Revelation of John 15

Ensel 7-peleim mahapila amamaga awami endilisi mandandam

Ati anom amamaga laifimi matagai heven eaꞋ okom natanea ma amama. Ati ensel 7-peleim mape eaꞋ amam mahapila amamaga awami endilisi mandandama epes. IꞋi anona nemaf amamaga amama awami hiꞋilam, ina ataꞋ anom motaga wapotiꞋ, owaꞋ. DeiꞋ main, amamaga amama awami 7-peleim, amama okom wandafunai Godi eaꞋ hiꞋilana endilisi. EaꞋ ati anom amamaga siꞋi naoh embel luꞋwami mandati siꞋi glas amama sandaꞋam maloma nif. Epes isima saitu laꞋifis saliꞋamona wandafa waf aonai sahagofa mafin anama luꞋunai nape aolupi naloma ambal ananinai maloma ikwaf ananinai 666, esis saitu naoh amama daꞋmalifima siꞋi glas. God naseꞋas anom musik siꞋi gita sahapilam. Esis sandaꞋ awaf Moses nandaꞋmana opeh Godi naloma awaf sipsip noganai. Awaf anama naꞋama.

“Dembinai, ineꞋ God pepel hianainai. Opeh hiami ineꞋ nandaꞋami, amama laꞋifimi eaꞋ afaꞋ watolom ukup matameamam hiahiam! IneꞋ king numafi epes hiesi eaꞋ waf ineꞋinai boꞋona endilisinai hiꞋalana!
Dembinai, ineꞋ etina nape boꞋwena. DeiꞋ emi egafis owaꞋ umbamahasa ineꞋ? OwaꞋetin. Hiesi umbamahasa ineꞋ sandaꞋ lotu ma ineꞋ etina. Emi egafis owaꞋ sefela agel ineꞋinai? OwaꞋetin. Epes wambotagw hiami ma etap hiagoma anona nemaf sifiꞋi sondaꞋ lotu ma ineꞋ etina. DeiꞋ main, waf buꞋunai ineꞋinai nataga alihiguma nandawalap.”
Amama mafeꞋma eaꞋ, atologon wapotiꞋ ati ipat buꞋunai Godi notawa gani heven. Ipat anama nagal alihina ati nomon ipat anama nape sandaꞋ sel sandaꞋanai God napeinai. EaꞋ ensel amama 7-peleim mahapila amamaga awami endilisi mandandam nohambamboga epes, makwaha ipat anama mawisi andeꞋ. EaꞋ mowahoꞋ luwaguf afitimi buꞋwami endilisi howalagon mafifil endilisi. MowahoꞋ legw siꞋi goli managam mefetagw amamumi. EaꞋ anona laꞋafena amam biamibiam mape namumi naseꞋama dis luꞋwami 7-peleim sandaꞋ gol sandaꞋami mandandama amam ensel atona etin. God nape namunai laꞋelaꞋef okom wandafunai ananinai nape siꞋinama dis amama 7-peleim. EaꞋ nogoh amama mataga mafifili ma pepel Godi, amama siꞋima ipat anama Godi. EaꞋ ina enin epen laꞋifina nefeꞋ nuwis ipat anama nomon, owaꞋ. Esis sape sohafa ensel 7-peleim mondaꞋ opeh hiꞋilam amamaga amama awami mahapilam mandandami ataꞋ miliꞋ.

Copyright information for `AOJFILIFITA