bafasepa ipeꞋisi sati pepel hianai AeꞋ andaꞋanai anama wafiguma afagof hiami 40-peleim. OwaꞋ. Nimeguf hiami esis sandaꞋ AeꞋ gwambai gwambae endilisi.
10 Esis sandaꞋe naꞋama, AeꞋ deiꞋ okom wandafunamas endilisi aꞋi, ‘LaꞋelaꞋef ukup asasimi maseꞋasa eaf buꞋunai sololamana. Esis ina ataꞋ saila waf buꞋunai AeꞋanai, owaꞋ.’ 11 EaꞋ AeꞋ okom wandafuna ma esis aꞋi basef endilisimi atom laꞋifimi aꞋi, ‘Anona nemaf esis ina ataꞋ sifiꞋi suwis sopoma nomaꞋw solome, owaꞋ.’ ”

ApeꞋ mundumafuma andeandeꞋ. NaꞋama mosambala basef Godi siꞋi esis Israel sandaꞋam

12 Alupipei AeꞋipei, ipeꞋ pindumafuma andeandeꞋ. NaꞋama enin sahin owan ipeꞋisi okom ninila waf aonai nekwaha baleꞋef ananinai newaꞋ alafugama God nape laꞋelaꞋefi. 13 NaꞋama owaꞋ. IpeꞋ pendagigiambanama etin pitu laꞋifipa. PendaꞋam naꞋama etin nimeguf hiami atona etin nogota anaeꞋ God naꞋi, “DeiꞋ.” PendaꞋam pilam ama pilam laꞋelaꞋef. NaꞋama enipa opalef ipeꞋimi laꞋifima waf aonai basoꞋomainai. 14 ApeꞋ fowaꞋ maliꞋ mombaleꞋefana, eaꞋ deiꞋ mombaleꞋefana laꞋifipa laꞋelaꞋef, mefeꞋ motagama mogaꞋ. IꞋi apeꞋ mondaꞋam naꞋama laꞋelaꞋef, apeꞋ amam nematawa endilisi Kraisi, mape laꞋifipa malomana.

15 SiꞋi basef mail Baibeli doꞋok aꞋipipami maꞋiam maꞋi,

“IꞋi ipeꞋ deiꞋ pemeꞋ basefa malogel Ananinai ipeꞋ ina pesopama opalef ipeꞋimi laꞋifim endilisi siꞋi fowaꞋ pewaꞋ alafugaha Goda pandaꞋ okom Ananinai wandafuna, owaꞋ.”
16 FowaꞋ gani emi egafis sameꞋ basef malogel Godi sowaꞋ alafugahana sandaꞋ okom Ananinai wandafuna? Epes amama atom hiesi fowaꞋ Moses nofaꞋasi sakwaha Isip safiꞋi, amama atom. 17 Afagof amama hiami 40-peleim God okom wandafuna ma emi? Anan okom wandafuna ma epes isima sandaꞋ waf aonai sagaꞋ hiꞋalas etap anama wafiguma fatauguma, amama atom. 18 God naꞋi enis epes naꞋi basef endilisimi atom laꞋifimi ma esis ina sefeꞋ suwis sopoma nomaꞋw solomana. NaꞋi emi egafis? Anan naꞋi amama atom. 19 EaꞋ deiꞋ apeꞋ mogawa esis ina anona nemaf laꞋifisa sefeꞋ suwis sopoma nomaꞋw solomana, owaꞋ. DeiꞋ main, esis ina sembaleꞋefana, owaꞋ.

Copyright information for `AOJFILIFITA