Revelation of John 16

Dis 7-peleim okom Godi wandafunai napaim

AmeꞋ anona malogel naꞋi natagai mehip ipat luꞋunai Godi nomon. Malogel anama naꞋi nofala ensel amama 7-peleim naꞋi, “IpeꞋ pefeꞋ pekoloꞋwa dis amama 7-peleim okom wandafunai Godi napaimi ma koloꞋolam mofeꞋ etap.”

EaꞋ ensel naliꞋi anama nafeꞋ nakoloꞋwa dis amama ananimi mafeꞋ etap eaꞋ maselis mamumami luꞋwami endilisi mataga etap epes isima ikwaf anama mafin aolupunai nailas ma epes isima sandaꞋ lotuma ambal ananinai.

EaꞋ ensel anama nafeꞋma bifi wapotiꞋ nafeꞋ nakoloꞋwa dis ananimi embel naoh luꞋwami. EaꞋ naoh amama mandamboma mataga siꞋi esimbela epes hiesi sagaꞋi. EaꞋ amamaga mape nomon naohi magaꞋ hiꞋalam.

EaꞋ ensel anama nafeꞋma wenifi nakoloꞋwa dis ananimi embel walemb luꞋwami maloma anama embel motah mahagofowa. Embel amama hiami mandamboma mataga esimbel. EaꞋ ameꞋ ensel anama numafi embel naohi walemb hiami naꞋi, “IneꞋ buꞋwinai endilisi, nandaꞋ kot ineꞋinai andeandeꞋ naila ikwaf buꞋunai atona nawaloga esis sandaꞋ waf aonai. DeiꞋ main, esis amam nematawa hiesi saha amam nematawa buꞋwasi Godi ineꞋisi afis saloma profet ineꞋimi wapotiꞋ eaꞋ esimbel asasimi malo. EaꞋ deiꞋ naseꞋasa esimbel epes isima sandaꞋ waf aonai ma sogwaꞋ embel. IneꞋ nagwamasam mandahama waf aonai esis sandaꞋanai.”

EaꞋ ameꞋ anona maf nataga balata anama sondolalima Godanai noga naꞋi, “Endilisi Dembinai, ineꞋ God pepel hianai napainai. IneꞋ nowaloga epes ma kot eaꞋ kot ineꞋinai endilisi buꞋunai hiꞋalana.”

EaꞋ ensel anama nafeꞋma biamibiami nakoloꞋwa dis ananimi ma aon alipunai eaꞋ God nape nati owaf naofa epes nif. Nif amama luꞋwami nigisigeim endilisi ma epes isima. EaꞋ saꞋi basef findiwaimi awami ma God numafi amamaga amama awami. Esis ina samboma opalefa sakwaha waf aonai esis sandaꞋanai ma sefela agel Ananinai, owaꞋ.

10 EaꞋ ensel anama nafeꞋma wanom biami nakoloꞋwa dis ananimi balata kingi luꞋunai anama mafin aolupunai. EaꞋ owamb luꞋunai nataga anama mafin aolupunai nahopogoma. EaꞋ esis sail waf ananinai sofaꞋ nimanimi luꞋwami. EaꞋ sogwa afegah asasimi nalelef tilili talalaꞋ sondolaꞋwifa sofaꞋ nimanimi luꞋwami. 11 Esis ukup mapoma nimanimi maloma maselis asasimi, deiꞋ saꞋi basef awami findiwaimi ma God nape heveni. Ina samboma opalef sowaꞋ alafugaha waf anama aonai esis sandaꞋanai, owaꞋ.

12 EaꞋ ensel anama nafeꞋma wanom wanomi nakoloꞋwa dis ananimi walemb luꞋunai Yufretis. EaꞋ walemb embel mafaꞋ hiꞋalama mondondomba eaf amam king dembemi mufiꞋi anama aon natefima. 13 EaꞋ ati ambagof awami wanom mandati siꞋi kwahowa luꞋwami matagai malogel kwambon anama luꞋunai naloma malogel mafin anama aolupunai naloma malogel profet anama nambasoꞋami. 14 Ambagof amama awami endilisi mandaꞋ ikwaf pepel naninani ma esis sotolona sogawana. Amam mafeꞋma amam king dembemi mumafi epes hiesi sape wambel hiagomai. Amam maꞋi mokolasa amam atogon mondaꞋ wandaf nemaf anama luꞋunai ma God pepel hianai napainai.

15 “PemeꞋ! Anona nemaf aeꞋ etagamepa siꞋi sandaꞋ wali safiꞋi sataga. Atagamepa anona nemaf ipeꞋ owaꞋ pegawa piꞋi aeꞋ iefiꞋianai. IꞋi epes ukup matamea sope sowahoꞋ luwaguf asasimi andeandeꞋma owaꞋ soꞋoh, esis ina sofeꞋ alop atona wahifina solomas siti alop asasinai ambagof aom, owaꞋ. Isima sondanifel.”

16 EaꞋ ambagof awami makolasa king hiami anagon etap tuꞋwanina diga Hibrui saꞋi Armagedon.

17 Ensel anama nafeꞋma 7i nakoloꞋwa dis ananimi eaꞋ uf nofaꞋam. EaꞋ anona malogel naꞋi natagai balata king luꞋunai nomon ipat luꞋunai Godi naꞋi mehip naꞋi, “Amama deiꞋ eaꞋ hiꞋalam!”

18 EaꞋ otaga holala nafeꞋ, peleleꞋala nafeꞋ eaꞋ otaga dililu bugwalagw, sowambon luꞋunai nakotoꞋ. Sowambon anama anan luꞋunai endilisi ma nimeguf hiami epes sape etapi ina sameꞋ anona sowambon nakotoꞋ luꞋuna fowaꞋ siꞋi anama, owaꞋ. 19 Taun anama wambel luꞋunai nandawal wenifigin. EaꞋ wambel hiagoma etap hiagoma kantri awagon hiꞋalagon. EaꞋ God okom napoma epes sandaꞋ waf aonai sape taun anama luꞋwagoma Babilon, deiꞋ okom ananinai wandafuna nandaꞋ esis saꞋ embela kap wain nalami nahas kwapeteꞋas. Wain anama womun etina okom wandafunai Godi. 20 EaꞋ ailan hianai nafaꞋ nafeꞋ higilalana hiꞋalana eaꞋ ina ataꞋ anona halaf atotona nape, owaꞋ. 21 EaꞋ asaf ondowa luꞋwamunai siꞋi otamba ais afitimi mowai mahas. Asaf ondowa luꞋwamunai nimanimi endilisi siꞋi beg kopi luꞋunai atona etin. EaꞋ saꞋipana awagon God ma asaf ondowa luꞋwamunai mowai maha esis.

Copyright information for `AOJFILIFITA