John 3

Jisas naꞋi naloma Nikodemus

Anona aman agilinama Nikodemus, anan Farisi agel luꞋunai ma esis Juda. Anan nape dembinai asasinai. Anona owamb nafiꞋmai Jisas naꞋipana naꞋi, “Dembinai Tisa, apeꞋ mogawa ineꞋ, God nasapaꞋena nafiꞋi siꞋi Dembinai Tisa. IꞋi owaꞋ God nope noloma anona epen, anan ina laꞋifina neandaꞋ maol anama laꞋifinai ineꞋ nandaꞋanai, owaꞋ.”

EaꞋ Jisas nagwamana basef naꞋi, “AeꞋ aꞋipina endilisi, emi epen God owaꞋ nendan netaga dambaini, enin ina nambimb niowis wambota Godi numafian, owaꞋetin.”

EaꞋ Nikodemus nahaliꞋana naꞋi, “DeiꞋ amama hagasi sondaꞋam siꞋimama ma solas seataga dambais wapotiꞋ? Esis sotanima suwis opalef mamasasi nomon, ama nambimb otanima olas wapotiꞋ?”

EaꞋ Jisas nagwamana naꞋipana naꞋi, “AeꞋ aꞋipina endilisi, iꞋi Ambal BuꞋunai Godi owaꞋ nendaꞋan dambaina embel, ina nambimb laꞋifin niowis wambota Godi, owaꞋetin. EaꞋ iꞋi Ambal BuꞋunai Godi nolan dambain, enin wilama niowis wambota Godi. Amamaga mataga alop atonai, amama alop atopumi siꞋi anoꞋw nemataꞋw kola awani. EaꞋ amamaga Ambal BuꞋunai Godi nandaꞋami, amama mataga siꞋi Ambal BuꞋunai. Ina nomonas natanea aꞋipina naꞋama aꞋi petaga dambaipa wapotiꞋ siꞋi epes solaipa, owaꞋ. Uf naluwi siꞋi nalo nafeꞋ ganigani. IneꞋ nameꞋ uf atona, eaꞋ ina negawa anama nalo nafiꞋima nafeꞋma, owaꞋ. Epes hiesi Ambal BuꞋunai Godi nandaꞋas sataga dambais, esis sataga naꞋama etin.”

EaꞋ Nikodemus nagwamana basef naꞋi, “Amamaga amama nambimb motaga mondawalap miꞋimama?”

10 EaꞋ Jisas nagwamana naꞋi, “DeiꞋ siꞋi main? IneꞋ Dembinai Tisa nawalipasa basef esis Juda, eaꞋ ineꞋ owaꞋ negawa amamaga amama? 11 Endilisi aeꞋ aꞋipina, afaꞋ waꞋi amamaga afaꞋ wagawami, eaꞋ wawalapa amamaga amama watolomi. EaꞋ ipeꞋ pewaꞋ alafugaha basef amama afaꞋ wawalapami. 12 AeꞋ aꞋipipa amamaga amama etapami, eaꞋ ipeꞋ ina pegawam pembaleꞋefam, owaꞋ. IꞋi aeꞋ ieaꞋipipa amamaga ilifami, nambimb ipeꞋ pegawa pembaleꞋefam piꞋimama? OwaꞋetin. 13 Ina enin epen etapani nealata gani heven, owaꞋ. AeꞋ atowe. AeꞋ ataga epen endilisiwei eaꞋ aeꞋ atowe akwaha heven isilaꞋi, aeꞋ maꞋuwi. 14 FowaꞋ Moses nafela anona yul nandaꞋ kapa nandaꞋanai nail anona lawag ilif. NandaꞋana anama wafiguma fatauguma. Anama naꞋama etina anona nemaf sefela aeꞋ ataga epen endilisiwei sundi ieil anona lawag ilif. 15 Ama epes emi egafis sembaleꞋefa aeꞋi, anona nemaf sofaꞋ ambal namunai sope andeandeꞋ laꞋelaꞋef hihif.

16 Endilisi, God Nogalomana ananinai atotona nape. OwaꞋetin. EaꞋ anan okom nainaila amam nematawa hiapai mape etapi. EaꞋ naseꞋapai Nogalomana ananinai atotona ma emi egafis sombaleꞋefanai sope andeandeꞋ, ina segaꞋma waf aonai, owaꞋ. SofaꞋ ambal namunai sope andeandeꞋ laꞋelaꞋef hihif. 17 God ina nasapaꞋ Nogalomana ananinai nafiꞋi etap anaeꞋ ma neandaꞋmapa basef, owaꞋ. Anan nasapaꞋana nafiꞋi ma nofaꞋ apeꞋ epes hiapai mape etapi motanimani. 18 Emi egafis sembaleꞋefa anan, esis anona nemaf basef kot luꞋunai aꞋas. EaꞋ emi egafis owaꞋ seambaleꞋefana, epes isima hegililas eaꞋ ma kot anama luꞋunai aonai. DeiꞋ main? Esis sandaiwaꞋma seambaleꞋefa Nogalomana atotona Godi, naꞋama epes isima hegililas hiꞋalas. 19 Basef ofagema ma kot luꞋunai anama naꞋama. Howalagon nafiꞋi nataga etap anaeꞋ, eaꞋ esis ukup maimaila waf anama etapanai atona siꞋi sape owamb, sandaiwaꞋma howalagon. DeiꞋ maina esis sandaiwaꞋ? Esis sandaꞋ waf aonai naꞋama deiꞋ sandaiwaꞋ. 20 Emi egafis sandaꞋ waf aonai, sowaꞋ alafugaha howalagon, esis sandaiwaꞋma sifiꞋmai howalagon ma waf aonai esis sandaꞋanai neandawalap. EaꞋ deiꞋ umbamahas sandaiwaꞋ. 21 Emi egafis sandaꞋ waf endilisinai safiꞋmai howalagon ma enis epes sitilis seagawa esis sape laꞋifis laꞋelaꞋef saloma God sandaꞋ opeh ananimi.”

Jon nawalapa basef ofagema Jisasi naꞋiam alihim

22 Basef amama hiꞋalam, Jisas naloma alupumi ananimi mafeꞋ etap hiagoma Judia eaꞋ mafeꞋ anama taun aꞋagoma. EaꞋ nape nalomam napisiꞋ esis amam nematawa embel. 23 EaꞋ Jon nape wambel anama Inon felefeleꞋma anona wambel Salim. Anama walemb luꞋunai netaha, esis amam nematawa hiesi safiꞋi anama, eaꞋ anan napisiꞋas embel.

24 Nemaf anama dembinai King Herot ina deiꞋ nandaꞋ Jon nandaꞋ kalabus, ataꞋ owaꞋ. 25 EaꞋ amam alupumi Joni maꞋi anom basef mape laꞋafena amam maloma anona aman Judainai. Amam maꞋi basefa waf anama esis Juda sasaꞋof sowandoꞋ alogwa seape boꞋwesa naep Godi.

26 EaꞋ alupumi Joni mafeꞋma anan maꞋipana maꞋi, “Dembinai Tisa, aman fowaꞋ nape naloma ineꞋi gani waꞋol walemb Jordani ineꞋ nawalapa basef naꞋianai, aman anama deiꞋ amam nematawa hiesi safeꞋma anan napisiꞋas embel.”

27 EaꞋ Jon naꞋipam naꞋi, “IꞋi God nape heveni owaꞋ neaseꞋana anom amamaga anona epen, epen anama ina laꞋifina neandaꞋ anona maol, owaꞋ. 28 IpeꞋ pegawa basef amama fowaꞋ aeꞋ aꞋiami aꞋi aeꞋ ina Krais, God nandandepe nasapaꞋe afiꞋi, owaꞋ. EaꞋ God nasapaꞋe aliꞋ afiꞋmai Krais. 29 IꞋi anona aman neseꞋ anoꞋw nemataꞋw, nemataꞋw akwama eaꞋ ananiꞋwi naseꞋakwi. EaꞋ alupunai aman anama nendanifela naitu nameꞋ basefa aman anama deiꞋ naseꞋakwi nafiꞋi. DeiꞋ naꞋama etina aeꞋ andanifel endilisi ma okom aeꞋanai, andanifela Dembinai Jisas. 30 Agel Jisasi nelata luꞋuna, eaꞋ agel aeꞋanai nowala saꞋona.”

Aman nafiꞋi heveni ilifi

31 Aman nafiꞋi ilifi anan nape ilifa amamaga hiami. EaꞋ aman nataga etapi anan etapanai naꞋi basef etapami atom. EaꞋ aman nafiꞋi heveni anan nape ilifa amamaga hiami. 32 Anan naꞋi basef nawalapa amamaga amama hiami natolom negawam eaꞋi. EaꞋ ina enin epen nemeꞋ basef amama anan naꞋiami, owaꞋetin. 33 Emi egafis semeꞋ basef ananimi ma sailam, esis saꞋi aꞋe ma basef amama sihiꞋambasam alihim eaꞋ saꞋi basef Godi endilisimi atom. 34 Aman anama God nasapaꞋana nafiꞋi anan nawalapa basef Godi. EaꞋ God naseꞋana Ambal BuꞋunai Ananinai nape siꞋinama anan. 35 Ahalomana God okom nainaila Nogalomana eaꞋ naseꞋana amamaga hiami ma lagof ananimi. 36 Emi egafis sembaleꞋefa Nogalomana ananinai, epes isima deiꞋ sefaꞋ ambal namunai ma sope andeandeꞋ laꞋelaꞋef hihif. EaꞋ emi egafis sewaꞋ alafugama Nogalomana ananinai, epesisima ina nambimb sefaꞋ ambal namunai sepe andeandeꞋ laꞋelaꞋef, owaꞋetin. DeiꞋ main, okom wandafunai Godi napomas laꞋelaꞋef.

Copyright information for `AOJFILIFITA