Matthew 6

Waf ipeꞋ pigiambama enis epes kwahusi

IpeꞋ pindumafuma andeandeꞋ. Ina pendaꞋ waf buꞋunai ipeꞋinai ma naep esis epesi ma seatilipa, ma sieꞋi ipeꞋ epes buꞋwipei ma seafela agof ipeꞋimi, owaꞋ. IꞋi ipeꞋ pendaꞋam naꞋama, ipeꞋ ina anona nemaf pefaꞋ anom amamaga buꞋwami ma Ahalomepa God nape heveni, owaꞋ. IꞋi ipeꞋ piꞋi pigiambama enis epes isima kwahusi, ipeꞋ ineꞋ piꞋipa enis epes, owaꞋ. IpeꞋ ina pendaꞋam siꞋi waf anama amam mambasoꞋas maꞋi malogof biami mofapula alelefi batagw maꞋipas saliꞋ, owaꞋ. Amam mandaꞋam ifagw esis Juda saꞋi basef sapeimi, anama eaf dawalegefa naep epesi seati amam sefela agof amamumi luꞋum. OwaꞋ, hapaimi. AeꞋ aꞋipipa endilisi, Epes isima safela agof amamumi eaꞋ maꞋum amama atom. IꞋi ipeꞋ pigiambama epes isima naꞋamai kwahusi, ipeꞋ pembahoꞋas pendaꞋas naꞋama. Lagel waꞋana nandaꞋami, lagel waꞋana ina nogawam, owaꞋetin. IpeꞋ pembahoꞋam pendaꞋam. Ama Ahalomepa ipeꞋinai nati amamaga amama mape mandambahiꞋi eaꞋ anan atona nambimb nogwamepam ipeꞋ.

Waf ipeꞋ pilana pendaꞋ beten

(Lu 11:2-4)

Maina nemaf ipeꞋ pendaꞋ beten, ipeꞋ ina pendaꞋam siꞋi waf anama amam amama mambasoꞋami maꞋi malogof biam mandaꞋanai, ma mietu etin nomon ifagw esis Juda saꞋi basef sapeimi o eaf luꞋunai dawalegef, ama epes seatolom, owaꞋ. AeꞋ aꞋipipa endilisi amam anona nemaf God ina nogwamama amam amamaga buꞋwami ma waf anama, owaꞋetin. Epes isima satolom eaꞋ maꞋum amama atom.

Nogota anama ipeꞋ piꞋi pendaꞋ beten, piwis ifagw nomon pewalo utagw eaꞋ pendaꞋ betena God Ahalomepa ipeꞋinai, anan nape anama nandambahoꞋma. Anan nati amamaga mape sandambahiꞋi ma nambimb neagwamipei beten. Afama ipeꞋ pendaꞋ beten, ipeꞋ ina pendaꞋ beten piꞋi basef loumi atom siꞋi epes isima sololama Godi sandaꞋam, owaꞋ. Esis saꞋi sondaꞋ beten launai ma nambimb God neameꞋas. OwaꞋetin, God ina nameꞋas. IpeꞋ ina pila waf asasinai, hapainai. Ahalomepa God nape ilif nogawa eaꞋ ma amamaga aꞋipei. Nogota anama ipeꞋ ataꞋ owaꞋ pihaliꞋanama, anan nagawam eaꞋ.

IpeꞋ pendaꞋ beten naꞋama piꞋi,

‘Ahalomapa apeꞋinai nape heven ilif, apeꞋ maꞋi agel ineꞋinai nope boꞋona andeandeꞋ ma hiesi seafela agel ineꞋinai luꞋuna.
10 ApeꞋ maꞋi nemaf anama buꞋunai nifiꞋi ma epes hiesi siowis kingdom ineꞋinai. Waf buꞋunai esis ineꞋisi sailana heven, apeꞋ maꞋi milana etap anaeꞋ wapotiꞋ naꞋama etin. 11 DeiꞋ ineꞋ neseꞋapa gwaꞋaimi mondahama nemaf anaeꞋ. 12 IneꞋ nekwahomapa waf aonai apeꞋ mandaꞋanai siꞋi apeꞋ makwahomasa waf aonai enis epes sandaꞋmapanai. 13 IneꞋ owaꞋ niliꞋapa mefeꞋma amamaga ahifimi meagwamba apeꞋi. Hapaimi. Netagahipa ma epen aonai.’ ” [Wambel ineꞋinai noloma pepel ineꞋinai noloma nafifili ineꞋinai, amama ineꞋimi atom laꞋelaꞋef hihif. Endilisi.]

14 EaꞋ Jisas naꞋipam wapotiꞋ naꞋi, “IꞋi ipeꞋ pekwahomasa waf aonai enis epes sandaꞋmepanai, ma Ahalomepa nape heveni nekwahomepa waf aonai ipeꞋ pandaꞋanai wapotiꞋ. 15 IꞋi ipeꞋ owaꞋ pekwahomasa waf aonai enis epes sandaꞋmepanai, Ahalomepa nape heven ina nekwahomepa waf aonai ipeꞋ pandaꞋanai wapotiꞋ, owaꞋetin.

Basef amama ma anom nimeguf sokwaha gwaꞋaimi ma seandaꞋ beten

16 Maim nimeguf ipeꞋ pekwaha gwaꞋaimi, ina pendaꞋam siꞋi amam amama mambasoꞋmami maꞋi malogof biami mandaꞋami ma mandaꞋ amagah amamumi awasim, owaꞋ. Amam mandaꞋ amagah aom naꞋama ma epes satolom sogawa saꞋi amam mokwaha gwaꞋaimi. AeꞋ aꞋipipa endilisi amam mofaꞋam eaꞋ amamaga amama ma danifel amamunai. Epes isima sati waf anama amamunai, eaꞋ maꞋum amama atom. 17 Maina nemaf ipeꞋ pekwaha gwaꞋaimi ma pendaꞋ betena God, ipeꞋ pesaꞋopa amagah pendaꞋ wel pindisa balagah ipeꞋimi. 18 Ama enis epes ina sogawa ipeꞋ pakwaha gwaꞋaimi, owaꞋ. PendaꞋam naꞋama ma Ahalomepa nape nandambahiꞋi anan atona nogawepa. Anan nati amamaga mape mandambahiꞋi, ma nambimb neagwamipei beten.

Amamaga buꞋwami netamam nimbeꞋam otaga ilif

(Lu 12:33-34)

19 IpeꞋ ina petama amamaga buꞋwami atom ipeꞋimi pewaꞋaniam etap anaeꞋ, owaꞋ. Enis sakowalefi sapisila ifagw sawis sakowalopam, sopafowa motopaꞋam mondaꞋam aom, waimba nasagiham. 20 DeiꞋ aeꞋ aꞋipipa pewaꞋania amamaga buꞋwami ipeꞋimi moꞋomepa gani heven ilif. Anama bamagufi sopafowa ina mototopaꞋam eaꞋ waimba ina nasagiham, owaꞋetin endilisi. EaꞋ sakowalefi ina suwis sokowalopam, owaꞋ. 21 Maina wambel amamaga buꞋwami ipeꞋimi maꞋoma, eaꞋ wambel anama atona anona nemaf ukup ipeꞋimi wapotiꞋ meapoma.

Alop siꞋina howalana

(Lu 11:34-36)

22 Naep nomon ukup ipeꞋipi siꞋi lama alop siꞋina ipeꞋinai. IꞋi ukup ipeꞋimi boꞋom mope, eaꞋ alop siꞋina ipeꞋinai howalana. 23 IꞋi ukup ipeꞋimi aom, nambimb alop ipeꞋinai akutina hiꞋilana. EaꞋ naꞋama etin, iꞋi lam amama mape ukup ipeꞋimi nomon akutim, anona nemaf owamb anama eaꞋ luꞋuna endilisi.

Enin epen ina nandaꞋ maol andeandeꞋma amam agufumi biam, owaꞋ.

(Lu 16:13)

24 Ina enin epen laꞋifina nandaꞋ maol nihapila maol biefina amam dambami biam, owaꞋetin. NaꞋama okom nila anona, anona nesambalona. EaꞋ anan nemeꞋ basefa anona, anona nowaꞋ alafugahana. EaꞋ naꞋama etin, ipeꞋ ina laꞋifipa pepe owina God noloma wiga hianai moni hianai, owaꞋetin.

Ukup iwanim nomonas matamea hiahias

(Lu 12:22-31)

25 EaꞋ aeꞋ aꞋipipa aꞋi ipeꞋ ina ukup matamea hiahiama ambagof ipeꞋimi piꞋi, ‘ApeꞋ ataꞋ meaꞋ main? EaꞋ meaꞋ embel maim?’ OwaꞋ. IpeꞋ ina ukup motamea ma alop ipeꞋinai piꞋi, nambimb apeꞋ mondaꞋ main mombahoꞋ alop apeꞋinai? Ambagof afaꞋimi ina gwaꞋaimi atom. EaꞋ alop ina luwaguf atom, owaꞋ. 26 IpeꞋ ukup mopoma amiguf. Amiguf ina mandaꞋ aof mawa gwaꞋaimi maim, owaꞋ. Amiguf amam ifagw owaꞋetina mowaꞋani gwaꞋaimi moꞋoh, eaꞋ mowaꞋaniam mofaꞋam maꞋoh ifagw gwaꞋaimi emi, owaꞋetin. EaꞋ Ahalomepa ipeꞋinai nape heveni, anan naseꞋam gwaꞋaimi. EaꞋ ipeꞋ epes pikilaꞋ amiguf amama endilisi. 27 IpeꞋ nambimb emi laꞋifina nomonas notanea nawis niwatania anona nemaf wapotiꞋ ma ambal ananinai nope nogota laona wapotiꞋ? OwaꞋetin. 28 DeiꞋ maina nomonas ipeꞋimi matamea safeꞋ endilisi ma luwaguf maim? IpeꞋ ataꞋ ukup mopoma afis main salo andeꞋ. Esis sataga salo luꞋwis saꞋimama? Esis ina sandaꞋ maol, ina sandaꞋ luwaguf maim, owaꞋetin. 29 DeiꞋ aeꞋ aꞋipipa fowaꞋ gani anona aman amamaga hiamunai Solomon nandaꞋ sosaf hianai ma luwaguf ananimi, eaꞋ sosaf ananinai ina boꞋona siꞋi afis amama, owaꞋetin. 30 AꞋe, otalef amama deiꞋ ataꞋ malo aof ama naman etef sotopaꞋam sokwahom mefeꞋ nif. Otalef amama awami God nofaloꞋmam. EaꞋ ipeꞋ amam nematawa pikilaꞋ otalef amama. EaꞋ deiꞋ ipeꞋ pembaleꞋefa basef Godi, baleꞋef ipeꞋinai ina laꞋifina, pegawa endilisi anan numafipa wapotiꞋ. 31 EaꞋ ipeꞋ ina ukup motamea hihif endilisi piꞋi, ‘Nambimb apeꞋ meaꞋ main? MeaꞋ embel eti? MondaꞋ luwaguf eti?’ NaꞋama owaꞋ. 32 Epes sape etapi sololama Godi ukup matamea mafeꞋ endilisi ma sogolopam amamaga amama hiami. EaꞋ Ahalomepa ipeꞋinai nape heveni anan nogawa eaꞋ amamaga amama aꞋipei. 33 IpeꞋ ataꞋ ukup miliꞋ pegolopa waf buꞋunai noloma piwis kingdom Ananinai piliꞋ, neseꞋepa amamaga amama ipeꞋ wapotiꞋ. 34 EaꞋ ipeꞋ ina nomonas mopoma amamaga meataga naman, owaꞋ. Nemaf namanifi fendapoma naman atef, ama amamaga amama meataga naman. Amamaga nimanimi matagama nimeguf deindei mandahama nimeguf atona etin. IpeꞋ ine ukup motamea mefeꞋ, owaꞋ.

Copyright information for `AOJFILIFITA