Matthew 25

Basef womun etina nematawa awiawai 10-peleiwa

Nemaf anama epes siowis kingdom heveni siꞋi anom basef womun etina nematawa awiawai 10-peleiwa. Anona aman naꞋi nosoꞋ anoꞋw nemataꞋw, nafeꞋ napani ma notanima nifiꞋi. EaꞋ nematawa awama awiawaiwai ohafel ofaꞋ lamifah mandandawa wafeꞋ waꞋi witi aman anama eaf oꞋwana ufiꞋi. Wanowa biawa gawa aꞋawai eaꞋ wanowa biawa ogawai. Awama gawa aꞋawai ofaꞋ lamifah malomawa wafiꞋi, eaꞋ awau ina ofaꞋai kerosin etifin nalomawa, owaꞋ. EaꞋ awama gawaiwai owala kerosin batowagof ofaꞋam etifim maloma lamifah awoumi ofaꞋam etifim wafeꞋ. Aman anama ina deiꞋ nafiꞋi ulal, ataꞋ owaꞋ. EaꞋ awau hiawai naep nimanim ambeh mahawa waꞋoh.

WaꞋoh wafeꞋ wafeꞋ ma amaneta laꞋefina wameꞋ anona maf nataga naꞋi, ‘DeiꞋ aman nasoꞋ nemataꞋwi nafiꞋi. IpeꞋ pefeꞋ petolona eaf peꞋwanai pifiꞋi.’ EaꞋ nematawa awama ohafel, wandondomba lamifah awoumi ma weafeꞋ. EaꞋ nematawa awama gawa aꞋawai wandaila awama gawaiwai waꞋipawa waꞋi, ‘IpeꞋ ataꞋ peseꞋapa kerosin tuꞋwanina. Lamifah apeꞋimi maꞋi fendagaꞋam.’ EaꞋ awau waꞋipawa waꞋi, ‘OwaꞋ. Kerosin anaeꞋ dendeꞋma apeꞋ. IpeꞋ foꞋo stua petala anona ipeꞋinai.’

10 EaꞋ awo ataꞋ wafeꞋ watala kerosin etin, aman anama nosoꞋ nemataꞋwi nafiꞋi. EaꞋ nematawa awama wandandombol wapotiꞋ, wawis ipat nomon walomana saꞋ gwaꞋaimi luꞋwami ma aman nasoꞋ nemataꞋwi, eaꞋ uta nasoꞋ.

11 EaꞋ awama wafeꞋ watala kerosin otanima wafiꞋi wagiꞋ wataga, eaꞋ waitu ofalana waꞋi, ‘Dembinai, Dembinai, ineꞋ usiꞋmapai uta.’

12 EaꞋ anan nagwamawa basef naꞋi, ‘AeꞋ aꞋipipa endilisi, aeꞋ owaꞋ eagaupei.’

13 EaꞋ Jisas naꞋi anom basef wapotiꞋ naꞋi, ‘DeiꞋ eaꞋ naꞋama etin, ipeꞋ pindumafuma andeandeꞋ. DeiꞋ main, ipeꞋ ina pegawa nambaiꞋ aeꞋ iefiꞋi.’

Basef womun etina amam mofaꞋ otamba

(Lu 19:11-27)

14 Nemaf anama aeꞋ etanima iefiꞋianai epes siowis kingdom heveni naꞋama etin siꞋi anom basef womun etina anona aman naꞋi nefeꞋ anagon. Anan nofalai amam amama mandaꞋ maola anani mafiꞋi, naseꞋama amamaga ananimi atona etina mumafiam. 15 EaꞋ anan nawalomam moni amam. Anona naseꞋana 5,000 kina, anona naseꞋana 2,000 kina, anona naseꞋana 1,000 kina. Anan naseꞋam otamba amama dendeꞋ ma gawa amamunai eaꞋ nafeꞋ. 16 EaꞋ aman anama nofaꞋ 5,000 kinai mehip etin nandaꞋ maolana eaꞋ nofaꞋ 5,000 kina wamenai wapotiꞋ. 17 EaꞋ aman anama nofaꞋ 2,000 kinai wapotiꞋ nandaꞋ maolan nofaꞋ 2,000 kina wamenai wapotiꞋ naloma fowaꞋinai. 18 EaꞋ aman anama nofaꞋ 1,000 kinai dembinai ananinai naseꞋananai nofaꞋana nafeꞋ nalaꞋagon nawa moni anama nambahoꞋwana etap.

19 Ama nogota laona nafeꞋ eaꞋ, dembinai amamunai notanima nafiꞋi. EaꞋ naꞋi ataꞋ niꞋi basef andeandeꞋ noloma amam nogawa moni anama anan naseꞋamanai. 20 EaꞋ aman anama nofaꞋ 5,000 kinai nafiꞋi eaꞋ nofaꞋai 5,000 kina anama anan nandaꞋ maol nofaꞋanai wapotiꞋ naꞋipa dembinai ananinai naꞋi, ‘Dembinai, ineꞋ naseꞋe 5,000 kina eaꞋ deiꞋ ineꞋ niti aeꞋ andaꞋ maola moni anama deiꞋ efaꞋ 5,000 kina wamenai wapotiꞋ.’

21 EaꞋ Dembinai naꞋipana naꞋi, ‘IneꞋ aman buꞋwinai nandaꞋ maol andeandeꞋ. DeiꞋ fowaꞋ ineꞋ nimafi amamaga saꞋum andeandeꞋ. DeiꞋ endaꞋena nimafi amamaga luꞋwami. IneꞋ nifiꞋi nendanifel neloma Dembinai ineꞋinai.’

22 EaꞋ aman anama nofaꞋ 2,000 kinai nafiꞋi naꞋipana naꞋi, ‘Dembinai, ineꞋ niti. IneꞋ naseꞋe 2,000 kina, deiꞋ andaꞋ maola moni anama, efaꞋ 2,000 kina wamenai wapotiꞋ.’

23 EaꞋ Dembinai naꞋipana naꞋi, ‘IneꞋ aman buꞋwinai nandaꞋ maol andeandeꞋ. FowaꞋ ineꞋ nimafi amamaga saꞋumi andeandeꞋ. DeiꞋ endaꞋena nimafi amamaga luꞋwami. IneꞋ fiꞋi nendanifel neloma Dembinai ineꞋinai.’

24 EaꞋ aman anama nofaꞋ 1,000 kinai anan wapotiꞋ nafiꞋi naꞋipa Dembinai ananinai naꞋi, ‘Dembinai, aeꞋ egawa ineꞋ aman laꞋifinai nagi amamaga naꞋi ineꞋimi atom. Aof anona aman nawamanai anama ineꞋ nafeꞋ nalaꞋam. EaꞋ anona etap anona aman nowaha olelembanai, ineꞋ nafiꞋi nagiam. 25 AeꞋ okom napoma ineꞋ. NaꞋama aeꞋ umbamahe ma ineꞋ, deiꞋ afeꞋ alaꞋagon ambahoꞋam 1,000 kina ineꞋinai ambohoꞋana nape etap. Amama amamaga ineꞋimi eaꞋ ineꞋ tanima faꞋamo.’

26 EaꞋ Dembinai ananinai nagwamana basef naꞋipana naꞋi, ‘IneꞋ nandaꞋ maoli, ineꞋ aman aowinai endilisi. IneꞋ alaꞋuta nainai. Endilisi ineꞋ negawa aeꞋ alaꞋ gwaꞋaimi anona aman nawam aof ananinai, afeꞋ atopaꞋ wit anona etap anona amani. 27 IꞋi naꞋama, deiꞋ nefaꞋana nembeꞋana benga aeꞋ etanima ifiꞋi efaꞋana neloma anona wamenai wapotiꞋ. 28 EaꞋ ipeꞋ dalombana 1,000 kina aman anama peseꞋanana nefeꞋma aman anama nofaꞋ moni 10,000 kinai.’

29 DeiꞋ main? Emi egafis sahapila amamaga amama nambimb sofaꞋ anom wamenai wapotiꞋ ma sefaꞋ hiami. EaꞋ emi egafis amamaga aꞋasi, amamaga kwaiyoꞋum esis sahapilami, amama nambimb endalombasam esis. 30 Aman anama wafinai ipeꞋ pekwahona nefeꞋ nuwis andeꞋ akotiguma endilisi. Wambel anama awagoma selef sondaꞋ nalelef tilili talalaꞋ kwapeteꞋas sapoma.

Dembinai nataga epen endilisinai owagama newaloga epes hiesi siꞋi sawaloga sipsipi meme maitu deindei

31 Nemaf anama aeꞋ ataga epen endilisiwei iefiꞋi ilumai pepel howalagon aeꞋanai, eaꞋ amam ensel hiami molome mifiꞋi. Ama nemaf anama aeꞋ epe etoma balata luꞋunai aeꞋanai ma howalagon mafiꞋi heveni. 32 EaꞋ amam nematawa hiesi sape etap hiagoma sifiꞋi sope naep aeꞋimi. EaꞋ aeꞋ ihihiꞋas endaꞋas situ biefis, siꞋi aman numafi sipsipi nasifaꞋ sipsip mafeꞋ anagon, meme mafeꞋ anagon. 33 EaꞋ endaꞋ epes sefeꞋ situ waꞋol lagel kwahisinai aeꞋanai siꞋi sipsip, eaꞋ epes isima God nondaiwaꞋmasi situ waꞋol lagel eganai siꞋi meme.

34 EaꞋ aeꞋ dembiwei king iꞋipa esis isima sape lagel kwahisinai iꞋi, ‘IpeꞋ Ahalome aeꞋanai nofaloꞋmepa ma pendanifel, ipeꞋ piwis kingdom Ananinai pefaꞋ amamaga amama ipeꞋimi fowaꞋ etap owaꞋ ataꞋ neatagai maꞋomipei. 35 DeiꞋ main, ipeꞋ fowaꞋ pati aeꞋ nolomahe ape ipeꞋ paseꞋe gwaꞋaimi. Pati iap naseꞋe, paseꞋe embel aꞋ embel. AeꞋ afiꞋi siꞋi anona wambelinai ipeꞋ pefaꞋe afeꞋ ifagw ipeꞋimi. 36 EaꞋ aeꞋ luwaguf maim aꞋe, ipeꞋ paseꞋeam andaꞋam eaꞋ awasiwi ipeꞋ pimafi andeandeꞋ. AeꞋ ape andaꞋ kalabus, ipeꞋ pafoꞋo patolowe.’

37 EaꞋ esis isima buꞋwasi sogwa basef ananimi siꞋi, ‘Dembinai, deiꞋ maina nemaf apeꞋ mati ineꞋ nolomahena maseꞋena gwaꞋaimi ineꞋ? Maina nemaf ineꞋ eap maseꞋena apeꞋ maseꞋena embel? 38 EaꞋ maina nogota apeꞋ matilina siꞋi anona wambelinai apeꞋ mofaꞋena mafiꞋi ifagw apeꞋimi? EaꞋ maina nemaf apeꞋ matilina lowaf aꞋena, maseꞋena lowaf? 39 EaꞋ maina nemaf mati awes nandaꞋena nape kalabus mafeꞋ matilina?’

40 EaꞋ aeꞋ dembiwei king egwamasa basef iꞋi, ‘AeꞋ aꞋipipa endilisi! Maim opeh buꞋwami ipeꞋ pandaꞋama pagiambama esis sahin owan aeꞋasi falafisi agof aꞋasi, amama ipeꞋ ina pandaꞋmasam esis etis, owaꞋ. PandaꞋmeam aeꞋ wapotiꞋ.’

41 EaꞋ aeꞋ iꞋipa esis saitu lagel eganai waꞋol wapotiꞋ iꞋipas, ipeꞋ siꞋamae foꞋo. God nandaiwaꞋmepa naꞋi ipeꞋ epes aopei. ‘IpeꞋ foꞋo wambel aonai nif luꞋwami maꞋoma. Nif anama Ahalome nandaꞋam mandandombol maꞋoma aman aonai Satan naloma ensel ananimi atom. 42 DeiꞋ main, ipeꞋ fowaꞋ pati aeꞋ nolomahe ape, ipeꞋ ina paseꞋe gwaꞋaimi, owaꞋ. EaꞋ aeꞋ eap maseꞋema embel, ipeꞋ ina paseꞋe embel aꞋ embel, owaꞋ. 43 EaꞋ aeꞋ siꞋi epen anagon lauguniwei, eaꞋ ipeꞋ owaꞋ pefaꞋe pefeꞋ ifagw ipeꞋimi, owaꞋ. EaꞋ lowaf aꞋe ipeꞋ ina paseꞋe lowaf, aeꞋ awes nandaꞋe, ape andaꞋ kalabus eaꞋ ipeꞋ ina pafoꞋo patolowe, owaꞋetin.’

44 EaꞋ esis wapotiꞋ sogwa basef sohaliꞋ aeꞋ siꞋi, ‘Dembinai, deiꞋ maina nemaf apeꞋ mati ineꞋ gwaꞋaimi embel aꞋena nolomahena, ineꞋ epen anagon lauguninai, ineꞋ lowaf aꞋena awes nandꞋena, nape nandaꞋ kalabus, eaꞋ apeꞋ owaꞋ mofoꞋo meatilina?’

45 EaꞋ aeꞋ egwamasa basef esis iꞋi, ‘AeꞋ aꞋipipa endilisi, maina waf owaꞋ peandaꞋana enin epen inima falafini agel aꞋani, amama eaꞋ naꞋama etin ina pandaꞋmeana aeꞋ wapotiꞋ, owaꞋetin.’ 46 EaꞋ epes isima anona nemaf sefeꞋ sofaꞋ amamaga awami mape laꞋelaꞋef hihif. EaꞋ epes isima buꞋwasi anona nemaf owagama sofaꞋ ambal namunai sefeꞋ sope anama sope andeandeꞋ laꞋelaꞋef hihif.”

Copyright information for `AOJFILIFITA