Matthew 26

Amam dambami agufumi maꞋi basef mandameꞋmama moha Jisas neagaꞋ

(Mk 14:1-2; Lu 22:1-2; Jo 11:45-53)

Jisas nawalipasa basef amama ma hiꞋalam, ama nogota anama anan naꞋipa alupumi ananimi naꞋi, “IpeꞋ pegawa, nimeguf biam atom ataꞋ mape ma nemaf anama sogwaꞋ gwaꞋaimi luꞋwami saꞋi Pasova eaꞋ neataga. Nemaf anama anona aman nowalapa aeꞋ ataga epen endililsiwei ma anom amam naumbih mundi ieil lawag usiꞋinai tuꞋwanainai mohe eagaꞋ.”

Nemaf anama amam pris dambami maloma agufumi esis Judai munduwaꞋanima mape ipat Kaiafasi, anan pris dembinai nape naliꞋma pris hiami. EaꞋ maꞋi basef mandameꞋmama mefeꞋ mondambahoꞋ mombaloꞋ Jisas mohana neagaꞋ. EaꞋ amam mandaiwaꞋma meambaloꞋana nemaf anama sandaꞋ gwaꞋaimi amama luꞋwami. NaꞋama epes hiesi ukup aom eaꞋ sohafel sondaꞋ wandaf.

AnoꞋw nemataꞋw kwakoloꞋ sanda newala balaga Jisasi

(Mk 14:3-9; Jo 12:1-8)

Nemaf anama Jisas nape Betani nape ipat anona aman Saimon, fowaꞋ awes aonai nandaꞋ alop ananinai namboꞋ, deiꞋ amboꞋona. EaꞋ anoꞋw nemataꞋw kwafiꞋmai anan kwahapila anona botol sandaꞋana siꞋi owap, embel sanda alogw buꞋwami maꞋanai satalona otamba luꞋwami nala botol anama. EaꞋ kwakoloꞋw sanda anama newala balaga Jisasi ma tebol anan natomama.

Amam alupumi ananimi mati naꞋama, ukup amamumi aom endilisi. EaꞋ maꞋi, “DeiꞋ maina akwaꞋw kwahambombaga sanda anama nafeꞋ etin? IꞋi afaꞋ ofaꞋana enis epes sotalona moni hianai ma afaꞋ ofaꞋana osoꞋ epes isima kwahusa gwaꞋaimi maim, andeandeꞋ. OwaꞋetin.”

10 EaꞋ Jisas nogawa ukup amamumi, naꞋipam naꞋi, “DeiꞋ maina ipeꞋ ukup aom mapoma nemataꞋw akwama? OwaꞋ. AkwaꞋw kwandaꞋ waf buꞋunai ma aeꞋ. 11 Isima kwahusa gwaꞋaimi maim sape salomepa nimeguf hiami. EaꞋ aeꞋ ina ataꞋ elomepa epe nimeguf hiami, owaꞋ. 12 NemataꞋw akwama kwakoloꞋwa sanda anama ma alop aeꞋanai kwandaꞋ amama kondolaꞋwifa felefeleꞋma esis seawe hiꞋagif. 13 Endilisi aeꞋ aꞋipipa, ganima etap wambel hiagoma anona nemaf siꞋipasa basef amama buꞋwami Godi, siꞋipasa basef akoꞋumi wapotiꞋ ma ukup meapoma waf buꞋunai akwaꞋw kwandaꞋmeanai.”

Judas naꞋi basef laꞋifimi naloma amam naumbih moha Jisas neagaꞋ

(Mk 14:10-11; Lu 22:3-6)

14 Nogota anama anona alupumi Jisasi 12-peleim agilinama Judas Kariotinai nafeꞋma amam pris hiami dambami. 15 EaꞋ nahaliꞋam naꞋi, “IpeꞋ paꞋi peseꞋe main petalowe ma ihiꞋambepana?”

EaꞋ amam matalifa moni silva 30-peleim maseꞋana.
16 EaꞋ nogota anama atona nohafel nandaꞋam laꞋelaꞋef nagolopa anona eafa nihiꞋambama Jisas amama meambaloꞋana.

Jisas naꞋ gwaꞋaimi luꞋwami saꞋi Pasova naloma alupumi ananimi

(Mk 14:12-21; Lu 22:7-14, 21-23; Jo 13:21-30)

17 Nemaf anama saliꞋ saꞋ anom gwaꞋaimi saꞋi Pasova esis saꞋ bret anama owaꞋ neatef luꞋunai eaꞋ amam alupumi ananimi mafiꞋmai anan mahaliꞋana maꞋi, “IneꞋ naꞋi afaꞋ ofeꞋ ondondomba ipat eti ma ineꞋ neaꞋ gwaꞋaimi amama?”

18 EaꞋ naꞋi, “IpeꞋ pefeꞋ taun, pefeꞋma anona aman piꞋipana piꞋi, ‘Dembinai Tisa naꞋi, “Nemaf dahandahama God nandandepamianai eaꞋ felefeleꞋ. AeꞋ aꞋi eaꞋ Pasova anama eloma alupumi aeꞋami ope ipat ineꞋinai.” ’ ”

19 EaꞋ amam alupumi ananimi mandaꞋam naꞋama siꞋi anan naꞋipam eaꞋ mandondomba gwaꞋaimi Pasova. 20 EaꞋ owamb anan nape nagwaꞋ gwaꞋaimi tebol naloma alupumi ananimi 12-peleim. 21 EaꞋ amam mape maꞋ gwaꞋaimi etin, Jisas naꞋipam naꞋi, “AeꞋ aꞋipipa endilisi, anona afaꞋinai atuwasi nefeꞋ nihiꞋamba amam naumbiha aeꞋ efeꞋ eapoma.”

22 EaꞋ ukup amamumi nimanim endilisi, mohafel mahaliꞋana atona etin maꞋi, “Dembinai, aeꞋ o emi?”

23 EaꞋ anan nagwamama basef naꞋi, “Aman anama deiꞋaol nalome wahapila bret walata dis, anan eaꞋ maꞋuna, anama atuwasi nowalapa aeꞋ ma naumbih aeꞋami. 24 AꞋe, ataga epen endilisiwei, atuwasi enis epes sehe eagaꞋ siꞋi Buk Baibel naꞋiama aeꞋ. EaꞋ aman anama nowalapa aeꞋ ma naumbih, anan uwahipina endilisi. Nambimb nimanimi awami endilisi motagamana. FowaꞋ mamaꞋwana owaꞋ ataꞋ kolanai, andeandeꞋ. Ama anan ina notagama amamaga nimanimi awami. OwaꞋetin.”

25 EaꞋ aman anama Judas atuwasi nowalapa Jisas amam naumbih anan naꞋipa Jisas naꞋi, “Dembinai Tisa, aeꞋ o emi?”

EaꞋ Jisas nagwamana basef naꞋi, “IneꞋ etina naꞋiam.”

Jisas naseꞋama gwaꞋaimi komunion alupumi ananimi 12-peleim

(Mk 14:22-26; Lu 22:15-20; 1 Ko 11:23-25)

26 Jisas nalomam ataꞋ mape maꞋ gwaꞋaimi etin, nafela anona bret, nandaꞋ beten nanifela God, nawalona naseꞋam naꞋipam naꞋi, “IpeꞋ felana peaꞋana. Bret anama alop aeꞋanai.”

27 EaꞋ nafela anona kap embel wain nalanai nanifela God, naseꞋam naꞋipam naꞋi, “IpeꞋ hipei gwaꞋam etin. 28 Embel amama esimbel aeꞋami mandaꞋ basef amama Godi maꞋi endilisimi atomi mataga laꞋifim. Esimbel amama aeꞋ ekoloꞋwama God nokwahomasa waf aonai epes hiesi sandaꞋanai. 29 AeꞋ aꞋipipa, ina ataꞋ etanima eaꞋ embel wain wapotiꞋ, owaꞋ. AeꞋ efeꞋ etaga wambel Ahalomei, eaꞋ anona wain dambainai elomepa anama.”

30 Amam mandaꞋ anona awaf eaꞋ mawisi mafeꞋ mondowasaꞋ halaf lawah oliv motawama.

Jisas naꞋi atuwasi Pita nombahoꞋ agel ananinai nowaꞋ alafuga anan

(Mk 14:27-31; Lu 22:31-34; Jo 13:36-38)

31 EaꞋ Jisas naꞋipam naꞋi, “Atuwasi owamb anaeꞋ ipeꞋ pindaiwaꞋma pembaleꞋefa aeꞋ pekwahowe. DeiꞋ main, fowaꞋ gani Baibel naꞋi naꞋama naꞋi, God naꞋi,

‘Anona nemaf owagama gani, aeꞋ eha aman anama numafi sipsipi nogaꞋ. EaꞋ sipsip amama mofaꞋ mefeꞋ atona etin.’
32 EaꞋ owaꞋetin. Nambimb aeꞋ etanima ehafel wapotiꞋ iliꞋipa efeꞋ etap hiagoma Galili.”

33 EaꞋ Pita nagwa basef naꞋama naꞋi, “IꞋi endilisi amam alupumi ineꞋimi hiemi meambaleꞋefa ineꞋ miꞋi mokwahena, hapaimi, aeꞋ embaleꞋefa ineꞋ laꞋifiwi ina atuwasi ikwahina, owaꞋ.”

34 EaꞋ Jisas nagwamana basef naꞋi, “AeꞋ aꞋipina endilisi, deiꞋ owamb anaeꞋ awata ata owaꞋ nondoꞋam, ineꞋ nembahoꞋ agel aeꞋanai niꞋi wenif niꞋi, ‘AeꞋ owaꞋ egawa Jisase.’ ”

35 EaꞋ Pita naꞋipana naꞋi, “OwaꞋetin. IꞋi esis soha afaꞋ biafa ogaꞋ etin, aeꞋ ina embahoꞋ agel ineꞋinai, owaꞋetin.”

EaꞋ alupumi hiami Jisasi maꞋiam naꞋama etin hiꞋalam.

Jisas nafeꞋ nawis anagon Getsemani sawa lawah oliv motawama nandaꞋ beten

(Mk 14:32-42; Lu 22:39-46)

36 EaꞋ Jisas naoꞋwa alupumi ananimi mafeꞋ etin anagon Getsemani lawah hiami oliv motawama. EaꞋ naꞋipam naꞋi, “IpeꞋ pepe naꞋae, aeꞋ efeꞋ gani waꞋol endaꞋ beten.”

37 EaꞋ anan naoꞋwa Pita naloma Sebedi batausana Jemsi Jon naoꞋwam mafeꞋ. EaꞋ nameꞋ opaf ananinai nimanina kwapeteꞋ endilisi. 38 EaꞋ naꞋipam naꞋi, “Opaf aeꞋanai nimanina endilisi ma aeꞋ egaꞋ. IpeꞋ pepe naꞋae pindumafuma pepe pehafa aeꞋ eatanimani.”

39 EaꞋ anan nandamboma nafeꞋ feleꞋ nowa nambeꞋ opaf notawa nandaꞋ beten naꞋi, “Ahalome AeꞋinai, iꞋi ineꞋ niꞋi aꞋe, nekwahome nimanimi amama. EaꞋ ineꞋ nila okom ineꞋinai atona, AeꞋ owaꞋ.”

40 NahaliꞋana eaꞋ, nehafel notanima nafeꞋma alupumi ananimi mapoma, nati amam maꞋoh magaꞋ mafeꞋ. EaꞋ nofala Pita naꞋi, “IpeꞋ laꞋifipa pepe pehafa aeꞋ o owaꞋ? Nogota aꞋipipa aꞋi pepe pehafa aeꞋ ina laona, owaꞋ. Nogota bandana siꞋi aua atotona. 41 IpeꞋ pindumafuma andeandeꞋ pepe pendaꞋ beten. NaꞋama amamaga meagwambipei motagama ipeꞋ. Endilisi ambagof ipeꞋmi maꞋi aꞋe ma pendaꞋ beten, eaꞋ alop nimanina alaꞋuta naepa.”

42 EaꞋ anan notanima nafeꞋma bif nandaꞋ beten naꞋi, “Ahalome aeꞋanai, iꞋi owaꞋ anona eaf aeꞋ indihiꞋama nimanimi amama, eaꞋ hapaimi, aeꞋ efaꞋam. IneꞋ nila okom ineꞋinai atona.”

43 Anan nahaliꞋana eaꞋ nandamboma notanima nafiꞋi bif amam mapoma nati amam ataꞋ maꞋoh etin. DeiꞋ main, naep amamumi nimanim. 44 EaꞋ nakwahom notanima nafeꞋ nandaꞋ beten wenif. Beten anama atona doꞋok naliꞋ nandaꞋanai, notanima nandaꞋana wapotiꞋ.

45 EaꞋ notanima nafiꞋmai amam mapoma naꞋipam naꞋi, “IpeꞋ ataꞋ papoma nomaꞋw paꞋoh etin? PemeꞋ! Nogota aeꞋanai nataga. DeiꞋ nemaf anaeꞋ anona aman aonai nifiꞋi nulumai anom amam awami mufiꞋi mowaꞋ AeꞋ ataga epen endilisiwei. 46 Hafel! AfaꞋ ofeꞋ uti aman anama nihiꞋambama aeꞋ ma naumbih aeꞋami deiꞋ nafiꞋi.”

Judas nawalapa Jisasa naumbiha mombaloꞋana mofaꞋana mofeꞋ

(Mk 14:43-50; Lu 22:47-53; Jo 18:3-12)

47 Jisas ataꞋ naitu naꞋipam etin, Judas, anona amam 12-peleim Jisasi, anan nafiꞋi nalumai amam hiami mahapila bainahi belep. Amam pris dambami malumai amam agufumi dambami esis Judai masapaꞋam mafiꞋi. 48 EaꞋ aman anama nowalapa Jisas, naliꞋ naꞋipam nandaꞋ ikwaf nihiꞋambam naꞋi, “Atuwasi ipeꞋ piti aeꞋ iesisiꞋ dalogwanai, aman anama eaꞋ Jisas maꞋuna. IpeꞋ pembaloꞋana pewaꞋana.”

49 EaꞋ anan nafeꞋma Jisas mehip naꞋi, “Owamb buꞋunai, Dembinai Tisa.” EaꞋ nasisiꞋ dalogwana.

50 EaꞋ Jisas naꞋipana naꞋi, “Alupinai, amamaga ineꞋ nafiꞋi ma naꞋi nendaꞋami, daꞋam mehip.”

EaꞋ amam mafiꞋi felefeleꞋma Jisas mowasaꞋ lagof mombaloꞋana.
51 EaꞋ anona aman nape naloma Jisas, nala lagel nagiai bainat ananinai naha anona aman nandaꞋmana maola pris dembinai nape naliꞋma pris hiami, natopaꞋ aliga ananinai peleꞋatana nowa.

52 EaꞋ Jisas naꞋipana naꞋi, “Wala bainat notambel nowala napoma. Emi egafis sapaꞋ bainah, anona nemaf bainah mohas sogaꞋ. 53 IneꞋ negawa pepel Ahalomei o owaꞋ? IꞋi aeꞋ ihaliꞋana, Anan naseꞋe ensel ananimi hiami endilisi mehip mikilaꞋ amam soldia hiami wambotagw 12-peleim. OwaꞋ. 54 IꞋi aeꞋ endaꞋ waf anama, atuwasi basef amama fowaꞋ God naꞋiam mape buk Baibeli ina mataga alihim dendeꞋma amam mifiꞋi mombaleꞋe, owaꞋ.”

55 EaꞋ Jisas naꞋipa esis amam nematawa hiesi naꞋi, “IpeꞋ pefaꞋai bainahi belep pafiꞋi siꞋi pafiꞋi paꞋi pewaꞋ anona aman aonai napaꞋ naloma gavmani? Nimeguf hiami aeꞋ ape alomepa ipat luꞋunai Godi awalapa basef buꞋwami esis amam nematawa hiesi eaꞋ ipeꞋ ina pembaleꞋe. 56 EaꞋ deiꞋ amamaga amama ipeꞋ pandaꞋami mataga dendeꞋma basef amama fowaꞋ God naꞋipa amam profet mandaꞋam mail buk mataga endilisi.”

EaꞋ alupumi ananimi hiami makwahona mafaꞋ mafeꞋ hiꞋalam.

Amam mofaꞋ Jisas mafeꞋ mandaꞋmana basefa amam dambami Juda

(Mk 14:53-65; Lu 22:54-55, 63-71; Jo 18:13-14, 19-24)

57 Amam amama mombaloꞋ Jisas mofaꞋana mafeꞋ ipat anona pris dembinai nape naliꞋma pris hiami Kaiafas. EaꞋ amam dambami mawalipasa miꞋuli Godi maloma agufumi esis Judai maliꞋ mafiꞋi mundawaꞋanima mape. 58 EaꞋ Pita ina nalomam nafeꞋ etin, owaꞋ. Anan nape lougun nagiꞋmam nafeꞋ nataga endalelemb nawis ipat dembinai prisi nafeꞋ nape naloma amam polisman mapoma nif. Anan naꞋi nope niti atuwasi maim meataga.

59 EaꞋ amam pris dambami maloma amam dambami Juda mumafi koti, amam hiami maꞋi mogolopa enis epesa sombasoꞋma Jisas ma anom basefa mohana neagaꞋ. 60 EaꞋ epes hiesi sataga saꞋi basef basoꞋmaimi mafeꞋma Anan. EaꞋ esis ina satagama anom basef endilisimi ofagema ma mohana neagaꞋ, owaꞋ. EaꞋ anom amam biam mataga 61 maꞋi, “Aman anama naꞋi anom basef naꞋi, ‘AeꞋ laꞋifiwei ma etalona ipat luꞋunai Godi ma etanima elaꞋana wapotiꞋ nimeguf wanom.’ ”

62 EaꞋ pris anama dembinai naitu nahaliꞋ Jisas naꞋama naꞋi, “IneꞋ negwa basef amama o owaꞋ? DeiꞋ maina amam maꞋipina basef naꞋama?”

63 EaꞋ Jisas ina naꞋi anom basef, owaꞋ.

EaꞋ pris anama naꞋipana naꞋi, “AeꞋ aꞋipina endilisi ma agel dembinai Godi nape laꞋelaꞋef hihif, ineꞋ kipa apeꞋ. IneꞋ Krais nogalomana Godi nandandepena nasapaꞋena nafiꞋi o owaꞋ?”

64 EaꞋ Jisas naꞋi, “IpeꞋ paꞋiam eaꞋ maꞋum. EaꞋ aeꞋ aꞋipipa, anona nemaf ipeꞋ piti aeꞋ ataga epen endilisiwei, epe lagel daꞋisinai Godi. Epe otaga ilif etanima ifiꞋi petolowe.”

65 Jisas naꞋiam naꞋama eaꞋ, pris anama okom wandafuna eaꞋ nahapeꞋ klos amama anan nalami naꞋiam naꞋi, “Anan nandaꞋ dembinai God findiwana ma basef awami! ApeꞋ ina ataꞋ mofalai enis epes wapotiꞋ sifiꞋi siꞋi anom basefa anan, owaꞋ. Anan naꞋipana basef awami ma God, eaꞋ amama deiꞋ pameꞋanamam eaꞋ. 66 IpeꞋ ukup mape maꞋimama?”

EaꞋ amam hiami magwamana basef maꞋi, “Anan nandaꞋ waf aonai eaꞋ andeandeꞋma neagaꞋ.”

67 EaꞋ amam misiꞋwafa amaga Jisasi mahana lagof amamumi. EaꞋ anom nakolaombana. 68 EaꞋ masopamana naep ananimi maꞋi, “IneꞋ Krais God nandandepena nasapaꞋena nafiꞋi, ineꞋ niꞋi basef siꞋi anona profet naꞋiami newalapa emi nahena.”

Pita naꞋi, “AeꞋ owaꞋ egawa Jisase.”

(Mk 14:66-72; Lu 22:56-62; Jo 18:15-18, 25-27)

69 Pita tol nape endalelemb nomon nape ipat andeꞋ. EaꞋ anoꞋw nemataꞋw kwandaꞋ maoli kwafiꞋi felefeleꞋ ma anan eaꞋ kwaꞋipana kwaꞋi, “IneꞋ wapotiꞋ nape naloma Jisas etap hiagoma Galili.”

70 EaꞋ Pita nambahoꞋ agel Jisasi ma naep isima hiesi naꞋi, “AeꞋ ina egawa basef amama ineꞋ naꞋiami, owaꞋ.”

71 EaꞋ nafeꞋ naitu indalelemb nomon felefeleꞋma uta, anoꞋw nemataꞋw kwatolona wapotiꞋ kwaꞋipa esis amam nematawa sape felefeleꞋ kwaꞋi, “Aman anama anan nape naloma Jisas Nasaretinai.”

72 EaꞋ Pita nambahoꞋ agel Jisasi wapotiꞋ eaꞋ naꞋi, “Endilisi gani ilif, aeꞋ ina egawa aman anama.”

73 Nogota bandana nafeꞋma eaꞋ, anom amam maitu felefeleꞋ mafiꞋmai Pita maꞋipana maꞋi, “Endilisi, ineꞋ aman naloma esisi. Diga ineꞋinai nawalapena alihina.”

74 EaꞋ deiꞋ Pita nehafel naꞋi basef laꞋifimi naꞋi, “IꞋi basef aeꞋami ina endilisimi, aeꞋ aꞋi God neheꞋ egaꞋ. Endilisi gani ilif, aeꞋ ine egawa aman anama, owaꞋ.”

Anan naꞋiam eaꞋ, mehip awata nandaꞋam.
75 EaꞋ Pita okokoma basef nambatiꞋ Jisas naꞋipanami naꞋi, “Awata owaꞋ ataꞋ neandaꞋam, ineꞋ nembasoꞋmas niꞋiam wenif niꞋi, ‘IneꞋ owaꞋ negawa Jisase.’ ”

EaꞋ Pita nawisi nafeꞋ andeꞋ nalef mehip endilisi.

Copyright information for `AOJFILIFITA