John 5

Jisas nandaꞋ anona aman boꞋona anona walemb batupaꞋmanai Betesda

Jisas nape Galili eaꞋ, nondowasaꞋ Jerusalem naloma esis Juda seaꞋ gwaꞋaimi luꞋwami ma nomonas meapoma Dembinai God. Wambel anama nomon felefeleꞋma uta luꞋunai sipsip mawisanai anama anona walemb batupaꞋmanai saꞋunai notah. Agilinama esis sofalana diga Hibrui saꞋi Betesda. Walemb batupaꞋmanai anama waꞋowaꞋol salaꞋ ifagw sandaꞋ ilagwalef wanom biam mape. Ilagwalef amama laꞋelaꞋef epes isima hiesi awes nandaꞋasi sape saloma enis naep maseꞋasi saloma boꞋwagahi lagof magaꞋ mailasi. [Esis sape laꞋelaꞋef sahafa embel mandambombol mandaꞋam deꞋindaꞋ. Anom nimeguf anona ensel Dembinai Godi nafiꞋi nowala walemb batupaꞋmanai anama nandaꞋ embel mandambombol. Emi egafin awes nandaꞋasi niliꞋ nefeꞋ newala embel, netaga boꞋwen wapotiꞋ.]

Anona aman nape awes luꞋunai nandaꞋana nape nalomas afagof hiami 38-peleim. EaꞋ Jisas natolona tol naꞋoh eaꞋ negawa aman anama awes nandaꞋanai naꞋoh naꞋae afagof hiami. NaꞋama nahaliꞋana naꞋi, “IneꞋ naꞋi atuwasi netaga boꞋwena, o owaꞋ?”

EaꞋ nagwamana basef naꞋi, “Aman dembinai, nemaf anama embel mandambombol ina enis epes safele salae ewala embel, owaꞋ. AeꞋ atowe andaꞋam aꞋi efeꞋ eaꞋ, enis epes saliꞋ sowala sikilaꞋe.”

EaꞋ Jisas naꞋipana naꞋi, “IneꞋ hafel nitu nefaꞋ lehis ineꞋimi nitu nefeꞋ.”

DeiꞋ atef anan nataga boꞋona. NaꞋama anan nohafel naitu nafela lehis ananimi eaꞋ nafeꞋ.

10 Nemaf anama amama mataga, anona nemaf Sabat esis Juda sapoma nomaꞋwanai. EaꞋ amam dambami esis Judai mati aman anama nataga boꞋona nafela lehis ananimi nofaꞋam naitu nafeꞋ naep amamumi nemaf anama Sabat. EaꞋ maꞋipana maꞋi, “DeiꞋ nemaf apeꞋ mapoma nomaꞋwanai, miꞋuli apeꞋinai naꞋi owaꞋ ma ineꞋ nefela lehis nefaꞋam neafeꞋ, owaꞋ.”

11 EaꞋ anan nagwamama basef naꞋi, “Aman anama nandaꞋe buꞋuwei anan naꞋipi naꞋi, ‘Fela lehis ineꞋimi nefaꞋam nefeꞋ.’ ”

12 EaꞋ mahaliꞋana maꞋi, “Emi egalin naꞋipina naꞋi, ‘IneꞋ fela lehis ineꞋimi nefaꞋam nefeꞋ?’ ”

13 Aman anama ina negawa emi egalin nandaꞋana boꞋona, owaꞋetin. DeiꞋ main? Jisas nafeꞋ nandambahoꞋ naloma amam nematawa hiesi wambel anama. 14 Anom nimeguf mafeꞋma eaꞋ, Jisas natolona ipat luꞋunai Godi sandaꞋ lotuwanai naꞋipana naꞋi, “NemeꞋ! DeiꞋ ineꞋ amboꞋwena eaꞋ. EaꞋ ineꞋ owaꞋ nitanima nefeꞋ nendaꞋ waf aonai wapoti, owaꞋ. NaꞋama amamaga awami endilisi motagamena.”

15 EaꞋ nafeꞋ naꞋipa amam Juda naꞋi, “Aman anama nandaꞋe buꞋuwei anan Jisas.”

16 EaꞋ deiꞋ amam Juda ukup aoma nandaꞋ aman anama awes nandaꞋana nataga boꞋona nehafel nofaꞋ lehis naꞋohami nafeꞋ nemaf anama Sabat. NaꞋama deiꞋ mohafel mandaꞋmana waf aonai mogolopana ma meahana. 17 EaꞋ Jisas nagwamama basef amam naꞋi, “Ahalome aeꞋanai nandaꞋ maol nimeguf hiami nafiꞋi notambel deiꞋ nemaf anaeꞋ Sabat wapotiꞋ. EaꞋ aeꞋ wapotiꞋ andaꞋ maol siꞋi anan.”

18 EaꞋ amam Juda ukup wandafum endilisi maꞋi mohana neagaꞋ. Amam maꞋi anan nosambala basefa miꞋuli ma nemaf anama Sabat sapoma nomaꞋwanai. EaꞋ Jisas naꞋiam wapotiꞋ naꞋi God anan ahalomana ananinai endilisi. EaꞋ amam maꞋi, “Anan naꞋi anan nataga naꞋama etin siꞋi God.”

Nogalomana Godi anan nefaꞋ agel luꞋunai ma nandaꞋ maol

19 EaꞋ Jisas nagwamama basef amam naꞋi, “AeꞋ aꞋi endilisi aꞋipipa. AeꞋ nogalomana Godi aeꞋ atowe ina laꞋifiwei ma endaꞋ anom amamaga ma okom aeꞋanai atona, owaꞋ. AeꞋ andaꞋ amamaga amama ati Ahalome nandaꞋami, eaꞋ amama atom. DeiꞋ main, amamaga hiami ahalome nandaꞋami, amama aeꞋ Nogalomana wapotiꞋ deiꞋ andaꞋam. 20 Ahalome aeꞋanai okom nainaila aeꞋ Nogalomana ananiwei nihiꞋambe amamaga hiami anan nandaꞋami. Anona nemaf nihiꞋambe anom amamaga luꞋwami mikilaꞋ. NaꞋama nambimb ipeꞋ gegelalasipa endilisi ma amamaga amama luꞋwami meataga. 21 Ahalome nafela esis sagaꞋi sohafel wapotiꞋ ma neaseꞋas ambal namunai. EaꞋ deiꞋ naꞋama etin aeꞋ Nogalomana ananiwei wapotiꞋ aeꞋ aseꞋas ambal namunai epes aeꞋ okom naꞋiasi. 22 Endilisi, Ahalome God ina nawaloga enin epen siꞋi sandaꞋmasa koti sandaꞋam, owaꞋ. Maol hianai ma neawaloga epes anan naseꞋeam aeꞋ Nogalomana ananiwei. 23 God nandaꞋam naꞋama ma deiꞋ esis amam nematawa hiesi safela agel aeꞋ Nogalomanai ananiwei luꞋuna naꞋama etin siꞋi safela agel Ahalomei luꞋuna. Emi egafis owaꞋ seafela agel aeꞋ Nogalomanai luꞋuna, amama ina safela agel Ahalomei God nasapaꞋe afiꞋi luꞋuna, owaꞋ.

24 Endilisi aeꞋ aꞋipipa. Emi egafis semeꞋ basef aeꞋami ma sembaleꞋefa anan nasapaꞋe afiꞋi, isima sefaꞋ ambal namunai eaꞋ ma seape andeandeꞋ laꞋelaꞋef hihif. Esis ina sandaꞋ basef luꞋwami ma kot, owaꞋ. Esis sefaꞋ ambal namunai nikilaꞋa gaꞋ. 25 Endilisi aeꞋ aꞋipipa, nemaf anama naꞋi neataga, deiꞋ nataga eaꞋ ma esis saꞋi seameꞋ maf aeꞋanai, aeꞋ Nogalomana Godi. Emi egafis semeꞋ aeꞋi, nambimb sefaꞋ ambal namunai ma seape boꞋwes endilisi laꞋelaꞋef. 26 Ambal namunai nape Ahalome atona. EaꞋ nandaꞋ aeꞋ Nogalomana ananiwei eaꞋ aeꞋ wapotiꞋ ambal namunai napaiwei naꞋama etin. 27 AeꞋ ataga epen endilisiwei. NaꞋama God naseꞋe agel luꞋunai ma eawaloga epesa kot ma basef luꞋwami. 28 IpeꞋ ina ukup hiahiama amama, owaꞋ. Nemaf anama dahandahama niꞋi neataga, amam nematawa hiesi sagaꞋi sawas sape hiꞋagilifi anona nemaf semeꞋ maf aeꞋanai sohafel sokwaha hiꞋagilif suwisi andeꞋ. EaꞋ emi egafis sandaꞋ waf buꞋunai, anona nemaf sohafel wapotiꞋ sofaꞋ ambal namunai sepe boꞋwes laꞋelaꞋef hihif. EaꞋ emi egafis sandaꞋ waf aonai, anona nemaf setanima sehafel sondaꞋ basef luꞋwami ma kot.”

Enis epes sawalapa basef ofagema saꞋiama Jisas

30 EaꞋ Jisas naꞋipas naꞋi, “AeꞋ ina andaꞋ anom amamaga ma nomonas aeꞋami atom, owaꞋ. Basef aeꞋ ameꞋama Ahalome, amama atom ailam awalapama esis ewalogas ma kot. EaꞋ basef amama ma kot aeꞋanai amama boꞋom andeandeꞋ. DeiꞋ main, aeꞋ ina andaꞋama aila nomonas aeꞋami atom, owaꞋ. AeꞋ andaꞋama aila nomonasa aman anama nasapaꞋe afiꞋi. 31 IꞋi aeꞋ ewalapa basefa aeꞋ atowe, naꞋama ipeꞋ piꞋi basef amama aeꞋ aꞋiami ina endilisi, owaꞋ. PiꞋi basef amama basoꞋmaimi. 32 Anona nape deiꞋ nawalapa basefa aeꞋ. NaꞋama aeꞋ deiꞋ egawa basef amama naꞋiama aeꞋ endilisi.

33 FowaꞋ ipeꞋ pasapaꞋ basef mafeꞋmago Jon. Anan nawalapa basef endilisimi ma aeꞋ. 34 EaꞋ deiꞋ aeꞋ ina efala enis epes etapasi ma sowalapa basefa aeꞋ siegiambame, owaꞋ. AeꞋ aꞋi God nofaꞋepa pitanimani pifiꞋmai anan. DeiꞋ aꞋi basef amama. 35 Aman anama Jon siꞋi anona nagwapina nafifima amam nematawa hiesi. EaꞋ ukup ipeꞋimi maꞋi aꞋe ma ipeꞋ pendanifel nogota anama bandana ma howalagon anama Joni eaꞋ pembaleꞋefa basef ananimi. 36 Maol anama laꞋifinai Ahalome naseꞋeama naꞋi imafiana endaꞋana hiꞋilana anama atona aeꞋ deiꞋ andaꞋana. Anama maol laꞋifinai nikilaꞋ maol Joni nawalapa basef ofagema ma aeꞋ. DeiꞋ main, maol anama Ahalome nasiꞋianai ma eandaꞋana hiꞋialana aeꞋ andaꞋanai nihiꞋamba esis amam nematawa segawa Ahalome nasapaꞋe afiꞋi. 37 Ahalome nasapaꞋe afiꞋi, anan atona nawalapa basef ofagema ma aeꞋ. FowaꞋ gani pafiꞋi pataga deiꞋ ipeꞋ ina pati Anan pameꞋ maf ananinai, owaꞋ. 38 EaꞋ basef ananimi wapotiꞋ amama ina mape ukup ipeꞋimi, owaꞋ. DeiꞋ main, ipeꞋ owaꞋ peambaleꞋefe God nasapaꞋe afiꞋi. 39 Ukup ipeꞋimi mandandaꞋ maꞋi basef amama mape Buk Baibel maseꞋepa ambal namunai ipeꞋ ma peape boꞋwepa laꞋelaꞋef hihif. EaꞋ ipeꞋ patalifa basef amama peagawam eaꞋ pandaꞋ maol luꞋunai pagolopa basef amama hiami. Basef amama Baibelimi maꞋi aeꞋ mawalape. OwaꞋetin. 40 IpeꞋ pandaiwama pifiꞋmai aeꞋ pefaꞋ ambal namunai peape boꞋwepa laꞋelaꞋef hihif.

41 AeꞋ ina okom naꞋi epes etapasi seafela agel aeꞋanai luꞋuna, owaꞋ. 42 AeꞋ egawa ukup ipeꞋimi ina maimaila God, owaꞋ. 43 AeꞋ afiꞋi agel Ahalome aeꞋanai, eaꞋ ipeꞋ ina paseꞋe opalef ipeꞋimi ma aeꞋ, owaꞋ. Anona nemaf anona aman nifiꞋi ma agel ananinai atona, ipeꞋ piꞋi aꞋe peseꞋana opalef anan. 44 Ukup ipeꞋimi maꞋi mefaꞋ agof luꞋwami ma sahopepa owapepa ipeꞋimi atom. EaꞋ God owaꞋ. NaꞋama ipeꞋ pembaleꞋefe piꞋimama? OwaꞋetin. 45 IpeꞋ ina ukup mendandaꞋ miꞋi anona nemaf aeꞋ endaꞋ kotimipa ma Ahalome God, owaꞋetin. Aman nendaꞋ kotima ipeꞋ, anan Moses, aman anama ipeꞋ paꞋi anona nemaf nigiambamepa. 46 IpeꞋ pembaleꞋefa basef ananimi, pembaleꞋefa basef aeꞋami wapotiꞋ. DeiꞋ main, anan nandaꞋ basef maꞋi aeꞋ mail Buk Baibel. 47 EaꞋ ipeꞋ owaꞋ peambaleꞋefa basef anan nandaꞋami ma aeꞋ, owaꞋ. Nambimb ipeꞋ pembaleꞋefa basef aeꞋami piꞋimama? OwaꞋetin.”

Copyright information for `AOJFILIFITA