Luke 15

Basef womun etina sipsip higilalanai

(Mt 18:12-14)

Epes hiesi saloma anom mofaꞋ takisi maloma enis epes sandaꞋ waf aonai safiꞋi felefeleꞋma Jisas sameꞋ basef ananimi. EaꞋ amam Farisi maloma amam mawalipasa miꞋuli Godi mandaꞋ megah mahama anan maꞋi, “Aman anama naloma epes isima sandaꞋ waf aonai nofalas alupisi nalomas na gwaꞋaimi.”

EaꞋ Jisas naseꞋama basef amama womun etin naꞋipam naꞋi, “IꞋi anona aman ipeꞋinai numafi anom sipsip 100-peleim ama anona atotona hegililana, aman anama ataꞋ nokwaha sipsip amama 99-peleim mitu meaꞋ otalef anagon, anan ataꞋ nefeꞋ nogolopa anona hegilalanai. Nogolopana nafeꞋ nafeꞋ natolona nafelana nowandefana ekaf ananinai, nandanifel nefaꞋana nafiꞋi. NafiꞋi nataga ipat ananinai, nofalai esis alupisi ananisi saloma esis wambel atona sandakolas etifigin. EaꞋ naꞋipas naꞋi, ‘IpeꞋ pendanifel peloma aeꞋ! Anona sipsip aeꞋanai hegilalana, eaꞋ aeꞋ afeꞋ agolopana atolona efaꞋanai eaꞋ.’ ”

DeiꞋ Jisas naꞋipas naꞋi, “AeꞋ aꞋipipa naꞋama etina esis amam nematawa sape heven ilifi sandanifel ma epes isima 99-peleis amboꞋwes, ina sandaꞋ waf aonai ma sotanima somboma opalef, owaꞋ. EaꞋ iꞋi enin epen nendaꞋ waf aonai niꞋi nemboma opaf, esis sape heven ilifi sondanifel endilisi ma enin. Danifel asasinai nikilaꞋ sandanifela epes isima sape buꞋwasi.

Basef womun etina anona moni higilalanai

IꞋi anoꞋw nemataꞋw anona moni 10-peleina siliwa anona atotona higililana, atuwasi kondaꞋ maina kogolopana kwutolona? AkwaꞋw kwakata lam kombefagon ipat nomon kogolopana andeandeꞋ hiꞋalagon kofeꞋ kofeꞋ ma kwatolona. AkwaꞋw kwatolona eaꞋ, kofala esis alupisi wambel akwaꞋunai sondakolasi eaꞋ kwiꞋipas kwiꞋi, ‘IpeꞋ pendanifel peloma aeꞋ! Anona moni aeꞋanai higilalana, eaꞋ deiꞋ agolopana afaꞋ atolona etanima efaꞋanai eaꞋ.’ 10 DeiꞋ aeꞋ aꞋipipa naꞋama etin siꞋi amam ensel Godi mandanifela enin epen nandaꞋ waf aonai nemboma opaf nafeꞋma God.”

Basef womun etina nogalomana higilalanai nakwaha ahalomana

11 EaꞋ Jisas naꞋipam wapotiꞋ naꞋi, “Anona aman batausan biam. 12 Aonama awagufunai nafeꞋ naꞋipa ahalomana ananinai naꞋi, ꞋAhalome, aeꞋ okom napoma otamba maim amamaga afaꞋ ofaꞋami ma nemaf ineꞋ negaꞋ. DeiꞋ aeꞋ aꞋi efaꞋ tuꞋwanim aeꞋami. IneꞋ niwalom biefim newalogamafam afaꞋ biafa. AeꞋ aꞋi ineꞋ neseꞋeam deiꞋ.’

EaꞋ ahalomam nawaloga amamaga hiami ananimi mafeꞋma amam batausana biam.

13 EaꞋ ina ataꞋ nogota laona aonama awagufunai nefaꞋ amamaga hiami ananimi nafeꞋ napani anona wambel laogoma eaꞋ naseꞋasam amamaga hiami ananimi ma waf naninani aonai anan naila okom ananinai naꞋi neandaꞋanai. EaꞋ otamba ananimi hiꞋalama ma waf aonai. 14 Anan nakwaha otamba ananimi hiꞋalam, nogota nolomahasanai nataga luꞋuna etap anama hiagoma hiꞋalagon. EaꞋ anan amamaga aꞋana nape wafina. 15 EaꞋ anan nafeꞋ nandaꞋ maola anona aman etap anamainai. Aman anama nasapaꞋana nafeꞋ etap ananinai ma numafi bogof ananimi. 16 Bogof amama maꞋ suꞋutip lawahim, eaꞋ anan wapotiꞋ naꞋi neaꞋ suꞋutip amama ma opaf ananinai. Anan ina enis saseꞋana gwaꞋaimi, owaꞋ. 17 Anan nape naꞋama anom nimeguf, okom ananinai nogawa andeandeꞋ eaꞋ naꞋiam naꞋi, ‘Amam hiami mandaꞋ maola ahalome aeꞋanai amam gwaꞋaimi hiami endilisi. EaꞋ aeꞋ ape naꞋae nolomahe endilisi. 18 Hapaimi, aeꞋ atuwasi ehafel efeꞋma ahalome aeꞋanai. EaꞋ iꞋipana iꞋi, “Ahalome, aeꞋ andaꞋ waf aonai ma God ineꞋ wapotiꞋ. 19 DeiꞋ aeꞋ ina aman buꞋuwei ma ineꞋ nefala aeꞋ nogalomena ineꞋiwei, owaꞋ. IneꞋ nendaꞋe epe siꞋi anona nandaꞋmena maoli.” ’

20 EaꞋ nohafel nafeꞋma ahalomana.

EaꞋ anan ataꞋ nafiꞋi laogon ahalomana natolona, okom nainailana endilini nasagih nafeꞋ nahapilana nombaloꞋana nasisiꞋ dalogw.
21 EaꞋ nogalomana naꞋipana naꞋi, ‘Ahalome, aeꞋ andaꞋ waf aonai ma God ineꞋ wapotiꞋ. AeꞋ ina ataꞋ aman buꞋuwei ma ineꞋ nefala aeꞋ niꞋi nogalomena ineꞋiwei, owaꞋetin.’

22 EaꞋ ahalomana naꞋipa amam mandaꞋ maola anani naꞋi, ‘IpeꞋ faꞋai lowaf buꞋunai launai namunai aeꞋanai pefaꞋana pifiꞋi ulal pewahoꞋmanana anan. EaꞋ pelamana anona ring faf ananinai, pelamana su boꞋwagah ananimi. 23 FaꞋai bulmakau noganai anama luꞋunai gigititiꞋi pehana ma apeꞋ meaꞋana mondanifel molomana. 24 DeiꞋ main, nogalome anama aeꞋanai andowelamana siꞋi nagaꞋi, eaꞋ deiꞋ ambal napaina wapotiꞋ. Anan higilalana eaꞋ, deiꞋ matolona wapotiꞋ.’

EaꞋ esis sandanifel salomana.

25 EaꞋ nogalomana dembenama napani aof nafiꞋi. EaꞋ anan nafiꞋi nataga felefeleꞋma ipat, nameꞋ maguf sandaꞋ musik salemb.

26 EaꞋ nofala anona nandaꞋ maoli nahaliꞋana naꞋi, ‘Esis sandaꞋ main?’

27 EaꞋ anan nandaꞋ maoli naꞋipana naꞋi, ‘Owalomena ineꞋinai notanima nafiꞋi, eaꞋ ahalomena ineꞋinai nandanifel nalomana, naꞋama deiꞋ naha anona bulmakau luꞋunai. DeiꞋ main, anan notanimai ina ataꞋ nape aona, owaꞋ. Nape andeandeꞋ.’

28 EaꞋ nogalomana dembenama okom wandafuna eaꞋ nandaiwaꞋma nuwis nomon ipat. EaꞋ ahalomana nawisi andeꞋ naꞋipana mehipa nuwis nomon, owaꞋetin. 29 Anan nagwamana basef ahalomana naꞋi, ‘Afagof hiami aeꞋ ahapila maol ineꞋinai siꞋi agel aꞋe andaꞋ maol atona. AeꞋ ina esambala basef miꞋuli ineꞋimi anona nemaf, owaꞋ. EaꞋ ineꞋ owaꞋ neseꞋe anom amamaga soꞋumi atom siꞋi meme noganai ma eandanifel eloma alupisi aeꞋasi, owaꞋetin. 30 EaꞋ saꞋusaꞋuni anama ineꞋinai anan naseꞋawa amamaga hiami ineꞋimi ma awau nematawa gembaiwai. EaꞋ deiꞋ notanimai, ineꞋ okom napomana deiꞋ nahamana bulmakau anama anan.’

31 EaꞋ ahalomana naꞋipana naꞋi, ‘Nogalome, laꞋelaꞋef afaꞋ biafa wape etifigin. EaꞋ amamaga aeꞋami amama ineꞋimi atom. 32 EaꞋ deiꞋ afaꞋ ondanifel, opalef afaꞋimi mope boꞋom. DeiꞋ main, owalomena anama ineꞋinai fowaꞋ nafeꞋ laogon siꞋi nagaꞋi, eaꞋ deiꞋ nafiꞋi nataga ambal napaina wapotiꞋ. Anan higilalana, eaꞋ deiꞋ afaꞋ watolona wapotiꞋ.’ ”

Copyright information for `AOJFILIFITA