John 14

Jisas anan siꞋi eaf ma epes sefeꞋma Ahalomana

EaꞋ Jisas naꞋipafa naꞋi, “Opalef ipeꞋimi ina mohafel nimanim, owaꞋ. IpeꞋ pembaleꞋefa God, pembaleꞋefa aeꞋ wapotiꞋ. Ipat Ahalome aeꞋanai alihina satopaꞋ rum hiami mape mandandaepa. IꞋi owaꞋ, fowaꞋ aeꞋ aꞋipipa. Endilisi, aeꞋ efeꞋ endondomba wambel ipeꞋinai. IꞋi aeꞋ efeꞋ endomba wambel ipeꞋinai, anona nemaf etanimani efaꞋepa pefeꞋ pepe pelome. EaꞋ anama aeꞋ eapoma, ipeꞋ wapotiꞋ pepe anama atagon pelome. EaꞋ ipeꞋ pegawa eaf aeꞋ iefeꞋanai ma wambel anama.”

EaꞋ Tomas nahaliꞋana naꞋi, “Dembinai, afaꞋ owaꞋ ogawai ineꞋ nefeꞋ eti? AfaꞋ ina ogawa eaf anama ineꞋ naꞋi neafeꞋma.”

EaꞋ Jisas naꞋipana naꞋi, “AeꞋ atowe eaf ofagewe ma basef endilisimi moloma ambal namunai. OwaꞋ enin epen laꞋifina nefeꞋ neatagama Ahalome anona eaf, owaꞋetin. EaꞋ aeꞋ atowe. IꞋi ipeꞋ pegawa aeꞋ, pegawa Ahalome aeꞋanai wapotiꞋ. EaꞋ deiꞋ patolona. DeiꞋ atef patolona pegawana.”

EaꞋ Filip nahaliꞋana naꞋi, “Dembinai, ineꞋ nihiꞋambafa Ahalomena ineꞋinai afaꞋ eaꞋ mondahama afaꞋ.”

EaꞋ Jisas naꞋipana naꞋi, “Filip, nogota launa ape alomepa, ineꞋ owaꞋ ataꞋ negawa aeꞋ? Emi egafis sati aeꞋ, esis sati Ahalome aeꞋanai wapotiꞋ. DeiꞋ maina ineꞋ ataꞋ naꞋi, ‘AeꞋ ihiꞋambepa Ahalome aeꞋanai ipeꞋ?’ 10 IneꞋ nembaleꞋefa aeꞋ ma negawa aeꞋ aloma Ahalome afaꞋ atofa, aeꞋ ape anan, anan nape aeꞋ? Basef aeꞋ aꞋipapami, amama aeꞋ ina efaꞋama okom aeꞋanai atona, owaꞋ. Ahalome nape aeꞋ eaꞋ anan atona nandaꞋ opeh ananimi hiami. 11 IpeꞋ pembaleꞋefa basef amama. AeꞋ ape Ahalome, Ahalome nape aeꞋ. IꞋi owaꞋ, ipeꞋ ukup mopoma opeh laꞋifimi hiami andaꞋami. IpeꞋ piti opeh amama, pembaleꞋefa aeꞋ.

12 Basef endilisimi atom deiꞋ aꞋipipa. Emi egafis sembaleꞋefa aeꞋi, opeh hiami deiꞋ andaꞋami, esis wapotiꞋ anona nemaf esis sondaꞋam. Ama anona nemaf sondaꞋ opeh luꞋwami endilisi mikilaꞋ opeh aeꞋami. DeiꞋ main? AeꞋ efeꞋma Ahalome. 13 Amamaga hiami ipeꞋ pendaꞋ beten pihaliꞋana agel aeꞋanai, anona nemaf aeꞋ endaꞋam. Ama Ahalome nofaꞋ agel luꞋunai ma opeh aeꞋ nogalomana ananiwei anona nemaf endaꞋam. 14 Amamaga ipeꞋ pehaliꞋ aeꞋ ma agel aeꞋanai, pembaleꞋefa aeꞋ endilisi, nambimb endaꞋam.

Jisas naꞋi nambimb nosapaꞋ Ambal BuꞋunai Godi nifiꞋi

15 IꞋi ipeꞋ ukup mimila aeꞋ endilisi, ipeꞋ pila miꞋuli aeꞋenai andeandeꞋ. 16 Ama nambimb ihaliꞋ Ahalome, ma nisiꞋipei anona nigiambamepa nondaꞋepa laꞋifipa. Anan nope noloma ipeꞋ laꞋelaꞋef hihif. 17 Anama Ambal BuꞋunai Godi naꞋi basef endilisimi. Esis amam nematawa saila waf etapanai ina anona nemaf sotolona sogawana sofaꞋana, owaꞋ. EaꞋ ipeꞋ pegawana eaꞋ nape nalomepa, eaꞋ nambimb nope nolomepa. 18 AeꞋ ina ikwahipa tol pepe etin, siꞋi awasi amama alifisi ahapas mamasas aꞋasi, owaꞋetin. Nambimb aeꞋ ifiꞋmipei. 19 Nogota bandana esis amam nematawa saila waf etapanai ina nambimb sotolowe wapotiꞋ, owaꞋ. EaꞋ ipeꞋ petolowe. AeꞋ ape ambal namunai napaiwe, eaꞋ naꞋama etin ipeꞋ pepe ambal namunai nupaipa. 20 Nemaf anama ipeꞋ pegawa aeꞋ ape Ahalome, ape nomona ipeꞋ, ipeꞋ pape aeꞋ. 21 Emi egafis sefaꞋ miꞋuli aeꞋanai silana andeandeꞋi, esis ukup maimaila aeꞋ endilisi. Nambimb Ahalome aeꞋanai okom nila esis. EaꞋ aeꞋ wapotiꞋ okom ninila esis eaꞋ etaga endawalapa esis alihiwi.”

22 Jisas naꞋiam naꞋama eaꞋ anona Judas ina anama Kariotinai, owaꞋ, anona epen, naꞋipa Jisas naꞋi, “Dembinai, deiꞋ maina ineꞋ naꞋi nihiꞋambafa ineꞋ netaga nendawalap alihinama afaꞋ, eaꞋ ineꞋ owaꞋ nihiꞋambasa ineꞋ alihinama esis saila waf etapanai?”

23 EaꞋ Jisas nagwamana basef naꞋi, “Emi egafis ukup mimila aeꞋ endilisi, esis anona nemaf sila basef aeꞋami andeandeꞋ. EaꞋ Ahalome aeꞋanai okom ninila esis. EaꞋ afaꞋ biafa ufiꞋmai esis ope olomas laꞋelaꞋef hihif. 24 Emi egafis sandaiwaꞋma aeꞋi, esis ina anona nemaf sila basef aeꞋami andeandeꞋ, owaꞋ. EaꞋ basef amama ipeꞋ pameꞋami, amama ina aeꞋami, owaꞋ. Amama basef Ahalome God nasapaꞋe afiꞋi. 25 Nogota anama aeꞋ ataꞋ ape alomepa aꞋipipa basef amama hiami. 26 EaꞋ anan nigiambamepa ma nondaꞋepa laꞋifipa, anan Ambal BuꞋunai Godi. Anama Ahalome nambimb nesapaꞋana nifiꞋi ma agel aeꞋanai. EaꞋ nowalipipa ma amamaga hiami, nefela nomonas ipeꞋimi ma ukup mopoma basef hiami aliꞋ aꞋipipami. 27 AeꞋ aꞋi ikwahipa. EaꞋ aeꞋ ina endaꞋepa umbamahepa ukup awiaom pepan siꞋi amam nematawa saila waf etapanai sandaꞋam, owaꞋ. DeiꞋ andaꞋepa pepe ukup awanem endilisi. Ukup ipeꞋimi ina mohafel aom, owaꞋ. Ina umbamahepa, owaꞋ. 28 IpeꞋ pameꞋam eaꞋ basef amama doꞋok aꞋipipami. AeꞋ ikwahipa efeꞋ. Nambimb itanimamipei ifiꞋi. IꞋi ipeꞋ ukup mila AeꞋ endilisi, ipeꞋ pendanifel ma AeꞋ efeꞋma Ahalome. DeiꞋ main? Ahalome Anan dembinai nikilaꞋ AeꞋ. 29 Amamaga amama ina deiꞋ mataga, ataꞋ owaꞋ. EaꞋ aeꞋ aliꞋ aꞋipipa ma nemaf anama amamaga amama meataganai ipeꞋ pegawa eaꞋ pembaleꞋefa aeꞋ. 30 AeꞋ ina nambimb iꞋi basef hiami elomepa, owaꞋ. DeiꞋ main? Aman dembinai aonai numafi etap anaeꞋ anama deiꞋ nafiꞋi. Anan ina nambimb laꞋifinama nondaꞋme anom amamaga, owaꞋetin. 31 EaꞋ aeꞋ aꞋi esis amam nematawa saila waf etapanai sogawa aeꞋ okom nainaila Ahalome endilisi. NaꞋama deiꞋ andaꞋam naꞋama etin siꞋi anan naꞋipi. EaꞋ deiꞋ afaꞋ ofeꞋ.

Copyright information for `AOJFILIFITA