b- Mt 15:2Lu 11:38
c- Mt 15:4Eks 20:12Eks 21:17Diu 5:16
d- Mt 15:7Ais 29:13
e- Mt 15:11Mt 12:34
h- Mt 15:28Mt 8:10,13
j- Mt 15:32Mt 14:14

Matthew 15

MiꞋuli Godi nikilaꞋ basef bafas akwis

(Mk 7:1-13)

Nemaf anama anom Farisi esis Judai maloma anom amam mawalipasa miꞋuli Godi makwaha Jerusalem mafiꞋmai Jisas. EaꞋ mahaliꞋana maꞋi, “DeiꞋ maina alupumi ineꞋimi mumbisilaꞋ waf apeꞋinai akupapa maseꞋapenai? Ama amam owaꞋ measaꞋopa lagofa
Amam Farisi maꞋi esis owaꞋ Judaisi waf asasinai aona. EaꞋ maꞋi emi egafis safeꞋ anagon eaf o maket, ma sitanima siefiꞋi ifagw, ataꞋ siliꞋ sosaꞋopa lagof eaꞋ seaꞋ gwaꞋaimi. OwaꞋ seasaꞋopa lagof, amam maꞋi lagof asasimi alugum.
meaꞋ gwaꞋaimi.” b, c, d, e 

EaꞋ Jisas nagwamama basef naꞋi, “DeiꞋ maina ipeꞋ pawala miꞋuli Godi ma paila waf ipeꞋinai atona? IpeꞋ pawala basef God naꞋiam naꞋi, ‘IpeꞋ pinifela mamasepa ipeꞋisi pembaleꞋefas pigiambamas. Emi egafis siꞋi basef awami ma ahapas mamasas asasisi, isima enis epes sohas sogaꞋ.’ EaꞋ ipeꞋ pambasoꞋam paꞋi anom basef naꞋama paꞋi, Emi epen nindaiwaꞋma nigiambama mamasan niꞋipas niꞋi, ‘Otamba maim aeꞋami andaiwaꞋma eseꞋepam. AeꞋ andandepama eseꞋanam God.’ EaꞋ ipeꞋ Farisi paloma ipeꞋ enipa pawalipasa miꞋuli Godi, ipeꞋ paꞋi aꞋe ma epen inima nembasoꞋma mamasan, eaꞋ ina nagiambamas.

IpeꞋ pandaꞋ waf anama pesambala basef amama Godi naꞋi migiambama mamasapa. EaꞋ pandaꞋ waf ipeꞋinai atona luꞋuna.
FowaꞋ profet Aisaia nendelaꞋwifa ipeꞋ endilisi, ipeꞋ paꞋi basefa malogof biam. Anan nandaꞋam andeandeꞋ dendeꞋma ipeꞋ naꞋiam naꞋama naꞋi,

‘Amam nematawa isima safela agel aeꞋanai luꞋuna malogof asasimi atom andeꞋ, eaꞋ opalef asasimi mape laogona aeꞋ. Ukup asasimi ina sembaleꞋefa aeꞋ, owaꞋ.
Esis ina sawalipasa basef aeꞋami. Esis sawalapa miꞋuli epes sape etapi sambasoꞋmas saꞋi, “MiꞋuli anama basef Godi.” EaꞋ sandaꞋ lotu safela agel aeꞋanai atona.’ ”

Amamaga awami mandaꞋ epes sandaꞋ waf aonai

(Mk 7:14-23)

10 EaꞋ Jisas nofala esis amam nematawa hiesi safiꞋmai anan naꞋipas naꞋi, “IpeꞋ hipei pemeꞋ basef AeꞋami okokomam pegawam andeandeꞋ. 11 Amamaga gwaꞋaimi maim andeꞋami ipeꞋ pegwaꞋam mowala nomon, amama ina mandaꞋepa awepa, owaꞋ. EaꞋ amamaga mape ukup ipeꞋimi nomon mawisi andeꞋ, amama atom mandaꞋepa awepa.”

12 EaꞋ alupumi ananimi 12-peleim mafiꞋmai anan maꞋipana maꞋi, “IneꞋ negawa amam Farisi mameꞋ basef amama ineꞋimi mandaiwaꞋmam opalef aoma ineꞋ?”

13 EaꞋ nagwa basef womun etina amam naꞋipam naꞋi, “Ahalome aeꞋanai nape heveni nawa amamaga anona aof. EaꞋ amamaga hiami anan owaꞋ neawami, amama anona nemaf nigiam moloma nombalef masilimb. 14 IpeꞋ kwahowa amam Farisi ataꞋ mopan. Amam siꞋi amam naep maseꞋami maꞋi mihiꞋamba eafa enis epes. IꞋi esis naep maseꞋasi siꞋi sihiꞋamba eaf enis epes isima naep maseꞋasi, atuwasi esis hiesi sondakolas dogwas sefeꞋ sowala etin kwambiwag.”

15 EaꞋ Pita nagwamana basef naꞋipa Jisas naꞋi, “IneꞋ niꞋi basef amama ofagema womun etina amamaga awami ma afaꞋ ataꞋ weameꞋam.”

16 EaꞋ Jisas naꞋipam naꞋi, “IpeꞋ wapotiꞋ nomonas ataꞋ aꞋepa? 17 IpeꞋ owaꞋ ataꞋ pegawa! Amamaga andeꞋami mawis malogofa mowala opalef, amama motanima mawisi andeꞋ mafeꞋ mowala dowah. 18 EaꞋ amamaga mape ipeꞋ nomon, ukup awami maim mataga andeꞋ, amama atom mandaꞋepa awepa. 19 Amamaga awami mape ukup nomon mawisi andeꞋ amama. Ukup awami, waf soha enis seagaꞋ, waf sandaꞋ soꞋa waulanai, eaꞋ sondaꞋ anona waf aonai siꞋi waf anama soꞋa waulanai, wal, basoꞋam, findiwa. 20 Waf anama atona nawisi andeꞋ nandaꞋ epes awes. EaꞋ epes owaꞋ seasaꞋopa lagof andeandeꞋma seaꞋ gwaꞋaimi siꞋi amam Farisi maꞋiam, amama ina mandaꞋas awes, owaꞋ.”

NemataꞋw KenaniꞋwi kombaleꞋefa Jisas endilisi

(Mk 7:24-30)

21 EaꞋ Jisas nakwaha wambel anama nafeꞋ gani waꞋol etap felefeleꞋma wambel anama biefina Tair Saidon. 22 EaꞋ anoꞋw nemataꞋw KenaniꞋwi kwafiꞋi kofalana naꞋama kwaꞋi, “O, Dembinai, ineꞋ akunamana Deviti, ineꞋ niti aeꞋ uwahipiwi. Ambal aonai nahambombaga nogame aeꞋakwi endilisi eaꞋ kofaꞋ nimanimi endilisi.”

23 EaꞋ Jisas ina nagwamaꞋwa anom basef akwaꞋw, owaꞋ. EaꞋ amam alupumi ananimi mafiꞋmai anan maꞋipana mehip maꞋi, “NemataꞋw akwama kwandaꞋam falafala kwagiꞋmafa. IneꞋ sapaꞋakw kotanima kofoꞋo!”

24 EaꞋ Jisas nagwa basef naꞋipaꞋw naꞋi, “God nasapaꞋ aeꞋ afiꞋi ma epes sape siꞋi sipsip higilalapi isima esis Israeli etis.”

25 EaꞋ akwaꞋw kwafiꞋi kwindiwa nembawa kotawa felefeleꞋma anan kwaꞋi, “Dembinai, ineꞋ nigiambama aeꞋ.”

26 EaꞋ nagwamaꞋwa basef naꞋi, “ApeꞋ ina mofaꞋ gwaꞋaimi awasi apeꞋisi makwahom mafeꞋma nombagw,
AkwaꞋw ina JudaiꞋwi. Esis Juda saꞋi epes owaꞋ Judaisi sandaꞋ waf aonai sofalas saꞋi nombagw. EaꞋ deiꞋ Jisas naꞋipakw basef amama ma nombagw.
owaꞋ.” g, h, i, j 

27 EaꞋ akwaꞋw kwagwamana basef anan kwaꞋi, “Dembinai, ineꞋ naꞋi endilisi. EaꞋ nombagw mafeꞋ owina tebol matatama gwaꞋaimi mowa etapi magwaꞋam.”

28 AkwaꞋw kwaꞋiam naꞋama, Jisas nagwamaꞋwa basef naꞋi, “O, nemataꞋw, baleꞋef ineꞋinai luꞋunai. DeiꞋ amamaga ina okom naꞋiami atuwasi meatagamena siꞋi ineꞋ naꞋiam.”

EaꞋ nogota anama atona nogamaꞋw akwaꞋukwi amboꞋokw wapotiꞋ.

Jisas nandaꞋ hiesi awes nandaꞋasi sataga boꞋwes

29 Jisas nakwaha wambel anama nafeꞋ felefeleꞋma walemb batupaꞋmanai Galili. EaꞋ nondowasaꞋ anona halaf tol nape. 30 EaꞋ esis amam nematawa hiesi safiꞋi satagamana sofaꞋai esis awes naninani nandaꞋasi safiꞋmai anan. Enis boꞋwagah awamisi, enis naep maseꞋasi, bihiguf mondolaꞋasi, enis malogof maseꞋasi, awes naninani nandaꞋasi. Esis sofaꞋas safiꞋi sambeꞋas saꞋoh felefeleꞋma boꞋwagah Jisasi eaꞋ nandaꞋas boꞋwes. 31 EaꞋ esis gegelalasisa sati epes isima naep maseꞋasi satologon, malogof maseꞋas saꞋi, bihiguf mondolaꞋasi eaꞋ usiꞋim, boꞋwagah awamisi eaꞋ boꞋom safeꞋ. EaꞋ deiꞋ esis hiesi safela agel God Israeli luꞋuna.

Jisas naseꞋasa gwaꞋaimi epes hiesi 4,000-peleis

(Mk 8:1-10)

32 EaꞋ Jisas nofalai alupumi ananimi mafiꞋi naꞋipam naꞋama naꞋi, “AeꞋ ati esis amam nematawa isima uwahipis. Esis sape salome nimeguf wanom gwaꞋaimi aꞋas nolomahas endilisi. IꞋi aeꞋ esapaꞋas sefeꞋ etin utagw wambel asasima, siti noga atona sowa soꞋoh sefeꞋ eaf.”

33 EaꞋ alupumi ananimi maꞋipana naꞋama maꞋi, “AnaeꞋ wafiguma epes aꞋagoma. Atuwasi afaꞋ ofaꞋai bret eti ma weasoꞋ amam nematawa isima hiesi?”

34 EaꞋ Jisas nahaliꞋam naꞋi, “DeiꞋ ipeꞋ bret maꞋum maꞋoh?”

EaꞋ amam maꞋi, “AfaꞋ bret 7-peleim maꞋomafa maloma agof saꞋumi kwasalaꞋum.”

35 EaꞋ Jisas naꞋipa esis amam nematawa sope etap, 36 nafela bret 7-peleim maloma agof amama nanifela God nawalom nasoꞋ alupumi ananimi ma measeꞋasam esis amam nematawa hiesi. Amam maseꞋas hiꞋalas dendeꞋ. 37 EaꞋ saꞋam dendeꞋ elihis andeandeꞋ. EaꞋ alupumi ananimi matatama tukwakwanimi maꞋihi makolasom maoloꞋwam holalef luꞋwami 7-peleim siꞋim endilisi. 38 Esis amam nematawa saꞋ gwaꞋaimi amama, seamba amam atom mataga 4,000-peleim. EaꞋ esis ina seamba awasi nematawa wapotiꞋ, owaꞋ. 39 Jisas nasapaꞋas safeꞋ eaꞋ, anan nalata bot nafeꞋ gani waꞋol walemb batupaꞋmanai luꞋunai anona etap luꞋunai Magadan.

Copyright information for `AOJFILIFITA