b- Mk 14:36Ro 8:15Ga 4:6Mk 10:38Jo 6:38

Mark 14

Amam dambami Juda maꞋi moha Jisas nogaꞋ

(Mt 26:1-5; Lu 22:1-2; Jo 11:45-53)

Anona nemaf buꞋunai saꞋi Pasova ma esis Juda sondaꞋ gwaꞋaimi luꞋwami sagwaꞋ anona bret owaꞋ neatef luꞋunai. Nimeguf biam ataꞋ mape ma nemaf anama buꞋunai saꞋi seaꞋ gwaꞋaimi Pasova eaꞋ notaga. Nemaf anama amam mawalipasa miꞋuli Godi maloma anom pris dambami maꞋi mondambahoꞋ miti anona eaf ma mombaloꞋ Jisas mohana neagaꞋ. Amam maꞋiam naꞋama maꞋi, “Nemaf anama sandaꞋ gwaꞋaimi luꞋwami afaꞋ ina ombaloꞋana, hapainai. NaꞋama epes hiesi ukup aom sohafel sondaꞋ wandaf.”

AnoꞋw nemataꞋw kwakoloꞋ sanda newala balaga Jisasi

(Mt 26:6-13; Jo 12:1-8)

Nemaf anama Jisas nape Betani, nape ipat anona aman Saimoni. FowaꞋ awes aonai nandaꞋ alop ananinai namboꞋ, deiꞋ amboꞋona. Jisas ataꞋ nape naꞋ gwaꞋaimi etin nalomana, eaꞋ anoꞋw nemataꞋw kwahapila anona botol sandaꞋana siꞋi otam, sanda alogw buꞋwami maꞋanai satalom otamba luꞋwami mala botol anama, agilinama nad. EaꞋ kopalia botol anama kwakoloꞋam mowala balaga Jisasi.

EaꞋ enis epes sape satolom saꞋi, “DeiꞋ maina kwakoloꞋ sanda amama mafeꞋ etin?”

EaꞋ esis ukup numbutim kwapeteꞋas ma akwaꞋw,
eaꞋ saꞋi, “DeiꞋ afaꞋ ofaꞋam enis epes soseꞋafa moni nikilaꞋ 300 kina sotalom ofaꞋana osoꞋ epes isima kwahusa gwaꞋaimi maim, andeandeꞋ.”

Esis ukup numbutim endilisi mapoma nemataꞋw akwama.

EaꞋ Jisas naꞋipas naꞋi, “IpeꞋ kwahoꞋw. IpeꞋ ina ukup aoma akwaꞋw, owaꞋ. AkwaꞋw kwandaꞋ waf buꞋunai ma AeꞋ. Isima gwaꞋaimi maim aꞋasi laꞋelaꞋef sape salomepa. Maina nemaf piꞋi pigiambamas peseꞋas moni, andeandeꞋ peseꞋasana. Epes isima sape salomepa nimeguf hiami, eaꞋ aeꞋ owaꞋ. AeꞋ ina elomepa epe nimeguf hiami, owaꞋ. Maol anama akwaꞋw kwogawana, kwandaꞋana. FelefeleꞋma nambimb esis sehe egaꞋ ma sowe hiꞋagif. Okom akoꞋunai napoma felefeleꞋma aeꞋ egaꞋ. NaꞋama deiꞋ kofaꞋai sanda amama kwafiꞋi kwakoloꞋam mowala balaga aeꞋanai kwakoloꞋam mowala alop aeꞋanai ma kwandondomba aeꞋ ma seawe. Endilisi AeꞋ aꞋipipa, ganima etap anaeꞋ wambel hiagoma anona nemaf siꞋipasa basef buꞋwami Godi, siꞋipasa basef akoꞋumi wapotiꞋ ma ukup mopoma waf buꞋunai akwaꞋw kwandaꞋmeanai.”

Judas nihiꞋamba Jisasa agufumi Juda ma mofaꞋana mohana neagaꞋ

(Mt 26:14-16; Lu 22:3-6)

10 Amam amama Jisasi 12-peleim anona amamunai agilinama Judas Kariotinai nafeꞋma amam pris hiami dambami. Anan naꞋi niꞋipama Jisas atona napoma mofeꞋ mombaloꞋana. 11 Amam mameꞋ basef ananimi mandanifel endilisi. EaꞋ maꞋi basef mandameꞋmam naꞋama maꞋi, “AndeandeꞋ, afaꞋ oseꞋena anona moni.”

EaꞋ Judas naꞋi nefeꞋ nogolopa anona eafa nihiꞋambama Jisas amama mombaloꞋana.

Jisas naꞋ gwaꞋaimi luꞋwami saꞋi Pasova naloma alupumi ananimi

(Mt 26:17-25; Lu 22:7-14, 21-23; Jo 13:21-30)

12 Nemaf anama saliꞋ saꞋ gwaꞋaimi luꞋwami saꞋi Pasova esis saꞋ bret anama owaꞋ neatef luꞋunai, nemaf anama saha sipsip noganai sondolalima Goda sondaꞋ gwaꞋaimi amama siꞋi afagof hiami sandaꞋam.

EaꞋ alupumi Jisasi mahaliꞋana maꞋi, “IneꞋ naꞋi afaꞋ ofeꞋ ondondomba ipat enima ma afaꞋ ofeꞋ ondaꞋ gwaꞋaimi amama?”

13 EaꞋ Jisas naꞋipa ananimi biam naꞋi, “IpeꞋ pefeꞋ piwis gani wambel luꞋunai, piti anona aman eaf nofaꞋ embel malep luꞋunai. EaꞋ pigiꞋmana pefeꞋ piwis ipat anama anan nefeꞋ niowisanai. EaꞋ pihaliꞋ kofagena ma ipat anama piꞋi, ‘Dembinai afaꞋinai naꞋipafa naꞋi, rum aeꞋanai nape eti? Anan naꞋi noꞋwa afaꞋ atofa alupufai ope ondaꞋ gwaꞋaimi amama Pasova.’ 15 EaꞋ nihiꞋambepa rum anama luꞋunai nape ilif, eaꞋ sandombana tebol siaifah maꞋoh etifim. IpeꞋ pendondombamafa gwaꞋaimi rum anama.”

16 EaꞋ amam mafeꞋ mawis wambel anama mati amama siꞋi Jisas naliꞋ naꞋipami eaꞋ mandondomba gwaꞋaimi amama Pasova rum anama. 17 Wambomota felefeleꞋma owamb, Jisas naloma alupumi 12-peleim mafeꞋ mataga ipat anama 18 Mawis ataꞋ mape maꞋ gwaꞋaimi etin, Jisas naꞋipam naꞋi, “AeꞋ aꞋipipa endilisi, anona afaꞋinai deiꞋ nape nalomafa naꞋ gwaꞋaimi, atuwasi nefeꞋ nihiꞋamba amam naumbiha AeꞋ efeꞋ eapoma.”

19 Amam mameꞋ naꞋama ukup amamumi nimanim eaꞋ mahaliꞋana atona etin maꞋi, “AeꞋ o emi?”

20 EaꞋ Jisas naꞋipam naꞋi, “Anona afaꞋinai 12-peleim naloma aeꞋ wahapila bret walata disi, eaꞋ anama atona. 21 AeꞋ ataga epen enidilisiwei, naman enis epes sehe egaꞋ, siꞋi Buk Baibel naꞋiama AeꞋ. EaꞋ aman anama nowalapa AeꞋ ma naumbih, anan uwahipina endilisi. Nambimb nimanimi awami endilisi motagamana. FowaꞋ mamaꞋwana owaꞋ ataꞋ kolanai, andeandeꞋ. Ama anan ina notagama nimanimi amama awami, owaꞋ.”

Jisas naseꞋama bret naloma embel wain alupumi ananimi

(Mt 26:26-30; Lu 22:15-20; 1 Ko 11:23-25)

22 Jisas nalomam ataꞋ mape maꞋ gwaꞋaimi etin, nafela anona bret, nandaꞋ beten nanifela God, nawalona naseꞋam naꞋipam naꞋi, “IpeꞋ felana peaꞋana. Bret anama alop AeꞋanai.”

23 EaꞋ nafela anona kap embel wain nalanai nandaꞋ beten nanifela God nasoꞋ amam hiami maꞋ embel etin. 24 EaꞋ naꞋipam naꞋi, “Embel amama esimbel AeꞋami mandaꞋ basef amama God naꞋi endilisimi atomi motaga laꞋifim. AeꞋ ekoloꞋwama igiambama amam nematawa hiesi. 25 AeꞋ aꞋipipa endilisi, aeꞋ ina ataꞋ etanima eaꞋ embel wain wapotiꞋ, owaꞋ. EfeꞋ etaga wambel Godi, eaꞋ anona wain dambainai.”

26 Amam mandaꞋ anona awaf eaꞋ mawisi mafeꞋ mondowasaꞋ halaf lawah oliv motawama.

Jisas naꞋi Pita atuwasi nombahoꞋ agel Jisasi

(Mt 26:31-35; Lu 22:31-34; Jo 13:36-38)

27 EaꞋ Jisas naꞋipa alupumi naꞋi, “FowaꞋ gani Baibel naꞋi naꞋama naꞋi, God naꞋi,

‘Anona nemaf owagama gani, AeꞋ eha aman anama numafi sipsipi nogaꞋ. EaꞋ sipsip amama atuwasi mofaꞋ mofeꞋ atona etin.’
EaꞋ Jisas naꞋipam naꞋi, atuwasi ipeꞋ pekwaha pembaleꞋefa aeꞋ pefaꞋ pefeꞋ atona etin, siꞋi fowaꞋ gani God naꞋiam.

28 EaꞋ nambimb aeꞋ etanima ehafel wapotiꞋ, iliꞋipa efeꞋ etap hiagoma Galili.”

29 EaꞋ Pita nagwamana naꞋi, “IꞋi amam hiami ineꞋimi mokwahina, hapaimi, aeꞋ owaꞋ.”

30 EaꞋ Jisas nagwamana basef naꞋi, “AeꞋ aꞋipina basef endilisi, deiꞋ owamb anaeꞋ, awata ataꞋ owaꞋ nondaꞋam bif, ineꞋ nembahoꞋ agel aeꞋanai niꞋi wenif niꞋi, ‘AeꞋ owaꞋ egawa Jisas.’ ”

31 EaꞋ Pita naꞋipana mehip naꞋi, “IꞋi esis sohafa, afaꞋ biafa ogaꞋ etin. AeꞋ ina embahoꞋ agel ineꞋinai, owaꞋ.”

EaꞋ alupumi hiami Jisasi maꞋiam naꞋama etin hiꞋalam.

Jisas nape anagon Getsemani lawah oliv motawama nandaꞋ beten

(Mt 26:36-46; Lu 22:39-46)

32 EaꞋ Jisas naloma alupumi ananimi mafeꞋ mataga anona etap Getsemani, eaꞋ naꞋipam naꞋi, “IpeꞋ pepe naꞋae. AeꞋ efeꞋ gani waꞋol endaꞋ beten.”

33 EaꞋ Jisas naoꞋwa Pita naloma Jems naloma Jon mafeꞋ malomana. EaꞋ opaf Jisasi aona kwapeteꞋana. 34 EaꞋ naꞋipam naꞋi, “Opaf aeꞋanai nimanina endilisi ma egaꞋ, nomonas aeꞋami aom endilisi. IpeꞋ pepe naꞋae pindumafuma pepe pehafa aeꞋ etanimai iefiꞋi.”

35 EaꞋ Jisas nandamboma nafeꞋ, nambeꞋ opaf naꞋoh etap nandaꞋ beten. NaꞋi notofa amamaga awami amama anan atuwasi meatagamanai. 36 EaꞋ nahaliꞋ God naꞋi, “Aba
Basef amama aba maꞋi Ahalome.
Ahalome, ineꞋ laꞋifinai ma nandaꞋ amamaga hiami hiꞋalam. Nekwahome nimanimi amama. EaꞋ nila okom ineꞋinai atona, aeꞋ owaꞋ.” b, c 

37 Anan nahaliꞋana eaꞋ, nohafel notanima nafeꞋma alupumi ananimi mapoma. NafeꞋ natolom eaꞋ, nati amam maꞋoh magaꞋ mafeꞋ. EaꞋ nofala Saimon Pita naꞋi, “Saimon, ipeꞋ ataꞋ owaꞋ pepe, paꞋoh etin aꞋamon? DeiꞋ maina ipeꞋ owaꞋ laꞋifipama pepe pehafa aeꞋ? Nogota ina ataꞋ laona ma ieꞋipipa aꞋi pepe, owaꞋ. 38 IpeꞋ pindumafuma andeandeꞋ pepe pendaꞋ beten. NaꞋama amamaga meagwambipei meatagamepa. Endilisi ukup ipeꞋimi maꞋi awima pendaꞋ beten, eaꞋ alop owaꞋ laꞋifina, alaꞋuta naepa ma penda beten pelome.”

39 Jisas naꞋipam naꞋama ma eaꞋ, notanima nafeꞋ nandaꞋ beten. NahaliꞋanama basef amama atom naliꞋ nahaliꞋanamami. 40 NahaliꞋana eaꞋ nandamboma notanima nafiꞋi amam mapoma nati ataꞋ maꞋoh. EaꞋ ninimbalom mohafel maꞋi, “Atuwasi afaꞋ wiꞋipana maim basef?”

Ambeh maham eaꞋ maꞋoh magaꞋ mafeꞋ.
41 EaꞋ anan nandamboma notanima nafeꞋ wapotiꞋ nandaꞋ beten siꞋi doꞋok naliꞋ nandaꞋ beten bif. EaꞋ notanima nafiꞋmai amam naꞋipam naꞋi, “IpeꞋ papoma nomaꞋw paꞋoh etin? DeiꞋ ipeꞋ koh eaꞋ, hafel. DeiꞋ nemaf anaeꞋ anona aman nifiꞋi nulumai anom amam awami mufiꞋi mowaꞋ aeꞋ ataga epen endilisiwei. 42 Hafel! AfaꞋ ofeꞋ uti aman anama nihiꞋambama aeꞋ deiꞋ nafiꞋi.”

Judas nawalapa Jisasa amam naumbih

(Mt 26:47-56; Lu 22:47-53; Jo 18:3-12)

43 Jisas ataꞋ naitu naꞋipam etin, anona aman nafiꞋi. Aman anama Judas anona amam 12-peleim alupumi ananimi nafiꞋi nalumai amam hiami mahapila bainahi belep malomana mafiꞋi. Amam pris dambami malumai amam agufumi dambami esis Judai masapaꞋam mafiꞋi.

44 Aman anama nawalapa Jisasi, naliꞋ naꞋipam nandaꞋ ikwaf nihiꞋambam naꞋi, “Atuwasi piti aeꞋ iesisiꞋ dalogwanai, aman anama eaꞋ Jisas maꞋuna. IpeꞋ pembaloꞋana pewaꞋana andeandeꞋ pefaꞋana pefeꞋ.”

45 Amam ataꞋ mataga etin, Judas nafeꞋma Jisas naꞋipana naꞋi, “Dembinai Tisa.”

EaꞋ nasisiꞋ dalogwana.
46 EaꞋ amam membaloꞋ Jisas. 47 EaꞋ anona aman naitu felefeleꞋma Jisasi nagiai bainat naha anona aman nandaꞋmana maola pris dembinai nape naliꞋma pris hiami, natopaꞋ aliga ananinai peleꞋatana nowa.

48 EaꞋ Jisas naꞋipa amam naumbih naꞋi, “IpeꞋ pefaꞋai bainah maloma belep pafiꞋi paꞋi pewaꞋ anona aman aonai nandaꞋ wal napaꞋ naloma gavmani? 49 Nimeguf hiami aeꞋ ape alomepa felefeleꞋma ipat luꞋunai Godi awalapa basef buꞋwami ma esis aman nematawa hiesi, eaꞋ ipeꞋ owaꞋ pembaleꞋe. EaꞋ deiꞋ paila basef mape Baibeli pafiꞋi pewaꞋe siꞋi basef fowaꞋ gani maꞋiam. AeꞋ aꞋi basef amama deiꞋ motaga endilisi molaꞋ gwaꞋaimi.”

50 EaꞋ alupumi ananimi hiami makwahona mafaꞋ mafeꞋ hiꞋalam.

Anona aman saꞋunai nafaꞋ nafeꞋ

51 EaꞋ anona aman saꞋunai nagiꞋma Jisas nafiꞋi nowahoꞋ anona lowaf afitinai eaꞋ amam mahapila bainah maloma belep maꞋi mombaloꞋana. 52 EaꞋ anan nakwaha lowaf atona naꞋoh eaꞋ nafaꞋ nafeꞋ etin.

Amam mandaꞋ kotima Jisas

(Mt 26:57-68; Lu 22:54-55, 63-71; Jo 18:13-14, 19-24)

53 Amam mofaꞋ Jisas mafeꞋma pris dembinai nape naliꞋma pris hiami. Anan naloma amam pris dambami maloma amam dambami Judai maloma amam mawalipasa miꞋuli Godi amam hiami mandakolas etifigin. 54 EaꞋ Pita ina nalomam etin nafeꞋ, owaꞋ. Anan nagiꞋmam nafeꞋ nawis endalelemba pris anama dembinai eaꞋ nape naloma amam polisman mapoma nif. 55 EaꞋ amam pris dambami maloma amam dambami Juda hiami mumafi koti maꞋi mogolopa enis epesa sombasoꞋmana ma anom basefa moha Jisas neagaꞋ. EaꞋ amam ina mati enis, owaꞋ. 56 Esis hiesi sambasoꞋmana ma anom basef eaꞋ ina saꞋi endilisimi mafeꞋ etifigin, owaꞋ. SaꞋiam mafeꞋ deindei.

57 EaꞋ amam maitu mambasoꞋmana ma anom basef naꞋama maꞋi, 58 “AfaꞋ wameꞋ Jisas naꞋiam naꞋama naꞋi, ‘Ipat luꞋunai Godi epes sandaꞋanai, nambimb AeꞋ etalona, ma nimeguf wanom eaꞋ efelona notawa wapotiꞋ. EaꞋ AeꞋ ina endaꞋ lagof epesi efelona, owaꞋ.’ ”

59 Basef amama amam maꞋiami ina maꞋi endilisimi mafeꞋ etifigin, owaꞋ. MaꞋiam mafeꞋ deindei. 60 EaꞋ pris anama dembinai naitu laꞋafen nahaliꞋ Jisas naꞋama naꞋi, “IneꞋ negwa basef amama, o owaꞋ? DeiꞋ maina amam maꞋipina basef naꞋama?”

61 EaꞋ Jisas nasopama malogel naitu. Anan ina nagwamana basef anan, owaꞋ. EaꞋ pris anama dembinai nahaliꞋana wapotiꞋ naꞋi, “IneꞋ Krais aman anama God nandandepena nasapaꞋena nafiꞋi o owaꞋ? IneꞋ nogalomana Godi apeꞋ mandaꞋ lotumanai, o owaꞋ?”

62 EaꞋ Jisas naꞋi, “Endilisi aeꞋ maꞋuwi. EaꞋ anona nemaf ipeꞋ piti aeꞋ ataga epen endilisiwei epe lagel daꞋisinai Godi, epe otaga ilif itanimai ifiꞋi petolowe.”

63 Jisas naꞋiam naꞋama, eaꞋ pris anama okom wandafuna, eaꞋ nahapeꞋ lowaf anama nalanai naꞋiam naꞋi, “ApeꞋ ina ataꞋ mofalai enis epes wapotiꞋ sifiꞋi siꞋi anom basefa anan, owaꞋ. 64 Anan nandaꞋ God findiwana eaꞋ amama pameꞋam. DeiꞋ ipeꞋ ukup mape maꞋimama?”

EaꞋ amam hiami maꞋi anom basef mandameꞋmam maꞋi, “Anan nandaꞋ waf aonai afaꞋ ohana negaꞋ.”
65 EaꞋ anom mohafel misisiꞋwafana masopama naep ananimi mahana maꞋipana maꞋi, “NiꞋi basef siꞋi profet newalapa emi nahena.”

EaꞋ amam polisman mafiꞋi mahana mofaꞋana mafeꞋ.

Pita nambasoꞋmas nambahoꞋ agel Jisasi

(Mt 26:69-75; Lu 22:56-62; Jo 18:15-18, 25-27)

66 AnoꞋw nemataꞋw kwandaꞋmana maol pris anama dembinai kwafiꞋi kwati Pita napoma nif ipat andeꞋ. EaꞋ kwaitu kwatolona kogawana kwaꞋipana naꞋama kwaꞋi, “Enina ineꞋ nape naloma Jisas Nasaretinai.”

68 EaꞋ Pita nambahoꞋ agel Jisasi naꞋipakw naꞋi, “OwaꞋ. AeꞋ ina egawa basef ofagema ineꞋ naꞋiami.”

EaꞋ anan nohafel nafeꞋ felefeleꞋma endambel uta, anona awata nondaꞋam.
69 EaꞋ nemataꞋw akwama kwatolona kwaꞋipas isima saitu felefeleꞋi wapotiꞋ kwaꞋipas naꞋama kwaꞋi, “Aman anama wapotiꞋ alupunai Jisasi.”

70 EaꞋ Pita naꞋiam wapotiꞋ naꞋi, “AeꞋ ina egawana, aeꞋ owaꞋ.”

Nogota bandana eaꞋ enis saitu felefeleꞋi saꞋipa Pita wapotiꞋ saꞋi, “Endilisi, ineꞋ alupinai naloma amam Jisasi. IneꞋ wapotiꞋ aman Galilinai.”

71 DeiꞋ Pita nambahoꞋ agel Jisasi naꞋi basef laꞋifimi naꞋi, “Endilisi ilif, aeꞋ ina egawa aman anama ipeꞋ paꞋianai, owaꞋ.”

72 Anan naꞋiam eaꞋ, awata nandaꞋam bif eaꞋ Pita okokoma basef doꞋok Jisas naꞋipanami naꞋi, “Awata owaꞋ ataꞋ nondaꞋam bif, ineꞋ nembasoꞋmas niꞋiam wenif niꞋi, ‘OwaꞋ negawea.’ ”

EaꞋ Pita okom napoma basef amama eaꞋ nalef mehip.

Copyright information for `AOJFILIFITA