Matthew 22

Basef womun etina esis safiꞋi sandaꞋ gwaꞋaimi luꞋwami ma bias seandaseꞋamai

EaꞋ Jisas naꞋipana basef womun etin wapotiꞋ naꞋi, “Epes siowis kingdom heveni siꞋi anona king dembinai etapanai. Nogalomana ananinai naꞋi nosoꞋ anoꞋw nemataꞋw, eaꞋ king anama nandaꞋ anom gwaꞋaimi luꞋwami. Nemaf anama seagwaꞋ gwaꞋaimi anai notaga, anan nasapaꞋ amam amama mandaꞋ maola anani mafeꞋ mofalai epes isima fowaꞋ naliꞋ nofalasi seafiꞋmai gwaꞋaimi amama. EaꞋ esis sandaiwaꞋma seafiꞋi.

EaꞋ anan nasapaꞋ anom wapotiꞋ mandaꞋ maola anani motambel mafeꞋ, eaꞋ naꞋipam naꞋi, ‘IpeꞋ foꞋmago epes isima aeꞋ andandepas sapani eaꞋ piꞋipas naꞋama piꞋi, “PemeꞋ, aeꞋ andandomba gwaꞋaimi aeꞋami eaꞋ. Mafis bulmakau suwafumi maloma mafis amama luꞋwami aeꞋami, apeꞋ maham. EaꞋ amamaga hiami mandandombol maꞋoh eaꞋ. IpeꞋ pifiꞋmai gwaꞋaimi amama endaꞋama nogalome nosoꞋ akwaꞋwi.” ’

EaꞋ esis ukup aoma semeꞋama seafeꞋ eaꞋ sandamboma safeꞋ deindei ma opeh asasimi. Anona nafeꞋ aof, anona nafeꞋma bisnis ananimi. EaꞋ amam mapani mombaloꞋ amama mandaꞋ maola kingi mandaꞋam kwapeteꞋam maham afum. EaꞋ king anama nemeꞋ amama okom wandafuna nasapaꞋ soldia ananimi mafeꞋ maha amam maha mandaꞋ maola anani afum hiꞋalam. EaꞋ makata nif maofa wambel amamunai wapotiꞋ. EaꞋ king naꞋipa amam mandaꞋ maoli naꞋi, ‘GwaꞋaimi endaꞋama nogalome nosoꞋ akwaꞋw eaꞋ sandandombam maꞋoh eaꞋ epes isima aeꞋ efalasi ina semeꞋ basef aeꞋami safiꞋi, owaꞋ. NaꞋama deiꞋ ipeꞋ pefeꞋ eaf anama hianai dawalegefa piti isima epes hiesi piꞋipas pefalas sifiꞋmai gwaꞋaimi amama luꞋwami daseꞋamaimi.’ 10 Anan naꞋiam naꞋama, amam mandaꞋ maoli mafeꞋagon gani gani eaf dawalegef mowaꞋaniesi epes isima matilisi hiesi, epes buꞋwasi saloma sandaꞋ waf aonai wapotiꞋ. EaꞋ safiꞋi sape ipat anama sondaseꞋama ma siꞋina endilisi.

11 Esis sape eaꞋ dembinai king nawis nomona nitilis. EaꞋ nati anona aman atotona ina nala luwaguf salama nemaf anama daseꞋamainai, owaꞋ. 12 EaꞋ king naꞋipana naꞋi, ‘Alupinai, deiꞋ maina ineꞋ owaꞋ nela luwaguf amama sandaseꞋamaimi nifiꞋi niwisi naꞋae?’ EaꞋ anan ina naꞋi anom basef, owaꞋ.

13 EaꞋ king naꞋipa amam mandaꞋ maoli naꞋi, ‘IpeꞋ pewaꞋ lagof maloma boꞋwagaha ananimi pekwahona nefeꞋ niwis nepe owamb andeꞋ. Owamb anama nambimb anan nowa nelef nalelef tilili talalaꞋ kwapeteꞋ nepe.’ ”

14 EaꞋ Jisas naꞋipas naꞋi, “AꞋe, God nofala epes hiesi naꞋama etin siꞋi king anama nofalas. Anan nofala hiesi, eaꞋ nandandepa atona etin sifiꞋi siowis sope solomana.”

Amam mahaliꞋ Jisasa neseꞋana takis gavman dembinai Sisar Romunai

(Mk 12:13-17; Lu 20:20-26)

15 EaꞋ amam dambami Farisi mafeꞋ mandaꞋ basef maꞋiam mandameꞋmama membaleꞋa Jisas mowaꞋana. Amam maꞋi momeꞋ anom basef ananimi owaꞋ andeandeꞋi ma mondaꞋmana basef mowaꞋana siꞋi sowaꞋ bogof. 16 EaꞋ amam masapaꞋ alupumi amamumi maloma amam Heroti amam mafeꞋma Jisas maꞋi, “Dembinai Tisa, afaꞋ ogawena ineꞋ aman buꞋunai naꞋi basef endilisimi. Ina umbamehena owaꞋ. Ina niꞋipasa anom basef isima enis agof luꞋwamisi eaꞋ anom basef isima agof aꞋasi falafisi, owaꞋ. IneꞋ naꞋipasa basef atifim endilisimi atom ma okom Godi amam nematawa hiesi dendeꞋ etin hiꞋalas. 17 EaꞋ ineꞋ niꞋipafa. DeiꞋ ineꞋ okom nape naꞋimama? MiꞋuli apeꞋinai naꞋi andeandeꞋma apeꞋ moseꞋana takis Sisar gavman dembinai esis Romi o owaꞋ?”

18 EaꞋ Jisas nogawa eaꞋ ma waf basoꞋomainai amamunai eaꞋ naꞋi, “IpeꞋ amam paꞋi malogof biamipei, deiꞋ maina ipeꞋ pagwamba aeꞋ? 19 IpeꞋ pihiꞋambe anona moni ma ataꞋ itolona.”

EaꞋ mofaꞋmanai anona moni ma natolona.
20 EaꞋ nahaliꞋam naꞋi, “Ambal naloma agel anama mailanai eminai?”

21 EaꞋ maꞋi, “Anama Sisari gavman dembinai esis Romi.”

EaꞋ nagwamama basef naꞋipam naꞋi, “EaꞋ amamaga Sisari, amama peseꞋanam Sisar. EaꞋ amamaga Godi, peseꞋanam God.”

22 Amam mameꞋanama basef amama eaꞋ gegelalasom kwapeteꞋam makwahona mafeꞋ.

Amam mahaliꞋ Jisasa epes sagaꞋi sotanima sohafel wapotiꞋ

(Mk 12:18-27; Lu 20:27-40)

23 Nemaf anama atona anom amam Sadyusi mafiꞋmai Jisas. Amam hiami mombaleꞋef sagaꞋi ina anona nemaf sotanima sohafel wapotiꞋ, owaꞋ. EaꞋ amam mafiꞋmai Jisas mahaliꞋana 24 maꞋi, “Dembinai Tisa, fowaꞋ gani Moses naꞋi, ‘IꞋi anona aman nogaꞋ ma anan awasi aꞋana eaꞋ wauluꞋmana ataꞋ kope, owalomana ananinai noseꞋakw nola enis awasi ma sohoꞋofana.’ 25 EaꞋ fowaꞋ amam wambota atotona 7-peleim mape. NaliꞋi sahalomam naseꞋakw awani aꞋakw nagaꞋ, nakwahoꞋw kwape. EaꞋ owalomana naseꞋakw nagaꞋ nakwahoꞋw kwapani awani aꞋakw.

26 EaꞋ owalomana nandatuꞋulanai wapotiꞋ nandaꞋam naꞋama etin, eaꞋ anona nandatuꞋulomi naseꞋakw mandaꞋam naꞋama etin mafeꞋ mafeꞋma matagama owagufunai akutainai. 27 Amam amama wambota atotona eaꞋ magaꞋ hiꞋalam. Anom nimeguf mafeꞋma eaꞋ, akwaꞋw kwagaꞋ wauluꞋmam. 28 EaꞋ anona nemaf esis sagaꞋi sohafel wapotiꞋ, nemataꞋw akwama kwasoꞋ amam 7-peleimi emi egafuna noseꞋakw? Amam 7-peleim maseꞋakw hiꞋalam.”

29 EaꞋ Jisas nagwamama basef naꞋi, “IpeꞋ owaꞋ pegawa basef Baibel naꞋiami, owaꞋ pegawa pepel Godi. EaꞋ ipeꞋ deiꞋ ina paꞋi basef endilisimi, owaꞋ. 30 Nemaf anama saꞋi sokwaha hiꞋagilif sotanima sohafel wapotiꞋ, amam nematawa ina ataꞋ sondaseꞋama wapotiꞋ, owaꞋ. Sopan etin siꞋi ensel mape heveni. 31 Basef amama esis sagaꞋi sotanima sohafel wapotiꞋ, ipeꞋ patalifa basef amama God naꞋiam mape Baibeli o owaꞋ? Anan naꞋipipa naꞋama naꞋi, 32 ‘AeꞋ God Abrahami, Aisaki maloma Jekopi.’ Basef amama maꞋi God ina Dembinai ma epes isima sagaꞋi, owaꞋ. Anan God epes isima ambal napeis sape namusi.”

33 Esis amam nematawa hiesi sameꞋ naꞋama sohafel gegelalasisa basef ananimi.

MiꞋuli naliꞋi Godi

(Mk 12:28-31; Lu 10:25-28)

34 EaꞋ Jisas nasopama malogofa amam amama dambami Sadyusi ma basef amama. EaꞋ anom amam Farisi mameꞋ basef amama mondowaꞋanima mafiꞋi felefeleꞋma anan. 35 EaꞋ anona naloma amam nogawa miꞋuli Godi andeandeꞋ naꞋi nogwamba Jisasa niꞋi anom basef owaꞋ andeandeꞋ ma mondaꞋmana basef mowaꞋana siꞋi sowaꞋ bogof. EaꞋ nahaliꞋana naꞋi, 36 “Dembinai Tisa, maina miꞋuli Godi luꞋunai nikilaꞋ miꞋuli hianai nape naliꞋi?”

37 EaꞋ Jisas naꞋipana naꞋi, “Ukup ipeꞋimi mohafela Dembinai God ipeꞋinai mimilana naꞋama. Ukup ipeꞋimi mimilana hiꞋilam, peseꞋana ambagof opalef ipeꞋimi peseꞋanam hiꞋilama Dembinai God atona. 38 MiꞋuli anama luꞋunai, naliꞋ endilisi. EaꞋ miꞋuli nagiꞋi anama, ‘IpeꞋ ukup mimila enis epes sape felefeleꞋma ipeꞋi, siꞋi ukup maimaila ipeꞋ etipa.’ 40 Basef ofagema ma miꞋuli hianai Godi maloma basef amam profet mandaꞋami hiami mape nomona miꞋuli anama biefina.”

Jisas nahaliꞋ amam dambami Farisi ma Krais, anan God nandandepana nasapaꞋana nafiꞋi

(Mk 12:35-37; Lu 20:41-44)

41 Amam Farisi ataꞋ munduwaꞋanimai etifigin maitu, Jisas nahaliꞋam naꞋi, 42 “IpeꞋ ukup mape maꞋimama ma Krais anan God nandandepana eaꞋ ma nesapaꞋana niefiꞋi? Anan nogalomana emi?”

EaꞋ maꞋipana maꞋi, “Devit nogalomana.”

43 EaꞋ nahaliꞋam naꞋi, “DeiꞋ maina Ambal BuꞋunai Godi nafela okom Deviti ma naꞋi Krais Anan Dembinai? EaꞋ Devit fowaꞋ gani naꞋi,

44 ‘Dembinai God naꞋipa Dembinai AeꞋanai naꞋi, “IneꞋ nepe lagel kwahisinai AeꞋanai laꞋelaꞋef nefeꞋ netagama anona nemaf AeꞋ endaꞋ naumbih ineꞋisi sefeꞋ owina boꞋwagah ineꞋimi.” ’
45 Devit fowaꞋ nofala Krais naꞋi, ‘Dembinai.’ Amama atom deiꞋ Krais ina aman atona falafunai, owaꞋ. Anan Dembinai.”

46 EaꞋ deiꞋ ina anona aman laꞋifina ma nogwamana anom basef Jisas, owaꞋ. Nemaf anama nafeꞋ nafeꞋ owagama wapotiꞋ amam hiami umbamahama meahaliꞋanama anom basef, owaꞋ.

Copyright information for `AOJFILIFITA