Matthew 24

Jisas naꞋi ipat luꞋunai Godi anona nemaf aona

(Mk 13:1-2; Lu 21:5-6)

Jisas nakwaha ipat luꞋunai Godi nafeꞋ etin, amam alupumi ananimi mafiꞋmai Anan. Amam maꞋi mihiꞋambana ifagw luꞋwami lotumi. EaꞋ Jisas nagwamama basef naꞋipam naꞋi, “IpeꞋ pati ifagw amama hiami? AeꞋ aꞋipipa endilisi, anona nemaf ina anom otamba motoma anom otamba mope, owaꞋetin. SagwasiꞋam sowalom hiꞋilam mofeꞋ moꞋoh atona etin.”

Jisas naꞋi basef naꞋi anona nemaf nimanimi awami motaga

(Mk 13:3-13; Lu 21:7-19)

Jisas tol nape halaf anama lawah oliv motawama eaꞋ alupumi ananimi atom mafiꞋmai anan maꞋipana maꞋi, “IneꞋ niꞋipafa amamaga amama nambaiꞋ motaga. Maina ikwaf niliꞋ notaga ma afaꞋ ogawa ineꞋ naꞋi netanima neafiꞋi ma etap anaeꞋ higililana?”

EaꞋ Jisas nagwamama basef naꞋi, “IpeꞋ pindumafuma andeandeꞋ. NaꞋama enin epen nembasoꞋmepa. DeiꞋ main, amam hiami anona nemaf mifiꞋi mombasoꞋmepa miꞋi agel aeꞋanai miꞋi, ‘AeꞋ maꞋuwi aeꞋ Krais, God nandandepe nasapaꞋe afiꞋi.’ EaꞋ anona nemaf mombasoꞋma amam nematawa hiesi someꞋ basef amamumi siꞋi endilisimi silam. Anona nemaf pemeꞋ enis sopaꞋ lupulupuꞋ sondaꞋ wandaf eaꞋ enis semeꞋasa wandaf siꞋipipa, ipeꞋ ina umbamehepa, owaꞋ. Amamaga amama anona nemaf meatagai, eaꞋ nemaf akutainai ataꞋ owaꞋ. Enis epes sape anama etap hiagoma kantri sofela wandaf sopaꞋ soloma anona kantri. Anona dembinai king nehafel noꞋwa enis wambel hiagoma ananisi sopaꞋ soloma anona dembinai king noꞋwa ananisi wambel hiagoma. Enis epes wambel hiagoma nolomohas sope, eaꞋ enis wambel hiagoma atona etin etap suwambon nokotoꞋ. Amamaga amama hiami ataꞋ muliꞋ motaga siꞋi nimanimi maliꞋ matagama nemataꞋw kwaꞋi kola awani.

Amama motaga ma eaꞋ, esis sofaꞋepa ma seseꞋepa nimanimi, eaꞋ sehepa pegaꞋ. Epes hiesi wambel hiagoma opalef aoma ipeꞋ kwapeteꞋ endilisi. Esis sati ipeꞋ paila basef AeꞋami naꞋama deiꞋ sahepa. 10 Nemaf anama amam nematawa hiesi sokwaha sombaleꞋefa Dembinai eaꞋ sondawawalapa etin soseꞋasas sefeꞋma naumbih sohas, eaꞋ epes isima ukup aoma enis. 11 EaꞋ amam profet hiami mambasoꞋami motaga mohafel mufiꞋi mombasoꞋma amam nematawa hiesi. 12 Waf aonai anona nemaf netaga luꞋuna, naꞋama amam nematawa hiesi sokwaha waf anama ukup maimaila enis epes miꞋi uwahipis. 13 EaꞋ emi egafis sembaleꞋefa aeꞋ laꞋifis situ seatagama nemaf akutainai, isima anona nemaf God nefaꞋas setanimani. 14 EaꞋ anona nemaf esis siꞋipasa basef amama buꞋwami Godi ma epes hiesi siowis kingdom heveni. Esis siꞋipas ganima etap hiagoma hiꞋilagon ama amam nematawa hiesi ganima wambel hiagoma ataꞋ siliꞋ semeꞋam eaꞋ nemaf akutainai notaga.

Amamaga awami endilisi anona nemaf motaga

(Mk 13:14-23; Lu 21:20-24)

15 Anona nemaf ipeꞋ piti amamaga awami mohambombaga amamaga buꞋwami motaga siꞋi fowaꞋ gani profet Daniel naꞋi basef mail Baibeli maꞋi. Amamaga amama motaga mope anama boꞋwagoma nomon ipat luꞋunai Godi. (Emi egafis sitalifa basef amama esis sogawa basef ofagema andeandeꞋ.) 16 Nemaf anama amam nematawa sape etap hiagoma Judia sofaꞋ sefeꞋ sondowasaꞋ halafutagw. 17 Emi egafis sape ipat andeꞋ felefeleꞋ ina ataꞋ setanima siwis sefaꞋai amamaga asasimi ipat nomon, owaꞋ. 18 Emi egafis sapani aofi, ina ataꞋ setanima sefeꞋ wambel sefaꞋ luwaguf maim asasimi, owaꞋ. 19 Nematawa opafuwai waloma awama awasi ataꞋ sagwaꞋ nomambeh atomi, aeꞋ aꞋi awau uwahipiwa endilisi ma nogota anama ofaꞋ nimanimi luꞋwami endilisi meataganai. 20 IpeꞋ pendaꞋ betena Goda ipeꞋ ina pefaꞋ pefeꞋ nogota anama uf noloma asaf mifiꞋi o nemaf anama Sabat sapoma nomaꞋwanai, owaꞋ. 21 Nogota anama nimanimi luꞋwami endilisi. FowaꞋ dambadamba God nandaꞋ etap nataga nafiꞋi nafiꞋi nataga deiꞋ, nimanimi awami amama fowaꞋ gani ina anom naꞋamaimi mataga, owaꞋ. EaꞋ anona nemaf wapotiꞋ ina anom nimanimi amama motaga, owaꞋ. 22 IꞋi God owaꞋ notopaꞋ nimeguf mefeꞋ bandam, anona nemaf amam nematawa hiesi higililas hiꞋilas. OwaꞋetin. God okom napoma epes isima anan nasaheꞋas eaꞋ deiꞋ natopaꞋ nogota anama bandana.

23 Nemaf anama notaga ma iꞋi enis epes siꞋipipa siꞋi, ‘IpeꞋ piti Krais, God nandandepana nasapaꞋana nafiꞋi anan nape naꞋae’, o ‘nani nape gani,’ ipeꞋ ina pembaleꞋefas, owaꞋ. Hapaisi. 24 DeiꞋ main, nemaf anama anom amam mombasoꞋam miꞋi amam Krais o miꞋi amam profet motaga mondaꞋ ikwaf laꞋifinai naninani hianai siꞋi God atona nandaꞋanai. Endilisi iꞋi amam laꞋifim, mombasoꞋma amam nematawa God nasaheꞋas eaꞋ mohambombagas. OwaꞋ. Hapaisi. 25 PemeꞋ, aeꞋ aliꞋ aꞋipipa eaꞋ ma amamaga amama nimanimi deiꞋ ataꞋ owaꞋ meatagai.

26 NaꞋama iꞋi emi egafis siꞋipipa siꞋi, ‘IpeꞋ piti, anan nani nape gani epes aꞋagoma wafiguma fetauguma,’ ipeꞋ ina pemeꞋas pefeꞋagon, owaꞋ. IꞋi emi egafis siꞋi, ‘IpeꞋ piti nani nape ipat nani nomon’, ipeꞋ ina pembaleꞋefas, owaꞋ. 27 IpeꞋ piti otaga holhol pelepeleꞋ holala nataga gani aon natefima eaꞋ howalagon nafeꞋ anama hiagoma aon nowalama nasoꞋma. AeꞋ ataga epen endilisiwei, nemaf anama aeꞋ etanima iefiꞋi, endaꞋam naꞋama etin hiesi sotolowe. 28 Mamagoma alop sagaꞋi naꞋoma, eaꞋ anama atogon anona nemaf komemb mefeꞋ munduwaꞋanima.

Jisas naꞋi, “AeꞋ ataga epen endilisiwei anona nemaf ifiꞋi.”

(Mk 13:24-27; Lu 21:25-28)

29 Nimanimi amama hiami ma nogota anama hiꞋilam eaꞋ, mehip etin

‘Aon alipunai netaga owamb, eaꞋ aon owambunai wa naꞋef ina molo, owaꞋ. EaꞋ ondowa mowai otaga ilif, amamaga hiami mape otagai eaꞋ bol etin mope.’
30 Nemaf anama ondowa mowai, ikwaf aeꞋanai netaga gani otaga ilif, AeꞋ ataga epen endilisiwei ifiꞋi. EaꞋ amam nematawa hiesi sape etap hiagoma selef. EaꞋ siti aeꞋ eloma elagw otaga ilif ifiꞋi eloma amamaga howalagon buꞋwami Godi moloma pepel Ananinai. 31 EaꞋ alof luꞋunai nelef mehip, esapaꞋ amam ensel aeꞋami mofeꞋ etap hiagoma aon natefima nowalama waꞋowaꞋol anama biafigin biafigin mefeꞋagon hiꞋilagon ganima etap otaga mafeꞋ motambela. Ensel amama mofeꞋ mofaꞋai esis amam nematawa God nasaheꞋas eaꞋ Ananisi sondatama etifigin.

Elif nihiꞋambapa mogawa nimeguf

(Mk 13:28-31; Lu 21:29-33)

32 IpeꞋ ukup miꞋi anom basef womun etina fig. IpeꞋ piti lawag anama fik noloma lawah hiami wapotiꞋ. IpeꞋ piti ilaof nonafa ma basowa, pegawa nogota anama nelemb eaꞋ felefeleꞋ ma meaof. 33 EaꞋ naꞋama etin nemaf anama ipeꞋ piti amamaga amama aliꞋ aꞋipipami motaga hiꞋilam, ipeꞋ pegawa aeꞋ afiꞋi aitu felefeleꞋma uta. Ina ataꞋ nogota laona, owaꞋ.

34 AeꞋ aꞋipipa endilisi, amam nematawa deiꞋ ataꞋ papani ina nambimb pogaꞋ ulal, ataꞋ owaꞋ, ipeꞋ piti amamaga amama hiami motaga hiꞋilam. 35 Otaga noloma etap hiagoma anona nemaf hegililam hiꞋilam, eaꞋ basef aeꞋami ina anona nemaf hiꞋilam, owaꞋetin. Mope laꞋelaꞋef hihif.

Ina enin epen negawa nemaf neloma nogota Dembinai nataga epen endilisinai neafiꞋi, owaꞋ

(Mk 13:32-37; Lu 17:26-30, 34-36)

36 AeꞋ ataga epen endilisiwei aꞋipipa. OwaꞋ enin epen negawa nemaf anama o nogota anama aeꞋ iefiꞋianai. Amam ensel mape heven ilifi wapotiꞋ ina mogawana. AeꞋ nogalomana Godi wapotiꞋ ina egawana, owaꞋ. Ahalome atona nape ilif anan atona negawa nemaf anama. Waf fowaꞋ sandaꞋana nogota anama Noa napenai, eaꞋ naꞋama etin siꞋi esis sondaꞋana nemaf anama felefeleꞋma iefiꞋi etaga etap anaeꞋ. 38 FowaꞋ gani embel luꞋwami ataꞋ owaꞋ motagai, nogota anama esis sape saꞋ gwaꞋaimi saꞋ embel amam nematawa sindikikilaꞋma sandaseꞋama etin safeꞋ safeꞋ sataga nemaf anama Noa nafeꞋ nawis sip. 39 Amam nematawa isima ina sagawa nemaf anama, owaꞋ. Esis ukup maseꞋas sape naꞋama etin safeꞋ satagama nemaf anama embel luꞋwami mataga mahas muwambuꞋwas sagaꞋ hiꞋalas. EaꞋ naꞋama etina nemaf anama aeꞋ etanima iefiꞋianai. 40 Anama amam biam mondaoꞋoma mondaꞋ maol mapani aof, God nofaꞋ anona, anona nokwahona nope. 41 EaꞋ anowa nematawa biawa ondaꞋ maola plaua ondaꞋ bret, nemaf anama God nofaꞋ anoꞋw kofeꞋ nokwaha anoꞋw kope.

42 EaꞋ ipeꞋ pindumafuma andeandeꞋ. DeiꞋ main, ipeꞋ ina pegawa nambaiꞋ Dembinai ipeꞋinai nifiꞋi, owaꞋ. 43 IpeꞋ ukup mopoma anom basef wamun etin pegawam. IꞋi ofagena ma ipati niliꞋ nogawa owamb maina nogota nandaꞋ wali neafiꞋianai, ama naep motawa notologon nope, nandaꞋ wali ina nafiꞋi nupisila ipat ananinai nuwis nomon, owaꞋ. 44 EaꞋ ipeꞋ wapotiꞋ naep motawai pepe. DeiꞋ main? AeꞋ ataga epen endililsiwei iefiꞋi anona nemaf ipeꞋ ina pegawa piꞋi ifiꞋi ulal nemaf anama, owaꞋ.

45 IpeꞋ hipai pendaꞋ waf buꞋunai pehafa AeꞋ siꞋi aman anama gawainai numafi amam mandaꞋ maoli nandaꞋ maol andeandeꞋ. Aman anama dembinai ananinai nandandepana ma numafi ananimi mandaꞋ maoli ma neaseꞋama gwaꞋaimi amam nogota anan naꞋianai. 46 Nemaf anama dembinai ananinai notanima niefiꞋianai, ma niti aman anama nandaꞋ maol andeandeꞋ, aman anama nondanifel. 47 AeꞋ aꞋipipa endilisi. Dembinai ananinai anona nemaf nondaꞋana nope dembinai ma numafi amamaga hiami ananimi. 48 EaꞋ iꞋi aman anama nondaꞋ waf aonai okom napoma opaf ananinai atona niꞋi, ‘Dembinai aeꞋanai ina nambimb nifiꞋi ulal, owaꞋ.’ 49 Ama anan noha amam mandaꞋ maol etini neaꞋ gwaꞋaimi embel laꞋifimi noloma amam amama mahaga magaoli. 50 EaꞋ Dembinai ananinai notanima nifiꞋi anona nemaf aman anama ina niꞋi Dembinai nifiꞋi ulal, ataꞋ owaꞋ. 51 EaꞋ nohana negaloꞋmana nope noloma epes isima sambasoꞋami malogof biefimisi. Wambel anama awagoma selef sondaꞋ nalelef tilili talalaꞋ kwapeteꞋas sope.

Copyright information for `AOJFILIFITA