Luke 22

Judas naꞋi basef laꞋifimi naloma agufumi Juda ma nihiꞋambamam Jisas napoma

FelefeleꞋma nemaf anama Pasova sondaꞋ gwaꞋaimi luꞋwami esis Juda sogwaꞋ bret owaꞋ neatef luꞋunaia felefeleꞋma netaga. EaꞋ amam pris maloma amam mawalipasa miꞋuli Godi magolopa eafa moha Jisas neagaꞋ. DeiꞋ main, amam umbamahama esis amam nematawa.

EaꞋ Satan nawis okom Judasi Kariotinai. Anan amam 12-peleim alupumi Jisasi. EaꞋ Judas nafeꞋma amam pris dambami maloma amam plisman dambami mumafi ipat luꞋunai Godi. Amam amama maꞋi basef mandameꞋmama Judas nogolopa eafa neaseꞋama Jisas nofeꞋ lagof amamumi. EaꞋ mandanifel maꞋi basef mandameꞋmama moseꞋana anom otamba Judas. EaꞋ anan naꞋi aꞋe ma basef amamumi, eaꞋ nafeꞋ nagolopa eafa nihiꞋambama Jisas amam meambaleꞋana. Anan nahafa anona nemaf ma owaꞋ enis amam nematawa sope solomana.

Alupumi biam mandondomba gwaꞋaimi luꞋwami Pasova

Nemaf anama nataga esis Juda saꞋi sondaꞋ anom gwaꞋaimi luꞋwami seaꞋ anona bret owaꞋ neatifi. Anama saꞋi soha anom sipsip nogami hiami ma sondaꞋ gwaꞋaimi amama Pasova. EaꞋ Jisas nasapaꞋ Pita naloma Jon naꞋipam naꞋi, “IpeꞋ bipa pefeꞋ pendondombamafa gwaꞋaimi amama Pasova ma afaꞋ weagwaꞋam.”

EaꞋ amam mahaliꞋana maꞋi, “IneꞋ naꞋi afaꞋ ofeꞋ ondondomba ipat enima?”

10 EaꞋ naꞋipam naꞋi, “PemeꞋ, ipeꞋ pefeꞋ piwis gani wambel luꞋunai, atuwasi piti anona aman nofaꞋ embel malep luꞋunai nitilipa eaf. EaꞋ pigiꞋmana pefeꞋ piwis ipat anama anan nefeꞋ niowisanai. 11 EaꞋ pihaliꞋ ofagena ma ipat anamai piꞋi, ‘Tisa afaꞋinai naꞋipafa naꞋi, ipat anama sapeinai netawa eti? Anan naꞋi noꞋwa afaꞋ atofa alupufai ope ondaꞋ gwaꞋaimi amama luꞋwami Pasova.’ 12 EaꞋ anan nihiꞋambepa rum anama luꞋunai nape ilifi, tebol siaifah maꞋoh etifim. IpeꞋ pendondomba gwaꞋaimi rum anama.”

13 EaꞋ amam mafeꞋ mati amamaga amama naꞋama etin siꞋi Jisas naliꞋ naꞋipamam eaꞋ mandondomba gwaꞋaimi amama Pasova.

Jisas naseꞋama bret naloma embel wain alupumi ananimi maꞋam

14 Nogota aꞋ nataga ma sogwaꞋ gwaꞋaimi amama luꞋwami Pasova, Jisas naoꞋwa alupumi ananimi mafiꞋi mape, anan nafeꞋ nape felefeleꞋma tebol.

15 EaꞋ naꞋipam naꞋi, “AeꞋ okom naꞋi ataꞋ eaꞋ gwaꞋaimi amama Pasova elomepa uliꞋ, ma atuwasi efaꞋ nimanini awami. 16 AeꞋ aꞋipipa endilisi, aeꞋ ina ataꞋ eaꞋ gwaꞋaimi amama Pasova wapotiꞋ, owaꞋ. Anona nemaf basefa gwaꞋaimi amama Pasova ofagema motaga mondawalap alihim anama wambel Godi, eagwaꞋam wapotiꞋ.” 17 EaꞋ anan nafela anona kap embel wain nalami nanifela God naꞋi, “IpeꞋ fela embel amama pendandamam. 18 AeꞋ aꞋipipa, deiꞋ anona nemaf wapotiꞋ aeꞋ ina eaꞋ embel wainim elomepa, owaꞋ. Anona nemaf epes hiesi siowis wambota Godi numafias wambel Ananinai, aeꞋ eaꞋ embel wain anama wapotiꞋ elomepa.”

19 EaꞋ anan nafelai bret nanifela God nawalona naseꞋam naꞋi, “Bret anama alop aeꞋanai. [AeꞋ aseꞋepana ma iegiambamepa. PendaꞋam laꞋelaꞋefa ukup mopoma aeꞋ.”

20 Amam maꞋam hiꞋalam, nandaꞋam naꞋama etina anona kap embel wain nalami, naꞋi, “Wain embel amama esimbel aeꞋami mandaꞋ basef Godi dambaimi endilisimi mataga laꞋifim. Esimbel amama aeꞋ ekoloꞋwama iegiambamepa.] 21 EaꞋ ipeꞋ piti aman anama naꞋi nowalapa aeꞋ ma amam naumbih aeꞋami, nape naꞋ gwaꞋaimi nalome tebol amaeꞋ. 22 AeꞋ ataga epen endilisiwei, naman egaꞋ siꞋi eaf fowaꞋ gani God nandandepanai. EaꞋ aman anama neawalape ma amam naumbih, aeꞋ ati uwahipina endilisi. DeiꞋ main, nimanimi luꞋwami motagamana.”

23 Anan naꞋiam naꞋama, alupumi ananimi atom mandahahaliꞋma maꞋi, “Epen afaꞋini emi atuwasi neandaꞋ waf anama?”

Alupumi Jisasi maꞋi basef mandahihianamam maꞋi emi nepe niliꞋ ma amam

24 Amam alupumi Jisasi maꞋi anom basef mandahihiꞋanamam maꞋi, “Emi nepe dembinai afaꞋinai?”

25 EaꞋ Jisas naꞋipam naꞋi, “Amom king dambami ma esis hiesi sololama Godi sape luꞋwagoma, mape dambami asasimi mandaꞋas kwapeteꞋas. Amam mumafi esis laꞋifim, eaꞋ maꞋi esis sofalam agof luꞋwami siꞋi mandaꞋ waf buꞋunai migiambamasi. 26 EaꞋ ipeꞋ ina pendaꞋam naꞋama, owaꞋ. Emi egalin niꞋi nope dembeni ma ipeꞋ, anan ataꞋ nope siꞋi amama agof aꞋami siꞋi isima sandaꞋ maoli ma segiambamepa. 27 Emi epen dambeni nikilaꞋ enis epes? Epen natoma naꞋ gwaꞋaimi teboli o epen nandaꞋ gwaꞋaimi nefaꞋam nafeꞋmanai? EaꞋ aeꞋ ape alomepa siꞋi nandaꞋ maoli ma iegiambamepa. 28 FowaꞋ amamaga amama magwamba aeꞋi, nimeguf amama ipeꞋ pape palome, ipeꞋ ina pakwahowe, owaꞋetin. 29 Ahalome aeꞋanai naseꞋe agel luꞋunai naꞋipi ape dembiwei, imafi enis epes. EaꞋ naꞋama etin aeꞋ eseꞋepa agof luꞋwami iꞋipipa pepe dembipei king pimafi enis epes. 30 Nemaf anama ipeꞋ pepe dembipei king peloma aeꞋ peaꞋ gwaꞋaimi embel pelome tebol aeꞋami wambel Godi. EaꞋ pepe siaifah buꞋwami amam dambami kingi, pewaloga epes wambotagw 12-peleim apeꞋisi Israel.”

Jisas naꞋipa esis naꞋama naꞋi, “Atuwasi Pita nembahoꞋ agel aeꞋanai niꞋi, ‘AeꞋ ina egawa Jisas.’ ”

31 EaꞋ Jisas naꞋi, “Saimon, Saimon, ineꞋ nemeꞋ. God naꞋi aꞋe ma Satan nogwamba ipeꞋ ma pendaꞋ waf aonai siꞋi sandilama rais ama buꞋwami mafeꞋ anagon awami mafeꞋ anagon. 32 OwaꞋetin. AeꞋ andaꞋ betena egiambamena ma nembaleꞋefa aeꞋ laꞋelaꞋef. Atuwasi nemboma opaf nendaꞋ owapena ineꞋimi motaga laꞋifim.”

33 EaꞋ Pita nagwamana basef naꞋipana naꞋi, “Dembinai, aeꞋ andandombam elomena weafeꞋ kalabus. EaꞋ aeꞋ andandombam egaꞋ ealomena wapotiꞋ.”

34 EaꞋ Jisas nagwamana basef naꞋi, “Pita, aeꞋ aꞋipina endilisi! Atuwasi owamb anaeꞋ awata ataꞋ owaꞋ neandaꞋam, ineꞋ nembahoꞋ agel aeꞋanai niꞋi wenif niꞋi, ‘AeꞋ owaꞋ egawa Jisase.’ ”

Jisas naꞋipam basef amama ma paos maloma brasbeli su

35 EaꞋ Jisas naꞋipa amam naꞋi, “FowaꞋ aeꞋ asapaꞋepa pandailagof pafeꞋ, ipeꞋ ina pefaꞋ paos moni nalami maloma brasbeli su, owaꞋ. PafeꞋ etin. Nemaf anama anom amamaga aꞋepa o owaꞋ?”

Amam magwam maꞋi, “OwaꞋetin.”

36 EaꞋ Jisas naꞋipam naꞋama naꞋi, “EaꞋ emi deiꞋ aman paos moni nalami maꞋomanai anan nefaꞋam. EaꞋ brasbel wapotiꞋ naꞋama etin. Aman bainat aꞋanai anan noseꞋasa saket ananinai enis sotalona, notala anona bainat.

37 DeiꞋ main, anom basef ma aeꞋ felefeleꞋma motaga mondawalap. Anom basef mail Buk Baibeli fowaꞋ gani maꞋiam naꞋama maꞋi, ‘Esis ukup maꞋi aeꞋ epen aowei atowe.’

AeꞋ aꞋipipa endilisi! Basef amama felefeleꞋ motaga endilisi ma nimanimi luꞋwami atuwasi motaga ma aeꞋ.”

38 EaꞋ alupumi ananimi maꞋi, “Dembinai, ineꞋ niti. AfaꞋ bainah biam amaeꞋ.”

EaꞋ nagwamam naꞋipam naꞋi, “EaꞋ amama.”

Jisas nandaꞋ beten anagon lawah oliv motawama agiliguma Getsemani

39 EaꞋ Jisas nakwaha taun nawis andeꞋ nafeꞋ halaf lawah oliv motawama siꞋi laꞋlaꞋef nandaꞋam. EaꞋ alupumi ananimi magiꞋmana mafeꞋ. 40 Anan nataga naꞋama naꞋipam naꞋi, “IpeꞋ pendaꞋ betena amamaga meagwambaipei ina motagamepa, owaꞋ.”

41 EaꞋ nakwaha amam nindikiꞋah nafoꞋo felefeleꞋ, nogota bandana siꞋi aman nakwaha anona otam nafeꞋ nowama. EaꞋ nindiwa nembawa notawa nandaꞋ beten naꞋi, 42 “Ahalome, ineꞋ niꞋi aꞋe, nekwahome kap anama. EaꞋ ineꞋ nila okom ineꞋinai atona, aeꞋ owaꞋ.” [ 43 EaꞋ anona ensel nafiꞋi heven ilif naseꞋana pepel. 44 Jisas nameꞋ nimanimi eaꞋ aom endilisi, eaꞋ nandaꞋ beten laꞋifinai endilisi, agwah mandana siꞋi esimbel malo etap.]

45 Anan nandaꞋ beten eaꞋ nohafel nafeꞋma alupumi ananimi. EaꞋ nati amam ukup nimanim ambeh maham maꞋoh etin. 46 EaꞋ naꞋi, “DeiꞋ maina ipeꞋ paꞋoh? IpeꞋ hafel pendaꞋ beten. NaꞋama amamaga meagwambipei mafiꞋi feleꞋ eaꞋ motagamepa.”

Judas naꞋipa amam naumbih ma Jisas napoma, eaꞋ mafiꞋi mofaꞋana

47 Jisas ataꞋ naꞋi etin, amam hiami mafiꞋi. Aman anama sofalana saꞋi Judas, anan alupunai amam 12-peleim Jisasi, nafiꞋi naliꞋma amam. Anan nafiꞋi felefeleꞋma Jisasa neasisiꞋ dalogw ananimi. 48 EaꞋ Jisas naꞋipana naꞋi, “Judas, aeꞋ ataga epen endilisiwei. IneꞋ nasisiꞋi nihiꞋamba amam naumbih aeꞋami?”

49 Alupumi ananimi mape malomana mati amam naumbih Jisasi maꞋi mombaloꞋana mohana eaꞋ mahaliꞋ Jisas maꞋi, “Dembinai, ineꞋ naꞋi afaꞋ oham bainah?”

50 EaꞋ anona alupunai ananinai naha anona aman nandaꞋmana maola pris dembinai nape naliꞋma pris hiami eaꞋ natopaꞋ aliga daꞋisinai peleꞋatana nowa.

51 EaꞋ Jisas naꞋipana mehip naꞋi, “Kwaha waf anama.”

EaꞋ Jisas nasa lagel aliga aman anamai, nataga boꞋona wapotiꞋ.

52 EaꞋ Jisas naꞋipa agufumi Judai maloma amam pris dambami maloma amam dambami mumafi polisman hiami mumafi ipat luꞋunai Godi, mafiꞋi maꞋi mombaloꞋana. EaꞋ naꞋi, “IpeꞋ pefaꞋai bainahi belep pafiꞋi siꞋi paꞋi pewaꞋ anona aman nandaꞋ wandaf naloma gavmani? 53 Nimeguf hiami laꞋelaꞋef aeꞋ ape alomepa ipat luꞋunai Godi awalapa basef buꞋwami ma esis amam nematawa hiesi, eaꞋ ipeꞋ owaꞋ peambaleꞋe. EaꞋ deiꞋ nogota anaeꞋ nemaf ipeꞋinai. DeiꞋ waf anama owambunai aꞋ nikilaꞋ aeꞋ.”

Pita nambasoꞋam nembahoꞋ agel Jisasi naꞋi, owaꞋ nogawa Jisase

54 EaꞋ amam mombaleꞋana mofaꞋana mafeꞋ mawis ipat pris dembinai. EaꞋ Pita ina nalomam nafeꞋ etin, owaꞋ. NagiꞋmam nafeꞋ nape laogon. 55 Amam makata nif indalelemb anama nomon ipat napoma mapomam. EaꞋ Pita nape nalomam.

56 EaꞋ anoꞋw nemataꞋw kwandaꞋ maoli kwati anan napoma nif. EaꞋ kwatolona kwaꞋi, “Aman anama wapotiꞋ anan nape naloma Jisas.”

57 EaꞋ Pita naꞋi, “EhaeꞋ, aeꞋ owaꞋ.” Anan naꞋi, “NemataꞋw, aeꞋ ina egawa anan, owaꞋ.”

58 EaꞋ nogota bandana hiꞋalana, anona aman nati Pita naꞋi, “IneꞋ wapotiꞋ ineꞋ aman epes hiesi ananisi.”

EaꞋ Pita naꞋi, “Aman, aeꞋ owaꞋ.”

59 EaꞋ nogota bandana siꞋi aua atitin, anona aman naꞋi basef laꞋifimi naꞋi, “Endilisi etis, aman anama wapotiꞋ nape naloma anan. DeiꞋ main, anan wapotiꞋ Galilinai atona.”

60 EaꞋ Pita nagwamana basef naꞋi, “EhaeꞋ, aeꞋ owaꞋ eagawa basef amama ineꞋ naꞋiami.”

Anan ataꞋ naꞋiam etin, awata nandaꞋam.
61 EaꞋ Dembinai nandamboma nati Pita, eaꞋ okom Pitai nandandaꞋ ma basef amama doꞋok Dembinai naꞋipanam naꞋi, “Owamb anaeꞋ awata ataꞋ owaꞋ neandaꞋam, ineꞋ atuwasi nembahoꞋ agel aeꞋanai niꞋiam wenif niꞋi, ‘AeꞋ owaꞋ egawa Jisase.’ ” 62 EaꞋ Pita nawisi nafeꞋ andeꞋ nalef mehip.

Amam soldia maꞋi basef mandaꞋ Jisas findiwana mahana

63 Amam mumafi Jisasi mandaꞋ anan findiwana mahana. 64 Amam mapeteꞋ anona lowaf mambahoꞋmana naep mahaliꞋana maꞋi, “IneꞋ niꞋi basef profeti newalapa emi nahena.” 65 EaꞋ mandaꞋ basef hiami awami wapotiꞋ ma anan.

Amam mandaꞋmana basef Jisas ma amam dambami gavman Judai

66 Ama aon natefi amam agufumi esis Judai maloma amam pris dambami maloma amam mawalipasa miꞋuli Godi, amam hiami mondowaꞋanima mape. EaꞋ mofaꞋ Jisas mafiꞋmai amam mahaliꞋana maꞋi, 67 “IneꞋ niꞋipafa. IneꞋ Krais, God nandandepena nasapaꞋena nafiꞋi o owaꞋ?”

EaꞋ Jisas nagwamama basef naꞋipam naꞋi, “IꞋi aeꞋ ipipa, ina atuwasi pembaleꞋefam owaꞋ.
68 EaꞋ iꞋi ihaliꞋipa ma anom basef, ipeꞋ ina pegwam, owaꞋ. 69 EaꞋ deiꞋ anona nemaf wapotiꞋ aeꞋ ataga epen endilisiwei epe waꞋol lagel daꞋisinai Godi.”

70 EaꞋ amam hiami maꞋi, “DeiꞋ ineꞋ God Nogalomana aꞋamon?”

EaꞋ anan nagwamama basef naꞋi, “IpeꞋ paꞋiam eaꞋ maꞋum.”

71 EaꞋ amam maꞋi, “AfaꞋ waꞋi ataꞋ omeꞋ maim basef wapotiꞋ? OwaꞋ. Malogel ananinai atona naꞋi basef amama afaꞋ wameꞋam eaꞋ.”

Copyright information for `AOJFILIFITA