Matthew 18

Emi epen nepe dembeni ma kingdom heveni?

(Mk 9:33-37; Lu 9:46-48)

Nemaf anama amam alupumi Jisasi mafiꞋmai anan mahaliꞋana maꞋi, “Emi nikilaꞋ enis nataga dembeni endilisi ma kingdom heveni?”

EaꞋ Jisas nofalai enin soꞋusoꞋwin nafiꞋmai anan nahaponan naitu laꞋafena amam. EaꞋ naꞋipam, “AeꞋ aꞋipipa endilisi. Emi egafis siꞋi siowis kingdom heveni, ama saseꞋana opalef God siꞋi awasi isima saꞋi saseꞋana opalef God, isima sandaꞋam naꞋama anona nemaf siowis kingdom heveni. IꞋi owaꞋ, owaꞋetin. Emi egafis seape saꞋumbili owaꞋ seafela agof asasimi luꞋum setaga siꞋi awani inima, epes isima eaꞋ sikilaꞋ enis epes seape dembesi ma kingdom heveni. Emi egafis seseꞋ opalefa sigiambama enin soꞋusoꞋwin siꞋi iniꞋ ma ukup asasimi mopoma aeꞋ, esis saseꞋe opalef aeꞋ wapotiꞋ sagiambame.

Waf aonai nahambombaga baleꞋef amam nematawai

(Mk 9:42-48; Lu 17:1-2)

IꞋi emi egafis seandaꞋ enin epen soꞋusoꞋwin nembaleꞋefa aeꞋi nefeꞋ nendaꞋ waf aonai, epes isima sepe naꞋama. IꞋi enis epes sofaꞋ epes isima sepaꞋ owap luꞋunai nil bagafowa asasimi sofaꞋas sefeꞋ sokwahis sowala naoh mami luꞋwami, esis sope andeandeꞋ kwaukwawieꞋ. IꞋi epes isima sendaꞋ enin soꞋusoꞋwin nekwaha nembaleꞋefa aeꞋ, epes isima anona nemaf sope awes endilisi sikilaꞋ sowala naoh afisi. IpeꞋ epes etapipei, aeꞋ ati ipeꞋ uwahipipa ma amamaga amama meagwambipei mondaꞋepa pendaꞋ waf aonai. Endilisi amamaga amama anona nemaf meatagai, eaꞋ emi egafis sondaꞋam meatagai, aeꞋ ati esis uwahipis endilisi. DeiꞋ main, anona nemaf sefaꞋ nimanimi.

IꞋi lagof o boꞋwagah ipeꞋimi mondaꞋepa pewa ma waf aonai, petopaꞋam pekwahom mefeꞋ. AndeandeꞋ ma lagof boꞋwagah atom mope ma ambal nopeipa pepan andeandeꞋ laꞋelaꞋef. EaꞋ sefaꞋepa sokwahipa pefeꞋ wambel aonai nif fandumi laꞋelaꞋefi. Anama ina nambimb pepe andeandeꞋ, owaꞋ. Pepe aopa endilisi. EaꞋ iꞋi naep ipeꞋimi mondaꞋepa pewa ma waf aonai, pigiam pekwahom. Atom etin mope ma pefaꞋ ambal namunai napeipa peapan andeandeꞋ laꞋelaꞋef hihif. NaꞋama naep biam mapomepa mofaꞋepa mokwahepa pefeꞋ wambel aonai hel nif fandumi mape laꞋlaꞋefi. NaꞋama ina nambimb pepe andeandeꞋ, owaꞋ. Pepe aopa endilisi.

Basef womun etina enin mafin sipsip higilalanai

10 IpeꞋ pindumafuma! NaꞋama piꞋi enin epen atitin saꞋwini piꞋi inima enin falafini, owaꞋ. DeiꞋ main, amam ensel asasimi mape heveni mumafi awasi isima andeandeꞋ. Ensel amama laꞋelaꞋef mape felefeleꞋma Ahalome God nape heveni. [ 11 AeꞋ ataga epen endiliswei, aeꞋ afiꞋi ma eagolopa epes higilalasi efaꞋas setanimani.]

12 IpeꞋ ukup maꞋimama? IꞋi anona aman numafi anom sipsip 100-peleim ama anona atotona hegililana, aman amama ataꞋ nokwaha sipsip amama 99-peleim mitu meaꞋ otalef anagon dohotagw, anan ataꞋ nefeꞋ nogolopa anona hegilalanai. 13 IꞋi nefaꞋanai, aꞋipipa endilisi, atuwasi nondanifamana. Danifel ananinai nikilaꞋ nandanifel ma sipsip amama 99-peleim maituwi. 14 EaꞋ naꞋama etin Ahalomepa ipeꞋinai nape ilif heveni nandaiwaꞋ ma enin epen soꞋusoꞋunai higililana, owaꞋ.

Waf anama ipeꞋ pinindinas enis sahin owan sandaꞋ waf aonai

15 IꞋi sahin owan sondaꞋ waf aonai ma ineꞋ, ineꞋ nefeꞋ nitilin ipeꞋ etipa pepe eaꞋ nihiꞋamban waf aonai ananinai. IꞋi enin nemeꞋena, andeandeꞋ, siꞋi ineꞋ nofaꞋai enin netanimani wapotiꞋ. 16 EaꞋ iꞋi enin owaꞋ nemeꞋ basef ineꞋifi, niꞋipa enis epes bies wapotiꞋ eaꞋ pefeꞋ etin. Ama ipeꞋ bipa o wanipa pefeꞋma peameꞋ basef epen inima ma peawaloga basef amama piꞋi endilisimi atom. 17 Ama iꞋi enin nindaiwaꞋma neameꞋ basef ipeꞋifi, ineꞋ niꞋipa esis Kristen hiesi sondatama etifigin niꞋipasan. Ama enin niꞋi nindaiwaꞋma neameꞋ basefa esis Kristen hiesi wapotiꞋ, ineꞋ nekwahin nepe siꞋi isima owaꞋ seagawa Godi, o siꞋi amam amama awami mofaꞋ takisi.

18 AeꞋ aꞋipipa endilisi! Amamaga ipeꞋ pahapilam etap anaeꞋ, amama anona nemaf God nohapilam mape gani ilif heven wapotiꞋ. EaꞋ amamaga amama ipeꞋ pekwahom etap anae, amama anona nemaf God nokwahom gani heven ilif wapotiꞋ.

19 EaꞋ aeꞋ aꞋiam endilisi ma ipeꞋ wapotiꞋ. IꞋi ipeꞋ bipa pape etapi ukup mefeꞋ atifigina anom amamaga, piꞋi pendaꞋ beten pehaliꞋ Goda neaseꞋepa amamaga amama, eaꞋ andeandeꞋ Ahalome aeꞋanai napani ilif heveni nambimb neseꞋepam ipeꞋ. 20 DeiꞋ main, iꞋi epes bias o wenis ukup mapoma agel aeꞋanai ma sunduwaꞋanima sope etifigin, aeꞋ ape alomas.”

Basef womun etina nandaꞋ maoli owaꞋ okom neaseꞋana wiaf anona nandaꞋmanai

21 Nemaf anama Pita nafiꞋi nahaliꞋana naꞋi, “Dembinai, nimeguf maꞋumaꞋum sahin owan aeꞋasi sondaꞋme waf aonai aeꞋ, ma eakwahamasana? Nimeguf 7-peleim o maꞋum?”

22 EaꞋ Jisas naꞋipana naꞋama naꞋi, “AeꞋ ina aꞋipina nimeguf amama atom 7-peleim, owaꞋ. AeꞋ aꞋi ineꞋ nekwaha waf aonai esis sandaꞋminanai nimeguf hiami 490-peleim.

23 DeiꞋ main, esis siowis kingdom heveni siꞋi anona dembinai king naꞋi nogawa wialef mapoma amam mandaꞋ maol ananinai mapoma maꞋum. 24 EaꞋ anan nandaꞋam nogawam andeandeꞋma nondaꞋ amam meagwamana wiaf, eaꞋ sofaꞋ anona aman safeꞋma anan. EaꞋ aman anama nowaola wiafa moni luꞋunai 10 milian kina. 25 EaꞋ anan moni aꞋana ma neagwan dendeꞋma niembi wiaf anama anan nowaolamasana. EaꞋ dembinai king naꞋipas naꞋi esis setala aman anama noloma wauluꞋmana awasi ananisi ma sondaꞋ maol akupi eaꞋ setala amamaga asasimi wapotiꞋ sofaꞋ moni ma seagwa wiaf anama.

26 EaꞋ aman anama nowafa notawa etapa naep king anama dembinai naꞋipana naꞋama naꞋi, ‘IneꞋ niti aeꞋ uwahipiwi nepe nehafa aeꞋ. Anona nemaf aeꞋ egwamena wiaf anama hiꞋilana ma ineꞋ.’ 27 EaꞋ dembinai anama nati owahipina nakwahomana wiaf ananinai nafeꞋ wafifina.

28 EaꞋ aman anama nawisi andeꞋ nati anona amam atom mandaꞋ maol etini, anan nowaola wiafa moni kwawieꞋin siꞋi 10 kina. EaꞋ nombaloꞋ aman anama nowaꞋana sisihina biniꞋw ananiꞋwi naꞋipana naꞋi, ‘IneꞋ negwame wiaf ineꞋinai hiꞋilana!’

29 EaꞋ aman anama nowafa notawa etap eaꞋ naꞋipana basef laꞋifimi naꞋi ‘IneꞋ niti aeꞋ owahipiwi eaꞋ nepe nehafa aeꞋ! Nambimb egwamena wiaf ineꞋinai hiꞋilana.’

30 EaꞋ anan nandaiwaꞋ. EaꞋ nofaꞋana nafeꞋ nandaꞋana nandaꞋ kalabus, ama nepe neagwa wiaf anama. 31 Amam mandaoꞋoma mandaꞋ maoli mati amama, opalef amamumi nimanim endilisi mafeꞋ mawalapa amama ma dembinai amamunai.

32 EaꞋ dembinai nofalai aman anama nandaꞋ maoli eaꞋ naꞋipana naꞋi, IneꞋ aman nandaꞋ maol aonai. DoꞋok ineꞋ naloma aeꞋ nalef, eaꞋ akwaha wiaf anama luꞋunai ineꞋinai hiꞋalana. 33 AeꞋ ati ineꞋ owahipina, eaꞋ deiꞋ maina ineꞋ owaꞋ nieꞋi owahipina alupunai ineꞋinai pandaꞋ maol etini? 34 EaꞋ dembinai okom numbutina naseꞋamana amam amama mumafi kalabusi ma measeꞋana nimanimi luꞋwami nope nope neagwa wiaf ananinai hiꞋialana.

35 IꞋi ukup ipeꞋ hipei owaꞋ peakwaha waf aonai endilisima sahin owan sandaꞋmipanai, anona nemaf Ahalome aeꞋanai nape ilif heveni wapotiꞋ nondaꞋmepam ipeꞋ naꞋama etin siꞋi dembinai nandaꞋama aman anama.”

Copyright information for `AOJFILIFITA