c- Jo 10:16Ais 56:8Jo 11:521 Pi 2:25Esi 34:23Esi 37:24
d- Jo 10:17Fl 2:8,9
e- Jo 10:18Jo 5:26; 14:31Jo 19:11
g- Jo 10:20Jo 7:20; 8:48
h- Jo 10:24Ap 3:11; 5:12Lu 22:67
i- Jo 10:25Jo 4:26; 5:36Jo 10:38
j- Jo 10:26Jo 6:64; 8:45
k- Jo 10:27Jo 8:47; 10:3
m- Jo 10:28Jo 3:16, 6:39Jo 18:9
o- Jo 10:33Lev 24:16Mt 26:65Jo 5:18
p- Jo 10:34Sam 82:6
r- Jo 10:38Jo 14:10,11
s- Jo 10:39Lu 4:30Jo 8:59

John 10

Basef womun etina endalelemb sipsipi

EaꞋ Jisas naꞋi, “Endilisi aeꞋ aꞋipipa, emi egafis owaꞋ suwisi uta endalelemb sipsipi ma esis situ siwisi anagon, epes isima sandaꞋ wali. Epen anama buꞋunai nawisi utai, anan numafi sipsipi. Aman numafi utai nawisiꞋamana uta ma numafi sipsip. Amam sipsip mameꞋ malogel ananinai. Anan nofala agofa sipsip ananimi, eaꞋ naoꞋwam mawisi andeꞋ. NaoꞋwa sipsip ananimi hiami mawisi andeꞋ hiꞋalam eaꞋ naliꞋ nafeꞋ, amam magiꞋmana mafeꞋ. DeiꞋ main? Amam mogawa maf ananinai. EaꞋ sipsip ina magiꞋma anona epen, owaꞋ. NaꞋama mondafaꞋmana mofaꞋ mefeꞋ atona etin. DeiꞋ main? Amam ina mogawa maf ananinai, owaꞋ.”

EaꞋ Jisas naꞋipasa basef womun etin naꞋama, eaꞋ esis ina sogawa basef ofagema, owaꞋ.

Jisas aman buꞋunai numafi sipsipi

EaꞋ Jisas naꞋipas wapotiꞋ naꞋi, “Endilisi aeꞋ aꞋipipa, aeꞋ siꞋi uta sipsip miawisanai. Amam fowaꞋ mumafi sipsipi, amam hiami mandaꞋ wali eaꞋ sipsip ina mameꞋ maguf amamumi, owaꞋ. AeꞋ siꞋi uta. Emi egafis siwisi aeꞋ nomon, God nefaꞋas seatanimani. Esis suwis suwisi seaꞋ gwaꞋaimi buꞋwami. 10 Amam makualifi ina mafiꞋi ma meandaꞋ anona maol, owaꞋ. Amam mafiꞋi ma makualef mohas sagaꞋ mohambombagas. AeꞋ afiꞋi ma ipeꞋ peape andeandeꞋ ambal namunai nopeipa siꞋipa endilisi. 11 AeꞋ aman buꞋuwei imafi sipsipi, aꞋi aꞋe ma eagaꞋ ma iegiambama sipsip imafiam. 12 IꞋi anona aman nendaꞋ maola neafaꞋ otamba atomi ma numafi sipsip amamai, anan okom niꞋi nofaꞋ otamba atom. Anan ina nambimb numafi sipsip andeandeꞋ, owaꞋ. Anan ina aman endilisi numafi sipsipi, owaꞋ. Maina nemaf niti nombagw maitu aolupi mufiꞋi, anan umbamohana nokwaha sipsip atom mitu nofaꞋ nefeꞋ. EaꞋ nombagw amama muwis moha sipsip mofaꞋ mefeꞋ atona etin. 13 Aman anama nandaꞋ maola otamba atomi, nambimb niti nombagw amama mufiꞋi, eaꞋ umbamohana nofaꞋ nefeꞋ. DeiꞋ main, anan nandaꞋ maola otamba atom, eaꞋ nandaiwaꞋ ma numafi sipsip andeandeꞋ.

14 AeꞋ aman buꞋuwei imafi sipsip andeandeꞋi. AeꞋ egawa sipsip aeꞋami eaꞋ sipsip mogawa aeꞋ. 15 EaꞋ naꞋama etin siꞋi Ahalome aeꞋanai negawa aeꞋ, aeꞋ egawa anan. AeꞋ aꞋi aꞋe ma egaꞋ iegiambama sipsip aeꞋami. 16 AeꞋ anom sipsip maitu anagon. Amam ina maitu nomon endalelemb amama, owaꞋ. Amam maitu endalelemb anagon. AeꞋ okom naꞋiam endilisi anona nemaf efaꞋam mifiꞋi momeꞋ maf aeꞋanai ekolasom mitu endalelemb etifigin eaꞋ aeꞋ atowe imafiam. 17 AeꞋ aꞋi egaꞋ ma ieigiambama sipsip aeꞋami ma nambimb ehafel eape namowe wapotiꞋ. Amama atom Ahalome aeꞋanai okom nainaila aeꞋ endilisi. 18 Ina anona aman noha ambal aeꞋanai egaꞋ, owaꞋetin. Okom aeꞋanai atona aꞋi nambimb eagaꞋ. AeꞋ efaꞋ agel luꞋunai ma egaꞋ eahafel wapotiꞋ. Ahalome aeꞋanai naꞋipi basef laꞋifimi eaꞋ aꞋi endaꞋam naꞋama.”

19 Esis Juda sameꞋ basef amama eaꞋ sandawaloga biefis. Hiesi saꞋi, “Ambagof awami mapaina eaꞋ nahaga nagaol endilisi. DeiꞋ maina ipeꞋ pameꞋ basef ananimi?”

21 EaꞋ enis saꞋi, “Anona aman ambagof awami mapainai ina naꞋi anom basef siꞋi anan naꞋiami, owaꞋ. Anan ambagof awami mapainai, ina laꞋifinama nendaꞋ aman anama naep maseꞋanai niti wapotiꞋ, owaꞋetin.”

Esis Juda sandaꞋ naumbih saloma Jisas

22 Nogota anama nomanamb luꞋwami mataga siꞋi asaf atona nalai, esis Juda sandaꞋ anom gwaꞋaimi luꞋwami ma seandaꞋ lotu luꞋunai gani Jerusalem.
SandaꞋ lotu anama, esis ukup mapoma fowaꞋ gani sandaꞋ ipat anama Godi hiꞋalana eaꞋ sawis sandaꞋ lotu.
EaꞋ Jisas nafeꞋ nawis ipat luꞋunai Godi ilafunama fowaꞋ gani Solomon nalaꞋanai.
24 EaꞋ amam Juda mafiꞋi maitu malipana maꞋi, “IneꞋ nandaꞋ opalef afaꞋimi mataga nomonas biefim. Maina nemaf niꞋipafa alihim? IꞋi ineꞋ Krais,
Diga Hibrui Krais naꞋi Mesaia.
,
c, d, e, f, g, h, i, j, k 

deiꞋ niꞋipafa basef alihim.”

25 EaꞋ Jisas nagwamama basef naꞋi, “AeꞋ aꞋipipa eaꞋ, ipeꞋ ina pembaleꞋefa aeꞋ, owaꞋ. AeꞋ andaꞋ ikwaf hianai laꞋifinai ma agel Ahalomei, ikwaf anama nihiꞋambepa aeꞋ emi egaliwi. 26 EaꞋ ipeꞋ ina sipsip aeꞋipai, owaꞋ. IpeꞋ enipa sipsip. NaꞋama deiꞋ ipeꞋ ina pembaleꞋefa aeꞋ, owaꞋ. 27 Sipsip aeꞋami mameꞋ maf aeꞋanai eaꞋ egawa amam eaꞋ amam maila aeꞋ. 28 AeꞋ aseꞋam ambal namunai ma meape andeandeꞋ laꞋelaꞋef hihif. Amam ina mogaꞋ, owaꞋetin. Ina enin epen laꞋifina neatagahom lagof aeꞋami nefaꞋam, owaꞋetin. Amam mope lagof aeꞋami laꞋelaꞋef hihif.

29 Ahalome aeꞋanai naseꞋe sipsip amama aeꞋami. Ina enin epen anona nemaf laꞋifina neatagahom lagel Ahalomei nefaꞋam, owaꞋetin. DeiꞋ main, Ahalome aeꞋanai laꞋifinai endilisi nikilaꞋ epes hiesi. 30 AeꞋ aloma Ahalome, afaꞋ biafa wape atotofa.”

31 EaꞋ amam Juda mafeꞋ mafela otamba wapotiꞋ maꞋi mokwahom mohana afuna.

32 EaꞋ Jisas naꞋipam naꞋi, “AeꞋ ihiꞋambepa ikwaf hianai laꞋifinai nataga Ahalomei eaꞋ patolona. EaꞋ ukup ipeꞋimi mapoma maina ikwaf aeꞋ aliꞋ andaꞋanai deiꞋ paꞋi pekwaha otamba pehe?”

33 EaꞋ amam Juda magwamana basef maꞋi, “AfaꞋ ina wakwaha otamba waꞋi ohena nandaꞋ ikwaf anama hianai, owaꞋ. IneꞋ aman falafunai nandaꞋ findiwa, naꞋi ineꞋ etina God. EaꞋ afaꞋ waꞋi ohena otamba.”

34 EaꞋ Jisas nagwamama basef naꞋi, “Anom basef Godi mail miꞋuli ipeꞋinai maꞋiam maꞋi, God naꞋi,

‘AeꞋ aꞋipipa eaꞋ aꞋi, ipeꞋ siꞋi anom god.’
Basef amama maꞋi esis Juda fowaꞋ gani sofaꞋ miꞋuli Godi eaꞋ sataga epes Ananisi sandaꞋ opeh Ananimi.
,
m, n, o, p, q, r, s 
35 FowaꞋ basef Godi mafeꞋma epes isima maꞋi, ‘God naꞋi, ipeꞋ atona etin siꞋi god.’ Basef amama ina malo, owaꞋ. Mape laꞋelaꞋef mandawalap endilisi. Ahalome aeꞋanai atona nesaheꞋe nandaꞋe ape boꞋwawe ananiwei atowe nasapaꞋe afiꞋi etap anaeꞋ. EaꞋ aꞋi aeꞋ Nogalomana ananiwei. DeiꞋ maina ipeꞋ paꞋi aeꞋ andaꞋ God findiwana? 37 IꞋi aeꞋ ina andaꞋ maol Ahalome aeꞋanai, andeandeꞋma ipeꞋ pindaiwaꞋ ma pembaleꞋefa aeꞋ. 38 IꞋi aeꞋ endaꞋ maol ananinai ma iꞋi ipeꞋ owaꞋ peambaleꞋefa aeꞋ, hapaimi. IpeꞋ piti ikwaf laꞋifinai andaꞋanai, eaꞋ pegawa Ahalome nape nalome, ape alomana.”

39 EaꞋ amam Juda maꞋi mombaloꞋana ma mowaꞋana. OwaꞋetin. Anan nakwahom eaꞋ nafeꞋ.

40 EaꞋ Jisas notanima nambo walemb Jordan fisana nafeꞋ nataga anama fowaꞋ dambadamba Jon napisiꞋas embel eaꞋ nape anama. 41 EaꞋ amam nematawa hiesi safiꞋmai anan. Esis saꞋi, “Jon owaꞋ nondaꞋ anona ikwaf laꞋifinai, eaꞋ basef ananimi hiami naꞋiama Jisas, amama endilisimi atom.”

42 EaꞋ amam nematawa hiesi sombaleꞋefa Jisas anama.

Copyright information for `AOJFILIFITA