Mark 4

Basef womun etina anona aman nowaha olelemb siꞋi rais anona aof

(Mt 13:1-9; Lu 8:4-8)

Anona nemaf Jisas nasefela opeh wapotiꞋ nandaꞋam nawalipa amam nematawa hiesi felefeleꞋma walemb batupaꞋmanai luꞋunai Galili. EaꞋ esis hiesi safiꞋi salipana sape. EaꞋ nalata natoma anona bot nala embel walemb batupaꞋmanai anama, eaꞋ esis saitu akata felefeleꞋma walemb anama. EaꞋ naseꞋasa basef hiami womun etin naꞋama naꞋi, “IpeꞋ pemeꞋ! Anona aman nafeꞋ nowaha olelemb witim siꞋi rais anona aof. Anan nowahom nafeꞋ, anom mowa eaf safeꞋma eaꞋ amiguf mufiaꞋ mafiꞋi maꞋam. EaꞋ anom mowa etap otambaiguma, etap ina luꞋuna, owaꞋ. KwaieꞋuna. Natoma ilif atogon ina nowala owin, owaꞋ. EaꞋ olelemb witim mataga mehip eaꞋ masilimb ina mowala etap, owaꞋ. EaꞋ owaf naluwi naham, otamba maofam alim. Anom mowala laꞋafena mandelef wandafumi mataga malomam maofenia wit, eaꞋ ina malo andeandeꞋ mail mola gwaꞋaimi, owaꞋ. EaꞋ anom mowa mafeꞋ etap buꞋunai, eaꞋ mataga malo mail mola gwaꞋaimi. Anom mola 30-peleim, anom 60-peleim eaꞋ anom mola 100-peleim.”

EaꞋ Jisas naꞋipas naꞋi, “IpeꞋ aligah magalipei pemeꞋ basef amama andeandeꞋ ukup mopomam.”

Jisas naꞋi basef womun etin

(Mt 13:10-17; Lu 8:9-10)

10 Jisas atona nape, alupumi 12-peleim ananimi maloma enis sape salomanai safiꞋi sahaliꞋana ma basef amama womun etin. 11 EaꞋ nagwamama basef naꞋi, “God nihiꞋambepa basef ofagema mape mandambahiꞋi ma epes siowis wambota Ananinai numafias. DeiꞋ God nihiꞋambepa basef amama ofagema alihim. IpeꞋ pameꞋam pegawam eaꞋ. Esis isima sololama Godi owaꞋ. Esis sameꞋ basef womun etin. 12 Ama anom basef mape Baibeli mandawalap maꞋiam maꞋi,

‘Esis nimeguf hiami sotologon, eaꞋ ina sati anom amamaga, owaꞋ. EaꞋ esis someꞋ basef aligah asasimi, eaꞋ ina sogawa ofagema, owaꞋ. IꞋi sogawam ofagema, esis somboma opalef ma aeꞋ ekwaha waf aonai esis sandaꞋanai. OwaꞋetin.’ ”

Jisas nawalapa basef ofagema ma aman nowaha olelemb

(Mt 13:18-23; Lu 8:11-15)

13 EaꞋ Jisas nahaliꞋ esis naꞋi, “IpeꞋ owaꞋ pegawa basef amama womun etin deiꞋ apipami? EaꞋ nambimb ipeꞋ pegawa basef womun etin hiꞋilam piꞋimama? OwaꞋetin. 14 DeiꞋ aman anama nowaha olelemb, anan siꞋi anona naꞋipasa basef Godi. 15 Olelemb mowa eafi amama siꞋi epes sameꞋ basef amama, eaꞋ Satan nagi basef amama God naseꞋasam mape opalef asasimi nakwahom nafeꞋ. 16 EaꞋ anom mowa mafeꞋ anagon otambaiguma, amama siꞋi enis epes sameꞋ basef Godi sofaꞋam mehip sandanifelamam. 17 Epes isima siꞋi masilimb ina malo mowala etap owin. Esis sembaleꞋef nogota bandana etin eaꞋ, nambimb nimanimi matagamas enis amam nematawa sandaiwaꞋma sembaleꞋam basef Godi sandaꞋas findiwas sahas, sandaꞋmasa waf aonai eaꞋ satanima safeꞋ. 18 EaꞋ anom mowala mandelef wandafumi laꞋafen, amama siꞋi enis epes sameꞋ basef Godi sailam safeꞋ, 19 eaꞋ amamaga hiami nimanimi maloma amamaga hiami esis satolom kowalasami basoꞋmaimi maloma moni wiga maima esis saꞋi sofaꞋami hiami mape etapi, amama mataga maofenia basef Godi. EaꞋ ina sombaleꞋef sandaꞋ waf buꞋunai laꞋifis, owaꞋ. Sowa siꞋi gwaꞋaimi owaꞋ molo andeandeꞋ. 20 EaꞋ anom mowa etap buꞋunai siꞋi epes isima sameꞋ basef buꞋwami sembaleꞋam sandaꞋ waf buꞋunai. Enis siꞋi mola gwaꞋaimi 30-peleim, enis siꞋi mola 60-peleim, eaꞋ enis siꞋi mola 100-peleim.”

Enis sambahoꞋ lamifah maꞋoh owina baket

(Lu 8:16-18)

21 EaꞋ Jisas naꞋipas basef womun etin naꞋi, “AꞋi epes sakata lamifah sopaloꞋam maꞋoh owina balatagw o sopaloꞋam mandambahoꞋ maꞋoh baket? OwaꞋ. Esis sawamonam balatagw ilif. 22 Amamaga hiami mandambahiꞋi, anona nemaf motaga alihim epes hiesi sotolom sogawam. EaꞋ amamaga hiami ataꞋ sambahoꞋam mapani, anona nemaf motaga mondawalap, epes hiesi sogawam. 23 IpeꞋ aligah magalipei pameꞋ basef, pemeꞋam andeandeꞋ.” 24 EaꞋ naꞋipam wapotiꞋ naꞋi, “Basef ipeꞋ pameꞋami, amama pegawam andeandeꞋ. Maim basef maloma maina waf ipeꞋ pandaꞋmasam enis epes, ikwaf anama atona anona nemaf God nogwamepana ipeꞋ, eaꞋ nowatanimipa anom wapotiꞋ. 25 Emi egafis sembaleꞋefa basef Godi, nambimb God nowatanimasam wapotiꞋ. Isima owaꞋ sembaleꞋami, nambimb basef kwawieꞋim amama esis sembaleꞋami, God nondalombasam esis eaꞋ sopan etin.”

Basef womun etina aman nowaha olelemb

26 EaꞋ Jisas naꞋipas basef womun etin naꞋi, “Epes siowis wambota Godi numafias, siꞋi anom basef womun etin deiꞋ aeꞋ aꞋipipami. Anona aman nowaha olelemb gwaꞋaimi aof ananinai. 27 EaꞋ nafiꞋi nape wambel naꞋoh owambeh hiami nape nimeguf hiami mafeꞋ eaꞋ olelemb amama nawami mataga malo luꞋum maꞋimama? Anan ina nogawa mataga maꞋimama, owaꞋ. 28 Etap atona nandaꞋ olelemb amama mataga malo mola gwaꞋaimi buꞋwami mail. Soh atom maliꞋ, eaꞋ afis mataga eaꞋ gwaꞋaimi mandandaꞋ luꞋum mail. 29 EaꞋ matagama luꞋum akom andeandeꞋ eaꞋ maof. Nemaf anama salaꞋ gwaꞋaimianai nataga, aman anama nandaꞋ maol naloma nogwatop.”

Basef womun etina nalelef mastetim

(Mt 13:31-32; Lu 13:18-19)

30 EaꞋ Jisas naꞋiam wapotiꞋ naꞋi, “Epes siowis wambota Godi numafias naꞋama etin siꞋi main? AeꞋ indilaꞋwifam siꞋi maim basef wamon etin? 31 Nalelef mastetim soꞋusoꞋumi. Ina luꞋum siꞋi suꞋutip gwaꞋaimi lawah hiami mawam etapi, owaꞋ. Nalelef soꞋusoꞋum endilisi. Anona aman nawam etap 32 eaꞋ mataga malo luꞋum mikilaꞋ gwaꞋaimi hiami mape aofi. Amam mataga siꞋi lawag luꞋunai, agof mandalana mafeꞋagon ganigani. EaꞋ amiguf mafiꞋi mala alagah mandambahoꞋma owaf mail agof.”

Jisas naꞋi basef hiami womun etin

(Mt 13:34-35)

33 EaꞋ Jisas naꞋipas basef womun etin siꞋi naliꞋ naꞋipasami. NaꞋipas nendalaꞋwifa amamaga hiami nagiꞋma gawa asasinai nafeꞋ netambel. 34 Anan ina naꞋipasa anom basef alihima esis, owaꞋ. NaꞋiam womun etin. EaꞋ nambimb alupumi ananimi atom malomana mape, naꞋipam alihima ofagema basef womunaimi.

Jisas ninifala embel maloma uf fasoꞋmam mapan

(Mt 8:23-27; Lu 8:22-25)

35 Nemaf anama atona, wambomota felefeleꞋma owamb, Jisas naꞋipa alupumi ananimi naꞋi, “AfaꞋ ofeꞋ anama walemb luꞋunai batupaꞋmanai anama gani fisana.”

36 EaꞋ amam makwaha esis amam nematawa hiesi mafeꞋ bot anama Jisas natumanai mofaꞋana mafeꞋ. Enis epes sofaꞋ anom bogw maloma bot anama mafeꞋ. 37 EaꞋ anona uf luꞋunai naluwi, naoh mandaꞋam fepoh, mafeꞋ mawis bot nomon eaꞋ naꞋi siꞋinama embel. 38 EaꞋ Jisas naꞋoh nalola bot nagiꞋma nola kombotoꞋw naꞋoh.

EaꞋ amam mafeꞋ minimbalona maꞋipana maꞋi, “Tisa dembinai, afaꞋ waꞋi aꞋ owala. IneꞋ negawafa, owaꞋ?”
39 EaꞋ Jisas nohafel ninifala uf naꞋipa embel naoh naꞋi, “Uf neloma embel ipeꞋ petah.” EaꞋ uf fasoꞋmana, embel ina ataꞋ mandaꞋ fepo. Tol motah.

40 EaꞋ naꞋipa alupumi ananimi naꞋi, ꞋIpeꞋ umbamahepa ma main? IpeꞋ pembaloꞋa basef Godi paꞋi AeꞋ laꞋifiwei, owaꞋ?

41 EaꞋ amam mati naꞋama, umbamaham kwapeteꞋam endilisi, eaꞋ mandaꞋipama maꞋi, “Anan emi egafuna? NaꞋipa uf naloma embel mameꞋana mowala.”

Copyright information for `AOJFILIFITA