Matthew 14

Amam matopaꞋ bagatoꞋw ma Jon, aman anama napisiꞋas embeli afuna

(Mk 6:14-29; Lu 3:19-20, 9:7-9)

Nemaf anama anona aman agilinama Herot nape dembinai gavmana etap hiagoma Galili. Anan nameꞋ basefa maol buꞋunai Jisas nandaꞋanai, eaꞋ nameꞋ safela agel Jisasi nafeꞋ luꞋuna. EaꞋ Herot naꞋipa isima sandaꞋmana maol naꞋi, “Aman anama Jon napisiꞋas embeli deiꞋ nohafel wapotiꞋ nape laꞋifina nandaꞋ maol siꞋi God nandaꞋanai.”

FowaꞋ basef amama mape naꞋama. Herot owalomana Filip wauluꞋmana ananiꞋwi agiliꞋwa Herodias. EaꞋ sahalomana Herot nandalombanaꞋw. EaꞋ Jon naꞋipa Herot naꞋi, “IneꞋ nasoꞋ nemataꞋw sahalomenai, eaꞋ nawala miꞋuli Godi. NaꞋama ina andeandeꞋ, owaꞋ.”

EaꞋ Herot nandaiwaꞋma nealiꞋamonaꞋw eaꞋ naꞋipa amam soldia mombaloꞋ Jon mofaꞋana mafeꞋ mandaꞋana nandaꞋ kalabus.
Herot naꞋi nohana nogaꞋ, eaꞋ owaꞋetin. DeiꞋ main, anan umbamahanama amam nematawa hiesi saꞋi Jon anona profet. NaꞋama Herot ina nahana, owaꞋ. NafeꞋ ma anona nemaf Herot nofala epes hiesi safiꞋi sandakolas etifigin nandanifela ma nemaf mamaꞋwana kolanai. Nemaf anama Herodias nogamaꞋw kwafiꞋi kwawisi nomon kwaitu kwalemb. Esis hiesi satoloꞋw eaꞋ Herot nandanifela ma akwaꞋw naꞋi basef laꞋifimi endilisi gani ilif naꞋiam naꞋi, “Endilisi aeꞋ aꞋipina, iꞋi ineꞋ niꞋipa aeꞋ ma easeꞋena anom amamaga aeꞋ, eseꞋenam.”

EaꞋ akwaꞋw kwafeꞋma mamaꞋwakw kwahaliꞋakw kwafeꞋ kwaꞋipa Herot kwaꞋi, “DeiꞋ etef aeꞋ aꞋi ineꞋ neha aman anama Jon napisiꞋas embeli neagaꞋ netopaꞋ balaga nola anona plet nefaꞋanai neseꞋeana.”

AkwaꞋw kwaꞋiam naꞋama, opaf Heroti nimanina endilisi. EaꞋ anan okom naꞋi basef endilisi gani ilif naꞋiam laꞋifimi, eaꞋ amam nematawa hiesi isima sameꞋana. EaꞋ nasapaꞋ anona aman soldia nafeꞋ ipat kalabusanai natopaꞋ bagatoꞋw Joni nala balaga nala anona plet nafiꞋi nasoꞋ Herodias nogamaꞋw kofaꞋana kwafeꞋ kwasoꞋ mamaꞋwakw. 12 EaꞋ amam alupumi Joni mafiꞋi mofaꞋ alop siꞋina mafeꞋ mawana hiꞋagif. EaꞋ mafeꞋ maꞋipa Jisasa amamaga amama.

Jisas naseꞋasa gwaꞋaimi amam nematawa hiesi 5,000-peleis

(Mk 6:31-44; Lu 9:10-17; Jo 6:1-13)

13 Jisas nameꞋ basef amama, anan atona nafeꞋ nakwaha wambel anama nofaꞋ bot nafeꞋ anagon wafiguma epes aꞋagoma. EaꞋ amam nematawa hiesi sameꞋ basefa Jisas nafeꞋ, sakwaha wambel hiagoma asasima sailana safeꞋ eaf saꞋi sotolona. 14 Jisas nafeꞋ nataga akata nati esis hiesi nati uwahipis. EaꞋ nati epes asasisi awes nandaꞋasi nandaꞋas sataga boꞋwes wapotiꞋ.

15 Wambomota felefeleꞋma owamb alupumi ananimi mafiꞋi maꞋipana maꞋi, “AfaꞋ wape naꞋae wafiguma eaꞋ wambomota felefeleꞋma owamb. IneꞋ nesapaꞋas sofoꞋo wambel asasima setala gwaꞋaimi sondaꞋam seaꞋam.”

16 EaꞋ Jisas nagwamam naꞋipam naꞋi, “AeꞋ ina esapaꞋas sefeꞋ, owaꞋ. IpeꞋ etipa peseꞋas gwaꞋaimi.”

17 EaꞋ amam maꞋipana maꞋi, “AfaꞋ gwaꞋaimi ina hiam. Bret lagel waꞋana atona naloma agof biam eaꞋ maꞋum maꞋomafa.”

18 EaꞋ naꞋipam naꞋi, “IpeꞋ faꞋam fiꞋi peseꞋ aeꞋ.”

19 EaꞋ naꞋipa amam nematawa hiesi sape otalef buꞋwami etap. EaꞋ nafela bret anama lagel waꞋana atona naloma agof naniga nati heven ilif nanifela God eaꞋ nawalam nasoꞋ alupumi ananimi mafeꞋ maseꞋas saꞋam dendeꞋ alihis andeandeꞋ. EaꞋ alupumi ananimi matatama tuꞋwaꞋwanimi maꞋihi maloꞋwam holalef luꞋwami 12-peleim siꞋim endilisi. 21 Epes saꞋ gwaꞋaimi amama hiesi. Esis seamba amam atom mataga 5,000-peleim. EaꞋ ina seamba awasi nematawa, owaꞋ.

Jisas natoma nafeꞋ embel ilif walemb batupaꞋmanai luꞋunai

(Mk 6:45-52; Jo 6:15-21)

22 EaꞋ Jisas nasapaꞋ alupumi ananimi mofaꞋ bot maliꞋ mafeꞋ walemb batupaꞋmanai luꞋunai anama mambo fisana. EaꞋ nasapaꞋ amam nematawa isima hiesi safeꞋ. 23 SafeꞋma eaꞋ, anan atona nandowasaꞋ halaf nape nandaꞋ beten nahaliꞋ God.

Wambomota felefeleꞋma owamb, anan atona ataꞋ napani halaf ilif.
24 EaꞋ alupumi ananimi mape bot maliꞋ mafeꞋ mape walemb batupaꞋmanai luꞋunai laꞋafen, eaꞋ uf luꞋunai naluwi. EaꞋ naoh fepo mafiꞋi makwasa bot. EaꞋ uf wapotiꞋ nalo nakotoꞋma bot, nandaꞋam bumu boma nala.

25 Owamb ataꞋ nail etin, felefeleꞋma lala, Jisas nailam natoma nafeꞋ embel ilif nafeꞋma amam. 26 Amam mati anan naitu nafiꞋi embel ilif, umbamaham kwapeteꞋ maꞋi, anona gamba nailam nafeꞋ. EaꞋ mandaꞋam wigeꞋ maꞋoh kwapeteꞋam. 27 EaꞋ Jisas nalomam naꞋi mehip naꞋi, “IpeꞋ laꞋifipa umbamehepa owaꞋ. AeꞋ atowe maꞋuwi ailipa afiꞋi.”

28 EaꞋ Pita nagwamana naꞋipana naꞋi, “Dembinai! IꞋi ineꞋ maꞋwina, niꞋipa aeꞋ itu efeꞋmago ineꞋ embel ilif.”

29 EaꞋ Jisas naꞋipana naꞋi, “IneꞋ fiꞋi.”

EaꞋ Pita nakwaha bot natoma nafeꞋ embel ilif nafeꞋma Jisas.
30 EaꞋ anan nati naoh mohafel luꞋum, umbamahana naꞋi nowala naoh. EaꞋ nofala Jisas naꞋi, “Dembinai! Nigiambame.”

31 EaꞋ mehip etin Jisas nowasaꞋ lagel nahapilana naꞋipana naꞋi, “IneꞋ owaꞋ nembaleꞋef laꞋifina niꞋi aeꞋ laꞋifiwei, owaꞋ. DeiꞋ maina ineꞋ nomonas mape biefim?”

32 EaꞋ amam biam malata bot, uf naloma embel mandahagas. 33 EaꞋ amam mape boti mati amamaga amama mandaꞋ lotuma Jisas mafela agel Godi luꞋuna maꞋi, “Endilisi etis, ineꞋ nogalomana Godi.”

Jisas nandaꞋ amam nematawa hiesi awesisi anagon etap hiagoma Genesaret amboꞋwes

(Mk 6:53-56)

34 EaꞋ Jisas naloma alupumi ananimi mowala mambo walemb batupaꞋmanai anama mafeꞋ mataga anagon etap hiagoma Genesaret. 35 EaꞋ enis epes sape etap anama sagawana saꞋi anama Jisas. EaꞋ sasapaꞋ enis safeꞋ saꞋipa enis sape felefeleꞋi hiagoma sofaꞋai enis epes awes nandaꞋasi safiꞋmai anan. 36 EaꞋ sofaꞋai isima awes nandaꞋasi saꞋipana saisailana saꞋi anan niꞋi aꞋe ma isima sohapila lowaf ananinai daꞋmalifina atona. EaꞋ emi egafis sahapila lowaf ananinai sataga boꞋwes wapotiꞋ.

Copyright information for `AOJFILIFITA