b- Lu 10:39Jo 11:1; 12:2,3

Luke 10

Jisas nasapaꞋ alupumi ananimi 72-peleim mafeꞋ

Dembinai nandandepa anom alupumi ananimi 72-peleim nasapaꞋam mafeꞋ biam atom maliꞋana mafeꞋ. Anan nasapaꞋam mafeꞋ taun wambel hiagoma anan naꞋi neafeꞋagoma. EaꞋ naꞋipam naꞋi, “IpeꞋ piti aof hianai gwaꞋaimi hiami maof eaꞋ. EaꞋ epes sandaꞋ maoli owaꞋ hiase, kwawieꞋis. EaꞋ ipeꞋ pendaꞋ beten pihaliꞋ Dembinai ofagonama aofi. PihaliꞋana ma nosapaꞋ epes hiesi sefeꞋ sondaꞋ maola sola gwaꞋaimi ananimi sembeꞋam etifigin. IpeꞋ foꞋo. PemeꞋ, aeꞋ esapaꞋepa pefeꞋ siꞋi sipsip nogami laꞋafena nombagw wandafumi aolopumi. IpeꞋ ina pefaꞋ paos manisi soloma brasbeli su, owaꞋ. IpeꞋ ina pendaꞋmasa nemaf buꞋunai enis amam nematawa eaf, owaꞋ. PefeꞋ mehip. IꞋi ipeꞋ pefeꞋ piwis anona ipat, ataꞋ piliꞋ piꞋi naꞋama piꞋi, afaꞋ waꞋi God nondaꞋ opalef ipeꞋ hipei pape ipat anaeꞋ mope awanem. IꞋi enin epen opaf awanena nepe ipat anama, eaꞋ basef buꞋwami ipeꞋimi mopoma epen inima. IꞋi owaꞋ, hapaimi, basef amama buꞋwami motanimani mopomepa laꞋelaꞋef. IpeꞋ peape ipat anama atona. Ina pepe pefeꞋ ifagw mamumami, owaꞋ. Pepe ipat anama atona peaꞋ gwaꞋaimi embel esis sasiꞋipami. DeiꞋ main, epes sandaꞋ maoli andeandeꞋma mofaꞋ otamba ma maol amam mandaꞋanai.

IꞋi ipeꞋ pefeꞋ piwis anona taun ama esis sofaꞋepa pefeꞋ ifagw asasimi, ipeꞋ pefaꞋ gwaꞋaimi esis saseꞋ ipeꞋami. EaꞋ pendaꞋ isima awes nandaꞋasi boꞋwes wambel anama. EaꞋ piꞋipa esis piꞋi, ‘Nemaf anama felefeleꞋma neataga ma ipeꞋ piowis wambota Godi numafipa.’ 10 EaꞋ ipeꞋ iꞋi pefeꞋ piwis anona taun ama esis owaꞋ seafaꞋepa pefeꞋ ifagw asasimi, ipeꞋ pefeꞋ pitu eaf taun anama piꞋi, 11 ‘Etap ma taun anama ipeꞋinai maila boꞋwagah afaꞋimi, eaꞋ afaꞋ upatiꞋam motanima mefeꞋmago ipeꞋ. Ama ipeꞋ ukup mondandaꞋ pegawa basef amama andeandeꞋ. Nemaf nataga felefeleꞋma epes siowis wambota Godi. EaꞋ ipeꞋ pandaiwaꞋ.’ 12 DeiꞋ aeꞋ aꞋipipa, nemaf anama luꞋunai God nowaloga epesanai anan anona nemaf niti esis fowaꞋ gani sape Sodomi uwahipis andeandeꞋ. EaꞋ epes isima wambel anama anan ina niti uwahipis, owaꞋ. Nimanimi luꞋwami endilisi anona nemaf motagamas.”

Wambel biefina uwahipis esis owaꞋ somboma opalef sombaleꞋefanae

(Mt 11:20-24)

13 “AeꞋ ati ipeꞋ Korasinipei paloma Betsaidaipei uwahipipa endilisi! Nimanimi luꞋwami anona nemaf meatagamepa. Epes isima fowaꞋ gani sandaꞋ waf aonai sape wambel biefina Tair naloma Saidoni, esis ina sati ikwaf laꞋifinai naninani siꞋi deiꞋ andaꞋana wambel ipeꞋinai, owaꞋ. IꞋi esis siti pepel anama, esis sowahoꞋam begah pepeꞋatami siꞋi luwaguf tol sope nif agambeh. Ama sihiꞋamba enis epes esis samboma opalef endilisi safeꞋma God. OwaꞋetin. 14 Anona nemaf God nowaloga esis amam nematawa hiesi, niti esis fowaꞋ gani sape Tair naloma Saidoni uwahipis andeandeꞋ. EaꞋ ipeꞋ owaꞋ. Anona nemaf pefaꞋ nimanimi awami endilisi. 15 EaꞋ ipeꞋ Kaperneam, anona nemaf esis sefela agof ipeꞋimi molata ilif? OwaꞋetin. Anona nemaf God nokwahipa pefeꞋ pewala wambel aonai hel.”

16 “Emi egafis semeꞋ malogof ipeꞋimi, esis sameꞋ malogel AeꞋanai wapotiꞋ. EaꞋ emi egafis seseꞋepa alafugah ipeꞋ, esis sasoꞋ alafugah ma AeꞋ eaꞋ saseꞋana alafugah Anan nasapaꞋe afiꞋi wapotiꞋ.”

Alupumi Jisasi mafeꞋ mandaꞋ maoli 72-peleim motanima mafiꞋi

17 EaꞋ amam amama mafeꞋ mandaꞋ maoli 72-peleim motanima mafiꞋi mandanifel endilisi maꞋi, “Dembinai, afaꞋ wahapila agel ineꞋinai, ambagof awami mameꞋ basef afaꞋimi.”

18 EaꞋ anan naꞋipam naꞋi, “AeꞋ ati Satan nowai heven siꞋi otaga holala ma dililimbugwalag. PemeꞋ, aeꞋ aseꞋepa pepel ipeꞋ ma nambimb laꞋifipa pefaꞋasa iguf awami wandafumi moloma awisiguf. Ama laꞋifipa piliꞋamona epen aonai Satan naloma pepel hianai ananinai. EaꞋ ina nambimb anom amamaga mohambombagepa, owaꞋ. 20 EaꞋ ipeꞋ ina pendanifel ma ambagof awami mameꞋ basef ipeꞋimi, owaꞋ. IpeꞋ pendanifel ma God nandaꞋ agof ipeꞋimi mail buk ananinai gani heven ilif.”

Jisas nanifela Ahalomana God

(Mt 11:25-27; 13:16-17)

21 Nogota anama atona Ambal BuꞋunai Godi nawalapa danifela opaf Jisasi eaꞋ Jisas naꞋi, “Ahalome, ineꞋ Dembinai ma ilif etapi. AeꞋ afela agel ineꞋinai anifelina. DeiꞋ main? IneꞋ nambahoꞋ amamaga amama ma esis epes gawaisi sofaꞋ gawa luꞋunai, eaꞋ nambomam nihiꞋ ambasam epes isima gawa aꞋasi falafisi isima sape siꞋi awasi. Ahalome, okom ineꞋinai naꞋi, eaꞋ amama atom.

22 Ahalome aeꞋanai nandaꞋ amamaga hiami hiꞋalam mape lagel aeꞋanai. Ina enin epen negawa aeꞋ Nogalomana Godi, owaꞋetin. Anan atona nogawe. EaꞋ owaꞋ enin epen negawa Ahalome, owaꞋ. AeꞋ Nogalomana ananiwei atowe egawana. EaꞋ emi egafis ihiꞋambasa Ahalomei, isima wapotiꞋ esis etis sogawana.”

23 EaꞋ anan nandamboma nati alupumi ananimi atom mape malomana naꞋipam naꞋi, “Epes sati amamaga ipeꞋ patulumi esis sandanifel. 24 DeiꞋ main? FowaꞋ gani amam king dambami hiami maloma amam profet hiami maꞋi miti amamaga amama deiꞋ ipeꞋ patulumi. OwaꞋ. Ukup amamumi maimailam endilisi ma mameꞋ basef amama ipeꞋ pameꞋami, owaꞋ. Amam ina mameꞋam.”

Aman Samariainai nati naumbihinai uwahipina

25 Anona aman gawainai nawalipasa miꞋuli Godi nohafel naꞋi nogwamba Jisas nememeꞋmana. EaꞋ naꞋipana naꞋi, “Dembinai, aeꞋ endaꞋ maina nambimb efaꞋ ambal namunai eape andeandeꞋ laꞋelaꞋef?”

26 EaꞋ Jisas naꞋipana naꞋi, “Maim basef mapoma miꞋuli Godi? IneꞋ natalifam naꞋimama?”

27 EaꞋ anan nagwamana basef naꞋi, “Ukup ipeꞋimi mohafela Dembinai God ipeꞋinai mimilana naꞋama. Ukup ipeꞋimi mimilana hiꞋilam, peseꞋana ambagof opalef moloma pepel ipeꞋinai peseꞋanam hiꞋilama Dembinai God atona. EaꞋ ukup mimila enis epes sape felefeleꞋma ipeꞋi siꞋi ukup maimaila ipeꞋ etipa.”

28 EaꞋ Jisas naꞋipana naꞋi, “Amama ineꞋ nagwa basef andeandeꞋ. IneꞋ nendaꞋam naꞋama ma nambimb neape ambal namunai laꞋelaꞋef.”

29 Aman anama naꞋi nondandaꞋ agel ananinai atona nope boꞋona. EaꞋ naꞋipa Jisas naꞋi, “Epes sape felefeleꞋma aeꞋi, esis emi egafis?”

30 EaꞋ Jisas nagwamana anom basef naꞋi, “Anona aman nakwaha Jerusalem nafeꞋ nakiniꞋ Jeriko. EaꞋ anom mandaꞋ wali matolona eaf, mahana kwapeteꞋana molaꞋipana amamaga hiami luwaguf maim ananimi. Amam mandaꞋam naꞋama makwahona mafeꞋ. Anan nataga siꞋi nagaꞋi.” 31 Nemaf anama anona aman pris naila eaf anama nafeꞋ. EaꞋ nati aman anama, nisilaꞋana naila eaf waꞋol atogon nafeꞋ. 32 EaꞋ anona aman wambota Livai naila eaf anama nafiꞋi wapotiꞋ. NafiꞋi nati aman anama nisilaꞋana naila eaf waꞋol atogon nafeꞋ. 33 EaꞋ anona aman Samariainai
Esis Sameria naumbih esis Judai. Basef amama Jisas nihiꞋambapa ma apeꞋ ina ukup mila esis alupisi etis, owaꞋ. Ukup mila naumbih wapotiꞋ.
,
b 

naila eaf anama nafiꞋi natagama aman anama. Anan natolona nati owahipina endilisi.
34 EaꞋ nafeꞋ felefeleꞋma anan nakoloꞋwa wel marasin naloma embel waina melegw ananimi, eaꞋ nowaꞋmanam. EaꞋ nafelana nawamonana natoma donki ananinai nofaꞋana nafeꞋ nahaponana nape ipat esis fiꞋifeꞋ sapeinai eaꞋ naꞋipa aman numafi ipati ma numafiana andeandeꞋ. 35 Ama wafilu anan naseꞋana otamba siliwa biam aman numafi ipat anamai naꞋipana naꞋi, ‘IneꞋ nimafi aman anama andeandeꞋ. Ama iꞋi enin moni ineꞋinai neseꞋanana, nambimb itanimai egwamenana.’ ”

36 Jisas naꞋipana basef amama eaꞋ nahaliꞋana naꞋi, “DeiꞋ ineꞋ okom nape naꞋimama? Amam wanom maila eaf mafiꞋi, emi nandaꞋam siꞋi aman nape felefeleꞋma aman anama amam awami mahanai?”

37 EaꞋ nagwamana naꞋipana naꞋi, “Aman anama Samariainai nati anan uwahipina nagiambamana.”

EaꞋ Jisas naꞋipana naꞋi, “IneꞋ foꞋo nendaꞋam naꞋama etin.”

Marta kwaloma Maria

38 Jisas naloma alupumi ananimi mafeꞋ eaf, eaꞋ nataga anona wambel nafeꞋ nawis. AnoꞋw nemataꞋw agiliꞋwa Marta kofaꞋana kwafeꞋ ipat akwaꞋunai. 39 OwamaꞋw akwaꞋukwi agiliꞋwa Maria. Maria kwafiꞋi kwape felefeleꞋma boꞋwagah Dembinai, kwameꞋ basef ananimi. 40 EaꞋ Marta kwandaꞋ maol hianai ma kwandondomba gwaꞋaimi. Okom natanea ma amamaga mamumami. EaꞋ kwafeꞋma Jisas kwaꞋipana kwaꞋi, “Dembinai, ineꞋ niti uwahipiwi. Owame aeꞋakwi kwaꞋwaha aeꞋ atowe andaꞋ maola andondomba gwaꞋaimi. IneꞋ kipaꞋw kufiꞋi kwigiambame.”

41 EaꞋ Dembinai nagwamaꞋwa basef naꞋi, “Marta, Marta, okom ineꞋinai napoma amamaga mamumami ma opaf ineꞋinai nafeꞋ aona ma amamaga hiami. 42 EaꞋ waf buꞋunai atotona ineꞋ aꞋena. Maria kwaꞋi kofaꞋ amamaga amama buꞋwami mikilaꞋ anom. Ina enin epen laꞋifinama niliꞋamona amamaga amama buꞋwami ma akwaꞋw, owaꞋ.”

Copyright information for `AOJFILIFITA