John 9

Anona aman naep maseꞋanai Jisas nandaꞋana boꞋona

Jisas nafeꞋ eaf eaꞋ nati anona aman naep maseꞋanai. FowaꞋ mamaꞋwana kolana naep maseꞋana nape naꞋama etin laꞋelaꞋef. EaꞋ alupumi ananimi mahaliꞋana maꞋi, “Dembinai tisa, deiꞋ maina aman anama naep maseꞋana? Anan nandaꞋ waf aonai o esis mamasana ananisi sandaꞋ waf aonai selana?”

EaꞋ Jisas naꞋipam naꞋi, “Ofagema ma anan naep maseꞋana ina mamasana sandaꞋ waf aonai o anan nandaꞋ waf aonai, owaꞋ. Anan naep maseꞋana ma maol Godi notaga luꞋuna nondawalap. Amama atom deiꞋ naep maseꞋana. DeiꞋ eaꞋ alip, nogota anama apeꞋ mondaꞋ maola anan nasapaꞋe afiꞋi. Owamb neataga ina ataꞋ mondaꞋ maol, owaꞋetin. AeꞋ ataꞋ ape etap anaeꞋ ape siꞋi nagwapin howalagon ipeꞋiwei ipeꞋ hipei pape etapi.”

Jisas naꞋipam naꞋama, eaꞋ nisiꞋwafa apah nandisam maloma etap. EaꞋ nasemanam naep aman anama. EaꞋ naꞋipana naꞋi, “IneꞋ nefeꞋ nesaꞋopa naep embel walemb batupaꞋmanai anama Siloam.” Basef ofagema ma agel anama naꞋi, nasapaꞋana nafeꞋ.

EaꞋ aman anama nafeꞋ nasaꞋopa naep ananimi, ma ataꞋ netanimani, naep matiana andeandeꞋ boꞋona.

Esis wambel atona saloma enis fowaꞋ sati anan nape eaf nandailasa otamba gwaꞋaimi maim sahaliꞋas saꞋi, “Anan aman anama maꞋuna fowaꞋ nape eaf nandailasa gwaꞋaimi maim?”

EaꞋ enis saꞋi, “Anan maꞋuna.”

EaꞋ enis saꞋi, “OwaꞋ. Anona aman anama. EaꞋ amaga ananinai siꞋi anan.”

EaꞋ aman anama atona fowaꞋ naep maseꞋanai naꞋi, “AeꞋ maꞋuwi.”

10 EaꞋ esis sahaliꞋana mehip saꞋi, “IneꞋ nandaꞋ maina deiꞋ nati andeandeꞋ?”

11 EaꞋ anan nagwamas naꞋi, “Anona aman agel ananinai Jisas nandaꞋ etap maloma apah ananimi nambomam nandaꞋmeam naep aeꞋami. EaꞋ naꞋipi naꞋi, ‘IneꞋ nefeꞋ nesaꞋof walemb batupaꞋmanai Siloam.’ EaꞋ afeꞋ asaꞋof eaꞋ naep mati.”

12 EaꞋ sahaliꞋana saꞋi, “Aman anama nape eti?”

EaꞋ naꞋipas naꞋi, “AeꞋ ina egawa napoma, owaꞋ.”

Amam Farisi mahaliꞋasa aman anama fowaꞋ naep maseꞋanai

13 Esis saoꞋwa aman anama fowaꞋ naep maseꞋanai safeꞋma amam Farisi. 14 Nemaf anama esis sapoma nomaꞋwanai Sabat, anama atona Jisas nandaꞋ etap maloma apah nambomam nandaꞋmana naep ananimi eaꞋ naep matiana.

15 EaꞋ amam Farisi mahaliꞋana wapotiꞋ maꞋi, “Anan nandaꞋmena maina deiꞋ naep mati?”

EaꞋ aman anama nagwamam naꞋi, “Anan nandaꞋ etap maloma apah ananimi nandaꞋmeam naep aeꞋami, eaꞋ afeꞋ asaꞋopa naep eaꞋ deiꞋ naep mati.”

16 EaꞋ anom Farisi maꞋi, “Aman anama ina naila miꞋuli ma nemaf anama Sabat, owaꞋ. NaꞋama deiꞋ anan ina aman Godi, owaꞋ.”

EaꞋ anom Farisi maꞋi, “Anona aman nandaꞋ waf aonai ina laꞋifina ma neandaꞋ maol laꞋifinai siꞋi God nandaꞋanai, owaꞋ.”

EaꞋ amam Farisi mandawal biefim.

17 EaꞋ mahaliꞋ aman anama fowaꞋ naep maseꞋanai wapotiꞋ maꞋi, “IneꞋ negawana naꞋimama? Aman anama nandaꞋ naep ineꞋimi mati.”

EaꞋ aman anama naꞋi, “Anan profet.”

18 EaꞋ amam dambami esis Judai ina mombaleꞋefana maꞋi endilisi, owaꞋ. EaꞋ mofalai mamasana ananisi safiꞋi mahaliꞋas.

19 EaꞋ mahaliꞋas maꞋi, “Aman anama nogalomepa ipeꞋinai? Aman anama ipeꞋ paꞋi naep ananimi maseꞋanai fowaꞋ mamaꞋwana kolana? DeiꞋ anan nati andeandeꞋ naꞋimama?”

20 Esis mamasana sagwamama basef saꞋi, “AfaꞋ ogawa anan nogalomafa afaꞋinai. EaꞋ ogawa fowaꞋ mamaꞋwana kolana naep maseꞋana. 21 EaꞋ afaꞋ ina ogawa deiꞋ anan nati, nati andeandeꞋ naꞋimama. Emi nandaꞋ naep ananimi matiana, afaꞋ ina ogawa. Anan dambena eaꞋ, afaꞋ waꞋi ipeꞋ pihaliꞋ anan niꞋipipa.”

22 Esis mamasana ananisi umbamahasa amam agufumi Juda. DeiꞋ saꞋiam naꞋama. DeiꞋ main, amam agufumi Juda maꞋi basef mandameꞋmam eaꞋ maꞋi, emi egafis siꞋi basefa Jisas siꞋi anan Krais, amam mogaloꞋmas ipat esis Juda saꞋi basef sapeinai ma ina sondaꞋ lotu sealomas wapotiꞋ, owaꞋ.

23 Amam maꞋiam naꞋama deiꞋ mamasana ananisi umbamahas saꞋi, “Anan dambena eaꞋ. PihaliꞋ anan niꞋipipa.”

24 EaꞋ amam mofalai aman anama wapotiꞋ maꞋipana maꞋi, “IneꞋ niꞋi basef endilisimi atom, God natilina. AfaꞋ ogawa aman anama Jisas, anan aman aonai.”

25 EaꞋ anan nagwamam naꞋi, “AeꞋ ina egawa waf ananinai aonai o owaꞋ. EaꞋ aeꞋ egawa endilisi, fowaꞋ naep aeꞋami maseꞋe eaꞋ deiꞋ ati andeandeꞋ.”

26 EaꞋ mahaliꞋana maꞋi, “Anan nandaꞋmena maina deiꞋ nandaꞋ naep ineꞋimi mati?”

27 Anan nagwamama basef naꞋi, “DoꞋok aeꞋ aꞋipipa eaꞋ, eaꞋ ipeꞋ ina pameꞋe, owaꞋ. DeiꞋ maina paꞋi pemeꞋ basef amama wapotiꞋ? IpeꞋ wapotiꞋ paꞋi petaga alupipei ananipei pilana?”

28 EaꞋ amam maꞋi basef wandafumi ma anan maꞋi, “IneꞋ aman alupinai ananinai. EaꞋ afaꞋ alupufai Mosesi. 29 AfaꞋ ogawa God fowaꞋ gani naꞋipa Moses eaꞋ aman anama afaꞋ ina ogawa waf ofagena ananinai anan nataga eti?”

30 EaꞋ anan nagwamama basef naꞋi, “Amama amamaga maim? IpeꞋ ina pegawa anan nataga eti, eaꞋ anan nandaꞋ naep aeꞋami mati. 31 ApeꞋ mogawa God ina nameꞋ esis sandaꞋ waf aonai, owaꞋ. Anan nameꞋ emi egafis sandaꞋ maol ananinai safela agel ananinai ma seameꞋ basef ananimi. 32 FowaꞋ gani nafiꞋi nafiꞋi nataga deiꞋ ina anom basef maꞋi anona aman mamaꞋwana kolana eaꞋ nataga naep maseꞋana ma anona nemaf anona aman nondaꞋ naep mitiana, owaꞋetin. 33 IꞋi aman anama ina aman Godi, anan ina nambimb nendaꞋ anom amamaga. OwaꞋetin. Anan aman Godi.”

34 EaꞋ amam magwamana basef maꞋi, “Endilisi, fowaꞋ mamaꞋwena kolaena ineꞋ nandaꞋ waf aonai atona. EaꞋ ina niwalipafa, owaꞋ.”

EaꞋ amam magaloꞋmana ipat anama esis Juda saꞋi basef sapeinai, ina ataꞋ nolomas nondaꞋ lotu wapotiꞋ, owaꞋ.

Naep mape opalef nomon epesi

35 EaꞋ Jisas nameꞋ basefa amam magaloꞋmana nape andeꞋ eaꞋ nagolopana natolona nahaliꞋana naꞋi, “IneꞋ nembaleꞋefa aman anama nataga epen endilisinai?”

36 EaꞋ nahaliꞋana naꞋi, “Dembinai, aman anama emi? NiꞋipiana ma embaleꞋefana.”

37 EaꞋ Jisas naꞋipana naꞋi, “DeiꞋ ineꞋ natolona eaꞋ. Anan epen anama deiꞋ naꞋi nalomanai.”

38 EaꞋ naꞋi, “Dembinai, deiꞋ embaleꞋefena.”

NaꞋiam naꞋama eaꞋ, nindiwa nembawa netawa etap nandaꞋ lotumana.

39 EaꞋ Jisas naꞋi, “AeꞋ afiꞋi etap anaeꞋ ma eawaloga epes hiesi hiꞋilas. Ama esis naep maseꞋasi nambimb seati andeandeꞋ eaꞋ isima naep matiasi eaꞋ naep measeꞋas.”

40 EaꞋ anom Farisi mape malomana mameꞋ basef amama mahaliꞋana maꞋi, “Amama maim basef? IneꞋ naꞋi afaꞋ naep maseꞋafa wapotiꞋ aꞋ amon?”

41 EaꞋ Jisas naꞋipam naꞋi, “IꞋi ipeꞋ naep measeꞋipei, ipeꞋ waf aonai aꞋepa. OwaꞋetin. IpeꞋ paꞋi, ‘AfaꞋ wati.’ NaꞋama waf aonai ipeꞋinai ataꞋ napomepa.”

Copyright information for `AOJFILIFITA