b- Mk 10:52Mk 5:34Mk 11:9Sam 118:25-26

Mark 11

Jisas nondowasaꞋ nafeꞋ nawis Jerusalem siꞋi anona dembinai king

(Mt 21:1-11; Lu 19:28-40; Jo 12:12-19)

Jisas naloma alupumi ananimi mafeꞋ mondowasaꞋ mataga felefeleꞋma Jerusalem, eaꞋ mataga Betani naloma Betafage wambel biefina eaꞋ mataga halaf lawah oliv motawama. EaꞋ Jisas nasapaꞋ alupumi ananimi biam naꞋipam naꞋi, “IpeꞋ bipa pefeꞋ wambel nanima nape gani waꞋol felefeleꞋma naꞋae pefeꞋ piwis wambel anama, piti anona donki soꞋunai sapana nail. Ina deiꞋ enin epen natomana, ataꞋ owaꞋ. Petagahona pefaꞋana pifiꞋmai aeꞋ. IꞋi enin epen nihaliꞋipa niꞋi, ‘IpeꞋ pafiꞋi pandaꞋam naꞋama ma main?’ EaꞋ ipeꞋ piꞋipana piꞋi, ‘Dembinai afaꞋinai naꞋipafa naꞋi nondaꞋ maolana atuwasi nosapaꞋana notanimamipei mehip.’ ”

EaꞋ amam biam mafeꞋ mati anona donki saꞋunai sapeteꞋana nail ipat uta andeꞋ felefeleꞋma eaf. Amam ataꞋ matagahona etin, enis saitu felefeleꞋ sahaliꞋam saꞋi, “DeiꞋ maina ipeꞋ patagaha donki anama?”

EaꞋ maꞋipas siꞋi Jisas doꞋok naꞋipam. EaꞋ saꞋi aꞋe ma amam mofaꞋ donki anama. EaꞋ mofaꞋana mafiꞋmai Jisas, mawamona sagwegw amamumi matoma donki anama Jisas natomam. EaꞋ esis hiesi sambeꞋamonam sagwegw eaf.
Esis sambeꞋamonam sagwegw eafa sesaꞋma agel Jisasi luꞋuna.
Enis satopaꞋi lawah motawa aof felefeleꞋi saseꞋwiam eaf sofaloꞋmana.
Esis hiesi saliꞋ sagiꞋ sandaꞋ la koloꞋ safeꞋ naꞋama saꞋi, b 

“Hosana. ApeꞋ mandanifel endilisi ma ineꞋ. ApeꞋ maꞋi God nofaloꞋma ineꞋ nafiꞋi agel Dembinai.
10 DeiꞋ awi ineꞋ nafiꞋi, nape Dembinai ma apeꞋ nimafiapa siꞋi fowaꞋ gani Devit nape dembinai numafias. Hosana. ApeꞋ mosaꞋma agel Godi nolata ilif endilisi.”
11 EaꞋ Jisas nawis Jerusalem nafeꞋ nawis ipat Godi luꞋunai sandaꞋ lotuwanai. Nawis nati amamaga nafeꞋma hiꞋalam, aon naꞋi nowala, naoꞋwa alupumi 12-peleim ananimi mafeꞋ Betani.

Jisas naꞋipa anona lawag agilinama fik ma ina ataꞋ nil nola suꞋutip wapotiꞋ, owaꞋ

(Mt 21:18-19)

12 Wafilu Jisas naloma alupumi ananimi mohafel makwaha Betani mafiꞋi etin, Jisas nolomahana. 13 EaꞋ naitu nati anona lawag agilinama fik notawa laogon felefeleꞋ, nati apul atom. EaꞋ nafeꞋ felefeleꞋ nagolopa suꞋutip. EaꞋ ina nati anom mailana, owaꞋ. Nati apul atom. Nogota anama mailanai ataꞋ owaꞋ. 14 EaꞋ Jisas naꞋipana naꞋi, “Ina ataꞋ nela anom suꞋutip milina wapotiꞋ, owaꞋ”.

EaꞋ alupumi ananimi mameꞋ basef amama naꞋipa lawagami.

Jisas nagoloꞋma amam nematawa satala amamaga ipat luꞋunai Godi sawisi andeꞋ

(Mt 21:12-17; Lu 19:45-48; Jo 2:13-22)

15 Jisas naloma alupumi ananimi mafeꞋ mataga Jerusalem, eaꞋ nawis ipat luꞋunai Godi nagoloꞋma esis hiesi sandaꞋ bisnisi saloma isima satalom ipat anama nomoni sawisi andeꞋ. Anom amam mati otamba enis epesi mindisilaꞋmam. EaꞋ Jisas namboma tebol amamumi nakowasom. Enis sandaꞋ bisnisa setal amiguf maiꞋunamb. EaꞋ namboma siaifah asasimi nakowasom wapotiꞋ. 16 EaꞋ nandaꞋimagon naꞋi, “Ina ataꞋ sofaꞋ anom amamaga amama suwisi nomon wapotiꞋ ipat anama sandatama sapoma, owaꞋ.” 17 EaꞋ naꞋipasa basef Godi mail Baibeli naꞋi,

“Ipat AeꞋanai nopoma esis sape ganima wambel hiagomai ma sifiꞋi sopaina sondaꞋ beten sohaliꞋ AeꞋ. EaꞋ ipeꞋ pandaꞋana nataga siꞋi sandaꞋ walanai.”
18 Amam nematawa hiesi gegelalasisa basef ananimi. Amama atom pris amama dambami maloma amam mawalipasa miꞋuli Godi umbamahama anan. EaꞋ magolopa eafa mohana neagaꞋ. 19 EaꞋ wambomota Jisas naoꞋwa alupumi ananimi makwaha Jerusalem mafeꞋ.

Emi nombaleꞋefa God nendaꞋ beten nihaliꞋana, nambimb nefaꞋ amamaga

(Mt 21:20-22)

20 Wafilu kuhimbita atona Jisas naloma alupumi ananimi mafeꞋ mati lawag anama fik bowana alina, soh maloma nombalef alim hiꞋalam. 21 EaꞋ Pita natolona okom napoma Jisas naꞋiami basefa lawag anama eaꞋ naꞋipana naꞋi, “Dembinai tisa, ineꞋ niti lawag anaeꞋ nambatiꞋ ineꞋ naꞋipanai, alina hiꞋalana.”

22 EaꞋ Jisas nagwamama basef amam naꞋipam naꞋi, “IpeꞋ pembaleꞋefa God. 23 Endilisi aeꞋ aꞋipipa, emi egafis owaꞋ ukup bimbiefim mopeis ma esis ukup etifim sembaleꞋa basef AeꞋami endilisi siꞋipa halaf nani siꞋi, ‘IneꞋ degia nefeꞋ newala naoh,’ endilisi God nambimb nondaꞋam motaga siꞋi esis ukup maꞋiam. 24 NaꞋama aꞋipipa, IꞋi ipeꞋ piꞋi pendaꞋ betena pehali Goda anom amamaga, pembaleꞋefa God endilisi pendaꞋ beten piꞋi, ‘Endilisi, afaꞋ nambimb ofaꞋami,’ ma nambimb pefaꞋam siꞋi paꞋiam. 25 Nemaf anama ipeꞋ pitu pendaꞋ beten, pekwahomasa waf aonai enis sandaꞋmepanai. Ama Ahalomepa nape heven ilifi nekwahomepa waf aonai ipeꞋ pandaꞋanai wapotiꞋ. [ 26 IꞋi pindaiwaꞋma peakwahomasa waf aonai enis epes sandaꞋmepanai, Ahalomepa nape heveni ina nekwahomepa waf aonai ipeꞋ pandaꞋanai, owaꞋetin.]”

Amam mahaliꞋ Jisas maꞋi, “Emi naꞋipina ma nepe dembinai?”

(Mt 21:23-27; Lu 20:1-8)

27 EaꞋ Jisas naloma alupumi ananimi mafiꞋi Jerusalem wapotiꞋ, eaꞋ nafeꞋ nawis ipat luꞋunai Godi sandaꞋ lotuwanai. Anan ataꞋ nafeꞋ etin, amam pris dambami maloma anom mawalipasa miꞋuli Godi maloma amam agufumi Juda mafiꞋmai Anan. 28 EaꞋ mahaliꞋana maꞋi, “IneꞋ nefaꞋ agel maina deiꞋ nandaꞋ maol anama? Emi naꞋipina ma nepe dembinai nandaꞋ maol anama?”

29 EaꞋ Jisas nagwamama basef naꞋi, “AeꞋ wapotiꞋ, aꞋi ihaliꞋipa ma anom basefa ipeꞋ ataꞋ piliꞋ piꞋipa aeꞋ, ma atuwasi iꞋipipa emi naꞋipi ape dembiwei andaꞋ maol anama. 30 Jon napisiꞋas amam nematawa hiesi, emi naꞋipana nandaꞋ maol anama? God nape heveni naꞋipana napisiꞋas o enin epen etapanai naꞋipana? IpeꞋ pegwam piꞋipiam.”

31 EaꞋ mameꞋ basef amama mandaꞋipama maꞋi, “AfaꞋ wiꞋi, ‘God nape heveni naꞋipana,’ Anan atuwasi niꞋipafa niꞋi, ‘DeiꞋ maina ipeꞋ owaꞋ pembaleꞋefana?’ 32 EaꞋ afaꞋ wiꞋi, ‘Epes sape etapi saꞋipa Jon napisiꞋasi,’ naꞋama esis amam nematawa sohafa.”

DeiꞋ main, esis hiesi saꞋi Jon anan profet dembinai. EaꞋ amam umbamahama esis.
33 EaꞋ magwamana basef maꞋi, “AfaꞋ ina ogawana.”

EaꞋ Jisas naꞋipam naꞋi, “NaꞋama etin aeꞋ ina iꞋipipa emi naseꞋe agel luꞋunai naꞋipi andaꞋ maol anama.”

Copyright information for `AOJFILIFITA