Luke 19

Basef Sakiusi

EaꞋ Jisas nafeꞋ nawis Jeriko, naꞋi nefeꞋ. EaꞋ anona aman amamaga hiamunai nape, agel ananinai Sakius anan agilinai ma amam amama mofaꞋ takisi. Anan naꞋi niti Jisasa nogawana anan emi egafuna. EaꞋ amam nematawa wambelisi hiesi saitu siliꞋakw. Sakius anan bandabandanai, eaꞋ ina nati Jisas, owaꞋ. EaꞋ nasagih naliꞋ nafeꞋ nalata natoma anona lawag fik ama niti Jisas niefiꞋi.

EaꞋ Jisas nataga anama naniga nati ilif naꞋipana naꞋi, “Sakius, deiꞋ aeꞋ efeꞋ epe ipat ineꞋinai. IneꞋ silaꞋi mehip.”

EaꞋ nisilaꞋi mehip okom ananinai nandanifel, naoꞋwa Jisas nafeꞋ ipat ananinai.

EaꞋ esis amam nematawa sati amama, ukup aom endilisi saꞋi basef mamumami saꞋi, “Anan nafeꞋ nape ipat anona aman nandaꞋ waf aonai.”

EaꞋ Sakius nehafel naitu naꞋipa Dembinai naꞋi, “Dembinai, ineꞋ nemeꞋ. DeiꞋ aeꞋ aꞋi ewala amamaga hiami aeꞋami laꞋafen naꞋama etin, eaꞋ eseꞋas tuꞋwanim isima kwahusi. IꞋi aeꞋ embasoꞋma enin epena ekwalopa amamaga ananimi, nambimb aeꞋ egwamana hiami bifibif.”

EaꞋ Jisas naꞋipana naꞋi, “DeiꞋ God nefaꞋ amam nematawa sape ipat anaeꞋi sotanimani eaꞋ. DeiꞋ main, aman anama wapotiꞋ akunamana Abrahami. 10 AeꞋ ataga epen endilisiwei, aeꞋ afiꞋi ma egolopa epes higilalasi efaꞋas setanimani.”

Basef womun etina amam mandaꞋ maoli 10-peleim mofaꞋ moni

11 Esis sameꞋ basef amama, eaꞋ Jisas nafeꞋ nataga felefeleꞋma Jerusalem, eaꞋ epes hiesi ukup maꞋi deiꞋ atef God nifiꞋi numafi epes Ananisi nupe dembinai ma esis eaꞋ epes hiesi sotolona. NaꞋama Jisas naꞋi basef amama womun etin 12 naꞋi, “Anona aman dembinai naꞋi nefeꞋ anona wambel laogoma ma esis sondaꞋana nope king. Anona nemaf anan notanima nifiꞋi. 13 EaꞋ nofalai anom amam 10-peleim mandaꞋ maol ananinai, eaꞋ natambeꞋ moni 20 kina nandahama amam. EaꞋ naꞋipam naꞋi, ‘IpeꞋ pendaꞋ maolana moni anama pefeꞋ petagama aeꞋ etanima iefiꞋi.’

14 EaꞋ esis wambel atona aman anamai ukup aoma anan endilisi. EaꞋ nafeꞋ sasapaꞋ anom amam magiꞋmana mafeꞋ maꞋi, ‘ApeꞋ mandaiwaꞋma ineꞋ nepe king ma apeꞋ.’

15 OwaꞋetin. Esis sandaꞋana nataga nape king dembinai nape anom nimeguf, notanima nafiꞋi. EaꞋ naꞋi, ‘Falai amam amama mandaꞋ maoli fowaꞋ aeꞋ aseꞋama moni. AeꞋ aꞋi ataꞋ egawa moni wamanai maꞋufina amam hiami atona etin mofaꞋanai.’

16 EaꞋ naliꞋi nafiꞋi naꞋipana naꞋi, ‘Dembinai, aeꞋ andaꞋ maol 20 kina anama ineꞋinai andaꞋ maolanana deiꞋ efaꞋai 200 kina wamanai.’

17 EaꞋ dembinai naꞋipana naꞋi, ‘IneꞋ nandaꞋ maol andeandeꞋ. IneꞋ nimafi moni anama kwawieꞋuna andeandeꞋ. DeiꞋ eseꞋena agel luꞋunai ineꞋ ma nimafi taun luꞋwagoma 10-peleina.’

18 EaꞋ anona nafeꞋma biami nafiꞋi naꞋipana naꞋi, ‘Dembinai, aeꞋ andaꞋ maola 20 kina ineꞋinai deiꞋ etanima efaꞋai 100 kina wamanai wapotiꞋ.’

19 EaꞋ dembinai naꞋipana naꞋi, ‘AeꞋ endaꞋena nimafi taun luꞋwagoma 5-peleina.’

20 EaꞋ anona nagiꞋi nafiꞋi wapotiꞋ naꞋipana naꞋi, ‘Dembinai, 20 kina ineꞋinai anaeꞋ. AeꞋ ewaꞋana hankisip ambeꞋana naꞋoh. 21 AeꞋ egawa ineꞋ aman laꞋifinai. Anom amamaga enis epes sambeꞋam maꞋihi, amama ineꞋ nefaꞋam. GwaꞋaimi enin epen nawami, amama ineꞋ nalaꞋami. NaꞋama aeꞋ ombamahe ma ineꞋ. EaꞋ deiꞋ ewaꞋana moni anama naꞋomena.’

22 EaꞋ dembinai naꞋipana naꞋi, ‘IneꞋ nandaꞋ maoli, ineꞋ epen awinai natotopaꞋ basefi. Basef ineꞋimi atom ewalogena. DeiꞋ ineꞋ negawa aeꞋ aman laꞋifiwei alaꞋ gwaꞋaimi anona aman nawami. 23 IꞋi ineꞋ negawa naꞋamai, deiꞋ nefaꞋana nembeꞋana benga aeꞋ etanima ifiꞋi efaꞋana neloma anona wamanai wapotiꞋ.’

24 EaꞋ naꞋipa esis saitu naꞋama felefeleꞋi naꞋi, ‘IpeꞋ dalombana 20 kina aman anama peseꞋanana aman anama nofaꞋ moni 200 kinai.’

25 EaꞋ esis saꞋipana saꞋi, ‘Dembinai, anan nofaꞋ 200 kina eaꞋ.’

26 EaꞋ anan naꞋi, “AeꞋ aꞋipipa, emi egafis sohapila amamaga amama nambimb eseꞋasa anom amamaga wapotiꞋ esis. EaꞋ emi egafis owaꞋ sehapila anom amamaga, amamaga kwawieꞋum esis sahapilami, amama nambimb aeꞋ endalombasam. 27 EaꞋ esis isima satago naumbih aeꞋasi, sandaiwaꞋma aeꞋ epe dembiwei king asasiwei imafias, ipeꞋ faꞋas fiꞋi naꞋae pehas ma naep aeꞋami.’ ”

Jisas nafeꞋ nawis Jerusalem siꞋi anona dembinai king

(Mt 21:1-11; Mk 11:1-11; Jo 12:12-19)

28 Jisas naꞋi basef amama eaꞋ naliꞋ nafeꞋ naila eaf nafeꞋ Jerusalemi nondowasaꞋ. 29 EaꞋ nataga Betfagei Betani wambel anama felefeleꞋma halaf anama oliv motawama eaꞋ nasapaꞋ alupumi ananimi biam maliꞋ mafeꞋ. 30 NaꞋipam naꞋi, “IpeꞋ bipa pefeꞋ wambel nanima nape gani waꞋili felefeleꞋma naꞋae. PefeꞋ piwis piti anona mafin donki saꞋunai esis saundana nail. Ina deiꞋ enin epen natomana, ataꞋ owaꞋ. Petagahona pefaꞋana pifiꞋmai aeꞋ. 31 IꞋi enin epen nihaliꞋipa niꞋi, ‘Patagahona ma main?’ eaꞋ pegwaman piꞋipan piꞋi, ‘Dembinai afaꞋinai naꞋipafa naꞋi nondaꞋ maolanana.’ ”

32 EaꞋ amam biam mafeꞋ mati amamaga amama naꞋama etin siꞋi doꞋok naꞋipam. 33 EaꞋ matagaha mandofa donki anama saꞋunai. Matagahona etin, amam mumafi donki anamai maꞋipam maꞋi, “DeiꞋ maina ipeꞋ patagaha donki anama?”

34 EaꞋ amam maꞋipam maꞋi, “Dembinai naꞋi nondaꞋ anona maolanana.”

35 EaꞋ amam mofaꞋ donki anama mafiꞋmai Jisas mawamona sagegw amamumi matoma ilifa donki anama. 36 EaꞋ magiambama Jisas nalata natoma donki anama nafeꞋ, eaꞋ esis amam nematawa saꞋi sefela agel ananinai luꞋuna. EaꞋ deiꞋ sambeꞋamanam sagegw saseꞋwiam eaf sofaloꞋmana.

37 Anan nafiꞋi felefeleꞋma eaf nakiniꞋi halaf lawah oliv motawama, alupusi ananisi hiesi sandanifel, ukup mapoma amamaga amama pepel fowaꞋ nandaꞋanai. EaꞋ sandaꞋ la koloꞋ saꞋoh mehip, safela agel Godi luꞋuna.

38 SaꞋiam naꞋama saꞋi,

“ApeꞋ mefela agel God nape ilifi luꞋuna, howalagon anan atona. MaꞋi anan nofaloꞋma ineꞋ dembinai king nafiꞋi agel Ananinai neseꞋena pepel ma nendaꞋ maol Ananinai. Esis sape heveni opalef awanem.”
39 EaꞋ anom dambami Farisi mape maloma epes hiesi maꞋipa Jisas maꞋi, “Dembinai Tisa, ineꞋ ninifala alupusi ineꞋisi ma ataꞋ sosopama malogof.”

40 EaꞋ Jisas nagwamasa basef naꞋi, “AeꞋ aꞋipipa endilisi, iꞋi esis seasopama malogof, atuwasi otamba atom maꞋoh etapi mope miꞋi mehip.”

Jisas nalopa Jerusalem

41 EaꞋ Jisas nataga felefeleꞋma Jerusalem natologon nalopagon. Nalopa esis amam nematawa sape taun anamaisi. 42 EaꞋ naꞋi, “IꞋi deiꞋ nemaf anaeꞋ atona ipeꞋ pegawa basef ofagema ma pepe opalef awanem, amama andeandeꞋ. OwaꞋetin. Basef amama ataꞋ mandambaheꞋ, deiꞋ ipeꞋ owaꞋ ataꞋ pegawam. 43 Anona nemaf netaga, naumbih ipeꞋisi sifiꞋi solaꞋ indalelemb sondaꞋ wandaf siliꞋakwepa. EaꞋ siliꞋakwepa endilisi ma anama hiagoma. 44 EaꞋ sehepa sohambombagepa endilisi, peloma awasi ipeꞋisi sape nomona wambel ipeꞋinai. Esis sohambombaga wambel awagon hiꞋilagon endilisi, eaꞋ ina nambimb otamba salaꞋ ifagwami mondapapeiꞋma etin mope, owaꞋ. MoꞋoh deindeiꞋ. DeiꞋ main? IpeꞋ owaꞋ pegawa nemaf deiꞋ God niefiꞋanai ma nefaꞋepa pitanimani pepe andeandeꞋ, owaꞋ.”

Jisas nagaloꞋmas amam mandaꞋ bisnisi ipat luꞋunai Godi sandaꞋ lotuwanai nomon

(Mt 21:12-17; Mk 11:15-19; Jo 2:13-22)

45 EaꞋ Jisas nehafel nawis ipat luꞋunai Godi sandaꞋ lotuwanai eaꞋ nagaloꞋmas amam amama mandaꞋ bisnisi matala amamaga ipat anama nomon. 46 Anan naꞋipam naꞋi, “Basef mape Baibeli, God naꞋi, ‘Ipat aeꞋanai nondapoma esis sifiꞋi sopama sondaꞋ beten sohaliꞋ AeꞋ.’ EaꞋ ipeꞋ pandaꞋana nataga siꞋi sandaꞋ walanai.”

47 Nimeguf hiami Jisas nawalipasa basef ipat anama nomon. EaꞋ amam pris dambami maloma amam agufumi Judai maloma amam mawalipasa miꞋuli Godi magolopa eafa mohana neagaꞋ. 48 EaꞋ esis amam nematawa hiesi ukup boꞋom endilisi ma seameꞋ basef ananimi. NaꞋama amam ina mati anona eafa meahana, owaꞋ.

Copyright information for `AOJFILIFITA