Matthew 2

Amam gawaimi owaꞋ mogawa Godi mafiꞋi mati Jisas

(Lu 2:1-7)

Maria kola Jisas Betlehem, etap hiagoma Judia. Nogota anama anona aman king Herot dembinai ma gavman nape numafi enis epes sape anona etap hiagoma Judia. AkwaꞋw kolana eaꞋ, anom amam dambami gawaimi owaꞋ mogawa Godi mafiꞋi laogoma gani aon natefima mafiꞋi mafiꞋi mataga Jerusalem eaꞋ mahaliꞋas maꞋi, “DeiꞋ awani dambaini nataga king dembinai esis Judai nape eti? AfaꞋ ataꞋ wapani gani aon natefima, wati ondoꞋw ananiꞋwi kwatefi, eaꞋ deiꞋ wafiꞋi waꞋi ondaꞋ lotumana ofela agel ananinai.”

Nemaf anama Dembinai King Herot nameꞋ basef amama, okom ananinai aona natanea nafeꞋ naꞋi nambimb awani inima netaga damben niliꞋamonana. EaꞋ esis hiesi sape Jerusalem wapotiꞋ umbamahas saꞋi nambimb nemaf aonai notaga. EaꞋ king Herot nefala amam pris hiami dambami maloma amam dambami mawalipasa miꞋuli Godi hiami mafiꞋi eaꞋ nahaliꞋam naꞋi, “Aman anama Krais God nandandepana nosapaꞋana niefiꞋi, nambimb anan neataga wambel enima?”

EaꞋ amam magwamana basef maꞋi, “MamaꞋwana kolana Betlehem, etap hiagoma Judia. DeiꞋ main, anona profet fowaꞋinai naꞋi basef mail okwatip maꞋi, God naꞋi,

‘IpeꞋ Betlehem etap hiagoma Judia, ipeꞋ ina epes falafipei, owaꞋ. IpeꞋ ina pape pagiꞋ ma amam gavman dambami mumafi ipeꞋ Judia, owaꞋ. DeiꞋ main, anona Dembinai anona nemaf neataga wambel ipeꞋinai Betlehem. Anan nope dembinai ma ipeꞋ amam nematawa AeꞋipei Israel eaꞋ numafi ipeꞋ hipei ma peape andeandeꞋ.’ ”
EaꞋ king Herot nandambahoꞋ etin nofalai amam gawaimi amama mafiꞋi aon natefima mandambahoꞋ mandatama etifigin nahaliꞋam naꞋi, “Maina nemaf ipeꞋ pati ondoꞋw akwama kwataga?”

Amam maꞋipana ma eaꞋ, king Herot nasapaꞋam mafeꞋ Betlehem naꞋipam naꞋi, “IpeꞋ foꞋo pegolopa awani inima. Ama pitilin, pifiꞋi piꞋipa aeꞋ wapotiꞋ. AeꞋ wapotiꞋ aꞋi efeꞋ itilin endaꞋ lotuman efela agel ananinai luꞋuna wapotiꞋ.”

Amam mameꞋ basef ananimi eaꞋ, mohafel makwaha anan mafeꞋ mati ondoꞋw akwama fowaꞋ maliꞋ matoloꞋw gani aon natefima, kwafeꞋ kwaliꞋamam. EaꞋ kotawa ipat anama ilif awani inima Jisas napeinai. 10 Amam mati ondoꞋw akwama kotawa naꞋama eaꞋ wandanifel endilisi. 11 EaꞋ mawis ipat anama mati awani inima naloma mamaꞋwana Maria. EaꞋ amam mindiwa nembawa motawa mandaꞋ lotumana mafela agel ananinai luꞋuna. EaꞋ mupalia paus amamumi mowafa hiahaom amama amam matalom otamba luꞋwami alogw buꞋwami maꞋami maseꞋanam. EaꞋ maseꞋana gol naloma enin paura saꞋi frankinsens, alogw buꞋwami maꞋami maloma anom sanda buꞋwami sofalam saꞋi mer, maseꞋanam awani inima Jisas. 12 MaseꞋanam eaꞋ, God naꞋipam naꞋi, “IpeꞋ ina ataꞋ pitanima pefeꞋma king Herot, owaꞋ. EaꞋ pila anona eaf pitanima pefeꞋ wambel ipeꞋinai.”

EaꞋ amam maila anona eaf motanima mafeꞋ wambel amamunai laogoma.

Josep naloma wauluꞋmana saoꞋwa awani Jisas safeꞋ sapani gani laogoma etap hiagoma Isip

13 Amam amama gawaimi mafeꞋ eaꞋ, Josep naꞋoh nandondoꞋoh anona ensel Dembinai nafiꞋmai anan naꞋipana naꞋi, “IneꞋ hafel neꞋwa awani inima neloma mamaꞋwana ananiꞋwi pefeꞋ laogoma etap hiagoma Isip. EaꞋ pipani Isip ama nambimb pemeꞋ aeꞋ iꞋipina wapotiꞋ, pitanimani. DeiꞋ main, King Herot atuwasi niꞋipa soldia ananimi mogolopa awani inima ma mohan neagaꞋ.”

14 EaꞋ Josep nehafel owamb anama atona naoꞋwa awani naloma mamaꞋwana Maria safeꞋ Isip laogoma. 15 Josep napani Isip ama King Herot nagaꞋ, eaꞋ naoꞋwas sotanimani siꞋi anom basef Dembinai God naꞋipa anona aman profet, amama deiꞋ mataga mandawalap maꞋi, God naꞋi, “Nogalome aeꞋanai napani Isip eaꞋ aeꞋ efalana notanima nafiꞋi.”

King Herot naꞋipa soldia mafeꞋ maha awasi amam hiami magaꞋ

16 King Herot nogawa amam amama gawaimi ina mutanimani, owaꞋ, mambasoꞋmana mafeꞋ anona eaf. EaꞋ okom ananinai wandafuna kwapeteꞋ naꞋi noha Jisas neagaꞋ. DeiꞋ anan okom nandandaꞋma basef amama amam gawaimi maliꞋ maꞋipanam ma nemaf anama ondoꞋw kwataga anai. NaꞋama deiꞋ nasapaꞋ anom soldia mafeꞋ Betlehema wambel anama nape felefeleꞋi maha awasi amam hiami deiꞋ solam dambaim mafeꞋ mataga afagof biam maloꞋami magaꞋ hiꞋalam.

17 EaꞋ deiꞋ anom basef fowaꞋ God naꞋipanam profet Jeremaia mataga endilisi mandawalap. 18 Anan naꞋi,

“Esis sape anona wambel Rama sameꞋ esis salef. Esis salef sandahowe mehip saꞋi uwahipisa awasi saꞋi, ‘AnoꞋw nemataꞋw Resel kwalopa batawisaꞋw akwaꞋusi, kwandaiwaꞋ ma nambimb enis sondaꞋ okom akwoꞋunai boꞋona awanena, owaꞋ. DeiꞋ main, awasi akwaꞋusi sagaꞋ hiꞋalas.’ ”

Josep naloma wauluꞋmana saoꞋwa awani sotanimani safeꞋ Nasaret

19 Josep ataꞋ napani Isip ama King Herot nagaꞋ, ensel Dembinai Godi nafeꞋ naꞋipana ma naꞋoh nandondoꞋoh 20 naꞋi, “IneꞋ hafel neꞋwa awani neloma mamaꞋwana ananiꞋwi pitanima pefeꞋ etap hiagoma Israel. DeiꞋ main, amam maꞋi meaha awani neagaꞋ magaꞋ hiꞋalam.”

21 EaꞋ Josep nesafel naoꞋwa awani naloma mamaꞋwana ananiꞋwi safeꞋ sataga etap hiagoma Israel. 22 EaꞋ Josep nameꞋ basefa anona aman Arkelaus king Herot nogalomana nataga nofaꞋ wambel nahoꞋofana nape dembinai king ma esis Judai. EaꞋ Josep umbamahana ma neafeꞋ Judia. EaꞋ naꞋoh nandondoꞋoh wapotiꞋ, God naꞋipana ma neafeꞋ anama etap hiagoma Galili. 23 EaꞋ nafeꞋ nape enin taun saꞋuni sofalagon Nasaret siꞋi anom basef amam profet fowaꞋ maꞋiami maꞋi, “Owagama esis sofalana siꞋi Nasaretinai.”

Basef amama deiꞋ mataga mandawalap endilisi.

Copyright information for `AOJFILIFITA