b- Mt 27:48Sam 69:21
c- Mt 27:51Eks 26:31-33Hi 10:19-20
d- Mt 27:55Lu 8:2,3
e- Mt 27:56Mt 20:20
f- Mt 27:58Diu 21:22,23

Matthew 27

Amam mofaꞋ Jisas nafeꞋma gavman dembinai Pailat

(Mk 15:1; Lu 23:1-2; Jo 18:28-32)

EaꞋ lala kuhimbita atona amam pris dambami hiami maloma agufumi esis Judai maꞋi basef mandameꞋmama moha Jisas neagaꞋ. Amam mowaꞋana mofaꞋana mafeꞋ maseꞋana gavman dembinai Pailat.

Judas nandaha nail mandof eaꞋ afuna

(Ap 1:18-19)

DeiꞋ aman anama Judas nawalapa Jisasa amam naumbih nati amam mandaꞋ basef mahana Jisasa neagaꞋ. EaꞋ nati amam mahana mandaꞋ amamaga amama, eaꞋ nofaꞋ nimanimi luꞋwami endilisi. EaꞋ deiꞋ anan notanima nowambela moni silva anama 30-peleina nafeꞋma amam pris amama dambami maloma agufumi esis Judai. EaꞋ naꞋi, “AeꞋ andaꞋ waf aonai. DeiꞋ main, awalapa aman anama buꞋunai, owaꞋ nondaꞋ waf aonai, atuwasi neagaꞋ.”

EaꞋ amam maꞋi, “Amama ina ofagema afaꞋimi, owaꞋ. Amama eaꞋ ofagema ineꞋimi atom.”

EaꞋ Judas nakwaha moni silva anama ipat luꞋunai Godi nomon, nafeꞋ anagon nandaha nail mandof eaꞋ afuna.

Amam pris amama dambami mafela moni anama mofaꞋana maꞋi, “Moni anama anan natala aman anama afaꞋ wahana nagaꞋi. EaꞋ afaꞋ ina ombeꞋ moni anama neloma moni naꞋoh ipat luꞋunai Godi, owaꞋ.”

EaꞋ amam maꞋi anom basef mandameꞋmam ama moni anama mandaꞋana matala anona etapa anona aman nalaꞋ malohi. EaꞋ mofaꞋ etap anama ma mondaꞋ hiꞋagilifa sowa epes isima lauginasi safiꞋi salomas sape sagaꞋi. EaꞋ deiꞋ sofala agiliguma saꞋi, “Etap esimbel matalanai.”

Agel anama ma etap anama deiꞋ nandape.
EaꞋ anom basef fowaꞋ gani God nihiꞋamba anona aman profet Jeremaia nandaꞋami, anama deiꞋ mataga alihim mandawalap. Basef amama maꞋiam naꞋama maꞋi,

“Amam mofaꞋ otamba silva 30-peleim, esis Juda sandandepam ma aman anama.
10 EaꞋ moni anama satala anona etapa anona aman nalaꞋ malohi, siꞋi Dembinai naꞋipa aeꞋ mehip.”

Jisas nafeꞋ naituma naep Pailati eaꞋ Pailat nahaliꞋana

(Mk 15:2-5; Lu 23:3-5; Jo 18:33-38)

11 Amam mofaꞋ Jisas mafeꞋ naitu naep dembinai gavman Pailati eaꞋ Pailat nahaliꞋana naꞋi, “IneꞋ king dembinai esis Judai o owaꞋ?”

EaꞋ Jisas nagwamana basef naꞋi, “Basef amama ineꞋ naꞋiami endilisimi.”

12 EaꞋ amam pris amama dambami maloma agufumi esis Judai mambasoꞋmana ma basef hiami, eaꞋ anan ina nagwamam anom basef, o owaꞋ.

13 EaꞋ Pailat nahaliꞋana naꞋi, “IneꞋ nameꞋ basef amama hiami mandaꞋmenami o owaꞋ?”

14 EaꞋ Jisas ina nagwamana anom basef Pailat, owaꞋ. EaꞋ dembinai gavman gegelalasana kwapeteꞋ.

Pailat naꞋi soha Jisas nail lawag usiꞋinai tuꞋwanainai

(Mk 15:6-15; Lu 23:13-25; Jo 18:39-19:16)

15 Nogota anama gavman anama dembinai waf ananinai naꞋama. Afagof hiami ma nemaf anama sandaꞋ gwaꞋaimi luꞋwami amama saꞋi Pasova, anan nakwaha enin epen nandaꞋ kalabusi nafeꞋ wafifina. Emi epen esis amam nematawa hiesi sandandepanai, dembinai gavman naꞋi aꞋe nakwahona nafeꞋma esis wafifina. 16 Nemaf anama anona aman nandaꞋ waf aonai nape nandaꞋ kalabus, agilinama Barabas. Aman anama epes hiesi sagawa anan nandaꞋ waf aonai endilisi. 17 EaꞋ esis amam nematawa sunduwaꞋanima saitu. Pailat nogawa amam dambami esis Judai kowalama epes hiesi saila basef Jisasi ukup aom atom mapomana deiꞋ mandaꞋ kotimana. Amama atom deiꞋ nahaliꞋas naꞋi, “IpeꞋ paꞋi aeꞋ ekwaha emi epen nekwaha kalabus nefeꞋmago ipeꞋ? Ekwaha Barabas o Jisas, esis saꞋi Krais Dembinai?”

19 Pailat nape ipat anama sandaꞋ kotanai, wauluꞋmana ananiꞋwi kwandaꞋ basef mafiꞋmai anan kwaꞋi, “Ina nendaꞋ anom amamaga awami ma aman anama buꞋunai, owaꞋ. AeꞋ doꞋok aꞋoh owamb andondoꞋah atolona eaꞋ efaꞋ nimanimi luꞋwami ma Anan.”

20 EaꞋ amam pris amama dambami maloma anom agufumi esis Judai mafela ukup ma esis amam nematawa hiesi ma sohaliꞋ Pailata nokwaha Barabas, eaꞋ soha Jisas nogaꞋ.

21 EaꞋ Pailat naꞋipas wapotiꞋ naꞋi, “Amam amama biam, ipeꞋ paꞋi aeꞋ ekwaha emi epen nefeꞋmago ipeꞋ?”

EaꞋ saꞋipana saꞋi, “Barabas.”

22 EaꞋ Pailat nahaliꞋas naꞋi, “Aman anama Jisas ipeꞋ paꞋi Kraisi, ipeꞋ paꞋi aeꞋ iꞋimamana?”

EaꞋ esis hiesi saꞋi, “Undana nil lawag usiꞋinai tuꞋwanainai!”

23 EaꞋ Pailat nahaliꞋas naꞋi, “DeiꞋ main? Anan nandaꞋ maina waf aonai?”

EaꞋ esis saꞋi mehip endilisi saꞋi, “Undana lawag hana afuna!”

24 EaꞋ Pailat nogawa basef ananimi ina laꞋifim nahianas, owaꞋ. NaꞋama esis sohafel sondaꞋ wandaf luꞋunai. EaꞋ Pailat nolai embel nasaꞋopa lagof ananimi ma naep esis amam nematawa hiesi nihiꞋambas naꞋiam naꞋi, “AeꞋ ina ati ofagema owaꞋetina eha aman anama nogaꞋ, owaꞋ. Ofagema amama ipeꞋimi atom.”

25 EaꞋ amam nematawa hiesi sagwa basef saꞋi, “EaꞋ ofagema amama mondafiꞋmai apeꞋ moloma awasi apeꞋisi.”

26 EaꞋ Pailat nakwaha Barabas nafeꞋma esis. EaꞋ naꞋipa amam soldia ma moha Jisas mofaꞋana mafeꞋ mundana lawag usiꞋinai tiꞋwanainai.

Amam soldia mandaꞋ salamala basef awami ma Jisas mahana mandaꞋam mondolaꞋwifana siꞋi anona dembinai king

(Mk 15:16-20; Jo 19:2-3)

27 EaꞋ amam soldia Pailati mofaꞋ Jisas mawisi ipat amam gavmani luꞋunai. EaꞋ mofala anom soldia hiami mafiꞋi munduwaꞋanima ma anan. 28 EaꞋ mowalia luwaguf maim ananimi malamana anona saket akwahinai. 29 EaꞋ mowaloꞋmana anona mandof higatagunai, malasanaꞋofana siꞋi hat mowaloꞋmanana balaga ananinai. EaꞋ maseꞋana anona alifita nahapilana lagel daꞋisinai ananinai. Amam mindiwa nembawa motawa felefeleꞋma anan, mandaꞋ salamalana maꞋi basef findiwaimi ma anan maꞋi, “Nemaf buꞋunai, ineꞋ king dembinai esis Judai!”

30 EaꞋ misiꞋwafana mandalombana alifita anama mohana timbi tambel balaga ananinai. 31 MandaꞋana findiwana ma eaꞋ, mowalimana saket anama, akwahinai malamana klos maim ananimi mofaꞋana mafeꞋma mundana lawag usiꞋinai tuꞋwanainai.

Amam soldia maunda Jisas lawag usiꞋinai tuꞋwanainai

(Mk 15:21-32; Lu 23:26-43; Jo 19:17-27)

32 Amam mohafel mafeꞋ etin, mati anona aman Saimon Sairininai. EaꞋ amam soldia masapaꞋana ma niegiambama Jisas nofaꞋ lawag ananinai. 33 EaꞋ mafeꞋ mataga anagon agiliguma Golgota. ApeꞋ deiꞋ mambomefagel maꞋi, Pipitagel Balagaina. 34 EaꞋ maseꞋana anom embel wainim mambomom malomana anona marasin numbutinai neaꞋ embel mohagofa ekep pehana. Anan nameꞋ embel etin, nandaiwaꞋmam. 35 Amam maundana lawag usiꞋinai tuꞋwanainai eaꞋ, mandaꞋ satu ma luwaguf maim ananimi ma emi nikilaꞋ nefaꞋam mondondam atona etin. 36 EaꞋ amam tol mape anama mumafiana. 37 EaꞋ mandaꞋ anom basef mail lawag anama ilifunama felefeleꞋma balaga ananinai. Basef amama sandaꞋ kotami Pailat nandaꞋami maiꞋam naꞋama maꞋi, “AMAN ANAMA ANAN JISAS, DEMBINAI ESIS JUDAI.”

38 FelefeleꞋma Jisas naila amam soldia maunda anom biam mandaꞋ waf aonai mandaꞋ wali. Amam maunda Jisas nail laꞋafen, eaꞋ maunda amam biam mail waꞋowaꞋol. 39 EaꞋ enis amam nematawa safeꞋ safiꞋi esis sandaꞋ salamala anan samboma balagah saꞋiam naꞋama 40 saꞋi, “IneꞋ ewi, ineꞋ netalona ipat anama luꞋunai Godi, ma netanima nefelana nimeguf wanom wapotiꞋ, deiꞋ nigiambama ineꞋ. IꞋi ineꞋ nogalomana Godi, nendatagah nisilaꞋi.”

41 EaꞋ amam pris dambami maloma amam mawalipasa miꞋuli Godi maloma amam agufumi esis Judai wapotiꞋ, hiami malomam mandaꞋana findiwana naꞋama etin siꞋi eses maꞋi, 42 “Anan nagiambama enis epes eaꞋ deiꞋ ina nagiambama anan, owaꞋ. Anan dembinai king esis Israeli! EaꞋ deiꞋ nondatagah lawag ilif nisilaꞋi ma apeꞋ motolona mombaleꞋefana. 43 Anan nembaleꞋefa God naꞋiam naꞋi, ‘AeꞋ nogalomana Godi.’ EaꞋ iꞋi God okom ninilana, anan nigiambamana.”

44 EaꞋ amam amama biam makowalefi saundam malumana mandaꞋana findiwana siꞋi amam agufumi maliꞋ mandaꞋmanam.

Jisas eaꞋ nagaꞋ

(Mk 15:33-41; Lu 23:44-49; Jo 19:28-30)

45 Aon nahagasom owamb luꞋunai nataga naofenia etap hiagoma esis Judai akotigin nape nafeꞋ nafeꞋ nataga aon nandamboma nape gani 3 klok wambomota. EaꞋ nataga howalagon wapotiꞋ.

46 FelefeleꞋma aon nandamboma 3 klok, Jisas noga naꞋi mehip naꞋi, “Eloi, Eloi, lema sabaktani?”

ApeꞋ mambomam maꞋiam naꞋama maꞋi,

“God aeꞋinai, God aeꞋinai, deiꞋ maina ineꞋ nakwahowe?”
47 EaꞋ enis epes saitu felefeleꞋ sameꞋ anan naꞋiam naꞋama saꞋi, “Anan nofala profet Elaija.”

48 EaꞋ deiꞋ atef anona aman nasagih nafeꞋ mehip nofaꞋ anom mosong mape naohi
Mosong mape naohi ofagema maꞋi boan otalef dindagimi. IꞋi enin epen nefeꞋ newala naoh nefaꞋami eaꞋ niwafiꞋama owaf neham, aleꞋum magal. IꞋi apeꞋ molam mowala embel, mowalom, mehip etin embel muwisam.
nalam mowala embel wainimi numbutimi nagiam nasapaꞋam anona elifita nandowana nafeꞋma Jisas neaꞋ embel. b, c, d, e, f 

49 EaꞋ enis saitu saꞋi, “AtaꞋ otaꞋ kwahowana, ma ataꞋ muti Elaija atuwasi nifiꞋi notagahona o owaꞋ?”

50 EaꞋ Jisas noga naꞋi mehip endilisi wapotiꞋ eaꞋ naꞋi aꞋe, eaꞋ ambal ananinai nandahiꞋ nafeꞋana.

51 EaꞋ lowaf anama luꞋunai siꞋi uta netaol ipat luꞋunai Godi nomon palalana gani ilif nowala etap nataga biefina. EaꞋ suwambon luꞋunai nakotoꞋ etap owah luꞋwami kokwaꞋalam. 52 EaꞋ anama sawa epes sagaꞋi hiꞋagilif mandawisiꞋ eaꞋ amam nematawa hiesi Godi fowaꞋ sagaꞋi sohafel wapotiꞋ. 53 Esis sokwaha hiꞋagilif amama sape. Nemaf anama Jisas nohafel wapotiꞋ esis sefeꞋ suwis Jerusalem, wambel buꞋunai God nandandepanai. EaꞋ epes hiesi satilis.

54 Kepten anama dembinai numafi soldia hiami naloma amam soldia mape mumafi Jisasi mati amamaga amama. Nogota anama mati amamaga mataga etap nasol etin napan, umbamaham endilisi maꞋi, “Endilisi, aman anama nogalomana Godi.”

55 Nematawa hiawai waila Jisasi wakwaha etap hiagoma Galili wafiꞋi wagiambamana awau waitu laogon watologon. 56 AnoꞋw Maria MakdalaiꞋwi. AnoꞋw agel atona Maria kola Jems naloma Josep. EaꞋ anoꞋw kola amam biam Sebedi batausana.

Amam masapaꞋ Jisas nawis owap luꞋunai nagal nawis nomon siꞋi ipat

(Mk 15:42-47; Lu 23:50-55; Jo 19:38-42)

57 EaꞋ wambomota felefeleꞋ ma owamb anona aman Arimateainai agilinama Josep nafiꞋi. Anan amamaga hiamunai anan alupunai naila Jisasi. 58 EaꞋ nafeꞋma Pailat nahaliꞋana ma nofaꞋi alop Jisasi nowana. EaꞋ Pailat naꞋipa amam soldia mehip ma Josep nofaꞋana moseꞋanana. 59 EaꞋ nofaꞋana lowaf namunai buꞋunai afitinai. 60 EaꞋ nowaꞋana nofaꞋana nafeꞋ nawis hiꞋagif ananinai dambainai, fowaꞋ nagwasana nawis anona owap luꞋunai. EaꞋ nasapaꞋana nawis nambeꞋana naꞋoh nomon. EaꞋ deiꞋ namboma anona owap luꞋunai nafeꞋ nowalo uta hiꞋagif anama. Anan nandaꞋam naꞋama eaꞋ nafeꞋ. 61 EaꞋ Maria MakdalaiꞋwi kwaloma anoꞋw awau agel atona, awau biawa wape waꞋol felefeleꞋ ma hiꞋagif watologon.

Amam soldia mumafi hiꞋagif

62 Ama wafilu nemaf sandandomba amamaga gwaꞋaimi maim anama nafeꞋma eaꞋ, amam pris dambami maloma amam Farisi mafeꞋ matagama Pailat. 63 EaꞋ maꞋipana maꞋi, “Dembinai, afaꞋ ukup mapoma anom basef aman anama nambasoꞋami naꞋiami fowaꞋ anan ataꞋ nape. Anan naꞋiam naꞋama naꞋi, ‘Nimeguf wanom mefeꞋma hiꞋilam, aeꞋ etanima ehafel wapotiꞋ.’ 64 Amama atom deiꞋ ineꞋ niꞋipa anom soldia mumafi hiꞋagif anama andeandeꞋma nimeguf wanom mefeꞋ hiꞋilam. NaꞋama amam alupumi ananimi mifiꞋi mokoalopana mofaꞋana mefeꞋ miꞋipa esis amam nematawa miꞋi, ‘Anan notanima nehafel hiꞋagif wapotiꞋ.’ EaꞋ basoꞋam anama deiꞋinai luꞋuna nikilaꞋ naliꞋi.”

65 EaꞋ Pailat naꞋipam naꞋi, “IpeꞋ peꞋwa anom soldia pefeꞋ pewalo uta hiꞋagif anama laꞋifina, siꞋi ukup ipeꞋimi maꞋiam dendeꞋma gawa ipeꞋinai.”

66 EaꞋ amam mafeꞋ mowalowa hiꞋagif anama laꞋifina, eaꞋ mosaoꞋma uta masaheꞋana mandaꞋ anona ikwaf laꞋifinai ma epes ina sinigaꞋana siowis. EaꞋ maꞋipa anom soldia mape mumafiagon.

Copyright information for `AOJFILIFITA