b- Mt 9:34Mt 12:24Mk 3:22Lu 11:15
c- Mt 9:35Mt 4:23Mk 1:39
d- Mt 9:36Mt 14:14Nam 27:171 Kin 22:17Esi 34:5
e- Mt 9:37Sek 10:2Mk 6:34Lu 10:2
f- Mt 10:1Mk 6:7Lu 9:1
h- Mt 10:26Mk 4:22Lu 8:17
j- Mt 10:31Mt 6:26, 12:12
k- Mt 10:33Mk 8:38Lu 9:262 Ti 2:12

Matthew 10

Amam Aposel 12-peleim Jisasi agof amamumi amama

(Mk 3:13-19; Lu 6:12-16)

EaꞋ Jisas nofalai alupumi 12-peleim ananimi mafiꞋmai anan naseꞋam agof luꞋwami nandaꞋam mataga laꞋifima meatofa ambagof awami eaꞋ mondaꞋ hiesi awes hianai naninani nandaꞋasi sataga boꞋwes.

Amam amama Aposel 12-peleim Jisasi, agof amamumi amama. NaliꞋi Saimon agel waꞋana Pita, owalomana ananinai Andru. EaꞋ Jems Sebedi nogalomana naloma owalomana Jon, eaꞋ Filip naloma Bartolomyu, Tomas naloma aeꞋ Matyu andaꞋ basef amaeꞋ efaꞋasa takis. EaꞋ Jems Alfius nogalomana, Tadius, eaꞋ Saimon anan epes hiesi Seloti.
Amam Selot anona wambota sandaiwaꞋma esis Rom sumafi esis Juda. Anom nimeguf amam Selot mapaꞋ maloma esis Rom.
EaꞋ aman anama Judas nawalapa Jisasa amam naumbih ananimi. b, c, d, e, f 

Jisas naseꞋama maol Aposel ananimi 12-peleim

(Mk 6:7-13; Lu 9:1-5)

Jisas nasapaꞋ amam amama 12-peleim mafeꞋ, naseꞋama basef amam naꞋi, “IpeꞋ ina pefeꞋma epes isima owaꞋ sogawa Godi, owaꞋ. EaꞋ ina pefeꞋ piwis anona wambel etap esis Samariainai, owaꞋ. IpeꞋ pefeꞋ ma esis epes hiesi Israel etisi sape siꞋi sipsip higilalam. PefeꞋ pewalapa basef naꞋama piꞋi, ‘Nemaf buꞋunai nafiꞋi felefeleꞋ eaꞋ ma ipeꞋ piowis kingdom heveni.’ IpeꞋ pendaꞋ awesisi boꞋwes pefala sagaꞋi sope namis wapotiꞋ, pendaꞋ isima awes aonai nandaꞋ alop asasinai nambuꞋwi sotaga boꞋwes. EaꞋ petofa ambagof awami mapeisi. Pepel Godi ipeꞋ pefaꞋanai, anama ipeꞋ pefaꞋana etin, ina patalana otamba, owaꞋ. EaꞋ naꞋama etin ipeꞋ peseꞋasana etin esis ina sotaloma ipeꞋ, owaꞋetin.

IpeꞋ ina peloꞋ otamba gol silva moloma kapa poket isalef ipeꞋimi, owaꞋ. 10 IpeꞋ ina pefaꞋ roksak o siaogw biam atom, o su moloma bandefah pandaheꞋamon pafiꞋiami, owaꞋ. DeiꞋ main, epes sandaꞋ maoli, andeandeꞋma sofaꞋ gwaꞋaimi asasimi.

11 IꞋi ipeꞋ pefeꞋ piowis anona wambel, ataꞋ petologon pegawagon andeandeꞋ. Aman wambel anamainai emi egafuna buꞋunai nieꞋi awima ipeꞋ, pepe peloma anan atona pefeꞋ ma nemaf anama pekwaha wambel anama pefeꞋ.

12 Nemaf anama ipeꞋ pefeꞋ piowis anona ipat, piꞋipa esis amam nematawa sape ipat anama piꞋi, ‘IpeꞋ pepe opalef awanem.’ 13 IꞋi enis sape ipat anama buꞋwasi sendaꞋmepa waf sieꞋi aꞋe ma ipeꞋ, nambimb basef ipeꞋimi opalef awanemami mopomas. IꞋi owaꞋ, hapaimi, basef amama buꞋwami motanimani mopomepa laꞋelaꞋef. 14 IꞋi enin epen nendaiwaꞋma neaseꞋepa opafa nefaꞋepa pefeꞋ piowis ipat ananinai ma nindaiwaꞋ ma neameꞋ basef ipeꞋimi, pehafel pekwaha ipat anama o taun anama eaꞋ pindilamam nombol sopof mail boꞋwagah ipeꞋimi, ma sitilipa sogawa waf aonai asasinai ofagena asasinai atona.

15 AeꞋ aꞋipipa endilisi, nemaf anama luꞋunai anona nemaf God nowaloga epesanai, niti esis fowaꞋ gani sape Sodom Gomora uwahipis andeandeꞋ. EaꞋ epes isima wambel anamaisi ina niti uwahipis, owaꞋ. Nimanimi awami endilisi anona nemaf motagamas.”

Jisas naꞋipasa nimanimi nambimb meataga

16 EaꞋ Jisas naꞋipam wapotiꞋ naꞋi, “IpeꞋ pemeꞋ, aeꞋ esapaꞋepa pefeꞋ siꞋi sipsip pefeꞋ laꞋafena nombagw wandafumi aolupumi. NaꞋama ipeꞋ ukup mondandaꞋ andeandeꞋ pefeꞋ pila gawa siꞋi iguf mafeꞋ. EaꞋ pila waf buꞋunai siꞋi anona amil maꞋunai, ipeꞋ ina ukup mope aoma pendaꞋ waf aonai, owaꞋ. 17 IpeꞋ pindumafuma andeandeꞋma anom amam. Anona nemaf sondaꞋ kotimipa ma amam dambami Juda eaꞋ sehepa nomon ifagw esis Juda saꞋi basef sapeimi. 18 Amam mogawa ipeꞋ pandaꞋ maol aeꞋanai eaꞋ mondaiwaꞋmepa, eaꞋ mofaꞋepa pefeꞋ pitu naep kinga gavman dambami ma peawalapa basef aeꞋami buꞋwami ma amam moloma esis amam nematawa ina sogawa Godi piꞋipasam. 19 Nemaf anama esis sowalapepa ma basef, ipeꞋ ina umbamehepa piꞋi, ‘Nambimb apeꞋ mogwa basef miꞋiam miꞋimama?’ OwaꞋ. Nogota anama atona God nihiꞋambepa maim basef ipeꞋ pewalapam piꞋiam. 20 Amama ina ipeꞋ etipa piꞋiam, owaꞋ. Ambal BuꞋunai Ahalomepa Godi atona nowalapa basefa malogof ipeꞋimi.

21 Nemaf anama esis hiesi sahin owan sondaꞋ basefa enis sohas sogaꞋ. EaꞋ ahapas sondaꞋam naꞋama etina esis nogamas batawiamas asasisi. EaꞋ nogamas batawisas wapotiꞋ sondaꞋ masa basefa mamasas asasisi enis sohas sogaꞋ. 22 Anona nemaf epes hiesi wambel hiagoma siti ipeꞋ pila basef aeꞋami, eaꞋ opalef aoma ipeꞋ endilisi. EaꞋ emi egafis sembaleꞋefa AeꞋ laꞋifis situma seatagama nemaf akutainai, anona nemaf God nefaꞋas sotanimani. 23 IꞋi esis sape anona taun sondaꞋ waf aonaima ipeꞋ, pefaꞋ pefeꞋ anona wambel. AeꞋ aꞋipipa endilisi, aeꞋ ataga epen endillisiwei. IpeꞋ ina pefeꞋ pembefa maol aeꞋanai wambel anama Israeli hiagoma, ataꞋ owaꞋ, ipeꞋ piti aeꞋ iefiꞋi.

24 Epes sandaꞋ skul etin ina sape dambes sikilaꞋ tisa asasinai, owaꞋ. EaꞋ epen inima agel aꞋan nandaꞋ maol etini enin ina nape ilifa dembinai ananinai, owaꞋ. 25 IꞋi esis sandaꞋ skuli sope naꞋama etin siꞋi tisa asasinai, esis ukup miꞋi andeandeꞋ. EaꞋ iꞋi enin epen agel aꞋan nandaꞋ maol etini nepe siꞋi dembinai ananinai, isima wapotiꞋ andeandeꞋ. AeꞋ Dembiwei Ahalomepa ma wambota aeꞋanai esis saꞋi basef awami ma agel aeꞋanai saꞋi aeꞋ Belsebul.
Belsebul anona god esis Kenan saꞋi anan dembinai ma god basoꞋamunai hianai. EaꞋ amam Juda mandaiwaꞋma Jisas maseꞋana agel anama. EaꞋ mofalana maꞋi anan aman aonai Satan wapotiꞋ. Niti Matyu 12:24.
NaꞋama anona nemaf esis siꞋipipa sondaꞋmepa agof awami endilisi mikilaꞋ agel Belsebul sandaꞋmeana aeꞋ. h, i, j, k 

Epes umbamohasa God atona

(Lu 12:2-7)

26 NaꞋama ipeꞋ ina umbamehepa ma amam, owaꞋ. Amamaga hiami mape mandambahiꞋi anona nemaf motaga alihim hiesi sotolom sogawam. EaꞋ amamaga hiami ataꞋ sambahoꞋam mapani anona nemaf motaga mondawalap, hiesi sogawam. 27 Basef amaeꞋ ambaheꞋam owamb aꞋipa ipeꞋ etipami, amama pewalapam piꞋiam alip. EaꞋ basef pameꞋam saꞋiam soꞋusoꞋumbili, amama petoma ifagw ilif pewalapam piꞋiama amam nematawa someꞋam. 28 IpeꞋ ina umbamehepama esis soha alop atona neagaꞋi, eaꞋ anona nemaf esis ina laꞋifisa soha ambagof ipeꞋmi, owaꞋ. EaꞋ ipeꞋ umbamehepama aman anama laꞋifinai ma noha alop siꞋina noloma ambagof ipeꞋimi ma wambel aonai hel.

29 IpeꞋ pegawa epes satala amiguf saꞋumi biam ma moni owap waꞋanai atotona. EaꞋ Ahalomepa ipeꞋinai ina nati anona amil atotona nowai etin, owaꞋ. Numafiam andeandeꞋ. 30 EaꞋ neambam auf malo balagah ipeꞋimi dendeꞋ hiꞋalam. 31 NaꞋama ipeꞋ ina umbamehepa. Anan okom napoma ipeꞋ pikilaꞋ amiguf hiami amama.”

Waf apeꞋ mowalapa agel Jisasi alihina

(Lu 12:8-9)

32 EaꞋ Jisas naꞋipas naꞋi, “Emi egafis sowalapa agel aeꞋanai ma amam nematawa hiesi, anona nemaf aeꞋ wapotiꞋ ewalapa agof epes isima ma naep Ahalome Godi gani heven. 33 EaꞋ emi egafis sowaꞋ alafuga aeꞋ sindaiwaꞋme ma owaꞋ sowalape siꞋipas naep amam nematawai, naꞋama etin anona nemaf aeꞋ wapotiꞋ ewaꞋ alafugahas ma naep Ahalome Godi gani ilif heven.”

Jisas nafiꞋi ma nondaꞋ wandaf netaga ma apeꞋ

(Lu 12:51-53, 14:26-27)

34 EaꞋ Jisas naꞋi anom basef wapotiꞋ naꞋi, “IpeꞋ ina piꞋi aeꞋ afiꞋi etap anaeꞋ ma eakolasa ipeꞋ peape opalef awanem, owaꞋ. AeꞋ efaꞋi bainat hiꞋelinai afiꞋi ma nambimb enis epes sohafel sepaꞋ sealoma enis. 35 AeꞋ afiꞋi ma endaꞋ waf anama lopaꞋ fitapanai neataga, siꞋi basef maꞋiam maꞋi,

‘Anona nemaf anona aman noloma ahalomana ananinai mondawaloga biefim, eaꞋ anoꞋw nemataꞋw koloma mamaꞋwakw ondawaloga biefiwa, eaꞋ mefiꞋmaꞋw akwoꞋukwi koloma maꞋmakw kwandagiꞋmokwi ondawaloga biefiwa.
36 EaꞋ esis sape ipat atotona nambimb esis wambota aman anama sondawaloga seataga naumbih.’
37 Emi egafis ukup maimaila ahapas mamasas asasisi etis ma owaꞋ ukup mimila aeꞋ, epes isima ina setaga alupisi aeꞋasi endilisi, owaꞋ. EaꞋ emi egafis ukup asasimi mohafel mimila awasi asasisi, ma owaꞋ ukup mimila aeꞋ, isima ina setaga alupisi aeꞋsi, owaꞋ. 38 AeꞋ efaꞋ nimanimi awami andaꞋ maol Godi sehe egaꞋ lawag usiꞋinai tuꞋwanainai. Emi egafis owaꞋ sendaꞋam naꞋama etin siꞋi aeꞋ ma sieli, epes isima ina laꞋifis setaga alupisi aeꞋasi, owaꞋ. 39 Emi egafis ukup mopoma ambagof asasimi atom siꞋi sihapilam tatalaꞋim sigiambama ambagof asasimi, anona nemaf ambagof asasimi higililam. EaꞋ emi egafis ukup mopoma aeꞋ ma sesambala ambagof asasimi etap anaeꞋ, anona nemaf God nofaꞋ ambagof asasimi sotanimani sope andeandeꞋ laꞋelaꞋef hihif.

Jisas naꞋipa epes ananisi ma anona nemaf seafaꞋ amamaga buꞋwami

(Mk 9:41)

40 Emi egafis seseꞋepa opalefa sieꞋi ipeꞋ aeꞋipai, esis saseꞋe opalef aeꞋ wapotiꞋ. EaꞋ emi egafis saseꞋe opalefa aeꞋ, esis saseꞋana opalef God nasapaꞋe afiꞋi. 41 EaꞋ emi egafis sieti anona aman profeta sieꞋi, ‘Aman anama profet nandaꞋ maol Godi. ApeꞋ moseꞋana opalef migiambamana,’ epes isima anona nemaf sefaꞋ amamaga buꞋwami siꞋi profet anama nefaꞋami. EaꞋ emi egafis sieti anona aman buꞋunai nifiꞋi ma esis sieꞋi, ‘ApeꞋ maꞋi anan aman buꞋunai. EaꞋ migiambamana meseꞋana opalef.’ Epes isima anona nemaf sefaꞋ amamaga buꞋwami siꞋi aman anama buꞋunai neafaꞋami. 42 IꞋi emi egafis sieti enis epes falafisi wafisi o agufisi ma esis sietilis ukup mimila epes isima Jisasi sigiambamas seseꞋasa embel maim, aeꞋ aꞋipipa endilisi, anona nemaf epes isima sefaꞋ amamaga asasimi buꞋwami ina higililam, owaꞋ.”

Copyright information for `AOJFILIFITA