Luke 20

Esis sahaliꞋ Jisas saꞋi, emi naseꞋana agel luꞋunai

(Mt 21:23-27; Mk 11:27-33)

Anona nemaf Jisas nape naseꞋasa basef amam nematawa ipat luꞋunai Godi nomon, nawalapa basef buꞋwami Godi. EaꞋ amam pris dambami maloma amam mawalipasa miꞋuli Godi maloma agufumi amam Judai mafiꞋmai anan. EaꞋ mahaliꞋana maꞋi, “IneꞋ niꞋipafa. IneꞋ nandaꞋ maol anama ma pepel eminai? Emi naꞋipina deiꞋ nape dembinai nandaꞋ maol anama?”

EaꞋ Jisas nagwamama basef naꞋi, “AeꞋ wapotiꞋ aꞋi ihaliꞋipama anom basef piꞋipiam. Aman anama Jon napisiꞋas embeli, God nape heveni naꞋipana napisiꞋas o enin epen etapani naꞋipana?”

EaꞋ amam mameꞋ basef amama mandaꞋipama maꞋi, “AfaꞋ wiꞋi, ‘God nape heveni naꞋipa Jon napisiꞋasi’, atuwasi anan niꞋipafa niꞋi, ‘DeiꞋ maina ipeꞋ owaꞋ pembaleꞋefana?’ EaꞋ afaꞋ wiꞋi, ‘Enin epen nape etapanai naꞋipana’, naꞋama esis amam nematawa sohafa. DeiꞋ main, hiesi saꞋi Jon anona profet dembinai.”

EaꞋ magwamana basef Jisas maꞋi, “AfaꞋ ina ogawana.”

EaꞋ Jisas naꞋipam naꞋi, “NaꞋama etin aeꞋ ina iꞋipipa ma emi naseꞋe agel luꞋunai andaꞋ maol anama AeꞋanai, owaꞋ.”

Basef womun etina epes awami mumafi aof sawa mandalef wainim

(Mt 21:33-46; Mk 12:1-12)

EaꞋ Jisas naꞋipasa basef amama womun etin esis amam nematawa naꞋi, “Anona aman nandaꞋ anona aof nawa wain. EaꞋ nakwahomana aof anama anom amam mondaꞋ maolana aof anama mofaꞋ monianai. EaꞋ nafeꞋ napani nogota launai anona wambel laogoma. 10 Ama nogota suꞋutip mailanai, anan nafamona aofi nasapaꞋ anona nandaꞋ maoli nafeꞋma amam mandaꞋ maol aof ananinai. Anan naꞋi amam moseꞋana anom suꞋutip gwaꞋaimi ma aof anama. EaꞋ amam mahana matofana notanima nafeꞋ. 11 EaꞋ nafamona aofi nasapaꞋ anona nandaꞋ maoli nafeꞋ wapotiꞋ ma amam, eaꞋ mahana wapotiꞋ mandaꞋana aona matofana nafaꞋ nafeꞋ. 12 EaꞋ nasapaꞋ anona nafeꞋma wenifi. EaꞋ amam mahana makwahona nawis andeꞋ.

13 EaꞋ anan nafamona aofi naꞋi, ‘AeꞋ ataꞋ endaꞋ main? Nogalome aeꞋanai aeꞋ okom nainailana, esapaꞋana nofoꞋo. Nambimb momeꞋ malogel ananinai o owaꞋ?’

14 EaꞋ amam mati nogalomana ananinai nafiꞋi, mandaꞋipama etin maꞋi, ‘Aman anama anona nemaf nofaꞋ amamaga hiami ahalomanai. AfaꞋ ohana ma afaꞋ atofa ofaꞋ aof anaeꞋ.’

15 EaꞋ mahana makwahona nawis aof andeꞋana, mahana afuna. EaꞋ nambimb anan nafamona aofi nondaꞋ maina amam? 16 Nambimb nifiꞋi noham afum hiꞋilam, noseꞋasa aof anama nofeꞋma enis epes.”

Esis sameꞋ basef amama saꞋi, “Waf anama aonai endilisi. AfaꞋ wandaiwaꞋmana.”

17 EaꞋ Jisas natilis andeandeꞋ naꞋipas naꞋi, “EaꞋ naꞋama etin siꞋi basef amama mape Baibeli maꞋi,

ꞋOwap anama amam malaꞋ ipati magaloꞋmana, deiꞋ nataga owap nape naliꞋi ma nembaloꞋ ipat.’
Basef amama ofagema maꞋi main?
18 Emi egafis hililiꞋilamas sowa owap anama, pepeꞋetas. EaꞋ iꞋi owap anama nowa nesaliꞋas, loloweas siꞋi sopof atona.”

19 EaꞋ amam agufumi esis Judai mogawa Anan naꞋi basef amama womun etini mondelaꞋwifa amam. EaꞋ maꞋi mombaloꞋana. EaꞋ amam umbamahama esis amam nematawa hiesi.

Amam mahaliꞋ Jisasa esis seaseꞋana takis Sisar gavman dembinai Romunai o owaꞋ?

(Mt 22:15-22; Mk 12:13-17)

20 EaꞋ amam mawalipasa miꞋuli Godi maloma amam pris dambami mandaꞋana naep diꞋindiꞋana ma mombaloꞋana mofaꞋana. EaꞋ masapaꞋ anom amam mafiꞋi matolona. Amam amama mandaꞋ doufindouf mambasoꞋam maꞋi amam mandaꞋ waf endilisinai. OwaꞋetin. Amam maꞋi mombaloꞋa Jisasa anom basef naꞋiami ma mosoꞋ anan neafeꞋma gavman dembinai ma nondaꞋ kotimana.

21 EaꞋ mahaliꞋ Jisas maꞋi, “Dembinai tisa, apeꞋ mogawena basef ineꞋimi buꞋwami atom naꞋipasam esis amam nematawa. IneꞋ naꞋi basef atifima epes isima hiesi agufisi saloma isima agof aꞋasi naꞋama etin hiꞋalas. IneꞋ naꞋipasa basef maloma waf buꞋunai Godi endilisi ma epes hiesi. 22 MiꞋuli apeꞋinai naꞋiam naꞋimama? ApeꞋ moseꞋana takis Sisar gavman dembinai esis Romi o owaꞋ?”

23 Jisas negawa eaꞋ ma basoꞋam amamunai. EaꞋ naꞋipam naꞋi, 24 “IpeꞋ pihiꞋambe anona moni ma ataꞋ itolona. Ambal naloma agel anama mailanai eminai?”

EaꞋ maꞋi, “Amama gavman dembinai Sisar esis Romi.”

25 EaꞋ nagwamam naꞋipam naꞋi, “EaꞋ amamaga Sisari, amama peseꞋanam Sisar. EaꞋ amamaga Godi, peseꞋanam God.”

26 EaꞋ amam ina laꞋifima mombaloꞋana ma anom basefa naep esis amam nematawa hiesi, owaꞋ. Amam ukup matamea ma basef amama naꞋipamami, eaꞋ masopama malogof tol mape.

Amam mandaꞋ doufindouf mahaliꞋ Jisasa epes sagaꞋi sohafel wapotiꞋ

(Mt 22:23-33; Mk 12:18-27)

27 Anom Sadyusi mafiꞋmai Jisas. Amam hiami mombaleꞋef sagaꞋi ina anona nemaf sotanima sohafel wapotiꞋ, owaꞋ. 28 EaꞋ mahaliꞋana maꞋi, “Dembinai tisa, fowaꞋ gani Moses nandaꞋ anom basef mail buki ma apeꞋ maꞋi, ‘IꞋi anona aman nogaꞋ ma anan awasi aꞋana, wauluꞋmana ataꞋ kope, owalomana ananinai noseꞋakwa nola enis awasi ma sohoꞋofana.’ 29 EaꞋ fowaꞋ amam wambota atotona 7-peleim mape. NaliꞋi sahalomam naseꞋakw soꞋusoꞋwin aꞋakw nagaꞋ nakwahoꞋw kwape. 30 EaꞋ owalomana nafelaꞋw naseꞋakw. 31 EaꞋ anona owalomana laꞋefinai wapotiꞋ nandaꞋam naꞋama etin, eaꞋ anona natuꞋulanai naseꞋakw mandaꞋam naꞋama etin mafeꞋ matagama owagufunai akutainai. Amam amama wambutaim 7-peleim ina mola enis awasi, owaꞋ. MagaꞋ etin hiꞋalam. 32 Anona nemaf nemataꞋw wauluꞋmam kwagiꞋmam kwagiꞋ kwagaꞋ. 33 EaꞋ anona nemaf esis sagaꞋi sohafel wapotiꞋ, nemataꞋw akwama kope nemataꞋw emiꞋwi? Amam 7-peleim maseꞋakw hiꞋalam.”

34 EaꞋ Jisas naꞋipam naꞋi, “Amam nematawa nogota anaeꞋisi deiꞋ sandaseꞋama. 35 EaꞋ emi egafis God naꞋi boꞋwes andeandeꞋma sotanima sohafel wapotiꞋ sope namusi nemaf anama etap dambainai neataga ina sendaseꞋama, owaꞋ. 36 Esis ina sogaꞋ wapotiꞋ, owaꞋ. Sopen siꞋi ensel Godi. Sotanima sohafel hiꞋagilif wapotiꞋ. NaꞋama sope awasi Godi. 37 Basef amama ma sagaꞋi sotanima sohafel wapotiꞋ, amama fowaꞋ gani Moses nihiꞋambepam nif ilalowa mataga lawag saꞋunai fandonai, maꞋi anan nofala Dembinai naꞋi

‘AeꞋ God Abrahami, Aisaki, naloma Jekopi.’
38 Basef amama maꞋi God ina Dembinai ma epes isima sagaꞋi, owaꞋ. Anan Dembinai ma epes isima sape namusi. DeiꞋ main, epes hiesi sape namisa naep Godi hiꞋalas.”

39 Jisas naꞋiam naꞋama, amam mawalipasa miꞋuli Godi umbamahama mohaliꞋana ma anom basef wapotiꞋ. EaꞋ anom magwamana basef maꞋi, “Dembinai Tisa, ineꞋ naꞋiam andeandeꞋ.”

Jisas nahaliꞋ amam Farisi ma Krais anan nogalomana eminai

(Mt 22:41-46; Mk 12:35-37)

41 EaꞋ Jisas naꞋipam naꞋi, “Amam maꞋi Krais, God nasapaꞋana nafiꞋi anan akunamana Deviti. MaꞋi Krais aman atona falafunai siꞋi epes sape etapi. DeiꞋ maina amam maꞋiam naꞋama ma Krais? 42 Buk anama Songi Devit naꞋi naꞋama naꞋi,

ꞋDembinai God naꞋipa Dembinai aeꞋanai naꞋi, “IneꞋ nepe lagel daꞋisinai aeꞋanai,
43 laꞋelaꞋef nefeꞋ netagama anona nemaf aeꞋ endaꞋ naumbih ineꞋisi sefeꞋ owina ineꞋ siꞋi sia boꞋwagah ineꞋimi maituma.” ’
44 Devit fowaꞋ gani nofala Krais naꞋi anan Dembinai. Amama atom Krais ina aman atona falafunai, owaꞋ. Anan Dembinai. DeiꞋ maina Devit nofala Krais akunamana ananinai?”

Jisas naꞋi waf aonai amam tisa mawalipasa miꞋuli Godi mandaꞋanai

(Mt 23:1-36; Mk 12:38-40; Lu 11:37-54)

45 Amam nematawa hiesi ataꞋ sape sameꞋ basef amama, Jisas naꞋipa alupumi ananimi naꞋi, 46 “IpeꞋ pindumafuma amam amama mawalipasa miꞋuli Godi. Amam maꞋi mundawisam luwaguf buꞋwami atom mefeꞋ, siꞋi dambami atom mandawisami. MaꞋi enis epes sotolom sondalalimam sondaꞋmam nemaf buꞋunai sinifelom anama luꞋwagoma ma naep hiesi sandatama sapoma ma sefela agof amamumi luꞋum. EaꞋ amam ukup maꞋi siaifah amama motawa maliꞋi atom, dambami atom mapoma, nomon ifagw esis Juda hiesi saꞋi basef sapeimi o anama hiesi sandakolasam nimeguf amama sandaꞋ gwaꞋaimi luꞋwami. 47 Amam amama mawis ifagw amama nematawa alifiwai, mandaꞋ wala amamaga awoumi. EaꞋ mandaꞋ beten launai etina esis sotolom siꞋi amam buꞋwami. Anona nemaf God nowaloga epes hiesi, enis epes owaꞋ seandaꞋ waf aonai naꞋamainai sofaꞋ nimanimi kwawieꞋum eaꞋ amam mofaꞋ nimanimi luꞋwami endilisi.”

Copyright information for `AOJFILIFITA