Revelation of John 10

Anona ensel naseꞋana buk Jon nagwaꞋana

Amama hiꞋalam, ati anona ensel laꞋifinai nisilaꞋi heven. Anan nandambahoꞋ elagw eaꞋ elelina naloma balaga ananinai. Amaga ananinai nafifil howalagon endilisi siꞋi aon alipunai nalatawi eaꞋ boꞋwagah ananimi siꞋi nif fandom malata ilif. Anan nahapila anona buk soꞋunai lagof ananimi, nandauf naꞋoh. Anan nawamona boꞋwaga ananinai daꞋisinai natoma naoh eaꞋ aonai nahaponana etap wataꞋita. EaꞋ nogal naꞋi mehip endilisi siꞋi mafin luꞋunai laion nandaꞋam. NandaꞋam naꞋama ma eaꞋ, otaga dilili bugwalag 7-peleif. MaꞋi siꞋi anona malogel naꞋi. Otaga dilili bugwalagw 7-peleif maꞋi basef eaꞋ, aꞋi endaꞋ anom basefa amama, eaꞋ ameꞋ anona malogel naꞋi nataga heven naꞋi, “Basef amama otaga dilili bugwalagw 7-peleif, amama ineꞋ nembahoꞋwam mope okom ineꞋinai atona. Ina nendaꞋam mil buk, owaꞋ.”

EaꞋ ensel anama aliꞋ atolona naitu naoh maloma etap wataꞋitai anan nasaꞋma lagel daꞋisinai nalata. EaꞋ naꞋiam endilisi gani ilifa agel Godi nape namunai laꞋelaꞋef hihif. Anan nandaꞋ ilif naloma etap naloma amamaga hiami ambagof mapaimi maloma amama ambagof aꞋami mape ilif etapi maloma naoh embel luꞋwami maloma amamaga amama hiami mape naoh owin wapotiꞋ.

EaꞋ ensel anama naꞋi, “Nogota mape mohafanai deiꞋ hiꞋalana.
Nemaf anama ensel anama nafeꞋma 7i niꞋi nufapula biugel ananinai, amamaga amama God nambaheꞋami motaga alihim. God felefeleꞋ nondaꞋam endilisi siꞋi basef fowaꞋ naseꞋamam amam profet mandaꞋ opeh ananimi.”

EaꞋ malogel fowaꞋ ameꞋana heveni naꞋipi wapotiꞋ naꞋama naꞋi, “IneꞋ foꞋo faꞋai buk anama nandauf nape lagel ensel naitu naoh maloma etapi.”

EaꞋ afeꞋma ensel anama aꞋipana aꞋi, “IneꞋ seꞋe buk anama soꞋunai.”

EaꞋ naꞋipi naꞋi, “IneꞋ faꞋana neaꞋana. Anan atuwasi usihina siꞋi aupimbel malogel ineꞋinai, eaꞋ opaf ineꞋinai numbutina.”

10 Anan naꞋiam eaꞋ, afela buk anama soꞋunai lagel enseli agwaꞋana. EaꞋ malogel aeꞋanai usihina siꞋi aupimbel hani. AgwaꞋana ameꞋ numbutina opaf aeꞋanai.

11 EaꞋ ameꞋ anom basef saꞋipi saꞋi, “IneꞋ newalapa basef Godi wapotiꞋ ma amamaga nambimb motagama epes amam nematawa alop naninani hianai ma diga anama hianai naninani ma amam king dembemi hiami wapotiꞋ.”

Copyright information for `AOJFILIFITA