b- Lu 5:10Mt 13:47
c- Lu 5:11Mt 19:27

Luke 5

Jisas naꞋipa Saimon Pita, deiꞋ nowafa agof hiami

(Mt 4:18-22; Mk 1:16-20)

Anona nemaf Jisas naitu akata walemb batupaꞋmanai luꞋunai Genesaret naloma amam nematawa hiesi salaꞋambemana sape sameꞋ basef Godi. EaꞋ nati bogw saꞋumi biam mala embel felefeleꞋma nimbap walemb batupaꞋmanai. EaꞋ amam mowafa agufi mandaniꞋ mafeꞋ masaꞋopa anemb amamumi. EaꞋ Jisas nalata natoma bot Saimoni eaꞋ naꞋipana naꞋi, “SapaꞋ bot nokwaha bandagoma nefeꞋ laogoma.”

EaꞋ Jisas natoma bot nawalipasa basef esis amam nematawa.
Anan naꞋipas eaꞋ naꞋipa Saimon naꞋi, “IneꞋ sapaꞋ bot nofoꞋo walemb embel laogoma eaꞋ pekwaha anemb mowala pewafai anom agof.”

EaꞋ Saimon nagwa basef naꞋi, “Dembinai, doꞋok owamb laona afaꞋ wandaꞋ maol luꞋunai eaꞋ ina wagi anom agof, owaꞋ. EaꞋ naꞋipa aeꞋ naꞋama, deiꞋ ekwaha anemb mowala.”

EaꞋ mokwaha anemb mowala mowafai agof hiami. EaꞋ anemb maꞋi peleꞋetama agof hiami endilisi. EaꞋ amam mofalai alupumi amamumi mape anona boti mafiꞋi magiambama mowafai agof malam bogw biam siꞋima agof maꞋi mowala. Saimon Pita nati naꞋama, eaꞋ nindiwa nembawa natawa felefeleꞋma boꞋwagah Jisasi naꞋipana naꞋi, “Dembinai, ineꞋ kwaha aeꞋ, foꞋo. AeꞋ aman aowei, andaꞋ waf aonai!”

DeiꞋ main, anan naloma amam malumanai mati agof mowafami umbelimi endilisi. EaꞋ amam gegelalasom nomonas matamea. 10 Batausana Sebedi biam Jems naloma Jon maloma Pita mandauꞋumai wapotiꞋ gegelalasoma agof amama.

EaꞋ Jisas naꞋipa Saimon naꞋi, “Ina umbamehena, owaꞋ. DeiꞋ atef nesafela maolan nendaꞋana laꞋelaꞋef niꞋpa enis epes sila AeꞋ.”

11 EaꞋ amam mandaꞋ bogw mafeꞋ bandagoma, makwaha amamaga amamumi hiꞋalam maꞋoh, eaꞋ mailana mafeꞋ.

Jisas nandaꞋ anona aman awes aonai nandaꞋ alop nambuꞋanai amboꞋona

(Mt 8:1-4; Mk 1:40-45)

12 Nogota anama Jisas nape anona taun, anona aman awesinai
Niti futnot Luk 4:27.
alop nambuꞋanai nape. Anan nati Jisas nafiꞋi, nandeꞋ nembawa natawa etap naꞋipana mehip naꞋi, “Dembinai, iꞋi ineꞋ niꞋi awi, nendaꞋ aeꞋ etaga boꞋowe.” b, c 

13 EaꞋ Jisas nasa lagel alop aman anamai naꞋipana naꞋi, “AeꞋ aꞋi aꞋe ma ineꞋ netaga boꞋwena.”

EaꞋ deiꞋ atef awes anama aonai nakwahona eaꞋ nataga boꞋona.

14 EaꞋ Jisas naꞋipana basef laꞋifimi naꞋi, “Ina nefeꞋ niꞋipa enin epen niꞋi aeꞋ andaꞋena boꞋwena, owaꞋ. IneꞋ foꞋo nihiꞋambana alop ineꞋinai ma aman anama pris. EaꞋ neseꞋana amamaga amama anan nondolalima God eaꞋ ineꞋ ninifelona ma nataga boꞋwena siꞋi miꞋuli ananinai fowaꞋ gani Moses naꞋipasanai naꞋi. Ama esis hiesi sogawa ineꞋ amboꞋwena.”

15 OwaꞋetin. Diga basefa amamaga amama Jisas nandaꞋmanam aman anama gatom mafeꞋ ganigani. FowaꞋ ina hiesi sameꞋ basef amama, owaꞋ. DeiꞋ hiesi endilisi. Amama atom deiꞋ epes hiesi safiꞋi ma someꞋ anona nonda eses awes nandaꞋas setaga boꞋwes. 16 EaꞋ nimeguf hiami Jisas nafeꞋ anama wafiguma epes aꞋagoma ma nape nandaꞋ beten.

Jisas nandaꞋ anona aman lagof boꞋwagah magaꞋanai amboꞋona

(Mt 9:1-8; Mk 2:1-12)

17 Anona nemaf Jisas nape nawalipa esis amam nematawa eaꞋ anom Farisi maloma anom mawalipasa miꞋuli Godi tol mape. Anom mafiꞋi wambel hianai etap luꞋunai biefina Judia naloma Galili. EaꞋ anom mafiꞋi Jerusalem. EaꞋ pepel Dembinai Godi nape Jisas, ama nandaꞋ epes awes nandaꞋasi sotaga boꞋwes wapotiꞋ. 18 EaꞋ anom amam mofaꞋ anona aman lagof boꞋwagah magaꞋ mailanai, naꞋoh lehis mofaꞋana mafiꞋi. EaꞋ maꞋi mofaꞋana mefeꞋ muwis ipat mombeꞋana felefeleꞋma Jisas. 19 EaꞋ siꞋigina amam nematawa hiesi. Amam ina mati anona eafa mofaꞋ aman anama muwis nomon, owaꞋ. EaꞋ malata ipat ilif mihianama bogwan ilif mala aman anama awes nandaꞋanai naloma lehis nowala nomon laꞋafena amam nematawa mambeꞋana naꞋoh naep Jisasi.

20 Nogota anama Jisas natolom nogawa amam mombaleꞋefana laꞋifinai ma niegiambama aman anama awes nandaꞋanai. EaꞋ naꞋipa aman anama naꞋi, “IneꞋ epen aeꞋinai. Waf aonai ineꞋ nandaꞋanai aeꞋ akwahomenana eaꞋ.”

21 EaꞋ amam mawalipasa miꞋuli Godi maloma amam Farisi atom ukup atifim mandandaꞋ maꞋi, “Aman anama emi egafuna nandaꞋ God findiwanai? OwaꞋetina anona aman laꞋifinaima nekwaha waf aonai. God atona nakwaha waf aonai.”

22 Jisas nogawa nomonas amamumi. EaꞋ naꞋipam naꞋi, “DeiꞋ maina ukup ipeꞋimi mape naꞋama? 23 DeiꞋ amamaga maim ipeꞋ paꞋi ahifima aeꞋ? AeꞋ laꞋifiwei ma iꞋipa awes nandaꞋanai iꞋi, AeꞋ ekwahomena waf aonai ineꞋ nandaꞋanai o iꞋipana iꞋi, fela lehis ineꞋimi nehafel nefeꞋ. Basef amama ma nefela lehis ananimi, ipeꞋ paꞋi amama ahifima aeꞋ. 24 EaꞋ aeꞋ aꞋi ipeꞋ pegawa aeꞋ ataga epen endilisiwei, laꞋifiwei ma ekwaha waf aonai hianai amam nematawa sape etapi sandaꞋanai. AeꞋ aꞋi ihiꞋambepa aeꞋ laꞋifiwei ma endaꞋ amamaga amama.”

EaꞋ anan naꞋipa aman anama awes nandaꞋanai naꞋi, “AeꞋ aꞋipina endilisi, ineꞋ hafel fela lehis ineꞋimi faꞋam nefeꞋ ipat ineꞋinai.”

25 Jisas naꞋipana etin naꞋama, nohafel naitu nafela lehis ananimi naep amam nematawa hiesi. EaꞋ ataꞋ nafeꞋ etin eaf, nandanifel nafela agel Godi luꞋuna nafeꞋ ipat ananinai.

26 EaꞋ amam nematawa isima hiesi gegelalasis kwapeteꞋas umbamahas endilisi safela agel Godi luꞋuna saꞋi, “DeiꞋ apeꞋ mati anona waf dambainai fowaꞋ owaꞋ meatolonai.”

Jisas nofala anona aman Livai

(Mt 9:9-13; Mk 2:13-17)

27 Amama mataga eaꞋ, Jisas nohafel nafeꞋ nati anona aman nofaꞋ takisi tol nape ipat sofaꞋ takisanai, agilinama Livai. EaꞋ Jisas naꞋipana naꞋi, “IneꞋ fiꞋi nila aeꞋ.”

28 EaꞋ nohafel nailana nafeꞋ. Amamaga hiami ananimi nakwahom maꞋoh.

29 EaꞋ Livai nandaꞋ anom gwaꞋaimi luꞋwami ipat ananinai nanifela Jisas. EaꞋ amam hiami mandaꞋ waf aonai mofaꞋ takisi maloma anom amam wapotiꞋ mape maꞋ gwaꞋaimi maloma amam biam. 30 EaꞋ anom Farisi maloma anom amam mawalipasa miꞋuli Godi, amam Farisi, mape mandaꞋ megah maham ma amam alupumi Jisasi maꞋi, “DeiꞋ maina ipeꞋ pape paꞋ gwaꞋaimi paloma amam mofaꞋ takisi maloma amam amama mandaꞋ waf aonai? NaꞋama ina andeandeꞋ, hapaimi.”

31 EaꞋ Jisas nagwamam naꞋipam naꞋi, “Isima awes aꞋasi ina safeꞋma dokta, owaꞋ. Esis buꞋwasi. EaꞋ isima awes nandaꞋasi etis safeꞋma dokta. 32 AeꞋ ina afiꞋi ma efala epes sape andeandeꞋi somboma opalef, owaꞋ. AeꞋ afiꞋi ma efala epes sandaꞋ waf aonai etis somboma opalef sokwaha waf aonai sefeꞋma God.”

Waf sololama gwaꞋaimi

(Mt 9:14-17; Mk 2:18-22)

33 EaꞋ enis epes saꞋipa Jisas naꞋama saꞋi, “Alupumi Joni maloma alupumi amam Farisi ukup mapoma basef Godi. EaꞋ anom nimeguf wikifah hiami amam mololama gwaꞋaimi mondaꞋ beten etin. EaꞋ alupumi ineꞋimi owaꞋ mondaꞋ waf anama. Amam maꞋ gwaꞋaimi embel maim nimeguf hiami.”

34 EaꞋ nagwamas naꞋi basef womun etin naꞋi, “IꞋi enis sondaꞋ anom gwaꞋaimi luꞋwami ma enis aman nemataꞋw bias sondaseꞋama, ipeꞋ ina laꞋifipama pendaꞋ esis alupisi sondaiwaꞋma gwaꞋaimi nemaf anama anan nasoꞋ nemataꞋwi nape nalomas, owaꞋetin. 35 EaꞋ nemaf anama anan nasoꞋ nemataꞋwi nokwaha esis nafeꞋ anagon laogoma, esis sakwaha gwaꞋaimi.”

36 EaꞋ Jisas naꞋipasa anom basef womun etina luwaguf naꞋi, “Ina andeandeꞋma petopaꞋ lowaf namunai pesana neloma anona lowaf apinai, owaꞋ. IꞋi enis sondaꞋam naꞋama, lowaf ina noloma apinai naꞋama etin, owaꞋ. Namunai peleꞋetana etin.

37 EaꞋ ina enin epen nakoloꞋwa embel wainim dambaimi agwahup apinai mafinina, siꞋi botowagof, owaꞋ. IꞋi enin nendaꞋam naꞋama, wain netef hiana, nohapeꞋ agwahup anama pepeꞋetana eaꞋ wain koloꞋolana aona hiꞋilana. 38 EaꞋ wain dambainai sakoloꞋwana agwahup dambainai atona. 39 EaꞋ emi nogaꞋ wain apinai enin ina atuwasi okom niꞋi wain dambainai, owaꞋ. Enin naꞋi, ‘Wain apinai buꞋunai nikilaꞋ dambainai.’ ”

Copyright information for `AOJFILIFITA