Hebrews 7

Melkisedek anan pris dembinai agel ananinai luꞋunai endilisi

Aman anama Melkisedek anan king dembinai numafi anona wambel Salem, anan pris nondolalima God Dembinai nape ilif endilisi. FowaꞋ gani Abraham nandaꞋ wandaf naha anom king dembemi naliꞋamonam nafeꞋ ma notanima nafeꞋ wambel, Melkisedek natolona nofaloꞋmana. EaꞋ Abraham nawaloga amamaga nefaꞋam nafeꞋ nandaꞋ wandafami gwaꞋaimi maim ananimi hiꞋalam nawalogam aolef 10-peleimi naseꞋana aof atotona Melkisedek. ApeꞋ deiꞋ mamboma agel anama Melkisedek, basef ofagema biefim. Anom maꞋi king dembinai nandaꞋ waf buꞋunai. EaꞋ anom maꞋi anan king dembinai noseꞋapa opalef awanem. DeiꞋ main, anan king dembinai numafi wambel anama Salem, deiꞋ mamboma basef amama Salem maꞋi opalef awanem. Anan Ahalomanai mamaꞋwana aꞋana. Anan bafasana wambota ananisi aꞋana. EaꞋ mamaꞋwana kolananai nemaf naloma nemaf nagaꞋanai wapotiꞋ owaꞋ sogawame. Anan nape siꞋi Nogalomana Godi, nape pris dembinai laꞋelaꞋef hihif.

DeiꞋ ipeꞋ okokoma Melkisedek, anan agel luꞋunai endilisi. Dembinai ahalomapa apeꞋinai naliꞋi anan Abraham, anan natembeꞋam amamaga hiami buꞋwami atom nofaꞋama wandafi nawalogam eaꞋ aof atotona nasoꞋ Melkisedek. Amam wambota awasi bafapana Livai anom mofaꞋ maol anama pris. EaꞋ miꞋuli anama God nasoꞋ Mosesanai naꞋipa amam atom mandaꞋ maol anama. NaꞋama naꞋi amam mowaloga amamaga amama hiami esis Israeli mofaꞋam maseꞋana namba ten hap God. Esis Israel sahin owan amamisi endilisi, eaꞋ esis bafasana awasi Abrahami wapotiꞋ. EaꞋ owaꞋetin, amam Livai mofaꞋ gwaꞋaimi maim hiami namba ten hapa esis sahin owan amamisi etis. Melkisedek ina nataga wambota Livai, owaꞋ. EaꞋ anan nofaꞋ amamaga hiami namba ten hap Abraham nowalogami. EaꞋ Melkisedek nofaloꞋmana naꞋipana basef buꞋwami aman anama Abraham. Aman anama Abraham basef buꞋwami God naꞋi endilisimi atom mapomana. EaꞋ apeꞋ mogawa, aman nofaloꞋmanai nape ilifa aman anama nofaꞋ amama buꞋwami presen. Amam Livai mandaꞋ maol mondolalima Godi mofaꞋ amamaga namba ten hap, amam anona nemaf magaꞋi. EaꞋ Melkisedek nofaꞋ amamaga sawalogami namba ten hap, anan nape namunai laꞋelaꞋef, siꞋi buk Baibel naꞋi. ApeꞋ maꞋiam naꞋama.

FowaꞋ gani Melkisedek natagama Abraham eaf, Abraham naseꞋana amamaga amama nowalogami namba ten hap mafeꞋma Melkisedek. EaꞋ Livai bafapana Abraham magiꞋ mataga mandaꞋ maol anama mofaꞋ amamaga amama namba ten hap esis Israel sawalogami.

EaꞋ naꞋama etin siꞋi Livai naseꞋana namba ten hap Melkisedeka lagel Abrahami. DeiꞋ main, nemaf anama Abraham naseꞋanam Melkisedek, Livai ataꞋ owaꞋ solanai, ataꞋ nape opalef nomon bafapana Abrahami.

Aman dambainai deiꞋ nahoꞋofa pris fowaꞋimi

11 FowaꞋ esis amam nematawa sofaꞋ basefa miꞋuli anama God nasoꞋ Mosesanai. Ofagema miꞋuli anama amam wambota Livai mandaꞋ maol pris. EaꞋ iꞋi maol anama amam pris mandaꞋanai andeandeꞋ ma mondaꞋ esis amam nematawa sotaga boꞋwesa naep Godi, deiꞋ maina ataꞋ anona pris dambainai nataga wapotiꞋ siꞋi Melkisedek, eaꞋ ina siꞋi Aron? OwaꞋ. 12 God nahoꞋofa waf amam pris mandaꞋanai. EaꞋ miꞋuli Godi wapotiꞋ nahoꞋofana naꞋama etin. 13 Dembinai apeꞋinai basef amama maꞋianai, anan anona wambota. Wambota ananinai ina fowaꞋ nandaꞋ maola balata amam pris maofa mafis maim mondolalima God, owaꞋ. 14 EaꞋ amama mataga alihim naꞋama. ApeꞋ mogawa, Dembinai apeꞋinai nataga wambota Judai. EaꞋ Moses ina naꞋi anom amam wambota anama motaga mondaꞋ maol mope pris, owaꞋ.

Jisas nape pris nataga dembinai laꞋelaꞋef nandahama Melkisedek

15 ApeꞋ mati anona pris dembinai nataga, nahoꞋofa amam pris maliꞋi, Anan siꞋi Melkisedek. Basef amama ma miꞋuli anama mataga mahoꞋofa miꞋuli anama naliꞋi deiꞋ mandawalap alihim naꞋama. 16 Anan ina nataga prisa anona miꞋuli naꞋi amam pris mataga wambota Livai, owaꞋ. Anan nataga prisa pepel ambal namunai napainai laꞋelaꞋef hihif. 17 DeiꞋ main, basef mail Baibeli maꞋiana maꞋi,

“IneꞋ nape pris dembinai laꞋelaꞋef siꞋi Melkisedek.”
18 God nahoꞋofa miꞋuli anama nasoꞋ Mosesanai eaꞋ. DeiꞋ main, miꞋuli anama owaꞋ laꞋifina nigiambama apeꞋ, owaꞋ. 19 DeiꞋ main, miꞋuli anama ina nandaꞋ epes sataga boꞋwes andeandeꞋ ma naep Godi, owaꞋ. EaꞋ deiꞋ God nandoga anona eaf, anama buꞋunai nikilaꞋ miꞋuli anama, deiꞋ eaf anama atona apeꞋ mogawa endilisi God nagiambamapa eaꞋ mefeꞋ felefeleꞋma Anan.

20 Nemaf anama God nandandepa Jisasa nataga pris Dembinai, ina nandaꞋana nosaheꞋana etin, owaꞋ. Anan naꞋi basef laꞋifimi naꞋi endilisi gani ilif eaꞋ nandandepana. Amam pris fowaꞋimi ina nandandepam naꞋama siꞋi Anan, owaꞋ. 21 EaꞋ God naꞋi basef amama laꞋifimi naꞋi endilisi gani ilif eaꞋ nandaꞋ Jisas nataga Dembinai pris. Anan nataga pris nemaf anama God naꞋipana naꞋi,

“Dembinai naꞋi basef laꞋifimi naꞋi endilisi gani ilif ma anona nemaf Anan ina nohoꞋofa okom Ananinai wapotiꞋ, owaꞋ. IneꞋ nape Dembinai pris laꞋelaꞋef hihif.”
22 God naꞋi basef amama naꞋiam laꞋifim. Amama atom deiꞋ Jisas nataga Dembinai ofagonama basef buꞋwami dambaimi God naꞋiam endilisimi atom mikilaꞋ basef fowaꞋ naliꞋ naꞋiami. 23 FowaꞋ amam pris amam hiami. DeiꞋ main, amam anona nemaf mogaꞋ ina laꞋifima mope laꞋelaꞋef mondaꞋ maol, owaꞋ. 24 EaꞋ Jisas deiꞋ nape namona laꞋelaꞋef. Amama atom deiꞋ nape pris Dembinai laꞋelaꞋef endilisi. 25 Amama atom deiꞋ Anan laꞋifinai ma nefaꞋ esis amam nematawa sotanimani sofeꞋ felefeleꞋma Goda agel Ananinai eaꞋ sope andeandeꞋ laꞋelaꞋef. DeiꞋ main, Anan nape ambal napaina laꞋelaꞋef nandaꞋ betena God nigiambamas.

Jisas Dembinai pris laꞋifinai endilisi ma nagiambamapa

26 Dembinai pris anama laꞋifinai endilisi ma nagiambamapa. Anan naila waf Godi boꞋona andeandeꞋ, waf aonai aꞋana. Anan okom buꞋunai deiꞋ nape laogona epes sandaꞋ waf aonai. God naseꞋana agel luꞋunai nikilaꞋ ilif endilisi. 27 Amam dembemi pris fowaꞋimi mape maliꞋ ma pris hiami mondolalima God nimeguf hiami laꞋelaꞋef. MaliꞋ ataꞋ mondolalimana ma nakwaha waf aonai amam mandaꞋanai. EaꞋ magiꞋ mondolalimana ma nakwaha waf aonai esis amam nematawa sandaꞋanai. EaꞋ Jisas ina nandaꞋam siꞋi amam, owaꞋ. Anan nondolali ma God nemaf atotona nakwahomasa waf aonai epes hiesi sandaꞋanai eaꞋ maꞋum. NasoꞋ Anan atona nafeꞋma God. 28 MiꞋuli anama God fowaꞋ nasoꞋ Mosesanai nesahoꞋ amam amama ina laꞋifima mondaꞋ waf buꞋunai nimeguf hiami eaꞋ mape dembemi pris. EaꞋ basef amama laꞋifimi God naꞋi endilisi gani ilif, amama mataga magiꞋma miꞋuli anama mandandepa Nogalomana Ananinai, Anan nataga boꞋona andeandeꞋ laꞋelaꞋef hihif.

Copyright information for `AOJFILIFITA